Revised Kalenjin Bible (KAPR)
10

Meetap Saulo

101Ki pargei Philistiik ak Israel, ak ki mweiso piigap Israel eng' taitap Philistiik, ak ki kibarchi che chaang' tulweetap Gilboa. 2Ki oon `Philistiik Saulo ak weeriikyik koosup inne, ak ki par `Philistiik Jonathan, Abinadab, ak Malki-sua weeriigap Saulo. 3King'wanit pooryeet eng' Saulo, ak ki nam ineendet mwogik, ak kiguoten ineendet.

4Koleenji anyun Saulo chiito ne ki ipchin ineendet kariik, “Ng'usu rotweng'ung' po chok ak itoorena, si ma pwa pichooto chu ma kimuratan kochota.” Ago ma cham chiito ne ki ipchin kariik; amu ki iywei miising'. Konam anyun Saulo rotwennyi po chok, kong'at ak kobutyi. 5Kingo keer chiito ne ki ipchin ineendet kariik kole kagome Saulo, kobutyi agine rotwennyi po chok ak kome. 6Kome anyun Saulo ak weeriikyik somok; ak koonnyi tugul kibagenge. 7Kingo keer piik tugul che po Israel che ki mi atebweet kole, “Kagomwei lugeet ak ko kagome Saulo ak weeriikyik, kometo nganasookwak ak komwei. Ak ki pwa Philistiik komeny nganasochooto.”

8Ak ki eng' karon, ye kibwanei Philistiik kobutei piik che kiga kibar, konyoor Saulo ak weeriikyik ko kogobek eng' tulweetap Gilboa. 9Kibut tuguukyik, ak koip metinnyi, ak kariikyik, ak koyookto koba emetap Philistiik komoswek tugul koipchi logoiywek kanamonikwak, ak piik ak icheek. 10Ki inde kariikyik kootap kanamonikwak, ak kogartaat metinnyi eng' kootap Dagon. 11Kingo kas Jabes-gilead komugul kiit ne koyachi `Philistiik Saulo, 12kong'eetyo piik tugul che nyigoonen, ak koba koip poortap Saulo ak che po weeriikyik, ak koip kobwa Jabes. Kitup kawekwak eng' keetit keel eng' Jabes, ak korugutkei peetuusyek tisap.

13

10.13:
A.La 19.31; 20.6; 1Sam 13.8-14; 15.1-24; 20.6; 28.7-8
Ki me anyun Saulo amu chalwoktanyi ne ki ingelelji Kamuktaindet ne Toroor, ak amu ng'olyootap Kamuktaindet ne Toroor ne ma riip; ak amu kiteep ng'omnateet kogeny eng' ineendet ne kiboisyee oik, koteepse, 14ama teebee Kamuktaindet ne Toroor. Kobar anyun `Kamuktaindet ne Toroor ineendet ak kogoochi laitornatet Daudi weeriitap Jesse.

11

Koegu Daudi laitoryatap Israel

(2Sam 5:1-10)

111Ki iyumjigei anyun Israel tugul ole mi Daudi eng' Hebron ak koleenji, “Ki koweguk ak ko ki panyeeguk. 2Eng' peetuusyek che ki kosiirto, ye ki Laitoryat Saulo, ko ki inyee ne ki imaandoi Israel ak imutu koweek. Ak ki leenjin Kamuktaindet ne Toroor Kamuktaindeng'ung', ‘Ibae piikyuk Israel, ak iegu pounindennywa.’ ” 3Ki pwa anyun poisyek tugul che po Israel ole mi laitoryat eng' Hebron, ak ki iyomiskei Daudi ak icheek eng' Hebron eng' taitap Kamuktaindet ne Toroor, ak ki iil Daudi koek laitoryat eng' Israel, ko uu ng'olyootap Kamuktaindet ne Toroor ne ki mwa eng' Samuel.

4

11.4:
Jos 15.63; Kirw 1.21
Ki wo Daudi kobooto Israel tugul Jerusalem (nooto ko Jebus). Ki mi olooto Jebusik che ki menyei emonooto. 5Ak ki leenji piik che ki menyei Jebus Daudi, “Menyone oli.” Ago ki nam Daudi irimeet ne po Zion, nooto ko nganaseetap Daudi. 6Ki le Daudi, “Chiito age tugul ne sip kobarei Jebusik koegu ne oo ak koek kiptaiyat.” Ak kisip kwo kotogosta Joab weeriitap Zeruiah, ak ki kiyai koek ne oo. 7Ki meny Daudi irimeet, ak ki kiguure anyun nganaseetap Daudi. 8Ki teech anyun komuut nganaseet, kobooch Milo koyiem, ak koteech Joab kogetyi ole kiga kobutok eng' nganaseet ne kiga ng'et. 9Ak kieet Daudi kotesak, amu ki mi Kamuktaindet ne Toroor ne po lugoosyek kobooto ineendet.

Piik nyigoonik che po Daudi

(2Sam 23:8-39)

10Chu ko che eecheen che po piik che kiimeen che ki tinyei Daudi che ki took kogimegitu kobooto ineendet eng' laitornatennyi, kobooto Israel tugul, si koyai ineendet koek laitoryat, ko uu ng'olyootap Kamuktaindet ne Toroor agobo Israel.

11Ak ni ko koitetap murenik che kiimeen che ki tinyei Daudi: Jasobeam, weeriitap Hakmonindet, ne oo ne po piik sosom; ki nam ng'otinnyi ak kobar pogol somok, tugul kibagenge. 12Ne kirubei ineendet ko ki Eleazar, weeriitap Dodo, Ahoindet ne ki agenge ak murenik somok che ki kiimeen. 13Ki mi ak Daudi eng' Pas-damim, ak kiga iyumgei eng' yooto Philistiik koyai lugeet, eng' ole ki mi mbareet ne ki mi sairik che chaang', ak ki mwei piik eng' taitap Philistiik. 14Ak kitononso eng' kwenutap mbaranooto. Koet anyun mbaranooto ak kobar Philistiik, ak ki sar `Kamuktaindet ne Toroor icheek eng' katerteeret ne oo.

15Ki choortagei somogu eng' che eecheen sosom, koba ole mi Daudi eng' rwandet, kot koit kebeneetap Adulam, ak kiga teech lugeetap Philistiik eng' atebweetap Repaim. 16Ak kimi Daudi eng' peetuunooto irimeet, ak kimi agine lugeetap Philistiik Bethlehem. 17Ki am melelda Daudi, ak ki le, “Eiye, inaga ng'oo peegap keriingetap Bethlehem ne neegitee ormariichet, aee!” 18Ara kichut lugeetap Philistiik murenjoto nyigoonen somogu, koba koram peek eng' keriingetap Bethlehem, ne ki mi ye neegitee ormariichet, ak koipchi Daudi. Ago ma cham Daudi koe, kitumda eng' taitap Kamuktaindet ne Toroor, 19ak ki le, “Ingoetena Kamuktaindennyu, si ma yai kii! Tos aee korotiigap pichu koinde saboonwekwak ng'oiyondit?” Amu kaip peechu eng' kandaet ne kainde saboonwekwak ng'oiyondit. Ara ma cham anyun koe amu nooto. Ki yai tuguuchuuto pichooto kiimeen somogu.

20Ki ne oo Abisai ng'eetap kametap Joab eng' pichooto somok. Ki nam ng'otinnyi ak kobar piik pogol somok, ak ki took kainennyi kobooto pichooto somok. 21Eng' pichooto somok ko ki konyitot Abisai kosiir chuun aeng', ak ki kiyai koek kiptaiyannywa, nganda ma ityi che po tai somok.

22Ki par Benaiah, weeriitap Jehoiada, weeriitap chiito ne nyigan ne po Kabseel, ne kiga koyai poisyonik che eecheen, weeriik aeng' che po Ariel ne po Moab. Ki choortagei agine kwo kobar ng'etundo eng' kwenutap keriinget eng' peetuusyegap teluji. 23Ak ki par Misirindet, chiito ne kooi kot, ne po mitainik aeng' koindonyi. Nganda kimi eutap misirindonooto ng'otit ne uu keetit ne taachin usiisyek chiito ne nabisyei, ko ki choortagei ole mi ineendet kotinyei kirokto ak korep ng'otit eng' eutap Misirindet ak kobare ineendet ng'otinnyi. 24Ki yai tuguuchuuto Benaiah weeriitap Jehoiada, ak ki took kainennyi kobooto pichooto somok ki kiimeen. 25Ki konyitot ineendet kosiir pichooto somok, ago ma ityi che po tai somok. Ak ki inde Daudi ineendet koboi riibiikyik.

26Piik che kiimeen che po lugoosyek ko ki: Asahel ng'eetap kametap Joab, Elanan weeriitap Dodo ne po Bethlehem, 27Samot Harorindet, Heles Pelonindet, 28Ira weeriitap Ikes Tekoindet, Abiezer Anatotindet, 29Sibekai Husatindet, Ilai Ahoindet, 30Maarai Netopatindet, Heled weeriitap Baanah Netopatindet, 31Itai weeriitap Ribai ne po Gibea ne po lagogap Benjamin, Benaiah Piratonindet, 32Hurai ne po kereruusyegap Gaas, Abiel Arbatindet, 33Asmabet Baharumindet, Eliaba Saalbonindet, 34weeriigap Hasem Gisonindet, Jonathan weeriitap Sage Hararindet, 35Aiam weeriitap Sakar Hararindet, Elipal weeriitap Ur, 36Hepher Mekeratindet, Ahija Pelonindet, 37Hesro Karmelindet, Naarai weeriitap Esbai, 38Joel ng'eetap kametap Nathan, Mibar weeriitap Hagri, 39Selek Amonindet, Naarai Berotindet, chiito ne ki ipchin kariik Joab weeriitap Zeruiah, 40Ira Itrindet, Garib Itrindet, 41Uriah Hitindet, Sabad weeriitap Alai, 42Adina weeriitap Shisha Reubenindet, ne oo ne po piigap Reuben, ak piik sosom che ki mi kobooto ineendet, 43Hanan weeriitap Maaka, Josapat Mitnindet, 44Uzziah Asteratindet, Shammah ak Jeiel weeriigap Hotam Aroerindet, 45Jediael weeriitap Shimri, Joha ng'eetap kamet, Tisiindet, 46Eliel Maabindet, Jeribai, Josabia, weeriigap Elnaam, Itma Moabindet, 47Eliel, Obed ak Jaasyel Mesobaindet.

12

Toretigap Daudi

121Chu ko che ki pwa ole mi Daudi eng' Ziklag, ye kita kounyegei amu Saulo weeriitap Kish. Ki pooto piik che kiimeen che ki toretikyik eng' lugeet. 2Ki tinyei kwangok ak ki imuuchi koboisyee eutap tai ak murot kaataam eng' wiirtaetap koik eng' porowet ak eng' mwoktoetap kipchabonik eng' kwangok; ki po tupchosyegap Saulo ne po Benjamin. 3Ne oo ko ki Aieser, korup Joash, weeriigap Semaa Gibeatindet; Jesyel ak Phelet, weeriigap Asmabet; kobooto Beraka, ak Jehu Anatotindet, 4ak Ismaia Gibeonindet, chiito ne kiim eng' pichooto sosom, ne ki pou pichooto sosom; Jeremiah, Jahasyel, Johanan, Josabad Gederatindet, 5Elusai, Jerimoth, Bealia, Semaria, Shepatiah Harupindet; 6Elkanah, Isia, Asarel, Joeser, ak Jasobeam, Koraik; 7ak Joela ak Sebadia weeriigap Jeroham ne po Gedor.

8Ki itabaangei che po piigap Gad koba ole mi Daudi eng' irimeet eng' surkwen. Ki murenik che kiimeen che nyigoonen, che ki kineet, piik che ki imuuchi konam long'onik ak ng'otwek. Ki uu togoochikwak togoochigap ng'etuunyik ak kichepcheben ko uu cheptirgichik che mi tuloonook. 9Ki ne oo Eser, ne po aeng' ko Obadiah, ne po somok ko Eliap, 10ne po ang'wan ko Mismana, ne po muut ko Jeremiah, 11ne po lo ko Atai, ne po tisap ko Eliel, 12ne po sisiit ko Johanan, ne po sogool ko Elsabad, 13ne po taman ko Jeremiah, ne po taman ak agenge ko Makbanai. 14Chuuto po weeriigap Gad ko ki kiptainigap lugeet; ne ki ming'in eng' icheek ko ki imuuchi koterteer piik pogol, ak ne ki oo eng' icheek ko ki imuuchi koterteer piik eliphuut. 15Chu ko icheek che kiga landa eng' Jordan eng' arawet ne po tai, ye kiga nyi peek kot koba timiin eng' ngeguusyekyik tugul, koba koon piik tugul che ki po atebwosyek, koba kong'asiis ak cherongo.

Kasubik che punu Benjamen ak Judah

16Ki pwa che po lagogap Benjamin ak che po Judah irimeet ole kimi Daudi. 17Ki manda Daudi kotorookta icheek ak komwachi icheek koleenji, “Ngot obwonjino eng' kaalyeet otoreta, konamegei muguleldanyu ak okweek. Ago ngot ko kobwane ong'wekyino puunikyuk, ago ma mi yaityet eunekyuk, ko ingogeer Kiptaiyat Kamuktaindetap kwanisyekyok kioto ak koger kong'.” 18Konyonji anyun `Kabuuset ne Tiliil Amashai, ne ki ne oo eng' pichooto sosom, ak kole:

“Ki cheguuk, Daudi!

Ki mi komostang'ung', inyee weeriitap Jesse!

Mi kaalyeet, ingotep kaalyeet kobooten,

ak ingotep kaalyeet kobooto toretiguk,

amu toretin Kamuktaindeng'ung'.”

Kotaach anyun `Daudi icheek, ak koyai koek kiptainigap kweanet.

19Ki pa ole kimi Daudi ak icheek alak che po Manasseh, ye kingo pwa kobooto Philistiik kobookyin Saulo, ago ma toret pichooto icheeget. (Amu ki irwooch kiptainigap Philistiik si koon ineendet kole “Tuun pagaachech ak kwo konamgei ak Saulo kiptaiyandennyi, si koek ng'oiyonditap saboonwekyok.”) 20Ye kiwendi Ziklag, kobwa ole mi ineendet che po Manasseh, Adna, Josabad, Jediael, Mikael, Josabad, Elihu ak Siletai, kiptainigap eliphuusyek che ki po Manasseh. 21Ak kitoret Daudi kobargei ak kweanaigap piik che ki iboktooti, amu tugul ko ki piik che kiimeen, che nyigoonen ak ko ki kiptainigap lugeet. 22Amu kibwanei peetuut age tugul kotoreti Daudi, kot koek lugeet ne oo, ne uu lugeetap Kamuktaindet.

Koitetap lugeetap Daudi

23Chu ko koitetap kandoigap icheek che kiga ilaach kariik che kiyae lugeet, che kiga pwa ole mi Daudi eng' Hebron, kogoochi ineendet laitornatetap Saulo, ko uu ng'olyootap Kamuktaindet ne Toroor. 24Lagogap Judah che ki tinyei long'onik ak ng'otwek ko ki eliphuusyek lo ak pogol sisiit, che kiga ilaach kariik si koyae lugeet. 25Che po lagogap Simion, che kiimeen che nyigoonen che po lugeet ko ki eliphuusyek tisap ak pogol agenge. 26Che po lagogap Lawi ko ki eliphuusyek ang'wan ak pogol lo. 27Ak ki kandoindet Jehoiada ne po kootap Aron, ak ki mi kobooto ineendet `piik eliphuusyek somogu ak pogol tisap, 28ak Zadok, neraneet ne ki kiim ak ko nyigan, ak kiptainik tiptem ak aeng' che po kootap kwandanyi. 29Che po lagogap Benjamin, tupchosyegap Saulo ko ki eliphuusyek somok, amu kita konamegei kebeberta ne oo ne po pichooto ak kootap Saulo agoi peetuunooto. 30Che po lagogap Ephraim, ko ki piik eliphuusyek tiptem ak sisiit, che kiimeen che nyigoonen, piik che taagunotiin eng' kooriigap kwanisyekwak. 31Che po kebebertap pororyetap Manasseh, ko ki eliphuusyek taman ak sisiit che kiga kimwa eng' kainaik, si kobwa koyai Daudi koek laitoryat. 32Che po lagogap Issakar, che ki iguitos agobo peetuusyek, che ki ingen kiit ne kanyool koyai Israel ko ki pogol aeng' kandoikwak, ak kigase iit icheek tupchosyekwak tugul. 33Che po Zebulun, ko ki ek eliphuusyek konom che ki imuuchi komanda koba lugeet, che ingen koborisye kariik alak tugul che po lugeet, che ki imuuchi kong'at lugeet, ak ki tinyei muguleldo ne pekyinot. 34Che po Naphtali, ko ki kiptainik eliphuut agenge, ak ki mi kobooto icheeget, piik eliphuusyek sosomu ak tisap che ki tinyei long'onik ak ng'otwek. 35Che po Danik, che ki imuuchi kotet lugeet, ko ki eliphuusyek tiptem ak sisiit ak pogol lo. 36Che po Asher, che ki imuuchi komanda koba lugeet, che ki imuuchi kotet lugeet, ko ki eliphuusyek artam. 37Ak eng' pitoniin eng' Jordan, ne po piigap Reuben, piigap Gad ak ne po kebebertap pororyetap Manasseh, che ki tinyei kariik alak tugul che po pooryeet che yaei lugeet, ko ki mi piik eliphuusyek pogolu agenge ak tiptem.

38Ki pwa Hebron chuuto tugul eng' muguleldo ne ititaat che icheeget ko piigap lugeet, che ki imuuchi kong'eet lugeet. Ki pwa icheek yooto si koyai Daudi koek laitoryat koboi Israel tugul. Piik tugul che ki ng'et ak icheek che po Israel ko ki tinyei mageet agenge koyai Daudi koek laitoryat.

39Ki tebi icheek eng' yooto ak Daudi peetuusyek somok, koamisyei ak koeisei, amu kiga chopchi tuguuk tupchosyekwak. 40Ak icheek che ki neegitee pichooto, kobooch Issakar Zebulun ak Naphtali, ko ki ip amitwogik eng' sigiroik ak tambeesik, ak eng' nyumbusyek, ak eiik. Ki mi amitwogik che po peek che ng'ootiin, magatiinik che po mogoonik, mooriik che mi logoek che po sabibuk che yamyotiin, divaik, mwanik, eiik ak keechiirek che chaang', amu ki mi poiboiyet Israel.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]