Revised Kalenjin Bible (KAPR)
28

Teteetap Daudi agobo Hekaluut

281Ki iyum `Daudi pounik tugul che po Israel eng' Jerusalem, kobooto pounigap ortinwek, kiptainigap kweanaik che kiboisyechin laitoryat eng' riipseet, kiptainigap eliphuusyek, kiptainigap pogolwogik ak pounik che ki pou tuguuk tugul che po laitoryat, ak che po weeriikyik, kobooto kiptainik, piik tugul che kiimeen ak che nyigoonen.

2

28.2-7:
2Sam 7.1-16; 1A.Pet 17.1-14
Ki tonon anyun Laitoryat Daudi ak kole, “Ogasa, tupchosyekyuk ak piikyuk. Ki mi muguleldanyu ateech koot ne imuung'ee moingetap arorutyetap Kamuktaindet ne Toroor, ak ng'echereet ne tebee keelyegap Kamuktaindennyo, ak ki achop tuguuk che po teekseet.” 3Ago ki leenjo Kamuktaindet, “Meteekyini koot kainennyu, amu ii chiitap lugeet ak ki itumde korotiik.” 4Ago ki lewena Kamuktaindet ne Toroor, Kamuktaindetap Israel, eng' koot komugul ne po kwandanyu aek laitoryat eng' Israel koigeny. Ki lewen Judah koek pounindet, ak ki paibait eng' anee, eng' kootap Judah, ne kootap kwandanyu, ak eng' weeriigap kwandanyu; ak koyaa aek laitoryat eng' Israel tugul. 5Ki lewen Solomon weeriinnyu eng' weeriikyuk tugul, (amu kigogoono Kamuktaindet ne Toroor weeriik che chaang',) kotebee ng'echereetap laitornatetap Kamuktaindet ne Toroor koboi Israel.

6Ki mwaiwo kole, “Teechei Solomon weeriing'ung' koonnyu ak seremusyekyuk, amu ki alewen ineendet koek weeriinnyu, ak aegu kwandanyi. 7Agimiiti laitornatennyi koigeny, ngot koyai kotugul ng'atuutikyuk ak kirwoogutikyuk, ko uu rani.”

8“Ara anyun nguno, eng' taitap Israel tugul, tuiyetap Kamuktaindet ne Toroor ak kogasei Kamuktaindennyo: Oriip ak ocheeng' ng'atuutik tugul che po Kamuktaindet ne Toroor Kamuktaindeng'wong', si kobunjook emoni karaaran ak obagakyi lagokwok koek porotennywa koigeny.

9“Nai anyun inyee Solomon weeriinnyu, Kamuktaindetap kwandang'ung', ak iboisyechi ineendet eng' muguleldo ne ititaat, ak eng' kabwaatutik che tinyei chameet, amu isyachi Kamuktaindet ne Toroor mugulelwek tugul ak koguitos kabwaatutik tugul che po metit. Ngot icheeng' ineendet, inyooru; ago ngot imete ineendet, kowiirtoin koigeny. 10Riipkei anyun; amu ki kolewenin Kamuktaindet ne Toroor iteech koot ne po ole-tiliil. Kimitu anyun ak iteech.”

11Yeityo kogoochi `Daudi Solomon weeriinnyi kergeindap keterut, ak ne po kooriik che tilaatiin, ne po ole kigonoree tuguuk, ne po kooriik che po parak, ne po kooriik che po oriit ak ne po kerwetap rireenet. 12Ki igoochi ineendet kergeindap tuguuk tugul che ki iboorchi agobo seremusyegap kootap Kamuktaindet ne Toroor, kooriik tugul che ki kiyieme, che po ole kigonorisye eng' kootap Kamuktaindet, kobooto che po ole kigonoree tuguuk che itabaanatiin. 13Ki igoochi kogeny pcheutigap riipsosyegap Tisiik ak Lawiik, ne po poisyet tugul ne po otisyetap kootap Kamuktaindet ne Toroor ak ne po tuguuk tugul che kiboisyee eng' kootap Kamuktaindet ne Toroor. 14Ki igoochi karagendoetap thahabu ngebiman ne po tuguuk che po thahabu, ak tuguuk che po poisyet age tugul, ak karagendoetap fedha che po tuguuk tugul che po fedha ngebiman, che po tuguuk tugul che po poisyet age tugul. 15Ki igoochi kogeny ole tee thahabu che po keelyegap tait, che po taisyekyik ngebiman ak che po keeldo age tugul ne po tait, ole tee tuguuk che po fedha che po tait age tugul ak taisyekyik, keeldo age tugul ne po fedha ngebiman, ko uu poisyetap keeldo age tugul ne po tait, 16ak thahabu ngebiman che po mesosyegap magatinigap kabartaet che po meset age tugul; ak fedha che po mesosyegap fedha; 17ak kariik che kirutunee panyeek, ak taabook, ak kigombok, che po thahabu che tiliileen tugul: ak che po taaboogap thahabu ngebiman, ko po taabeet age tugul; ak che po taaboogap fedha ngebiman, ko po taabeet age tugul; 18ak thahabu che tiliileen ngebiman che po kapkorosuut ne kibeelee nyamdutik. Ki igoochi kora thahabu che po kergeindap chepkichutit, chooto kerubisyek che kiuito kebebaikwak si kouur moingetap arorutyetap Kamuktaindet ne Toroor. 19Ki kigoono aguiyo chuuto tugul eng' siruutik kobun eutap Kamuktaindet ne Toroor, poisyonik tugul che po kergeini.

20Ki leenji `Daudi Solomon weeriinnyi, “Kimitu nyiganitu, ak iyai poisyet. Meiywei anan itoptoben, amu mi kobooten Kamuktaindet ne po Toroornatet, ineendet Kamuktaindennyu. Mabagaaktoin anan kometen agoi kogeskei poisyet tugul ne po otisyetap kootap Kamuktaindet ne Toroor. 21Keero, mi riipsosyegap Tisiik ak Lawiik agobo otisyet tugul ne po kootap Kamuktaindet, ak mi kobooten eng' poisyet age tugul chii age tugul ne chamei ak ko utaat, agobo otisyet age tugul. Kase iit ng'atuutyeng'ung' komyee kiptainik ak piik tugul.”

29

Kagoochinoik che po teekseetap Hekaluut

291

29.1-2:
1A.Pet 22.5
Ki leenji `Laitoryat Daudi tuiyet tugul, “Ta ko ming'in Solomon weeriinnyu, ne ki lewen ineegei Kamuktaindet, ak kota ko etyet, ak ko oo poisyet; amu koyooto po laitoryat koma po chiito, po Kamuktaindet ne po Toroornatet. 2Ki achop anyun eng' kimnateennyu tugul, thahabu agobo tuguugap thahabu, che po kootap Kamuktaindennyu, fedha agobo tuguugap fedha, sugunonik agobo tuguugap sugunonik, kariik agobo tuguugap kariik ak keetiik agobo tuguugap keetiik; koik che kiguure soam, ak koik che kitetei, kindoi kotabon ng'wony, che po saleiywek che teerchiin, koik alak tugul che po kamanuutyet ne oo, ak koik ng'iisyat che leelach. 3Kogeny, amu ki acham miising' kootap Kamuktaindennyu, ko uu ye atinye tuguukyuk che po thahabu ak fedha, agoochini kootap Kamuktaindennyu, che siirei tuguuk tugul che ki achopchi koot ne tiliil; 4talendaisyek eliphuusyek somok che po thahabu, che po thahabu che po Opir, ak talendaisyek eliphuusyek tisap che po fedha che tiliileen, che kiliige inatusyegap kooriik, 5che po thahabu agobo tuguugap thahabu, ak che po fedha agobo tuguugap fedha, ak che po poisyet age tugul che yaei musogik. Ng'oo anyun ne chamei kotabaanjigei Kamuktaindet ne Toroor eng' peetuuni?”

6Ki igoito anyun eng' chamyet pounigap kooriigap kwanisyek, ak pounigap ortinwegap Israel, ak kiptainigap eliphuusyek, ak che po pogolwogik, kobooto pounik che ki pou poisyetap laitoryat. 7Ki igoito agobo otisyetap kootap Kamuktaindet talendaisyek eliphuusyek muut che po thahabu kobooto kebeberwek che mengeechen eliphuusyek taman che po thahabu, talendaisyek che po fedha eliphuusyek taman, talendaisyek eliphuusyek taman ak sisiit che po sugunonik, ak che po kariik talendaisyek eliphuusyek pogol. 8Chii age tugul eng' icheek ne ki tinyei koik che po kamanuutyet ne oo, ko ki igoito kinde ole kigonoree tuguugap kootap Kamuktaindet ne Toroor, koba eutap Jehiel Gersonindet. 9Ki poiboitu anyun piik, amu ki igoito eng' chamyet, amu ki igoochi Kamuktaindet ne Toroor eng' muguleldo ne igesunotkei. Ki paibait agine Laitoryat Daudi eng' poiboiyet ne oo.

Komwaei Daudi kongoi

10Ki ilas anyun `Daudi Kamuktaindet ne Toroor eng' taitap tuiyet tugul, ak ki le, “Iberuurot inyee, Kamuktaindet ne Toroor, Kamuktaindetap Israel kwandanyo, koigeny ak koigeny. 11

29.11:
Mat 6.13
Ee Kamuktaindet ne Toroor, neng'ung' ooindo ak kamuktaet, ak toroornatet ak katerteeret ak etunateet, amu cheguuk tuguuk tugul che mi kipsengwet ak che mi ng'wony. Neng'ung' ee Kamuktaindet ne Toroor laitornatet, ii toroorot ak ii metitap tugul. 12Punun mogornatosyek ak teegisto, ak ibou tugul. Mi eung'ung' kimnateet ak kamuktaet, inyee ne ieeti ak igoochini tugul kimnateet. 13Ara anyun, Kamuktaindennyo, kimwaun kongoi, ak kilasu kaineng'ung' ne po toroornatet. 14Ago aa ng'oo anee, ak nee piikyuk, kot kimuuch kigoite eng' chamyet ko uu ni? Punun tuguuk tugul, ak kagigoonin tuguuguk. 15Amu ki toek eng' taing'ung', ak ki kiprutoinik, ko uu ye ki uu kwanisyekyok tugul. Uu peetuusyekyok eng' ng'wony urwet, ama mi ne tebyei agoi. 16Ee Kamuktaindet ne Toroor, Kamuktaindennyo, punu eung'ung' tuguuchuuto tugul kogechop si keteegunenen koot ne po kaineng'ung' ne tiliil, cheguuk tugul. 17Angen, ee Kamuktaindennyu ale, ityeme muguleldo, ak ibaibai eng' ne po iman. Ki agoonin tuguuchuuto tugul eng' chamyet ak lititindap muguleldanyu. Ak kaageer nguno eng' poiboiyet piiguk che mi yu kogoonin eng' chamyet. 18Ee Kamuktaindet ne Toroor, Kamuktaindetap Abraham, ak ko po Isak, ak ko po Israel, kwanisyekyok, riip ng'olyoondoniito koigeny eng' kabwaatutik che ibwaati mugulelwegap piiguk, ak ichopchigei mugulelwekwak. 19Ak igoochi weeriinnyu Solomon muguleldo ne ititaat, si koriip ng'atuutiguk, paornatosyeguk ak kaneetisyosyeguk, koyai chuuto tugul, ak koteech kootap laitoryat, ne ki achopchi tuguuchuuto.”

20Yeityo koleenji `Daudi tuiyet tugul, “Olasu Kamuktaindet ne Toroor Kamuktaindeng'wong'.” Ak ki ilas tuiyet komugul Kamuktaindet ne Toroor, Kamuktaindetap kwanisyekwak, ki ing'uruuk ak kogutung'ji Kamuktaindet ne Toroor, ak laitoryat. 21Eng' peetuut ne po aeng' ko ki eeny tiseiywek koeng'ji Kamuktaindet ne Toroor, ak kogoochi Kamuktaindet ne Toroor kagoochinoik che kibeelei, eiik eliphuut, mengichik eliphuut ak aaregap keechiir eliphuut, kobooto kagoochinoikwak che kieei, ak koroseek ng'iisyat che po Israel tugul. 22Ki amis ak koeeiso icheek eng' taitap Kamuktaindet ne Toroor eng' peetuunooto eng' kagasetapkei ne oo. Ki yai Solomon weeriitap Daudi koek laitoryat kogeny, ak koiil ineendet eng' taitap Kamuktaindet ne Toroor koek pounindet ak koiil Zadok koek tisiindet. 23

29.23:
1Lai 2.12
Ki tebee anyun Solomon ng'echereetap laitornatet ne po Kamuktaindet ne Toroor koek laitoryat, kogeer Daudi kwandanyi. Kibor ineendet ak ki kas iit Israel tugul ineendet. 24Ki kas iit pounik tugul ak piik che kiimeen, kobooto weeriik tugul che po Laitoryat Daudi, Laitoryat Solomon. 25Ki ieet `Kamuktaindet ne Toroor Solomon miising' eng' taitap Israel tugul, ak kogoochi ineendet etunatetap laitornatet ne kitom kigoochi laitoryat age tugul eng' Israel ne ki indoune ineendet.

Meetap Daudi

26Ki laitoran Daudi anyun weeriitap Jesse eng' Israel tugul. 27

29.27:
2Sam 5.4-5; 1A.Pet 3.4
Ki laitoran eng' Israel kenyiisyek artam; ki laitoran eng' Hebron kenyiisyek tisap ak kolaitoran eng' Jerusalem kenyiisyek sosom ak somok. 28Ki ilil, ko kagoyam peetuusyekyik, mogornatosyek ak teegisto. Ki laitoran Solomon weeriinnyi kogeer ineendet. 29Ak poisyonigap Laitoryat Daudi, che po tai ak che po let, ko siraatiin eng' kitabuutap Samuel keerindet, ak kitabuutap Nathan maotyot ak eng' kitabuutap Gad keerindet, 30kobooto laitornatennyi tugul ak kimnateennyi, ak peetuusyegap sabeennyi, ak che po Israel, ak che po laitornatosyek tugul che po emotinwek.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]