Revised Kalenjin Bible (KAPR)
11

111

11.1:
1Kor 4.16; Phlp 3.17
Oegu kasupiikyuk, ko uu ye aa kasubindetap Kristo.

Atebeet ne nyolu ak saaet

2Aloswok anyun nguno amu obwaata eng' tuguuk tugul, ak oriibe kaneetisyosyek ko uu ye ki arorwok. 3Ago amache onai, ole metitap muren age tugul ko Kristo; ak metitap kobogoryot ko muren; ak metitap Kristo ko Kamuktaindet. 4Muren age tugul ne saaei anan koamdoi logoiywek ko kerat metit, ko kagoteweer metinnyi. 5Ago kobogoryot age tugul ne saaei anan koamdoi logoiywek ko yaataat metit, ko kagoteweer metinnyi: amu kagergeit ak chii ne inemunoot met. 6Amu ngo ma tugoot metitap kobogoryot, ko ingetilji agine suumeek: ago ngo kalilano eng' kobogoryot ketilji suumeek anan kinem, ko ingotuch metinnyi. 7

11.7:
Tau 1.26-27
Ma nyooljin iman muren koger metit, amu ineendet ko kergeindo ak toroornatetap Kamuktaindet: ago kobogoryot ko toroornatetap muren. 8
11.8-9:
Tau 2.18-23
Amu ki ma pun mureno kobogoryo; ago ki punu kobogoryot muren: 9ak kogeny, ki ma kitoi keyai muren agobo kobogoryo; ago ki kiyai kobogoryo agobo muren: 10amu niito anyun konyaaljin kobogoryo kotinyei kaboorunet ne po pounateet eng' metinnyi, amu malaikaisyek. 11Ago ma mi kobogoryondo ngo ma mi mureno, ak ma mi mureno ngo ma mi kobogoryot, eng' Kiptaiyat. 12Amu ko uu ye ki punu kobogoryot muren, ko uu nooto agine mureno kisichei kobogoryot; ago punu tuguuk tugul Kamuktaindet. 13Orwooch okweegei: tos nyolu eng' kobogoryot kosa Kamuktaindet koma tugoot metit? 14Tos ma ineetook agine piteetap poorto, kole, ngo tinyei mureno suumeek che kooen, ko kalilanet eng' ineendet? 15Ago ngo tinyei kobogoryot suumeek che kooen, ko toroornatet eng' ineendet; amu ki kigoochi suumeekyik kotugegei. 16Ago ngo machei chii tiyet, koma ki tinyei piteet ne uu nooto, anan eng' kanisosyegap Kamuktaindet.

Igoortap Kiptaiyat

(Mat 26:26-29; Mar 14:22-25; Luk 22:14-20)

17Ago, ye ang'atook eng' ng'olyoondoni, ko maloswok amu oyumige koma agobo che myach ago agobo che yaach. 18Amu ne po tai eng' tugul, ye oyumige eng' kaniset, agase keele miitei pesyosyek eng' kwenung'wong'; ak ayani kitigin ale uu nooto. 19Amu mi ne matiny pesyosyek eng' kwenung'wong', si kobiit kotook icheek che po iman eng' kwenung'wong'. 20Ye oyumige anyun koma imugaksei keam igoortap Kiptaiyat: 21amu eng' amisyeng'wong' kosip konemu age amitwogikyik kotomo age; ak amei age rubeet, kobogiti age. 22Nee? Motinye kooriik che oamisye ak oeeise? Anan osase kanisetap Kamuktaindet, ak oteweer icheeget che ma tinyei? Amwaiwok nee anyun? Tos aloswok eng' ng'olyoondoni? Maloswok.

23Amu ki ataach eng' Kiptaiyat nooto ki agoonok agane, ko uu ye ki nam magatyat Kiptaiyat Jeso eng' kemounooto ki king'wektoe ineendet; 24ak kingo kagomwa kongoi, kobuutul, ak kole, “Niito ko poortanyu, ne mi agobo okweek; oyae ni obwaatena.” 25

11.25:
Kom 24.6-8; Jer 31.31-34
Ko uu nooto agine kigombet, kingo kagoamis, kole, “Kigombani ko arorutyet ne leel ne po korotiikyuk; oyae niito kotugul ye oee obwaatena.”

26Amu kotugul ye oame magatyandani, ak oee kigombet, oboortoi meetap Kiptaiyat agoi koit. 27Nooto anyun chii age tugul ne amei magatyat, anan ne eei kigombet ne po Kiptaiyat ama nyoljin, koipchingei kirwooget ne po poorto ak korotiigap Kiptaiyat. 28Ago ingosyachkei chii, si koamei magatyat, ak koeei kigombet. 29Amu ineendet ne amei ak koeei, koamei ak koeei kirwooget ngo ma ibesyo poorto. 30Amu niito anyun nyaluldos che chaang' eng' kwenung'wong', ak komyandos, ak koruitos che chaang'. 31Amu ngot kitigonigei, koma tuun kirwookwech. 32Ago ye kirwookwech, kotigoonech Kiptaiyat, si ma tuun ki kikyech kobooto ng'wony. 33Nooto anyun, tupchosyekyuk, ye oyumgei oamisye, oganygei. 34Ngo amei chii age tugul rubeet, koamis eng' kaa; si ma punji kayumeng'wong' pogei kirwooget. Ak ng'aleek che kang'et ko ye kaitu, anyoo achop.

12

Konunoik che terotin

121Nguno anyun agobo konunoik che po Kabuuset ne Tiliil, che kitupche, koma mache oegu che mongen. 2Ongen ole kingo ta ko oo Pororyosyek, ko ki kiretook obe ye mi kanamonichooto che ma twegu, ko uu ye ki kindoiywok. 3Nooto anyun agoonok oguiye ole, ma mi chii ne ng'alaali eng' Kabuusetap Kamuktaindet ne mwaei kole, “Jeso ko chuboot!” ama mi chii ne imuuchi komwa kole, “Jeso ko Kiptaiyat,” kobatee eng' Kabuuset ne Tiliil.

4

12.4-11:
Rom 12.6-8
Nguno anyun, komiitei konunoik che pesyotin, ago agenge Kabuuset ne Tiliil. 5Ak miitei riipsosyek che pesyotin, ago agenge Kiptaiyat. 6Ak miitei poisyonik che pesyotin, ago agenge Kamuktaindet, ne yaei tuguuk tugul eng' tugul. 7Ago kigoochin chii tugul kaboorunetap Kabuuset ne Tiliil si kobiit kotoretegei. 8Amu kigoochin chiito age ng'olyootap utaatyet eng' Kabuuset ne Tiliil; ak kigoochin age ng'olyootap naet, eng' Kabuusonooto: 9kigoochin age kayaneet, eng' Kabuusonooto; ak kigoochin age konunoigap kasaabet, eng' Kabuusonooto agenge; 10ak kigoochin age poisyonigap kamuget; ak age maonateet; ak age kabesyetap konunoigap Kabuuset: ak age kutusweek che teerchiin; ak age weeksetap kutusweek: 11ago poisyee chuuto tugul Kabuuset ne Tiliil ne nooto agenge, kopchechin age tugul ko uu ye makyin.

Poorto agenge ne mi kebeberwek che chaang'

12

12.12:
Rom 12.4-5
Amu ko uu ye agenge poorto, ak kotinyei kebeberwek che chaang', ak kebeberwek tugul che po poorto, agot ngo chaang', ko poorto agenge; ko uu nooto agine Kristo. 13Amu eng' Kabuuset ne Tiliil agenge ko ki kibatisanech acheek tugul keegu poorto agenge, ngo Yahudik anan Yunanik, ngo ratotiin, anan kotyagotin, ak ki kigoonech acheek tugul kee eng' Kabuuset ne Tiliil agenge.

14Amu poorto, koma kebeberta agenge, ago chaang'. 15Ngot komwa keeldo kole, “Amu ma aa euut, koma po poorto,” tos ma po poorto amu nooto? 16Ak ngot komwa itit kole, “Amu ma aa konda, koma po anyun poorto,” ko tos ma po poorto amu nooto? 17Nda poorto komugul ko konda, kota mi ano kastaet? Nda poorto komugul ko itit, ko tos mi ano kang'utoet? 18Ago nguno ko ki konde Kamuktaindet kebeberwek, age tugul eng' icheek, eng' poorto, ko uu ye ki cham ineendet. 19Ak nda tugul ko kebeberta agenge, ta mi ano poorto? 20Ago nguno ko kebeberwek icheek che chaang', ago agenge poorto.

21Amaimuuchi konda koleenji euut, Ma magenen kiy: anan kogeny, ma imuuchi metit koleenji keelyek, Ma magenok kiy. 22Ago ne siirei miising' ko, kebeberwechooto po poorto che uu keele nyalulyotin, ko chooto che nyolu: 23ak kebeberwechooto po poorto, che kiiti keele matya teegistanywa, ko chooto che kilaakyin teegisto ne oo kosiir; ak kebeberwekyok che ma tinyei korooronindo ko chooto che tinyei korooronindo ne oo kosiir; 24amu kebeberwekyok che tinyei korooronindo, koma machei kiy: ago kiituiyo Kamuktaindet poorto, kogoochin teegisto ne oo kosiir kebeberta kirarchi; 25si ma piit kabesyet eng' poorto; ago si koriipkei eng' riipseet agenge, kebeberwechooto, koriip age age. 26Ak ngo nyalili kebeberta agenge, konyalildos kebeberwek tugul kobooto nooto; anan ngegonyiti kebeberta agenge, koboiboitu kebeberwek tugul kobooto nooto.

27Nguno anyun, okweek ko oo poortap Kristo, ak oo kebeberwegap poroto, age tugul eng' okweek. 28

12.28:
Eph 4.11
Ak kigonde Kamuktaindet alak eng' kaniset, che po tai ko che kiyooktoi, che po aeng' ko maotik, che po somok ko kaneetik, yeityo ko kwang'utik, yeityo ko konunoigap kasaabet, toretosyek, kandoinatosyek, ak kutusweek che teerchiin. 29Tos tugul ko che kiyooktoi? Tos tugul ko maotik? Tos tugul ko kaneetik? Tos tugul ko yaigap kwang'utik? 30Tos tinyei tugul konunoigap kasaabet? Tos ng'alaali tugul kutusweek che teerchiin? Tos iweechi tugul kutusweek? 31Ago ocheeng' miising' konunoik che eecheen. Ak aboorwok ooreet ne myee miising' ne siirei tugul.

13

Konunotyotap Chamyet

131Agot ndang'alaale kutusweegap piik ak che po malaikaisyek, ama tinye chamyet, ko kaegu sugunwet ne cheei, anan sanitap sugunwet ne polei. 2

13.2:
Mat 17.20; 21.21; Mar 11.23
Ak ngot atinye konunetap maonateet, ak angen ung'ootik tugul ak naet tugul, ak ngatinye kayaneet tugul, kot amuuch autoe tuloonook, ago ma tinye chamyet, ko aa puch. 3Ak ngot agoite tuguukyuk tugul abae kibananook, ak ndagoite poortanyu kebeel, ago ma tinye chamyet, ko magelwo kiy.

4Muitoi chamyet, ak ko tala; ama tinyei chamyet ng'etkong', malosegei chamyet, ama meenei, 5ama yaei ne ma nyolu, ama cheeng'jingei chechiik ineegei, ama iiti tagisyet, ama iiti yaityo; 6ma paibai eng' ne ma po imanda, ago paibai eng' imanit; 7siisei eng' tuguuk tugul, iyani tuguuk tugul, imang'u tuguuk tugul, muitoi eng' tuguuk tugul. 8Mararu chamyet agoi: ago ngo miitei maonatosyek, kotun igeesugei; ngo mi kutusweek che teerchiin, kotun siistos; ngo mi naet, kotun igeesugei. 9Amu kingen eng' kebeberta, ak keamdoi eng' kebeberta: 10ago ye tuun nyo ne ititaat, kogeskei anyun kebeberta.

11Ye kingo aa lakwa, kogiang'alaali ko uu lakwa, ki aguitosi ko uu lakwa, ki abwaati ko uu lakwa: nguno, ko kaaegu chiito ne oo, ko kaamete tuguugap lakwandit. 12Amu nguno kegeere eng' kioit, eng' tamirmiron; ago tuun ko togoch eng' togoch: nguno angen eng' kebeberta; ago tuun anae ko uu ye kigenaa. 13Ago tebyei nguno kayaneet, kamang'unet, chamyet, chuuto somok; ago ne oo eng' chuuto ko chamyet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]