Revised Kalenjin Bible (KAPR)
13

Konunotyotap Chamyet

131Agot ndang'alaale kutusweegap piik ak che po malaikaisyek, ama tinye chamyet, ko kaegu sugunwet ne cheei, anan sanitap sugunwet ne polei. 2

13.2:
Mat 17.20; 21.21; Mar 11.23
Ak ngot atinye konunetap maonateet, ak angen ung'ootik tugul ak naet tugul, ak ngatinye kayaneet tugul, kot amuuch autoe tuloonook, ago ma tinye chamyet, ko aa puch. 3Ak ngot agoite tuguukyuk tugul abae kibananook, ak ndagoite poortanyu kebeel, ago ma tinye chamyet, ko magelwo kiy.

4Muitoi chamyet, ak ko tala; ama tinyei chamyet ng'etkong', malosegei chamyet, ama meenei, 5ama yaei ne ma nyolu, ama cheeng'jingei chechiik ineegei, ama iiti tagisyet, ama iiti yaityo; 6ma paibai eng' ne ma po imanda, ago paibai eng' imanit; 7siisei eng' tuguuk tugul, iyani tuguuk tugul, imang'u tuguuk tugul, muitoi eng' tuguuk tugul. 8Mararu chamyet agoi: ago ngo miitei maonatosyek, kotun igeesugei; ngo mi kutusweek che teerchiin, kotun siistos; ngo mi naet, kotun igeesugei. 9Amu kingen eng' kebeberta, ak keamdoi eng' kebeberta: 10ago ye tuun nyo ne ititaat, kogeskei anyun kebeberta.

11Ye kingo aa lakwa, kogiang'alaali ko uu lakwa, ki aguitosi ko uu lakwa, ki abwaati ko uu lakwa: nguno, ko kaaegu chiito ne oo, ko kaamete tuguugap lakwandit. 12Amu nguno kegeere eng' kioit, eng' tamirmiron; ago tuun ko togoch eng' togoch: nguno angen eng' kebeberta; ago tuun anae ko uu ye kigenaa. 13Ago tebyei nguno kayaneet, kamang'unet, chamyet, chuuto somok; ago ne oo eng' chuuto ko chamyet.

14

Konunoigap maonateet ak che po kutusweek

141Osup chamyet; ak ocheeng' miising' konunoik che po Kabuuset, ago ne siirei ko oamde logoiywek. 2Amu ineendet ne ng'alaali eng' kutit ne ma kigasei koma ng'alaaljin piik, ago Kamuktaindet; amu ma kasei chii; ago mwaei ung'ootik eng' Kabuuset. 3Ago ineendet ne amdoi kong'alaaljin piik ng'aleegap teekseet, ak kagimiitet, ak kagaigaet. 4Ineendet ne ng'alaali eng' kutit koteechegei ineegei; ago ineendet ne amdoi koteechei kaniset.

5Amakwok anyun okweek tugul ong'alaal eng' kutusweek, ago ne siirei ko oamde: ak oo ineendet ne amdoi kosiir ineendet ne ng'alaali eng' kutusweek, kobatee koweech, si kobiit koteegak kaniset. 6Ago nguno anyun, che kitupche, ngot Anyoonjok ang'alaalee kutusweek, atoretenok nee, ngot koma ng'alaalwok eng' ng'ang'et, anan eng' naet, anan eng' amdaet, anan ko eng' kaneetisyet? 7Agot tuguuk che masaptos, che cheitos, anan ndurerut anan ketubet, ngo ma ibesyo cheosyekwak, kenaitoi ano ne kiguutei anan ne kibutei? 8Amu ngo chei iryageet cheet ne ma kiguitos, ko ng'oo ne chobegei agobo lugeet? 9Ou nooto ak okweek, ngot ko motwegu eng' ng'aleek che nyumnyum kegas, kenaitoi ano kiit ne kagemwa? Amu ong'alaaljini ola puch. 10Uu keele, miitei kutusweek che chaang' che teerchiin eng' ng'wony, ama mi ne ma tinyei kiit ne ibooru. 11Ngot ko mangen anyun kiit ne mwaei tuguuchooto, aegu punootyot eng' ineendet ne ng'alaali, ak ineendet ne ng'alaali, koegu punootyot eng' anee. 12Ou nooto ak okweek, ko uu ye omache miising' konunoigap Kabuuset, ocheeng' eng' kagiiletapkei tuguuk che igoochin kaniset koteegak. 13Nooto anyun, ineendet ne ng'alaali eng' kutit, ingosa si koweech ng'aleek. 14Amu ngasa eng' kutit ne ma kigasei, kosaaei saboondanyu, ago ma tinyei logoek ng'omnatennyu. 15Nee anyun? Asaae eng' Kabuuset ne Tiliil, ak asaae eng' ng'omnateet agine; atyeni eng' Kabuuset ne Tiliil, ak atyeni eng' ng'omnateet agine. 16Amu ngo ma uu nooto, ko ngiberuuri eng' Kabuuset ne Tiliil, komwaitoi ano “Amen” ye igoitoi kongoi, ineendet ne tebee ole mi che ma ineetkei amu ma naei kiit ne kimwae? 17Amu iman, igoitoi inyee kongoi komyee, ago ma nyoor nin age kiit ne imuuchi koteech ineendet.

18Amwachini Kamuktaindet kongoi, ale ang'alaalee kutusweek kosiirok okweek tugul: 19ago achame amwa ng'aleek muut eng' ng'omnatennyu eng' kanisa, si aneet piik alak ak icheek, kosiir amwa ng'aleek eliphuusyek taman eng' kutit ne ma kigasei. 20Che kitupche, amoegu lagok eng' ng'omnateet: ago oegu lagok che nyerootiin eng' yaityo, ago oegu che kaoeegitu eng' ng'omnateet. 21

14.21:
Isa 28.11-12
Ki kisir eng' Ng'atuutyet keele,

“Eng' piik che po kutusweek alak,

ak eng' kutusweegap toek,

ang'alaaljini pichu,

agot ngo uu nooto koma kasa icheek, mwaei Kiptaiyat.”

22Nooto anyun kutusweek ko po kaboorunet, ma eng' icheek che iyanotin, ago eng' icheeget che ma iyanotin: ago amdaet ko po kaboorunet, ma eng' che ma iyanotin, ago eng' icheek che iyani.

23Nooto anyun ngo yumgei kaniset komugul, ak kong'alaal tugul eng' kutusweek che ma kigasei, ak ngo pwo ko piik che ma ineetkei, anan ko che ma iyanotin, ko tos ma mwaei kole oo kibion? 24Ago ngo amda tugul, ak konyo ko chii agenge ne ma iyanaat, anan ko ne ma ineetkei, koger kong' tugul ineendet, ak korwookyin tugul ineendet: 25ak king'aanyei ung'ootigap muguleldanyi; ak kobutyi ng'wony anyun kong'uruuk kolas Kamuktaindet, komwaei koleen mi Kamuktaindet kwenung'wong' iman.

Kasibet ne myee eng' otisyet

26Nee anyun, che kitupche? Ye oyumgei, kotinyei age tugul tyendap kalasunet, ak kaneetisyet, ak ng'ang'utyet, ak kutit ne ma kigasei, ak kaweegetap ng'aleek. Ingoyaogis tuguuk tugul koteegogis. 27Ngo ng'alaal chii age tugul eng' kutit ne ma kigasei, kong'alaal aeng'u, anan ko che ma siirei somok, ak ingorupkei; ak ingoweech chiito age: 28ago ngo ma mi weegindetap ng'aleek, ko ingosiis eng' kanisa; ak ingong'alaaljigei ineegei ak Kamuktaindet. 29Ak ingong'alaalso maotik aeng'u anan ko somok; ingoguiyo alage. 30Ago ngeng'aang'ji ng'olyoo age ne tebyei eng' yooto, ko ingosiis ni kabo tai. 31Amu omuuchi okweek tugul oamde agenge agenge, si kobiit koneetkei tugul, ak konyoor kagaigaet tugul; 32ak kase iit mugulelwegap `maotik maotik; 33amu Kamuktaindet koma Kamuktaindet ne po polateet, ago po kaalyeet. Ko uu eng' kanisosyek tugul che po che tiliileen, 34ingosiisyo kobogorisyek eng' kanisosyek: amu ma ki chamjin icheeget kong'alaal; ago ingogas iit, ko uu ye mwaei ng'atuutik. 35Ak ngo machei icheek koneetkei kiy, ko ingoteebe manong'otaikwak eng' kaa: amu kalilano ngo ng'alaal kobogoryondo eng' kaniset.

36Nee anyun? Tos okweek che ki mong'unenok ng'olyootap Kamuktaindet? Anan kibwanjok okweegei? 37Ngo pwaati chii age tugul kole maotyot, anan ko chii ne mi eng' atebeetap Kabuuset, ko ingonai tuguuk che asirwok, kole chooto ko ng'atuutyetap Kiptaiyat. 38Ago ngo ma ingen chii age tugul kiy, ko ingoek kimanaiyat.

39Nooto anyun, che kitupche, ocheeng' miising' oamde, amat oet keng'alaal eng' kutusweek che ma kigasei. 40Ago ingoyaogis tuguuk tugul ko uu ye nyolu ak eng' chobeet ne myee.

15

Ng'eetyetap Kristo

151Aboorwok anyun, che kitupche, nguno, logoiywek che myach che ki aamwok, chooto ki otaach, chooto ak icheek che otonone, 2kisaruunenok chooto ak icheek; eng' ng'aleek che ki aamwok, ngot onam komyee, ngot ko ki ma oyan puch.

3

15.3:
Isa 53.5-12
Amu ki agoonok eng' tai nooto ki ataach agane, ale kime Kristo agobo tengekwogikyok, ko uu ye mwaei siruutik, 4
15.4:
T.Kal 16.8-10; Mat 12.40; Poi 2.24-32
ak ki kitup; ak ki king'eet eng' peetuutap somok ko uu ye mwaei siruutik; 5
15.5:
Mat 28.16-17; Mar 16.14; Luk 24.34,36; Jhn 20.19
ak ki mong'ji Kepha; ye ibata, komong'ji taman ak aeng'; 6yeityo komong'ji tupchosyek che siirei pogol muut komi tugul, che ta komi agoi kora che chaang' eng' icheek, ago ki koruiyo alak; 7yeityo komong'ji Jakobo; ye ibata, komong'ji che kiyooktoi tugul; 8
15.8:
Poi 9.3-6
ak let eng' tugul, komong'ja agane, ko uu ne ki kios. 9
15.9:
Poi 8.3
Amu aa ne ming'in eng' kiyooktoik, ne ma nyolu keguureno kayooktoin, amu ki aus kanisetap Kamuktaindet. 10Ago eng' myeeindap Kamuktaindet auu kiit ne auu: ak myeeindonyi ne ki kigoono koma ek puch; ago ki aboisyee miising' asiir icheek tugul: ago ma anee, ago myeeindap Kamuktaindet ne ki mi kobooto. 11Ngo anee anyun, anan ngo icheek, keamdoi ui tugul, ak uu nooto ki oyan ak okweek.

Ng'eetyetap che ki kobek

12Ara anyun, ngeamdoi Kristo keele ki king'eet komong' eng' che ki pek, ko teptoi ano si komwaei alak eng' kwenung'wong' kole ma mi ng'eetyeet ne po che pegu? 13Ago ngot koma mi ng'eetyeet ne po che pegu, ko kaagaa ma king'eet Kristo agine: 14ak ngo ki ma king'eet Kristo, ko puch anyun amdaennyo, ko puch agine kayaneng'wong'. 15Ee, ak kagenyoorwech keele kibaorinik che po lembech che po Kamuktaindet; amu kigebaoryan agobo Kamuktaindet keele ki ing'eet Kristo: ne kaagaa ma ing'eet Kamuktaindet, ngot koma king'eeti che pegu. 16Amu ngot koma king'eeti che pegu, kogimaging'eet Kristo agine: 17ak ngo ki ma king'eet Kristo, ko puch kayaneng'wong'; kota omi eng' tengekwogikwok. 18Nooto anyun, icheeget che ki koruiyo eng' Kristo ko ki kolusyo. 19Ngot ko kogimang'u Kristo eng' sabooni kityo, ko kaagaa ki piik che tinyei riirek kosiir tugul.

20Ago ki king'eet anyun Kristo komong' eng' che ki pek, tongoaniat ne po icheeget che ruitos. 21Amu ko uu ye ki punu meet chii, ko ki punu chii agine ng'eetyeet ne po che pegu. 22Amu ko uu ye pegu tugul eng' Adam, ko uu nooto tuun kisoobi tugul eng' Kristo. 23Ago chii tugul eng' komostanyi: Kristo ko tongoaniat; ye ibata ko icheek che po Kristo, eng' nyonunennyi. 24Ye ibata koit anyun let, ye tuun igoito ineendet pounateet kogoochi Kamuktaindet, ineendet Kwanda; ye tuun kagowong' pounateet tugul ak kimnateet tugul ak kamuktaet. 25

15.25:
T.Kal 110.1
Amu kanyool kolaitoran ineendet matiny, agoi konde puunikyik tugul keldebesaigap keelyekyik. 26Puunyoot ne po let ne tuun king'emei ko meet. 27
15.27:
T.Kal 8.6
Amu, kigonde tuguuk tugul keldebesaigap keelyekyik kogas iit ineendet. Ago ye mwaei kole kindoi tuguuk tugul kogas iit ineendet, kotaagu keele mabooto ineendet ne ki inde tuguuk tugul kogas iit. 28Ak ye tuun kaginde tuguuk tugul kogas iit ineendet, eng' peetuunooto anyun kinde Weeriit agine kogas iit ineendet, si koek Kamuktaindet tugul eng' tugul.

29Anan yaei nee anyun che ki kibatisanji che ki kobek? Ngot ko kaagaa ma king'eeti iman che pegu, ko kalya anyun si kibatisan chooto agobo icheek? 30Ko amu nee anyun si kemi ng'oiyondit sait age tugul? 31Abaoryani eng' kalasunonooto mi eng' okweek, che kitupche, ne atinye eng' Kristo Jeso Kiptaiyandennyo ale, amee peetuut age tugul. 32

15.32:
Isa 22.13
Ngo ki kibarge ak tyong'ik eng' Epheso ko uu piteetap piik, atinye porot nee anyun? Ngo kaagaa ma king'eeti che pegu, ongeamisye ak kee, amu kibegu mutai.

33Among' kiberberak: Ng'emei choronok che yaach atepto ne myee. 34Ogosu eng' imanda, amat oyai tengek; amu ma ingen alak Kamuktaindet: amwae ni si agoonok olilan.

Ole uu poorto ne po ng'eetyeet

35Ago mwaei chii age, koleen, King'eetitoi ano che ki kobek? Ak pwoonei eng' poorto ne uu nee? 36Inyee ne ii perber, nooto ne igoole inyeendet, koma sabei, ngot koma me: 37ak nooto ne igoole, ko megoole poorto ne tuun piitu, ago keswoot puch, abeere pitunee nganuuk, anan tuguuk alak; 38ago igoochin Kamuktaindet poorto ko uu ye iboiboi ineendet, ak kogoochin keswoot age tugul poortanyi ineegei.

39Panyeek tugul koma agenge: ago mi alak che po piik, ak alak che po tyong'ik, ak alak che po toriitik, ak alak che po njireenik. 40Miitei poorwek che po kipsengwet, ak miitei poorwek che po ng'wony: ago teerchiin telunateet ne po chooto po kipsengwet ak telunateet ne po chooto po ng'wony. 41Miitei liilindo ne po asiista, ak liilindo age ne po arawet, ak liilindo age ne po kecheik; amu teerchiin kecheiyat age ak kecheiyat age eng' liilindo.

42Ko uu nooto agine ng'eetyeetap che pegu. Ki kolei eng' ng'emisyet; king'eeti koma komi ng'emisyet: 43ki koolei koma mi teegisto; ak tuun king'eeti eng' telunateet: ki koolei eng' nyalulet; ak tuun king'eeti eng' kamuktaet: 44ki koolei poorto ne ki kisiktoi; king'eeti poorto ne po Kabuuset ne Tiliil. Ngo mi poorto ne ki kisiktoi, komi agine ne po Kabuuset ne Tiliil. 45

15.45:
Tau 2.7
Ko uu nooto agine, ki kisir keele, Ki ek chiito ne po tai, Adam, chiito ne sabei. Ki ek Adam ne po let Kabuuset ne igoitoi saboondo. 46Ago ma indoi nooto po Kabuuset ne Tiliil, ago nooto po poorto; ye ibata ko nooto po Kabuuset ne Tiliil. 47Chiito ne po tai ko po ng'wony, po ng'ung'unyek; chiito ne po aeng' ko po kipsengwet. 48Ko uu ole teptoi ne po ng'ung'unyek, uu chooto ak icheek che po ng'ung'unyek: ak ko uu ole teptoi ne po kipsengwet, uu chooto ak icheek che po kipsengwet. 49Ak ko uu ye ki kiip itoondap chiitap ng'ung'unyek, ko tuun ki ibe itoondap chiitap kipsengwet agine.

50Amwae ni anyun, tupchosyechu, ale ma imuuchi panyeek ak korotiik konyoor laitornatetap Kamuktaindet; amaimuuchi ne nunei konyoor ne manunei.

51

15.51-52:
1Thes 4.15-17
Ogeero, amwaiwok ung'ootyet: Ma kiruitosi acheek tugul, ago kiwalech acheek tugul, 52eng' ne matya, eng' kamismisetap konda, eng' iryageet ne po let: amu cheei iryageet, si king'eet che ki kobek koma kotinyei nunet, ak kewalech. 53Amu kanyool kolaach ne nunei, ne manunei, ak kanyool kolaach niito meei ne ma meei. 54
15.54:
Isa 25.8
Ago ye tuun kagolaach niito nunei, ne manunei, ak ko kagolaach niito meei ne ma meei, kosulda anyun mwaet ne ki kisir keele, Kagelugui meet eng' kabelisyet. 55
15.55:
Hos 13.14
Ee, meet, mi ano kabelisyeng'ung'? Ee, meet, mi ano ng'wanindang'ung'? 56Ng'wanindap meet ko tengek; ak kimnateetap tengek ko ng'atuutik: 57ago kigoochini Kamuktaindet kongoi, ne koonech kabelisyet eng' Kiptaiyandennyo Jeso Kristo.

58Nooto anyun, che kitupche che achame, ogimegitu, among' king'eak, oyae otese kotugul poisyetap Kiptaiyat, amu ongen ole ma po puch poisyeng'wong' ne uui eng' Kiptaiyat.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]