Revised Kalenjin Bible (KAPR)
1

Kagateet

11Paulo, ne ki kiguur koek kayooktoindet ne po Kristo Jeso eng' mageetap Kamuktaindet, ak Sosten tupchennyo, 2

1.2:
Poi 18.1
kisirchini kanisetap Kamuktaindet ne miitei Korinto, icheek che ki kitabaan eng' Kristo Jeso, che ki kiguur koek che tiliileen, kobooto tugul che kuurei kainetap Kiptaiyandennyo Jeso Kristo eng' komosta age tugul, Kiptaiyannyo ak ko nenywa.

3Ingotep kobootok myeeindo ak kaalyeet ne punu Kamuktaindet Kwandanyo ak Kiptaiyat Jeso Kristo.

Mwaetap kongoi

4Amwachini Kamuktaindet nenyu kongoi kotugul agobo okweek, amu myeeindap Kamuktaindet ne ki kigoonok eng' Kristo Jeso; 5amu kigeyaak oegu mogoreek miising' eng' ineendet eng' kiy age tugul, eng' ng'aleek tugul, ak naet tugul; 6ko uu ye ki kigimit paornateetap Kristo eng' okweek: 7si moletu eng' konunotyot age tugul; ogeni ng'ang'utyetap Kiptaiyandennyo Jeso Kristo. 8Ne igimitok agine agoi let, ko motinye kiy ne kirwoogunenok eng' peetuutap Kiptaiyandennyo Jeso Kristo; 9Kamuktaindet ko ne kiyani, kigeguurok eng' ineendet obwonji yamdaetap Weeriinnyi Jeso Kristo Kiptaiyandennyo.

Pesyosyek eng' kaniset

10Asoomok miising' anyun, che kitupche, eng' kainetap Kiptaiyandennyo Jeso Kristo, ale, omwa tugul kiit agenge, si ma piit pesyosyek eng' kwenung'wong'; ago si oegu che ititaatiin kibagenge eng' kabwaatet agenge ak eng' kirwooget agenge. 11Amu ki komwoiwo icheek che mi kootap Kloe agobo okweek, tupchosyekyuk, kole mi toiyasyek kwenung'wong'. 12

1.12:
Poi 18.24
Ki it anyun ne amwae ko ni, ale, mwaei age tugul eng' okweek, kole, “Aa po Paulo,” kole age “Aa po Apolo,” kole age “Aa po Kepha,” ak kole age “Aa po Kristo.” 13Tos pcheat Kristo? Tos ki kigartatwok Paulo? Anan ki kibatisanjok kainetap Paulo? 14
1.14:
Poi 18.8; 19.29; Rom 16.23
Amwachini Kamuktaindet kongoi amu ma abatisan chii eng' okweek, kobatee Krispo ak Gaio, 15si ma mwa chii age tugul kole ki kibatisanjok kainennyu. 16
1.16:
1Kor 16.15
Nga ki abatisan che po kootap Stephana ak icheek: mangen kogeny, ngo kita abatisan chii age. 17Amu ma iyookwo Kristo abatisanis, ago aamda logoiywek che myach: ma eng' utaatyet ne po ng'aleek, si ma ki yai kimurtoiyotap Kristo koek puch.

Kristo ko kimnateet ak utaatyetap Kamuktaindet

18Amu perberyo ng'olyootap kimurtoiyot eng' icheeget che lustos; ago eng' acheek che kisaru ko kimnateetap Kamuktaindet. 19

1.19:
Isa 29.14
Amu ki kisir keele,

Ang'eme utaatyet che utaatiin,

Ak aeesyoi kaguiyetap icheeget che iguitos.

20
1.20:
Job 12.17; Isa 19.12; 33.18; 44.25
Mi ano ne utaat? Mi ano siriindet? Mi ano kiptiyotyot ne po kenyisyechu? Tos ma yai Kamuktaindet ng'omnatetap ng'wonyuni koberberit?

21Amu eng' utaatyet ne po Kamuktaindet koma nai ng'wony Kamuktaindet eng' utotyennyi, ki cham Kamuktaindet kosar icheeget che iyani, eng' perberyo ne po ng'olyoot ne ki amdoi. 22Amu soomei Yahudik kaboorunoik, ak cheeng'ei Yunanik utaatyet: 23ago ki amdoi acheek Kristo ne ki kigartaat, ne kanagutyet eng' Yahudik, ak ko perberyo eng' Pororyosyek; 24ago eng' icheek che ki kiguur, Yahudik kobooto Yunanik, Kristo ko kamuktaetap Kamuktaindet, ak utaatyetap Kamuktaindet. 25Amu perberyo ne po Kamuktaindet ko utaat kosiir utaatyetap piik; ak nyalulnatetap Kamuktaindet ko kiim kosiir ne po piik.

26Amu, ogeer kuurseng'wong', tupchosyechu, ole ma kiguur che chaang' che utaatiin eng' atebeetap poorto, anan che chaang' che kiimeen, ama che chaang' che taagunotiin: 27ago ki lewen Kamuktaindet tuguuk che perber che po ng'wony, si kogoochi kalilanet che utaatiin; ak ki lewen Kamuktaindet tuguuk che nyalulyotin che po ng'wony, si kogoochi kalilanet tuguuk che kiimeen; 28ak ki lewen Kamuktaindet tuguuk che ma taagunotiin che po ng'wony, ak tuguuk che kisasei, ak tuguuk che ma miitei, si kowal koek puch tuguuk che miitei: 29si mat koloskei chii age tugul eng' taitap Kamuktaindet. 30Ago oo po ineendet okweek eng' Kristo Jeso, ne ki kiyai eng' Kristo Jeso, ne ki kiyai eng' acheek koek utaatyet ne punu Kamuktaindet, ak imanda, ak tiliilindo, ak katyaget: 31

1.31:
Jer 9.24
si koek, ko uu ye ki kisir keele, “Ineendet ne ilasugei, ko ingoloskei eng' Kiptaiyat.”

2

Kimwaitoi Kristo ne ki kigartaat

21Ak ye ki Anyoonjok tupchosyechu, ko ki ma anyoo eng' anyinyindap ng'alaalet anan ne po utaatyet, anyoo aboorwok ung'ootyetap Kamuktaindet. 2Amu ki abegechi ale ma mache anai kiy age tugul eng' kwenung'wong' kobatee Jeso Kristo, ineendet ne ki kigartaat. 3

2.3:
Poi 18.9
Ki ami kobootok eng' nyalulet, ak eng' kaiyweisyet, ak eng' potanet ne oo. 4Ak ng'alaalennyu ak ng'olyoondennyu ne ki aamdoi ko ki ma ko ng'aleegap kagaigaet che po utaatyet, ago eng' kaboorunetap Kabuuset ne Tiliil ak ne po kamuktaet: 5si ma tonone kayaneng'wong' utaatyetap piik, ago eng' kamuktaetap Kamuktaindet.

Utaatyetap Kamuktaindet

6Ago kimwae utaatyet eng' kwenutap che ititaatiin: ago utaatyet ne ma po peetuusyechu, anan ne po pounigap peetuusyechu, che machei koek puch: 7ago kimwae utaatyetap Kamuktaindet eng' ung'ootyet, nooto ne kigeuny, ne kiga sip kong'at Kamuktaindet agobo toroornatennyo ye kitom kobiit ng'wony: 8ne manaei agot agenge eng' pounik che po peetuusyechu: amu nda kiga nai, ta ki ma kogartati Kiptaiyatap toroornatet: 9

2.9:
Isa 64.4
ago ko uu ye ki kisir keele,

“Ma mi kong' ne ki kogeer,

anan it ne ki kogas,

anan muguleldap chii ne kigoguiyo,

tuguuk tugul che kichopchi `Kamuktaindet icheeget che chamei ineendet.”

10Ago king'ang'wech Kamuktaindet eng' Kabuuset ne Tiliil: amu isyachi Kabuuset ne Tiliil tuguuk tugul, agot tuguuk che po oriit che po Kamuktaindet. 11Amu tos ng'oo chii ne ingen tuguugap chii kobatee muguleldap chiichooto ne miitei ineendet? Ko uu nooto ma mi chii ne ingen tuguugap Kamuktaindet, kobatee Kabuuset ne po Kamuktaindet. 12Ago ki ma kitaach kabuuset ne po ng'wony, ago Kabuuset ne po Kamuktaindet, si kenai tuguuk che ki kogoonech Kamuktaindet puch.

13Tuguuchooto ak icheek che kimwae, ko ma kimwae eng' ng'aleek che ineeti utaatyetap chii, ago che ineeti Kabuuset ne Tiliil; ki poisyee Kabuuset ne Tiliil asi kiguiyo tuguugap saboon. 14Ma taachei chiito ne mi eng' atebeetap poorto tuguuk che po Kabuusetap Kamuktaindet: amu perberyo eng' ineendet; ak temenee koobeesyo tuguuchooto, amu naoksei eng' toretetap Kabuuset. 15Ago ineendet ne mi eng' atebeetap Kabuuset ne Tiliil kobestos tuguuk tugul, ago ma mi chii ne ibestos ole teptoi chiichooto. 16

2.16:
Isa 40.13
Amu ng'oo ne ki konai kabwaatutigap Kiptaiyat, si kobiit koneet ineendet? Ago ki tinyei acheek kabwaatutigap Kristo.

3

Kegerei kong' pesyosyek

31Ki temena anyun, che kitupche, ang'alaalwok ko uu piik che mi eng' atebeetap Kabuuset ne Tiliil, ago ko uu piik che mi eng' atebeetap poorto, ko uu che manyurunik eng' Kristo. 2

3.2:
Heb 5.12-13
Ki aguenak cheego, ma abaenak amitwogik che uueen; amu kitom omuuch; achicha, agot nguno kotom omuuch; 3amu ta omi eng' atebeetap poorto: amu ko uu ye mi kwenung'wong' ng'etkonda ak pooryeet, tos ma mi eng' atebeetap poorto, ak obendoti ko uu piteetap piik? 4
3.4:
1Kor 1.12
Amu ye mwaei age kole, “Aa po Paulo” ak koleen age, “Aa po Apolo,” tos ma oo piik?

5Nee anyun Apolo? Ko nee Paulo? Kiboitiinik che ki koonok oyan; ak ko uu ye ki igoochi Kiptaiyat age tugul. 6

3.6:
Poi 18.4-11,24-28
Ki agoole, kobisi Apolo; ago ki ibit Kamuktaindet. 7Nooto anyun ma tilei kiy ne koolei, anan ne ibisi; ago Kamuktaindet ne ibiiti. 8Nooto anyun, ineendet ne koolei ak ineendet ne ibisi ko agenge: ago tuun nyooru age tugul melektanyi ineegei ko uu poisyennyi. 9Amu ki kiboitinigap Kamuktaindet che kiboisyei kobooto ineendet: okweek ko oo mbareetap Kamuktaindet, kootap Kamuktaindet.

10Ki alumde lumeiywot ko uu teegindet ne oo ne ng'oom, ko uu myeeindap Kamuktaindet ne ki kigoono; ak teechei chiito age paragunnyi. Ago ingoriip chii age tugul ole teektoi eng' paragunnyi. 11Amu ma mi lumeiywot age ne imuuchi chii kolumda kobatee nooto kigelum, nooto Jeso Kristo. 12Ago ngo teech chii paragutap lumeiywondonooto eng' thahabu, fedha, koik che po kamanuutyet ne oo, keetiik, susweek, mobeek; 13tuun king'aanyei poisyetap chii age tugul: amu tuun ng'aanyei peetuut, amu king'aanyei eng' maat; ak kotyem matole teptoi poisyetap chii age tugul. 14Ngo tebi poisyetap chii age tugul ne ki teech paragunnyi, kotaachei ineendet melekto. 15Ngo lal poisyetap chii age tugul, kobetos tuguukyik: ago kisaru ineendet; ago ko uu ye kisaru eng' maat.

16

3.16:
1Kor 6.19; 2Kor 6.16
Mongen okweek ole oo Hekaluut ne po Kamuktaindet, ak menyok Kabuusetap Kamuktaindet? 17Ak ngo ng'em chii age tugul Hekaluut ne po Kamuktaindet, kotun ng'emei `Kamuktaindet ineendet; amu tiliil Hekaluut ne po Kamuktaindet, okweek hekaluunooto.

18Amat koberbergei chii. Ngo pwaati chii age tugul eng' kwenung'wong' kole utaat eng' peetuusyechu, ko ingoek ne perber, si kobiit koek ne utaat. 19

3.19:
Job 5.13
Amu ng'omnateet ne po ng'wonyuni ko perberyo eng' Kamuktaindet. Amu ki kisir keele, “Ineendet ne namei che utaatiin eng' ng'aalseennywa;” 20
3.20:
T.Kal 94.11
ak kogeny, “Ingen Kiptaiyat kabwaatutigap che utaatiin, kole puch.” 21Nooto anyun amat koloskei chii eng' piik. Amu tuguuk tugul ko chekwok; 22ngo Paulo, anan Apolo, anan Kepha, anan meet, anan tuguuk che miitei, anan tuguuk che pwoonei; tugul ko chekwok; 23ak oo po Kristo; ak Kristo ko po Kamuktaindet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]