Revised Kalenjin Bible (KAPR)
8

Tuguuk che kieng'jin kanamonik

81Nguno anyun agobo tuguuk che kieng'jin kanamonik: kingen keele ki tinyei acheek tugul naet. Menei naet, ago teeksei chamyet. 2Ngo leen chii age tugul ingen kiy age tugul, ko tomo konai ko uu ye kanyool konai; 3ago ngo chamei chii age tugul Kamuktaindet, konaat chiichooto eng' ineendet.

4Nooto anyun eng' ameet ne po tuguuk che kieng'jin kanamonik, kingen keele ma mi kanamwet ne kiy eng' ng'wony, ama mi Kamuktaindet age kobatee agenge. 5Amu agot nganda miitei che keguure kamuktaik, ngo eng' kipsengwet, anan eng' ng'wony; ko uu ye miitei kamuktaik che chaang', ak kiptainik che chaang'; 6ago eng' acheek komiitei Kamuktaindet agenge, ineendet Kwanda, ne punu tuguuk tugul ak acheek eng' ineendet; ak Kiptaiyat agenge, Jeso Kristo, ne mi tuguuk tugul amu ineendet, ak acheek eng' ineendet.

7Ago ma mi naonooto eng' piik tugul: ago ko uu ye ki konerta alak kanamonik agoi nguno, koamei ko uu kiit ne kagieng'ji kanamwet; ak murwoniitu kabwaatennywa ne nyalulat. 8Ago amitwogik koma kiit ne imutech keriikyi Kamuktaindet: anan ngo ma ki amisye, ko mararwech kiy; anan, ngeamisye, ko matesak kiy.

9Ago oriipkei si ma ek kanagutyet kimnatoning'wong' eng' che nyalulyotin. 10Amu ngo keerin chii inyee ne itinye naet, iamisyei eng' Hekaluut ne po kanamwet, ko tos manyiganitu kabwaatennyi, ngot ko nyalulat, kot koam tuguuk che kieng'jin kanamonik? 11Ak lusei ineendet ne nyalulat amu naeng'ung', ineendet tupchet ne ki mechi Kristo. 12Ak uu nooto anyun, ye koyachini tengek tupchosyek, ak oguoteni kabwaatennywa ne nyalulat, ko koyachi tengek Kristo. 13Nooto anyun, ngot konachi amitwogik ne kitupche, koma aame panyeek agoi, si ma nach ne kitupche.

9

Imandap kayooktoindet

91Tos ma atyagat? Ma aa kayooktoindet? Tos ki ma ageer Jeso Kiptaiyandennyo? Tos ma oo poisyennyu okweek eng' Kiptaiyat? 2Ak ngot koma aa kayooktoindet eng' alak, ko aa kayooktoindet eng' okweek: amu ng'ooksetap kayooktoinatennyu ko okweek eng' Kiptaiyat.

3Niito anyun ne asaruunegei eng' icheeget che kina. 4Tos ma ki tinyei kimnateet keam ak kee? 5Tos ma ki tinyei kimnateet kimutate osotyot ne iyanaat, ko uu alak che kiyooktoi, ak tupchosyek che po Kiptaiyat, ak Kepha? 6Anan aneege kityo ak Barnaba, che ma ki tinyei kimnateet kebagaakte poisyet? 7Tos ng'oo asigarindet ne poisyee tuguukyik? Ng'oo ne minei logoek, ne ma amei logoekyik? Anan ng'oo ne iyagi akweet, ama luei cheego che po akweet?

8Tos amwae tuguuchu ko uu piteetap piik? Anan ma mwaei agine Ng'atuutyet chooto? 9

9.9:
NKNg'a 25.4; 1Tim 5.18
Amu ki kisir eng' Ng'atuutyetap Musa keele, Amerat kutitap eito ye tyechei peek koborye. Tos ibwaati Kamuktaindet miising' agobo eiik, 10anan mwaei kityo amu acheek? Ee, ki kisir amu acheek: amu ineendet ne ibatisyei, ko nyolu kobatis eng' kamang'unet, ak ineendet ne porei koboorei komang'u kole sige kiy. 11
9.11:
Rom 15.27
Ngo ki kigooljok tuguugap saboondo, ko tos kiy ne oo ngeges tuguukwok che po poorto? 12Ngot kotinyei piik alak yamdaet eng' kamugoniito koboiywok, ko tos ma kisiirtoot? Ago ma kiboisyee acheek kamugoniito; ago kimuitoi eng' tuguuk tugul, si ma ki kirinde logoiywek che myach che po Kristo. 13
9.13:
NKNg'a 18.1
Tos mongen ole icheeget che poisyei agobo tuguuk che tiliileen koamei tuguuk che po Hekaluut, ak icheeget che riibei kaptisisyet kotinyei kebebertanywa kobooto kaptisisyet? 14
9.14:
Mat 10.10; Luk 10.7
Ki ng'at ko uu nooto Kiptaiyat kole icheeget che amdaati logoiywek che myach kosaptos eng' logoiywek che myach.

15Ago tomo aboisyee tuguuchooto agot agenge: ama sire tuguuchu ale keyaiywo ko uu nooto: amu kata kaigai ame kosiir kowal chii toroornatennyu koek puch. 16Amu ngaamde logoiywek che myach, koma tinye kiy ne alasunegei; amu kanyool ayai ko uu nooto; Pwo eng' anee ngot koma amde logoiywek che myach. 17Amu ye ayai ni eng' magennyu aneege, atinye melekto: ago ngo ma po magennyu aneege, atinye riipseet ne ki kiyanwa. 18Nee anyun melektanyu? Nooto ko ni, ye aamdoi logoiywek che myach, ayae logoiywechooto myach koek ne ma pooto melekto, si ma poisyee kamugennyu miising' eng' logoiywek che myach.

19Agot ngo ki atyagat eng' piik tugul, ko ki ayaige aek ne rataat agobo tugul, si kobiit anyoor che siirtoot. 20Ak eng' Yahudik, ko ki aige Yahudyot, si kobiit anyoor Yahudik; eng' icheeget che mi eng' Ng'atuutyet, ko ki aige agane ne mi eng' Ng'atuutyet, ama keele ami aneendet eng' Ng'atuutyet, ago si kobiit anyoor icheeget che mi eng' Ng'atuutyet; 21eng' icheeget che ma mi eng' Ng'atuutik, ko ki aige agane chii ne ma mi Ng'atuutik, ma keele ma mi eng' Ng'atuutik eng' Kamuktaindet, ago ami eng' Ng'atuutik eng' Kristo, si anyoor icheek che ma mi eng' Ng'atuutik. 22Eng' che nyalulyotin ki aegu anee ne nyalulat, si tamangap anyooru che nyalulyotin: ki aegu tuguuk tugul eng' piik tugul, tamangap amuuch asar alak eng' ooreet age tugul.

23Ak ayae tuguuk tugul amu logoiywek che myach, si kobiit anyoor yamdaet eng' chooto. 24Mongen ole icheeget che ibelegei eng' labatet korwaei tugul, ago agenge ne nyooru konunet? Orwai anyun, si onyooru. 25Ak chii age tugul ne igiilegei eng' ureryosyek, koriibegei eng' tuguuk tugul. Yaei anyun icheek nooto si konyoor kuutweet ne ng'emaksei; ago acheek ko ne ma ng'emaksei. 26Alabati anyun ko uu nooto, ma ko uu ne tinyei saget, ayae anyun kabeletapkei ko uu nooto, ma ko uu chii ne pirei ola puch: 27ago abire poortanyu, ak abou ineendet: si ma ye kaamji piik alak, kotun keesia.

10

Kiteu kobun sabeetap piigap Israel

101

10.1:
Kom 13.21-22; 14.22-29
Ma mache anyun, che kitupche, ale oegu che mongen, ole ki miitei kwanisyekyok tugul ng'wonyutap pooldet, ak ki pun tugul nyanjet: 2ak ki kibatisanji tugul Musa eng' pooldet ak eng' nyanjet; 3
10.3:
Kom 16.35
ak ki am tugul amdit agenge ne po saboon; 4
10.4:
Kom 17.6; Kai 20.11
ak kiee tugul eet agenge ne po saboon: amu kiee tugul eng' rwandet ne po saboon ne ki isubi icheek: ak rwandanooto ko ki Kristo. 5
10.5:
Kai 14.29-30
Ago ki ma paibaitune miising' Kamuktaindet che chaang' eng' icheek: amu ki kiserta eng' surkwen.

6

10.6:
Kai 11.4
Ki ek tuguuchu anyun kaboorunoikyok, si ma kimakyigei tuguuk che yaacheen, ko uu ye kimakyigei icheek miising'. 7
10.7:
Kom 32.6
Amoegu che saaei kanamonik, ko uu alak eng' icheek; ko uu ye ki kisir keele, Ki tep ng'wony piik koamis ak koe, ak kong'eetyo kourerenso. 8
10.8:
Kai 25.1-18
Amongesokse, ko uu ye ki yai alak eng' icheek, ak ki ibutyo eng' peetuut agenge eliphuusyek tiptemu ak somok. 9
10.9:
Kai 21.5-6
Anan ketyem Kiptaiyat, ko uu ye kityem alak eng' icheek, ak ki par erenook. 10
10.10:
Kai 16.41-49
Amat ong'unyng'ung'se, ko uu ye ki ing'unyng'ung'so alak eng' icheek, ak ki pek eng' ng'emindet.

11Ki yaak anyun tuguuchuuto eng' icheek si koek kaboorunet; ak ki kisir agobo kateunennyo, acheek che kagonyonjech kagesunetap kenyiisyek. 12Nooto anyun ingoriipkei si ma ibut, ineendet ne ibwaati kole tononi. 13Ki ma namak yoomseet kobatee nooto ne imuuchi komuitae chii tugul; ago po iman Kamuktaindet ne ma chamdook keyomak kosiir ne tee ne omuuchi; ago kobooto yoomsonooto koyaei agine ooreet ne ochilile, si kobiit omuuch omuite.

14Nooto anyun, chamanikyuk, omwee piteetap kanamonik. 15Ang'alaali ko uu ye ang'alaaljini piik che ng'oomen; obesye kiit ne amwae. 16

10.16:
Mat 26.26-28; Mar 14.22-24; Luk 22.19-20
Kigombetap kaberuret ne kiberuuri, ko tos ma yamdaet ne po korotiigap Kristo? Magatyat ne kibuutuli, ko tos ma yamdaet ne po poortap Kristo? 17Amu acheek che ki piik che chaang', ko ki magatyat agenge, poorto agenge: amu ki ame acheek tugul magatyat agenge. 18
10.18:
A.La 7.6
Ogeer Israel o eng' atebeetap poorto: tos ma tinyei yamdaet ak kaptisisyet icheek che amei tiseiywek? 19Amwae nee anyun? Amwa ale kiy kiit ne kieng'jin kanamonik, anan tos kiy kanamwet? 20
10.20:
NKNg'a 32.17
Ago tuguuk che igoitoi Pororyosyek koeng'jin oik, ago ma Kamuktaindet: ama mache koyai yamdaet ak oik. 21Momuuchi oee kigombetap Kiptaiyat, ak kigombetap oik: momuuchi oam eng' meesetap Kiptaiyat, ak meesetap oik. 22
10.22:
NKNg'a 32.21
Anan kitache Kiptaiyat konyoor ng'etkong'? Tos ki kiimeen kosiir ineendet?

Katyaknatetap kayanindet

23

10.23:
1Kor 6.12
Chamdaat tuguuk tugul; ago ma tuguuk tugul che nyolu. Chamdaat tuguuk tugul; ago ma tuguuk tugul che teeksei. 24Amat kocheeng'jigei chii chechiik ineegei, ago che po chiitap kokwennyi.

25Kiy age tugul ne ki aldoi eng' kabany, oam, amoteep kiy amu kabwaatet; 26

10.26:
T.Kal 24.1
amu po Kiptaiyat ng'wony, ak che nyiitaat ng'wony. 27Ngo kuurok age eng' icheek che ma iyani kole kobaak, ak omache obe; ko kiy age tugul anyun ne kaginde taing'wong', oam, amat oteep amu kabwaatet: 28ago ngo leenjok chii age tugul, Kagigoitoi kii koek tiseiywot, ko moam, amu ineendet ne kagoboorun, ak amu kabwaatet: 29kabwaatet ne amwae koma neng'ung', ago po age; amu kalya si korwookyi katyagennyu kabwaatet age? 30Ngot ataache eng' kongoi, ko amu nee si kemwaitaena yaityo eng' kiit ne koagoite kongoi?

31Nooto anyun ngo ame, anan ngo ee, anan agot eng' kiy age tugul ne oyae, oyai tugul otoroori Kamuktaindet. 32Amonach Yahudik anan Yunanik, anan kanisetap Kamuktaindet: 33agot ko uu ye aboiboi piik tugul eng' tuguuk tugul, ma cheeng'e kelunennyu aneege, ago kelunet ne po che chaang', si kobiit kesar.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]