Revised Kalenjin Bible (KAPR)
12

Koegu Rehoboam laitoryat

(2A.Pet 10:1-19)

121Ki wo `Rehoboam Shekem, amu ki pa Israel tugul olooto koeet ineendet koek laitoryat. 2Kingo kas Jeroboam weeriitap Nebat agobo nooto, (amu kita komi Misiri, ole kiga mwechi komwee Laitoryat Solomon) 3konyo Jeroboam ak tuiyet tugul ne po Israel ak kong'alaalji Rehoboam koleenji, 4“Ki yai kwandang'ung' choginnyo kouuit. Ara anyun, yai kowisisiit otisyet ne uui ne ki po kwandang'ung', ak choginnyi ne nyigiis ne ki indeech, si keotin.” 5Ki leenji ineendet, “Oba peetuusyek somok, si tuun obwa kogeny.” Koba anyun piik. 6Ki ng'alaal Laitoryat Rehoboam ak poisyek che ki cham kotonondos eng' taitap Solomon kwandanyi, ye kita kosabei, koleenji, “Nee ng'olyoot ne omwaiwo ne awoljini pichu?” 7Ki mwachi icheek koleenji, “Ngot iegu otwogindetap pichu ra, ak ioot icheek ak imwachi icheek ng'aleek che myach, koegu anyun icheek otwogiguk koigeny.”

8Ago ki pagaakta ng'aleegap poisyek che ki mwachi ineendet ak kong'alaal ak neranik che kinerchindos tugul, che kitonondos eng' tainnyi. 9Ki leenji icheek, “Nee ng'olyoot ne omwae okweek si kobiit kewolji pichu, kong'alaalwo koleenjo, Yai kowisisiit chogit ne ki indeech kwandang'ung?” 10Ki mwachi neranik che kinerchindos ak ineendet, koleenji, “Imwachini ko uu ni pichu kong'alaalun, ileenjini, Ki yai kwandang'ung' choginnyo konyigiisit, ago iyaiywech kowisisiit imwachini ko uu ni, ileenjini, ‘Nyigiis mornennyu ne ming'in ne po euut kosiir suetap abba. 11Ko uu ye ki koonok abba chogit ne nyigiis, atese choging'wong'. Ki itigonenok abba kipcharitisyek, ago atigoonenok melmelwek.’ ”

12Kobwa anyun Jeroboam ak piik tugul ole mi Rehoboam eng' peetuutap somok, ko uu ye kiga ng'at laitoryat kole, “Obwa kogeny eng' peetuutap somok.” 13Ki wolji `laitoryat piik eng' koroomnateet. Ki meto ng'aleegap poisyek che ki kamwachi ineendet, 14ak kong'alaalji icheek ko uu ye ki kamwachi neranik, koleenji, “Ki yai abba choging'wong' konyigiisit, ago atese choging'wong'. Ki itigonenok abba kipcharitisyek, ago atigoonenok melmelwek.”

15Ma kasyi anyun laitoryat pichooto, amu ki kiit ne ki punu Kamuktaindet ne Toroor, si kobiit kosulda ng'olyoondennyi, ne ki mwa Kamuktaindet ne Toroor eng' Ahija Silonindet, komwachi Jeroboam weeriitap Nebat.

16

12.16:
2Sam 20.1
Kingo keer Israel tugul kole, mata kogasyi laitoryat icheek, kowolji piik laitoryat, koleenji,

“Nee kebeberta ne ketinye eng' Daudi?

Ama ki tinyei poroteet eng' weeriitap Jesse.

Oba emaisyekwok, ee Israel!

Riip koong'ung' anyun Daudi.”

Koba Israel anyun emaisyekwak. 17Ago ki laitorane `Rehoboam piigap Israel che ki menyei nganasoogap Judah. 18Ki iyookto anyun `Rehoboam Adoram, ne ki pou aisuruut, ak kilach Israel tugul ineendet eng' koik, kome. Kichaakta Laitoryat Rehoboam kolaany chepkichutinnyi ak komwei kwo Jerusalem. 19Kongelelji anyun Israel kootap Daudi agoi ra.

20Kingo kas Israel tugul kole kogoweek Jeroboam, koyookto keguur konyo tuiyet, ak koyai ineendet koek laitoryat koboi Israel tugul. Ki ma piit ne ki isup kootap Daudi, kobatee ooreetap Judah kityo.

Ng'aleegap Semaiah

(2A.Pet 11:1-4)

21Kingo it `Rehoboam Jerusalem, koyum kootap Judah tugul, kobooto ooreetap Benjamin, murenik eliphuusyek pogol ak tamanwogik sisiit che po lugeet, che ki kilewen, kobargei ak kootap Israel, koweekyi laitornatet Rehoboam weeriitap Solomon. 22Ago ki nyoonji `ng'olyootap Kamuktaindet Semaiah chiitap Kamuktaindet, koleenji, 23“Ng'alaalji Rehoboam weeriitap Solomon, laitoryatap Judah ak koot tugul ne po Judah ak ne po Benjamin, ak piik che kong'et, ileenji, 24‘Kamwa Kamuktaindet ne Toroor kole: Amobe otogoste, anan obargei ak tupchosyekwok piigap Israel. Ingoweek chii tugul kwo koonnyi, amu punwa kii.’ ” Kogas iit anyun icheek ng'olyootap Kamuktaindet ne Toroor, ak koweek koba kaa ko uu ng'olyoondennyi.

Tengektap Jeroboam

25Koteech anyun Jeroboam Shekem eng' emetap tuloonook ne po Ephraim, ak komeny olooto. Ki wo eng' olooto kwo koteech Penuel. 26Ki le Jeroboam eng' muguleldanyi, “Weekyingei anyun nguno laitornatet kootap Daudi. 27Ngot koba pichu kotogosta kogoito tiseiywek eng' kootap Kamuktaindet ne Toroor eng' Jerusalem, koweekyingei mugulelwegap pichu kogeny kiptaiyannywa, ne ineendet ko Rehoboam laitoryatap Judah. Kobara icheek ak koweekyigei Rehoboam laitoryatap Judah.”

28

12.28:
Kom 32.4
Korwooch anyun laitoryat ye ibata kotany itoonwek aeng' che po moek che po thahabu; ak ki leenji icheek, “Uui kot eng' okweek obe otogoste Jerusalem. Ee Israel ogeer kanamonikwok o, che ki imutwak otogosu eng' emetap Misiri.” 29Ki inde age Bethel ak konde age Dan. 30Ki ek kiito tengekto, amu ki pa piik kogutuny eng' taitap age tugul, agot eng' Dan. 31Ki teech kooriigap komoswek che torooreen ak ki lewen tisiik eng' piik tugul che ki ma ko po weeriigap Lawiik. 32
12.32-33:
A.La 23.33-34
Ki ng'at Jeroboam keyai igoorto eng' arawetap sisiit eng' peetuutap taman ak muut, ko uu igoorto ne ki mi Judah, ak kitogosta ye mi kapkorosuut. Ki yai ko uu nooto eng' Bethel, koeng'ji moek che kiga kotany. Ki inde Bethel tisiik che po komoswek che torooreen che kiga yai. 33Ki togosta kwo kapkorosuut ne kiga koyai eng' Bethel, eng' peetuutap taman ak muut, eng' arawetap sisiit, eng' arawet ne kiga chop ineegei eng' muguleldanyi, ak ki ng'at keyai. Ki inde igoorto ne po piigap Israel, ak kotogosta kwo kapkorosuut, kobeel nyamdutik.

13

Piretap maotyot ne ma kas iit

131Eng' peetuut age ko kitononi Jeroboam eng' ye neegitee kapkorosuut kobeelei nyamdutik. Ki nyo chiitap Kamuktaindet ne Toroor eng' Judah eng' ng'olyootap Kamuktaindet ne Toroor konyo Bethel. 2

13.2:
2Lai 23.15-16
Ak kiwaage ineendet kapkorosuut eng' ng'olyootap Kamuktaindet ne Toroor kole, “Ee, kapkorosuni, kapkorosuni, kamwa Kamuktaindet ne Toroor kole, ‘Keero, tuun kisikyin lakweet kootap Daudi, ne kiguure kainennyi Josiah; ak kogoitoenen ineendet tisiigap komoswek che torooreen, che peelenen nyamdutik, ak tuun peelei eng' inyee kawegap piik.’ ” 3Ki iboor kaboorunet eng' peetuunooto kole, “Ni kaboorunet ne kamwa Kamuktaindet ne Toroor: keero, petoksei kapkorosuut, ak kotumdagei oreek che mi paragunnyi.”

4Kingo kas laitoryat ng'aleegap chiitap Kamuktaindet, ne kiwaage kapkorosuut eng' Bethel, kochuul anyun Jeroboam eunnyi eng' kapkorosuut kong'werer kole, “Onam ineendet!” Ak ki yaam eunooto kiga chuul, ne mata komuuch koaruny kogeny. 5Kobetak kapkorosuut agine, ak kotumdagei oreek ko uu kaboorunet ne kagagobor chiitap Kamuktaindet eng' ng'olyootap Kamuktaindet ne Toroor. 6Ki wolji `laitoryat chiitap Kamuktaindet koleenji, “Igaigai Kamuktaindet ne Toroor Kamuktaindeng'ung' ak isaiywa, si koweek eunnyu kogeny kosap.” Ak ki sa `chiitap Kamuktaindet ne po Toroornatet, ak ki week eutap laitoryat kogeny kosap ak koigei kiit ne ka uu eng' tai. 7Ki leenji laitoryat chiitap Kamuktaindet, “Nyoo keebe kaa, iwe imuuny, ak agoonin melekto.” 8Ago ki leenji `chiitap Kamuktaindet laitoryat, “Agot ngot igoono kebebertap koong'ung', koma kibendi ko tuwai, ama amisyei anan aee peek eng' olito. 9Amu kang'ata ng'olyootap Kamuktaindet ne Toroor ko uu nooto, kole, ‘Amat iam amit anan iee peek, anan iweegegei ooreet ne kebunu.’ ” 10Kwo anyun kobun ooreet age, ma weegegei ooreet ne ki punu konyonei Bethel.

Chiitap Kamuktaindet ne Toroor ak maotyot

11Ki menyei maotyot ne oos nganaseetap Bethel, ne ki nyo age eng' weeriikyik komwachi ineendet poisyonik tugul che kiga yai chiitap Kamuktaindet peetuunooto eng' Bethel. Ki mwachi kwandanywa ng'aleechooto ak icheek chooto che ki kamwachi laitoryat. 12Ki leenji kwandanywa icheek, “Kabun ano?” Ak kiga keer weeriikyik ooreet ne kabun chiitap Kamuktaindet ne ki punu Judah. 13Ara ki leenji `ineendet weeriikyik, “Oitoiwo sigiryet.” Koiitoochi ineendet anyun sigiryet, ak ki laany. 14Ki isup chiitap Kamuktaindet ak kinyoor kotebyei eng' keetit keel. Ki leenji ineendet, “Tos, ii chiitap Kamuktaindet no kebunu Judah?” Ak ki le, “Aa ineendet.” 15Koleenji anyun ineendet, “Nyoo keebe kaa tuwai, iamisye.” 16Ak ki leenji ineendet, “Ma muuchi keweigei tuwai, anan keebe ko tuwai, ama ame amit anan kee peek tuwai eng' oli, 17amu kagimwaiwo eng' ng'olyootap Kamuktaindet ne Toroor keele, ‘Amat iam amit anan iee peek eng' olooto, anan iweegegei ooreet ne kebune.’ ” 18Ak ki leenji ineendet, “Aa maotyot agine ko uu inyee, ak kang'alaalwo malaikaiyat eng' ng'olyootap Kamuktaindet ne Toroor kole, ‘Imutu ineendet konyo koong'ung', si koamis ak koe peek.’ ” Ago ki mwachi lembech. 19Koweek anyun ak ineendet, kwo koamis eng' koonnyi ak koe peek.

20Ye kita koamisyei, konyonji ng'olyootap Kamuktaindet ne Toroor maotyondonooto ki imutu ineendet koweek. 21Ki mwachi eng' kutit ne oo chiitap Kamuktaindet ne ki punu Judah, koleenji, “Kamwa Kamuktaindet ne Toroor ko uu ni, kole, ‘Amu kaibistoe ng'olyootap Kamuktaindet ne Toroor, ama iriip ng'atuutyetap Kamuktaindet ne Toroor Kamuktaindeng'ung' ne kang'atiin, 22ago keweigei ak iamisye ak iee peek eng' ole kagamwaun koleenjin, Amat iam amit anan iee peek; ma itei muustong'ung' kereritap kwanisyeguk.’ ” 23Kingo kagoamis ak koeeiso, koiitoochi ineendet sigiryet maotyondoni kaweechi ineendet.

24Ak kingo kakwo, konyoor ng'etundo ineendet eng' ooreet, ak kobar ineendet. Ki kiwiirchi muustonyi ooreet ak kitonone sigiryet ak ng'etundo agine ye neegitee muusto. 25Kisiirto piik eng' yooto, ak kogeer muusto ne kagiwiirchi ooreet, ak ng'etundo ne kitononi eng' ye neegitee muusto. Ki pa komwaita eng' nganaseet ole ki menyei maotyondonooto oos. 26Kingo kas maotyondonooto kole, “Ineendet ko chiitap Kamuktaindet, ne kagabistoe ng'olyootap Kamuktaindet ne Toroor: ko nooto anyun, kaigoochi `Kamuktaindet ne Toroor ineendet ng'etundo, ne kagereer ineendet ak kobar, ko uu ng'olyootap Kamuktaindet ne Toroor ne ki kamwachi ineendet.” 27Ki mwachi weeriikyik koleenji, “Oitoiwo sigiryet.” Ak kiito. 28Ki wo anyun ak konyoor muustonyi ko kagiwiirchi ooreet, ak sigiryet ak ng'etundo kotonondos eng' ye neegitee muusto. Ma am ng'etundo muusto, anan kobar sigiryet. 29Kisut anyun maotyondonooto muustap chiitap Kamuktaindet, konde sigiryet parak ak koip koweekta, ak konyo nganaseetap maotyondonooto oos, konyo koriir, ak kotup ineendet. 30Ki inde musoto kererinnyi, ak koriirchi ineendet, kole, “Pwo! Tupchennyu!” 31Kingo kagotup ineendet, komwachi weeriikyik koleenji, “Tuun kaamee, otupcha kererini kagitupchi chiitap Kamuktaindet; onde kawekyuk korupkei ak chechiik. 32Amu isuldoi iman mwaet ne ki mwa eng' ng'olyootap Kamuktaindet ne Toroor, ne kawaage kapkorosuut eng' Bethel, ak kooriik tugul che po komoswek che torooreen che mi nganasoogap Samaria.”

33Kingo pata niito, koma week Jeroboam eng' ooreennyi ne ya, ago ki yai kogeny tisiik eng' piik tugul che po komoswek che torooreen. Ki itabaan age tugul ne kimach, si kobiit tisiik che po komoswek che torooreen. 34Ki ek kii tengekto eng' kootap Jeroboam, si koisto kobet ak kong'em kogeskei eng' ng'wony.

14

Kirwoogyin kootap Jeroboam

141Kimyan eng' peetuusyechooto Abijah weeriitap Jeroboam. 2Ki leenji `Jeroboam osotyonnyi, “Asoomin ale, ng'eet ak iwalgei si ma kinain keele ii osotyotap Jeroboam, yeityo iwe Shiloh. Mi olooto maotyot Ahija, ne ki mwa agobo anee kole aegu laitoryat abou pichu. 3Iip magatiinik taman, magatiinik che mengeechen ak chuboit ne mi kumyat, ak iwe oldanyi. Si komwaun ineendet kiit ne piitu eng' lakwani.”

4Ki yai ko uu nooto osotyotap Jeroboam, king'eet, kwo Shiloh, ak ki it kootap Ahija. Ki mata kogeerei kiy Ahija; amu kiga kogor eng' osindanyi. 5Ki leenji Kamuktaindet ne Toroor Ahija, “Keero, nyoonei osotyotap Jeroboam konyo koteebenen agobo weeriinnyi; amu myani. Imwachini ko uu ni ak ko uu ni. Ye iit ko ineendet, koyaegei koigei kwondo age.” 6Ara kingo kas Ahija cheetap keelyekyik, ko kait kurgat, koleenji, “Nyoo ko, osotyotap Jeroboam. Amu nee si iyaigei iigei age? Kagiyokwo aibun ng'aleek che pichiien. 7Ui, ileenji Jeroboam, ‘Kamwa ko uu ni Kamuktaindet ne Toroor, Kamuktaindetap Israel: ki aeetin eng' pichu ak ayain iegu pounindetap piikyuk Israel; 8ak arep laitornatet eng' kootap Daudi, ak agoonin. Ago ma iigei otwogindennyu Daudi, ne ki riip ng'atuutikyuk, kosuba eng' muguleldanyi komugul, koyai ne myee eng' tainnyu. 9Ago koiyai yaityet kosiir piik tugul che ki indounenen. Koiyachigei kanamonik alak, che kitanyi, itacha anereech, ki isasa ak ituktocha patai. 10

14.10:
1Lai 15.29
Ara anyun aipchini yaityet kootap Jeroboam amu nooto. Aistoe Jeroboam lakweet age tugul ne weeriit, ne ki kigerchi ko anan ne wendoti eng' Israel. Abuuktoi kogestagei kootap Jeroboam, ko uu ye peleei chiito pusagaryek, kot kogestagei. 11Chiito age tugul ne po Jeroboam ne meei eng' nganaseet, koamei sesenik ak ne meechin timiin, koamei toriitik che po parak. Amu kagomwa Kamuktaindet ne Toroor.’ ”

12Koleenji `Ahija osotyotap Jeroboam, “Ng'eet ui koong'ung'. Ye tyech keelyeguk nganaseet, komee lakweet. 13Rirchi Israel tugul ineendet ak kotup. Ineendet ineegei ne po kap Jeroboam ne wendi kererit, amu koginyoorchi ineendet kiit ne myee eng' Kamuktaindet ne Toroor, Kamuktaindetap Israel, eng' kootap Jeroboam. 14Tuun lewenjingei `Kamuktaindet ne Toroor laitoryat ne pou Israel, ne tuun parei kootap Jeroboam kogeskei eng' peetuunooto. Au? Agot nguno. 15Kong'eete nguno kobarei Kamuktaindet ne Toroor Israel, ko uu ye kitumdumi morong'yot eng' peek. Itutu `ineendet Israel eng' emoni karaaran, ne ki igoochi kwanisyekwak, ak koseer kosiir aineet pitoniin; amu kiyachigei Aserik ak kotaach Kamuktaindet ne Toroor. 16Metoi ineendet Israel amu tengekwogigap Jeroboam, che ki yai ineendet, che ki ibeete Israel si koyai tengekto.”

17Ki ng'eet anyun osotyotap Jeroboam ak kwo agoi koit Tirzah. Kingo it ye po tugatukyetap kurgeetap koot, kome lakweet. 18Kitup Israel tugul ineendet ak koriiryo icheek agobo ineendet, ko uu ng'olyootap Kamuktaindet ne Toroor, ne ki mwa eng' otwogindennyi Ahija maotyot.

Meetap Jeroboam

19Poisyonik che ng'etunotiin che po Jeroboam, ole kiyaita lugeet ak ole ki laitoranda, ko ki kisirchi kitabuutap ateptap peetuusyek ne po laitorinigap Israel. 20Ki laitoran Jeroboam kenyiisyek tiptem ak aeng', yeityo koru kobooto kwanisyekyik. Ki laitoran Nadap weeriinnyi kogeer ineendet.

Koegu Rehoboam laitoryatap Judah

(2A.Pet 11:5-12:15)

21Ki laitoran Rehoboam weeriitap Solomon eng' Judah. Ki po Rehoboam kenyiisyek artam ak agenge ye ki tau kolaitorani, ak ki laitoran kenyiisyek taman ak tisap eng' Jerusalem, nganaseet ne ki lewen Kamuktaindet ne Toroor eng' ortinwek tugul che po Israel, si konde kainennyi yooto. Ki kiguure kametap Rehoboam Naamah che po Amonik.

22Ki yai piigap Judah ne ya eng' taitap Kamuktaindet ne Toroor. Ki igoochi ineendet ng'etkonda eng' tengekwogikwak kosiir tugul che kiga koyai kwanisyekwak. 23

14.23:
2Lai 17.9-10
Amu kiteekyigei ak icheek komoswek che torooreen, tolochik ak Aserik eng' tulweet age tugul ne kooi ak eng' keetit keel eng' keetit age tugul ne tuon. 24
14.24:
NKNg'a 23.17
Ki mi sodomik ak icheek, ak ki yai tuguuk tugul che kiwechei che po pororyosyek che kiga koon Kamuktaindet ne Toroor eng' taitap piigap Israel.

25

14.25:
2A.Pet 12.2-8
Eng' kenyiitap muut ne po Laitoryat Rehoboam, ko ki togos Sisak laitoryatap Misiri konyo kobookyi Jerusalem. 26
14.26:
1Lai 10.16-17; 2A.Pet 9.15-16
Ki ip konoraigap kootap Kamuktaindet ne Toroor kobooto konoraigap kootap laitoryat. Ki ip tugul, kobooto long'onik tugul che po thahabu che ki yai Solomon. 27Ki yai Rehoboam long'onik che po sugunonik kogeere chooto, ak kogoochi kiptainigap riibiik che ki riibei kurgeetap kootap laitoryat. 28Ye kiwendi laitoryat kootap Kamuktaindet ne Toroor, ko ki ibei riibindet long'onichooto, yeityo koweech kobwa kootap riibiik.

29Poisyonik che ng'etunotiin che po Rehoboam, ak tuguuk tugul che ki yai, ko tos ma ki sirchi kitabuutap ateptap peetuusyek ne po laitorinigap Judah? 30Ki cham komi lugeet eng' kwenutap Rehoboam ak Jeroboam kotugul. 31Ki ru anyun Rehoboam kobooto kwanisyekyik, ak ki kitupchi nganaseetap Daudi kobooto kwanisyekyik. Ki kiguure kamet Naamah cheptap Amonik. Ak ki laitoran Abijam weeriinnyi kogeer ineendet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]