Revised Kalenjin Bible (KAPR)
3

Koleweni Solomon utaatyet

(2A.Pet 1:3-12)

31Ki yaigei Solomon koek tilyonut ak Pharaoh laitoryatap Misiri, ki itun cheptap Pharaoh ak komut konyo nganaseetap Daudi, kot kogees teekseetap koonnyi, kootap Kamuktaindet ne Toroor ak irimeet ne kiyiem Jerusalem.

2Ago kienyei piik tiseiywek eng' komoswek che torooreen, amu ki ma komi ko ne kiga kiteekyi kainetap Kamuktaindet ne Toroor agoi peetuusyechooto. 3Ki cham `Solomon Kamuktaindet ne Toroor, kowendote ng'atuutigap Daudi kwandanyi; ago kienyei tiseiywek ak kobeelei nyamdutik eng' komoswek che torooreen.

4Ki wo `laitoryat Gibeon kwo koeny tiseiywek eng' olooto, amu kitoroor yooto, ole oo; ki igoito Solomon kagoochinoik eliphuut che kibeelei eng' kaptisisyonooto. 5Kimong'ji `Kamuktaindet ne Toroor Solomon eng' Gibeon eng' karwotitoet kemoi. Ki le Kamuktaindet, “Soom kiit ne imache agoonin.” 6Ak ki le Solomon, “Ki iyachi otwogindeng'ung' Daudi abba myeeindo ne oo, ko uu ye kiwendote taing'ung' eng' imanit, ak eng' imanda, ak eng' lititindap muguleldo eng' inyee; ak ki igonorchi ineendet myeini oo, amu ki igoochi ineendet weeriit kotebee ng'echerennyi ne po laitornatet, ko uu ra. 7Ak nguno anyun, ee Kamuktaindet ne Toroor Kamuktaindennyu, ki iyai otwogindeng'ung' koek laitoryat kogeer Daudi abba, ago anee, kota ko aa lakweet ne ming'in; mangen ole amandoitoi ak ole among'undoi. 8Ak mi otwogindeng'ung' kwenutap piiguk che ki ilewen, piik che chaang', che ma kimuuchi kiit anan ko kerar amu chaang'indo. 9Igoochi anyun otwogindeng'ung' muguleldo ne tinyei kaguiyet si korwookyi piiguk, si kobiit abesyo ne myee ak ne ya; amu ng'oo anyun ne imuuchi korwookyi pororyoning'ung'et tagunoot?”

10Ki ibaibai Kiptaiyat ng'olyoondonooto, amu ki soom Solomon kiito. 11Ki leenji `Kamuktaindet ineendet, “Amu kaisoom kii, ama isoomjigei isap keny anan mogornatosyek, ama isoom kebar puuniguk, ago kesoomjigei kaguiyet ibesye kirwooget, 12nguno anyun ko kaayai ko uu ng'olyoondeng'ung'. Kaagoonin muguleldo ne utaat ak kotinyei kaguiyet; ne ki tomo kobiitu age ne ogerge, ama kobiitu age ne ogerge eng' let. 13Kaagoonin agine kiit ne ma isoom, mogornatosyek ak teegisto, ne ma piitu eng' laitorinik ne ogergeitu, eng' peetuusyeguk tugul. 14Ngot iwendotee ortinwekyuk, iriip kayomisutikyuk ak ng'atuutikyuk, ko uu ye kiwendotee Daudi kwandang'ung', atesun anyun kochang'a peetuusyeguk.”

15Kigos anyun Solomon, ak konai kole kaagaa karwotitoet. Ki nyo Jerusalem, ak kotonon eng' taitap moinget ne po arorutyetap Kamuktaindet ne Toroor. Ki igoito kagoochinoik che kibeelei ak kagoochinoigap kaalyeet, ak koyachi igoorto otwogikyik tugul.

16Ki pwa anyun ole mi laitoryat `kwonyiik aeng' che ki chepkugonik, kotononio eng' tainnyi. 17Ki le kwondo age, “Ee kiptaiyandennyu, ki menye ak kwonyi koot agenge; ki asich lakweet kemi tuwai koyooto. 18Ak eng' peetuutap somok ko kaasigisye, kosigiis kwonyi agine. Ki kimi tuwai; ki ma kemi ak too eng' ko, kobatee acheegei aeng' kityo. 19Kime lakweetap kwonyi kemoi, amu kisyep. 20Ki ng'eet kemoi kween ak komut weeriinnyu eng' ye koami kota konuuchi otwogindeng'ung' ne chepto, ak komogonji tegeennyi, yeityo konde lakweennyi ne kagome tegeennyu. 21Ye kanga ng'eet karon ale agoochi lakweet kochuchun, ageer ale kaagaa kagome; ago kanga keer komyee karon, koma weeriinnyu ne kigasich.”

22Ago ki le ne po aeng', “Achicha! Ni kogome ko weeriing'ung' ak ni sabei ko weeriinnyu.” Kitiiyo ko uu nooto anyun eng' taitap laitoryat.

23Ki le anyun laitoryat: Mwaei ni kole, “Weeriinnyu ni sabei, ak weeriing'ung' ni kogome; koleen age, ‘Achicha! Kogome weeriing'ung', weeriinnyu ni sabei.’ ” 24Ki le anyun laitoryat, “Oibwa rotwetap chok!” Ak ki kiipchi laitoryat rotwetap chok. 25Yeityo kole laitoryat, “Opcheune aeng' lakweet ne sabei, si ogoochi kebeber kwondo age, ogoochi kebeber kwondo age.” 26Ki ng'alaalji kwondo ne ki nenyi lakweet ne sabei, laitoryat, amu ki riir moo agobo weeriinnyi, kole, “Ee kiptaiyandennyu, igoochi ineendet lakwani sabei, amat ibar!” Ago ki le age, “Mabunjino, ama punjinin; pchei.” 27Ki wol anyun laitoryat kole, “Ogoochi ne po tai lakwani sabei, matobar, amu ineendet ko kamennyi.”

28Ki kas Israel tugul kirwooget ne ki irwooch laitoryat; ak ki iywei laitoryat, amu ki keer kole mi utaatyetap Kamuktaindet eng' ineendet, si kobiit korwooch.

4

Pounik che toreti laitornatetap Solomon

41Ki Laitoryat Solomon ne ki pou Israel tugul, 2ak chu ko ki pounik che ki tinyei ineendet: Azariah, weeriitap Zadok ko kitisiindet. 3Eliorep ak Ahija weeriigap Shisha ko ki Siriik; Jehoshaphat weeriitap Ahilud ko ki siriindetap tuguuk che piitu. 4Ki pou lugeet Benaiah weeriitap Jehoiada; Zadok ak Abiathar ko kitisiik. 5Azariah weeriitap Nathan, ko ki pou kiptainik; tisiindet Zabud weeriitap Nathan, ko ki ek ineendet chorweetap laitoryat. 6Ki pou Ahishar kootap laitoryat; ak ki pou Adoniram weeriitap Abda aisuruut.

7Ki tinyei Solomon kiptainik taman ak aeng' che ki pou Israel tugul, che ki ipchin laitoryat amitwogik kobooto koonnyi. Ki king'at koip chii age tugul amitwogik eng' arawet eng' kenyiit. 8Chu kainaikwak: Ben-Hur, eng' emetap tuloonoogap Ephraim. 9Ben-Deker, eng' Makaz, Saalbim, Beth-shemesh ak Elon-beth-hanam. 10Ben-Hesed, eng' Arubboth; ki nenyi Soko, ak emet tugul ne po Hepher. 11Ben-Abinadab, eng' Napat-dor tugul; ki itun Tapat cheptap Solomon. 12Baanah weeriitap Ahilud, eng' Taanak ak Megiddo, Beth-shean tugul ne neegitee Zarethan, ne mi atebweetap Jezreel, kobooch Beth-shean agoi Abel-meolah, kot koit pitetap Jokmeam. 13Ben-Geber, eng' Ramoth-gilead; ki chechiik nganasoogap Jair weeriitap Manasseh, che miitei Gilead; ki nenyi agine kooretap Argob, ne mi Bashan, nganasook che eecheen tamanwogik lo che tinyei irimoik ak temeleiywegap sugunonik. 14Ainadap weeriitap Ido, eng' Mahanaim. 15Ahimaaz, eng' Naphtali; ki itun agine Basemath cheptap Solomon. 16Baanah weeriitap Hushi eng' Asher ak Bealoth. 17Jehoshaphat weeriitap Paruah, eng' Issakar. 18Shimei weeriitap Elah, eng' Benjamin. 19Geber weeriitap Uri, eng' emetap Gilead, kooretap Sihon laitoryatap Amorik ak ne po Og laitoryatap Bashan; ak ki kiptaiyat ineegei ne ki mi emonooto.

Laitornatetap Solomon ne kitagunoot

20Ki chaang' Judah ak Israel, ko uu ng'aniek che mi nyanjet eng' chaang'indo, ki amisyei icheek ak koeisei ak koboiboegei. 21

4.21:
Tau 15.18; 2A.Pet 9.26
Ki laitorane Solomon laitornatosyek tugul kobooch aineet agoi emetap Philistik, agoi kiwotetap Misiri. Ki ibu kagoochinoik, ak kootei Solomon eng' peetuusyek tugul che po sabeennyi.

22Ak amitwogigap Solomon che po peetuut agenge ko ki keruutik pogol lo che po peek che ng'ootiin che tambulul che po nganuuk, ak keruutik eliphuut agenge pogol ang'wan che po peek che ng'ootiin; 23eiik taman che akwaen, eiik tiptem che kigetune akwotisyek, keechiirek pogol, koma pooto teweretinik, cheptirgichik, tyong'ik che uu chemnyogosonik ak ngogaik che akwaen. 24Amu ki pou kooret tugul ne po aineet Yufrets, Tiphsah agoi Gaza, kiboi laitorinik tugul che mi aineet komosi. Ki chamdos ak piik che ki mi komoswekyik tugul. 25Ki meng'iis Judah ak Israel eng' chametapkei, ki tebee chii tugul kelutap keetinnyi ne po sabibuk, ak mogoywennyi, kobooch Dan agoi Beer-sheba, eng' peetuusyek tugul che po Solomon. 26

4.26:
1Lai 10.26; 2A.Pet 1.14; 9.25
Ki tinyei Solomon kooriik eliphuusyek artam che po paraisisyegap kariisyekyik, piik eliphuusyek taman ak aeng' che ketei paraisisyek. 27Ki ipchi `kiptainichooto Laitoryat Solomon amitwogik, kobooto tugul che ki amisye meesetap Laitoryat Solomon, ki ipchi chii tugul eng' arawennyi; ma kany korarchi kiy. 28Ki ipchi baale ak icheek ak mobeek che po paraisisyek ak tyong'ik che chepcheben koip kobwa ole mi kiptainik, chii tugul ko uu ye ki king'at.

29Ki igoochi `Kamuktaindet Solomon utaatyet, naet ne oo miising' ak kaguiyet ko uu ng'aniek che mi ngeguutap nyanjet. 30Ki siir utaatyetap Solomon ng'omnatetap piik tugul che po kong'asiis, ak ng'omnateet tugul ne po Misiri. 31

4.31:
T.Kal 89.1
Amu king'oom kosiir piik tugul; kosiir Ethan Ezraindet, Herman, Chalkol, Darda, weeriitap Mahol. Ki yom tagunatennyi pororyosyek tugul che kiga yiem ineendet. 32
4.32:
Kale 1.1; 10.1; 25.1; TyST 1.1
Ki toi ineendet kalewenaik eliphuusyek somok ak tyenwogikyik eliphuut ak muut. 33Ki ng'alaal agobo keetiik, kobooch taragonik che mi Lebanon agoi husop che piitos eng' inaatut. Ki ng'alaal kogeny agobo tyong'ik, toriitik, tuguuk che ichuutegei ng'wony ak njireenik. 34Ki pwa piik eng' pororyosyek tugul kogas utaatyetap Solomon, kobun kaplaitorinik tugul che po ng'wony, che kiga kas agobo ng'omnatennyi.

5

Chobutik ak tuguugap teekseetap Hekaluut

(2A.Pet 2:1-18)

51Ki iyookto Hiram laitoryatap Tyro otwogikyik koba kap Solomon, ye kingo kagogas keele ki kiil ineendet koek laitoryat kogeer kwandanyi ak amu ki chamei Hiram Daudi eng' peetuusyek tugul. 2Ki iyookto `Solomon piik koba kap Hiram koleenji, 3“Ingen ile ki ma imuuch abba Daudi koteekyi koot kainetap Kamuktaindet ne Toroor Kamuktaindennyi amu lugoosyek che kiga yiem ineendet, che ki mi komoswek tugul, kot konde `Kamuktaindet ne Toroor icheek keldebesaigap keelyekyik. 4Ago nguno ko kogogoono Kamuktaindet ne Toroor Kamuktaindennyu kamuung'et eng' komosta age tugul; ma mi puunyoot anan ko kiy ne ya ne piitu. 5

5.5:
2Sam 7.12-13; 1A.Pet 17.11-12
Ara kaabegechi ateekyi koot kainetap Kamuktaindet ne Toroor Kamuktaindennyu, ko uu ye ki mwachi `Kamuktaindet ne Toroor abba Daudi, koleenji, ‘Tuun teekyin kainennyu koot weeriing'ung' ne tuun andoi kotebee ng'echerennyu ne po laitornatet, kogeerin.’ 6Ko uu nooto ng'at anyun keebwa keetiigap taragonik eng' Lebanon. Ingobois otwogikyuk ak otwogiguk, ak agoonin melektap otwogiguk che kemwa; ko uu ye ingen inyee ile ma mi chii eng' acheek ne ingen koep keetiik ko uu Sidonik.”

7Kingo kas Hiram ng'aleegap Solomon, kobaibait miising' ak kole, “Ingilas Kamuktaindet ne Toroor rani, ne ki igoochi Daudi weeriit ne utaat koboi pororyoni oo.” 8Ki iyookto `Hiram piik koba kap Solomon koleenji, “Kaagas ng'aleek che keyokwo, ayae ko uu mageng'ung' tugul agobo pagoinigap taragonik ak pagoinigap piribiryet. 9Ibu otwogikyuk kochoorgei eng' Lebanon kobwa nyanjetap Mediterenian; ak aratyine si koba kobun nyanjet kot koit ole imwaiwo, ak amwaite kityaach eng' yooto, si inyoo iip. Ak isuldaiwo magennyu igoochi amitwogik piigap koonnyu.”

10Ki igoochi anyun `Hiram Solomon pagoinigap taragonik ak pagoinigap piribirinik, ko uu che tee che kimache. 11Ki igoochi `Solomon Hiram keruutik eliphuusyek tiptem che po nganuuk koek amitwogigap koonnyi, ak keruutik tiptem che po mwanik che tiliileen. Ki igoochi anyun `Solomon Hiram ko uu nooto kenyiit age tugul.

12Ki igoochi `Kamuktaindet ne Toroor Solomon utaatyet, ko uu ye ki iarorchi. Ki mi kaalyeet eng' kwenutap Hiram ak Solomon; ak ki yai tuwai arorutyet.

13Ki ng'at Solomon kekwei piik eng' Israel tugul; ki ek pichooto tugul eliphuusyek sosom. 14

5.14:
1Lai 12.18
Ki iyookto koba Lebanon, piik eliphuusyek taman eng' arawet age tugul kochunjun; kimi Lebanon arawet agenge, komi kaa eng' arawek aeng'. Ki pou Adoniram pichooto. 15Ki tinyei kora Solomon piik eliphuusyek tamanwogik tisap che kilaisei, ak eliphuusyek tamanwogik sisiit che kiebisyei eng' tuloonook, 16koma pooto kiptainik che eecheen eliphuusyek somok ak pogol somok che po Solomon che ki indochin poisyet ak ko ki pou piik che kiyaei poisyonooto. 17Ki ng'at anyun laitoryat, ak kiwai icheek koik che eecheen, che po kamanuutyet ne oo, koek che tonone koot kobooto koik che ki kiwai. 18Ki yai koichooto teegigap Solomon ak teegigap Hiram ak Gebalik ak ki chop pagoinik ak koik koteege koot.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]