Revised Kalenjin Bible (KAPR)
30

Kobarei `Daudi Amelegik

301Kingo it `Daudi ak piikyik Ziklag eng' peetuutap somok, ko kiga kopookyi Amelegik murot tai ak Ziklag ak kiga kobar Ziklag ak kobeel eng' maat; 2Kiga koluul kwonyiik che ki mi yooto, che mengech ak che eecheen. Ma par chii age tugul ago kiluul ak koba.

3Kingo it `Daudi ak piikyik nganaseet, ko kiga kebeel ak keluul osotikwak, weeriikwak ak tiibiikwak. 4Kiwaach `Daudi ak piik che ki mi kobooto ineendet, ak koriiryo kot koma komuuchi koriiryo. 5

30.5:
1Sam 25.42-43
Kiga kiluul osotigap Daudi tuwai, Ainoam Jesreelyot ak Abigail ne ki osotyotap Nabal Karmelindet.

6Ki iimgei miising' `Daudi, amu ki mwa piik kole kilache ineendet eng' koik, amu ki aragenso saboonwegap piik tugul ak ki aragen chii age tugul agobo weeriikyik ak tiibiikyik, ago ki igimitkei Daudi eng' Kamuktaindet ne Toroor Kamuktaindennyi. 7

30.7:
1Sam 22.20-23
Ki leenji `Daudi Abiathar tisiindet, weeriitap Ahimelek, “Asoomin iibwo ephod konyo yu.” 8Kingo ip koteebe `Daudi Kamuktaindet ne Toroor koleenji, “Tos ngot asup lugoni, aname?” Kowolji Kamuktaindet ne Toroor koleenji, “Isup, amu iname iman, ak ne matiny isaru tuguuk tugul.”

9Ki wo `Daudi anyun, kobooto murenik pogol lo che ki mi kobooto ineendet, kot koit kererutap Besor, ole kiga tebee piik che kigang'et. 10Ago ki isup `Daudi pichooto kobooto murenik pogol ang'wan. Amu ki tebi piik pogolwogik aeng'u che ki ma imuuchi kolandae kererutap Besor amu kiga kong'etyo miising'. 11Ki nyoor `pichooto Misirindet eng' keeweet ak ki imutyi Daudi. Ki igoochi amitwogik ak ki am ak ki inaga peek koe. 12Yeityo kogoochi magatyat ne ming'in ne po mogoonik ak mooriik aeng' che po sabibuk che yamyotiin. Kingo kagoam kosap, amu ki ma am kiy anan koe peek eng' peetuusyek somok ak kemousyek somok. 13ki teebee `Daudi ineendet koleenji, “Ii po kap ng'oo? Ak ibunu ano?” Ki wol kole, “Aa muren ne po Misiri ak aa otwogindetap Amelegindet. Ki pagaakta kiptaiyandennyu amu ki amyan eng' peetuusyechu somok. 14Kiga kibookyi murot tai ne po Keretik, kap Judah ak kap Kaleb ne mi murot tai ak ki kibeel Ziklag eng' maat.”

15koteebee `Daudi ineendet koleenji, “Tos ichame imuta ole mi lugonooto?” Kowol kole, “Iyosyeiwo eng' Kamuktaindet ile mebara anan indea eunegap kiptaiyandennyu, si amutin ole mi lugonooto.” 16Ye kingo kagomut kochoortagei, ko kiga koyom pichooto ola tugul eng' emet, koamisyei ak koeisei. Ki urerendos amu parunenik che chaang' che kiga luul eng' emetap Philistiik ak eng' emetap Judah. 17Ki par `Daudi icheek kobooch ko karatarat agoi koskoleng'utap peetuut ne po aeng', ama chilil chii agot agenge, kobatee murenik pogol ang'wan che ki laany tambeesik ak komwei. 18Ki sar `Daudi tugul che kiga luul Amelegik. Ki sar `Daudi kora osotikyik tuwai. 19Ki ma petee kiy icheek, ngo ne ming'in anan ko ne oo, ngo weeriik anan ko tiibiik anan ko parunenik anan ko kiy age tugul ne kiga ip, ko ki ip Daudi tugul koweek. 20Ki kweri `Daudi akwotisyek tugul che po keechiirek ak che po tuuga, che ki kweri murenik kondoe tuuga alak ak koleen, “Chuuto ko parunenigap Daudi.”

21Ki it anyun Daudi ole ki mi murenjoto pogolwogik aeng'u, che kiga kong'etyo miising' kot ko mata komuuch koosup Daudi, che kiga mwechi ak kotebee kererutap Besor. Ki pa kotorookta Daudi ak piik che ki mi kobooto ineendet. Kingo riikyi `Daudi pichooto, kogat icheek. 22Ago ki wol anyun piik tugul che yaacheen, ak che uueen metowoi eng' piik che kigaba ak Daudi kole, “Ma kigoochini icheek kiy age tugul eng' parunenik che kagiweegu amu ki ma kibe tugul, kobatee kityo kigoochin chii tugul osotyonnyi ak lagokyik, si komut ak koba.”

23Ago ki le `Daudi, “Amat oyai ko uu nooto che kitupche eng' tuguuk che kogoonech Kamuktaindet ne Toroor ne koriibech, ak koinde eunekyok lugoni koibookyinech. 24Ng'oo ne kasok eng' ng'aleechu? Amu ko uu ole tenitu kebebertap ne wendi lugeet, kotenitu nooto kebebertap ne tebyei koriibei tuguuk, pcheei koaechin.” 25Ki ek ko uu nooto kobooch peetuunooto agoi. Ki yai koek ng'atuutyet ak kayomiset agobo Israel agoi rani.

26Kingo nyo `Daudi Ziklag, koyookyi parunenik poisyegap Judah, icheeget che ki choronokyik ak kole, “Kagoochineng'wong' ne po parunenigap puunigap Kamuktaindet ne Toroor.” 27Ki iyookyi che ki mi Bethel, che ki mi Ramot ne po murot tai, che ki mi Jatir, 28che ki mi Aroer, che ki mi Sipmot, che ki mi Estemoa; 29che ki mi Rakal, che ki mi nganasoogap Jerameelik, che ki mi nganasoogap Kenik, 30che ki mi Horma, che ki mi Korasan, che ki mi Atak, 31ak che ki mi Hebron ak komoswek tugul che ki cham koitei Daudi ak murenikyik.

31

Meetap Saulo ak weeriikyik

(NKNg'a 10:1-12)

311Ki pargei anyun Philistiik ak Israel; ak kimweiso murenigap Israel eng' taitap Philistiik ak kebar kobutyo eng' tulweetap Gilboa. 2Ki oon `Philistiik miising' Saulo ak weeriikyik. Kingo riikyi, kobar Jonathan, Abinadab ak Malkisua, weeriichooto po Saulo. 3Ki koromit pooryeet miising' eng' Saulo, ak kingo oon ineendet mwogik, koriich ak konyaliil. 4Eng' yooto, koleenji anyun `Saulo chiito ne ki ipchin kariikyik, “Ng'usu rotweng'ung' po chok ak itoorena, si ma pwa pichu ma kimuratan, kotoora, ak kogengeniena.” Ago ma cham chiito ne ki ipchin kariikyik, amu ki iywei kot. Ara ki inem anyun Saulo rotwennyi po chok ak kobutyi. 5Kingo keer chiito ne ki ipchin kariik kole, kagome Saulo, kobutyi agine rotwennyi po chok, ak kime kobooto ineendet. 6Ki me anyun Saulo, kobooto weeriikyik somok, ak chiito ne ki ipchin kariikyik ak piikyik tugul, eng' peetuunak. 7Kingo keer piigap Israel che ki mi atebweet komosin ak icheek che ki mi Jordan pitoniin, kole kagomweiso piigap Israel ak kagome Saulo ak weeriikyik, kobagaakta nganasook ak komwei. Ak ki pwa Philistiik komeng'iis.

8Eng' peetuut ne ki isubi nooto, ye kingo pwa Philistiik kobut piik che kiga kibar, konyoor Saulo ak weeriikyik somok ko kagobek eng' tulweetap Gilboa. 9Kitil metinnyi ak koreegune kariikyik, yeityo koyookto kemwaita eng' emetap Philistiik komoswek tugul, keip ng'aleechooto koba kootap kanamonikwak ak koipchi piik. 10Ki inde kariikyik kootap Astarot ak koratyi muustonyi inaatutap Beth-san.

11Kingo kas piik che ki menyei Jabes-gilead agobo kiit ne ki yachi `Philistiik Saulo, 12kong'eetyo murenik tugul che nyigoonen ak koba eng' kemout komugul. Ki inem muustap Saulo ak muuswegap weeriikyik eng' inaatutap Beth-san ak koba kot koit Jabes ak kobeel eng' olooto muuswechooto. 13Yeityo koip kawekwak ak kotupchi keetit keel eng' Jabes, ak korugutkei peetuusyek tisap.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]