Revised Kalenjin Bible (KAPR)
1

Kagateet

11Paulo, kayooktoindet ne po Kristo Jeso ko uu ng'atuutyetap Kamuktaindet Yetindennyo, ak Kristo Jeso ne kamang'unennyo; 2

1.2:
Poi 16.1
asirchini Timoteo lakweennyu, ne po iman eng' kayaneet: Ingotep kobooten myeeindo, ak rireenetapkei, ak kaalyeet, che punu Kamuktaindet Kwanda ak Kristo Jeso Kiptaiyandennyo.

Kateunet agobo kaneetisyosyek che ma po iman

3Ko uu ye ki asoomin ale itebee Epheso, ye ki awendi Makedonia, si kobiit ing'at piik alak amat koneet kaneetisyet ne teer, 4anan koepchi iit atindonik ak tetuutigap ibinwek che ki kosiirto, che ma tinyei ole igeesunegei, che ing'eeti teebutik, kosiir riipseetap poisyetap Kamuktaindet ne mi eng' kayaneet; kasoomin nguno anyun ko uu nooto. 5Ago kasuldaetap ng'atuutyoni ko chamyet ne punu muguleldo ne tiliil ak kabwaatet ne myee ak kayaneet ne ma tinyei keniisyet: 6ye kingo kagochiliil piik alak eng' tuguuchuuto, koyiemjigei ng'alaalet ne po puch, 7chamei koek kaneetigap Ng'atuutyet, nganda ma iguitos che mwaei, anan ng'aleechooto mwaei eng' kimnateet.

8Ago kingen keele myee Ng'atuutyet, ngo poisyee chii ko uu ye nyolu, 9kongen kole ki ma kiyai Ng'atuutyet agobo chii ne po imanda, ago agobo pistoik ak ng'emiik, agobo che yaacheen ak kiptengeginik, agobo che ma tiliileen ak che ma iywei Kamuktaindet, agobo che parei kwanisyek ak che parei kametisyek agobo rumiik, 10agobo che soksei, ak murenik che ibegei ak murenik, ak che chorei piik, ak kiplembechonik, ak che iyastos lembech, ak ngo mi kiit age tugul ne ketei kaneetisyet ne po imanit; 11ko uu ye mwaei logoiywek che myach che po toroornatetap Kamuktaindet ne iberuurot, che ki kigoono atononji.

Mwaetap kongoi agobo rireenetapkei

12Amwachini kongoi ineendet, ne ki imuktaiwa, ineendet Kristo Jeso Kiptaiyandennyo, amu kiita kole aa chiito ne kiyani, kondea poisyet; 13

1.13:
Poi 8.3; 9.4-5
nganda ki aa chii ne chubisyei eng' tai, ak ne usiisyei, ak ki aa kolgol: ago ki anyooru rireenetapkei, amu ki ayae ko mangen kotom ayan; 14ak kitesak myeeindap Kiptaiyandennyo kobarait kobooto kayaneet ak chamyet ne mi eng' Kristo Jeso. 15Po iman ng'olyoondoni, ak nyolu koyanak inne, ne mwaei kole ki nyo Kristo Jeso ng'wony kosar kiptengeginik; aa ne po tai eng' chooto; 16ago ki anyooru rireenetapkei amu ng'olyoondoni, si kobiit kobarta Jeso Kristo muitaennyi tugul eng' anee, ne aa ne po tai, koek kaboorunet eng' icheek che tuun iyani ineendet agoi saboondap koigeny. 17Ingobunji anyun nguno Laitoryat ne po koigeny, ne ma ng'emaksei, ne ma taagu, Kamuktaindet ne ineegei, teegisto ak toroornatet koigeny ak koigeny. Amen.

18Kagoonin kayomisoni inyee lakweennyu Timoteo, ko uu amdaosyek che kisip kemwa agobo inyee si kobiit imuuch iyai lugeet ne myee eng' chooto; 19iname kayaneet ak kabwaatet ne myee; che, kingo kagometo alage, kong'emogis eng' kayaneet; 20eng' chooto ko Humenayo ak Aleksanda; che ki agoochi Setani, si kobiit kineet si machubis.

2

Saaet ak kalasunet

21Ne po tai anyun abooru ale ingoyaak soomutik, ak saautik, ak saisaet, ak mwaet ne po kongoi agobo piik tugul; 2agobo laitorinik ak tugul che tinyei pounateet; si kobiit ketebee kaalyeet ak mutyonet eng' kayweet ne kiywei Kamuktaindet ak teegisto. 3Myee niito ak ko taagaksei eng' taitap Kamuktaindet Yetindennyo; 4ne machei kole kesar piik tugul, ak konyoor naet ne po imanit. 5Amu miitei Kamuktaindet agenge, katuiyoindet agenge agine kwenutap Kamuktaindet ak piik, nooto chiito, Kristo Jeso, 6ne ki igoitogei koek ne kityage tugul; ne tuun kibaoryanjin eng' peetuusyekyik; 7

2.7:
2Tim 1.11
ki kindea anyun agobo nooto aek amdoindet ak kayooktoindet (amwae imanit, ma mwaei lembech), kaneetindetap Pororyosyek eng' kayaneet ak imanit.

8Amache anyun ale kosaaei murenik eng' komosta age tugul, konamjin parak eunekwak che tiliileen, koma mi nereegek ak tiyet. 9

2.9:
1Pet 3.3
Ko uu nooto kobogorisyek ingolaachkei eng' kalaakset ne nyolu, eng' teegisto ak riibetapkei; ma eng' laetap suumeek, ak thahabu anan sonoek che korooron anan ngoroik che po kamanuutyet ne oo; 10ago (ko uu ye nyoljin kobogorisyek che ibortogei kole piigap Kamuktaindet icheeget) eng' poisyonik che myach. 11Ingoneetkei kobogoryot eng' mutyonet kobooto kasetap iit. 12Ago ma chamjini kobogoryot koneetis, anan koboi muren, ago kotebi eng' mutyonet. 13
2.13:
Tau 2.7,21-22
Amu ki kiyai Adam korook, si keyae Hawa; 14
2.14:
Tau 3.1-6
ak ki ma king'al Adam, ago kingo kageng'al kobogoryot kobutyi pistoet; 15ago kisaru eng' sigisyet, ngo tebyei icheek eng' kayaneet ak chamyet ak katabaanet kobooto riibetapkei.

3

Kandoigap kaniset

31Po iman ng'olyoondoni, Ngo machei chii koek riibindetap kaniset, ko kamach poisyet ne myee. 2

3.2-7:
Tit 1.6-9
Kanyolji anyun riibindet koek ne ma kigeerchin ng'olyoo ne ma litit, manong'otyotap osotyot agenge, ne riibegei, ne litit ng'omnateet, ne tebyei komyee, ne taachei toek, ne chepchep koneetis; 3ne ma kimaiya, ne ma pirisyei; ago ne tala, ne ma chii ne po pooryot, ne ma chamei silingisyek; 4ne pou koonnyi komyee, ne igoochin eng' teegisto tugul lagokyik kogas iit; 5(ago ngo ma nai chii ole poundoi koonnyi, koriiptoi ano kanisetap Kamuktaindet?) 6Ama chii ne kota koyani, si ye men kobutyi kirwoogetap chesawilyet. 7Ak kogeny konyaaljin kotinyei paornateet ne myee eng' icheeget che mi saang'; si ma ibutyi teweernateet ak mesteetap chesawilyet.

Kiboitinigap kaniset

8Ko uu nooto kiboitinigap kaniset kanyool kotebi eng' teegisto, ma che po ng'elyebwek aeng', ama che pogitos, ama che kasei myat agobo silingisyek; 9che namei ung'ootyetap kayaneet eng' kabwaatet ne tiliil. 10Ak nyolu ketyem chuuto ak icheek korook; ingoyai anyun icheek poisyetap kiboitiinik ngo ma kigeerchin ng'olyoo ne ma litit. 11Ko uu nooto kobogorisyek, kanyool kotebi eng' teegisto, ma kataamik, che riibegei, che kiyani eng' tuguuk tugul. 12Ingoek kiboitinigap kaniset manong'otaigap osotyot agenge, kobou lagokwak ak kooriikwak komyee. 13Amu icheeget che ki kobois komyee eng' poisyonooto po kiboitiinik, konyooru teegisto ne myee, ak nyiganateet ne oo eng' kayaneet ne miitei eng' Kristo Jeso.

Ung'ootyetap kayanennyo

14Kasirun tuguuchu, amang'u ale anyoonjinin ko neegit; 15ago ngot agagei, imuuchi inai ole kanyool kotepto piik eng' kootap Kamuktaindet, nooto kanisetap Kamuktaindet ne sabei, toloita ak irimeetap imanit. 16Ak ne matiny, ko oo ung'ootyot ne po kayweet ne kiywei Kamuktaindet:

Ineendet ne king'ang'ak eng' poorto,

ki kiityi imanda eng' Kabuuset ne Tiliil,

ne ki keer malaikaisyek,

ne ki kiamda eng' Pororyosyek,

ne ki iyan che po ng'wony,

ne ki kimut kwo parak eng' toroornatet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]