Revised Kalenjin Bible (KAPR)
1

Kosoomei Solomon utaatyet

(1Lai 3:1-15)

11Ki kimiit Solomon weeriitap Daudi eng' laitornatennyi, ki mi Kamuktaindet ne Toroor Kamuktaindennyi kobooto ineendet ak ki ieet miising' ineendet. 2Ki ng'alaalji `Solomon Israel tugul, kiptainigap eliphuusyek ak che po pogolwogik, kirwoogik ak pounindet age tugul eng' Israel tugul ak kandoigap kooriigap kwanisyek. 3Ki wo anyun Solomon kobooto tuiyet tugul, komosta ne toroor eng' Gibeon, amu ki mi yooto emait ne kituiyechin ne po Kamuktaindet, ne kiga teech Musa otwogindetap Kamuktaindet ne Toroor eng' surkwen. 4

1.4:
2Sam 6.1-17; 1A.Pet 13.5-14; 15.25-16.1
Kiga koip `Daudi moingetap Kamuktaindet kotogos eng' Kiriath-Jearim konyo ole kiga kochopchi Daudi: amu kiga koteekyi emait eng' Jerusalem. 5
1.5:
Kom 38.1-7
Ki mi yooto kaptisisyet ne po sugunwet ne kiyaei Bezalel weeriitap Uri, weeriitap Hur, ne ki miitei taitap kootap Kamuktaindet ne Toroor; ak ki pa Solomon ak tuiyet ole mi. 6Ki togosta Solomon kwo ole miitei kaptisisyet ne po sugunwet, ne ki miitei emait ne kituiyechin, eng' taitap Kamuktaindet ne Toroor ak kogoito kagoochinoik che kibeelei eliphuut. 7King'aang'jigei anyun `Kamuktaindet Solomon kemounooto ak koleenji, “Soom kiit ne imache agoonin.”

8Ki leenji `Solomon Kamuktaindet, “Ki iyachi myeeindo ne oo kwandanyu Daudi ak kiyaa aek laitoryat ageer ineendet. 9

1.9:
Tau 13.16; 28.14
Ara anyun, ee Kamuktaindet ne po Toroornatet, ingogimiit kayomiset ne ki iyomisyi kwandanyu Daudi, amu koiyaa aek laitoryat aboi piik che tee chaang'indo temburyek eng' ng'wony. 10Koono anyun utaatyet ak naet, si amuuch amanda ak anyo eng' taitap pichu, amu ng'oo ne imuuchi korwookyi pichuguk chaang' ko uu ni?”

11Ki leenji `Kamuktaindet Solomon, “Amu ki mi ng'olyoondoniito muguleldang'ung', ama isoom mogornatosyek ak chaang'indap tuguuk, anan ko teegisto, anan kebar icheeget che wechin, ama isoom isap keny ago kesoomjigei utaatyet ak naet, si kobiit irwookyi piikyuk, che ki andein iegu laitoryat ibou, 12kagegoonin anyun utaatyet ak naet. Ak agoonin mogornatosyek, chaang'indap tuguuk ak teegisto, che tomo konyoor laitorinik che ki kondounenen, amaa kobiitu age ne nyooru ko uu nooto.”

Mogornateet ak kamugetap Solomon

(1Lai 10:26-29)

13Konyo anyun Solomon eng' komosato toroor ne ki mi Gibeon, eng' taitap emait ne kituiyechin, konyo Jerusalem. Ak ki laitoran ineendet eng' Israel. 14

1.14:
1Lai 4.26
Ki iyum Solomon kariisyegap lugeet ak piik che ketei paraisisyek; ki tinyei kariisyek eliphuut agenge ak pogol ang'wan ak piik eliphuusyek taman ak aeng' che ketei paraisisyek, ki inde nganasoogap kariisyek ak ole mi laitoryat eng' Jerusalem. 15Ki yai laitoryat fedha ak thahabu eng' Jerusalem kot kotenit koik, ak ki yai taragonik kotenit mogoonik che mi emet ne soi. 16
1.16:
NKNg'a 17.16
Ki kigetune Misiri paraisisyek che ki tinyei Solomon; ki alei chemung'arainigap laitoryat kobee akwotisyek. 17Ki ale chepkichutit eng' Misiri shekelisyek pogol lo che po fedha, ak paraisiit ne yamei pogol agenge ak konom. Kigetyi ko uu nooto laitorinik tugul che po Hitik ak che po Syria.

2

Chobutigap teekseetap Hekaluut

(1Lai 5:1-18)

21Ki pegechi anyun Solomon koteekyi koot kainetap Kamuktaindet ne Toroor ak koot ne po pounatennyi. 2Ki iit Solomon piik eliphuusyek tamanwogik tisap che laisei, piik eliphuusyek tamanwogik sisiit che waei koik eng' tuloonook ak piik eliphuusyek somok ak pogol lo che tononjin.

3Ki iyookto Solomon koba kap Huram laitoryatap Tyro, keleenji, “Yaiywo agane ko uu ye ki iyachi abba Daudi, ye ki iyookyi ineendet taragonik koteege koonnyi ne menyei. 4Keero, ateekyini koot kainetap Kamuktaindet ne Toroor Kamuktaindennyu si atabaanji ineendet ak abeel eng' tainnyi nyamdutigap tuguuk che ng'uu ne anyiny, kobunji magatinigap kabartaet che po kotugul ak kagoochinoik che kibeelei karon ak koskoleny, eng' sabatoisyek, ak eng' ye kaleel arawet, ak eng' igoorwek che ki king'at che po Kamuktaindet ne Toroor Kamuktaindennyu. Po koigeny niito eng' Israel. 5Oo koot ne ateeche, amu oo Kamuktaindennyu kosiir kamuktaik tugul. 6

2.6:
1Lai 8.27; 2A.Pet 6.18
Ago ng'oo anyun ne imuuchi koteekyi ineendet koot, ngo mayamei ineendet kipsengwet, kipsengwet ne po parak miising'? Aa ng'oo anyun, kot ateekyi koot, kobatee kebeelji nyamdutik eng' tainnyi? 7Ara anyun, iyookwo chiito ne ng'oom ne imuuchi koyai poisyetap thahabu, ak ne po fedha, ak ne po sugunonik, ak ne po kariik, ak ne ingen konap ngoroik che arusen ne piriir, ak che piriireen, ak che buluu, ak piik che utaatiin eng' waet age tugul, ngo nyo kotebi ak piik che ng'oomen che mi kobooto eng' Judah ak eng' Jerusalem, che ki kochop abba Daudi. 8Iyookwo kogeny keetiigap taragonik, piribirinik, ak keetiigap almug che po Lebanon, amu angen ale ng'oomen otwogiguk eng' ebetap keetiigap Lebanon. Tuun mi otwogikyuk ak otwogiguk, 9si kochobwa keetiik che chaang' miising', amu koot ne neegit ateech ko oo ak ko po kwong'eet. 10Agoochini otwogiguk piik che ebei keetiik, nganuuk che kigetui, tanisyek pogol aeng' che po nganuuk che ki kibor, tanisyek pogol aeng' che po baale, ak divaik che yamegei ak litaisyek eliphuusyek pogol ang'wan, ak mwanik che yamegei ak litaisyek eliphuusyek pogol ang'wan.”

11Kowolji anyun Huram laitoryatap Tyro eng' parweet ne ki iyookyi Solomon, koleenji: “Amu chamei `Kamuktaindet ne Toroor piikyik, ko ki indein iegu laitoryat ibou icheek. 12Iberuurot Kamuktaindet ne Toroor, Kamuktaindetap Israel, ne ki yai kipsengwet ak ng'wony! Ne Ki kogoochi Laitoryat Daudi weeriit ne ng'oom, ne ki kigoochi kaguiyet ak naet, si kobiit koteekyi koot Kamuktaindet ne Toroor ak koot ne po pounatennyi. 13Kaayogu anyun chiito ne utaat, ne ki kigoochi kaguiyet, ne po Huram kwandanyu, 14weeriitap kwondo ne po tiibiigap Dan ak ki po Tyro kwandanyi. Tinyei ineendet utaatyet ne imuuchi koyai poisyetap thahabu ak fedha, sugunonik ak kariik, ne po koik ak ne po keetiik, ak ne po ngoroik che arusen ne piriir, ak che buluu, ak ne po katanit ne karaaran, ak ne po che piriireen. Ingen kowai waet age tugul ak koyai kiit age tugul ne kaibwaat. Igoochi ineendet kobois kobooto piiguk che ng'oomen, ak kobooto piik che ng'oomen che po kiptaiyandennyu Daudi kwandang'ung'. 15Ingoyokyi anyun `kiptaiyandennyu otwogikyik nganuuk, ak baale, ak mwanik, ak divaik, che ki mwa, 16si keep keetiik che tee che imache eng' Lebanon ak kiyogun ko ratotiin kobun peek eng' nyanjetap Mediterenian agoi Joppa. Yeityo iip eng' yooto kotogosta koba Jerusalem.”

Ketau teekseetap Hekaluut

(1Lai 6:1-38)

17Ki iit Solomon toek tugul che ki mi emetap Israel, eng' koitonooto kiiti kwandanyi Daudi, ak ki ek tugul piik eliphuusyek pogol ak konom ak somok ak pogol lo. 18Ki inde piik eliphuusyek tamanwogik tisap che laisei, ak eliphuusyek tamanwogik sisiit che waei koik eng' tuloonook, ak piik che tononjin poisyet eliphuusyek somok ak pogol lo che igoochin piik poisyet.

3

31

3.1:
Tau 22.2
Ki toi anyun Solomon koteech kootap Kamuktaindet ne Toroor eng' Jerusalem eng' tulweetap Moriah, ole ki mong'jine Kamuktaindet ne Toroor kwandanyi Daudi, ki chop ineendet eng' ole ki ng'at Daudi, eng' rwanyut ne kiboorsee ne po Ornan Jebusindet. 2Ki toi koteekso eng' kenyiitap ang'wan ne po laitornatennyi, arawet ne po aeng' eng' peetuutap aeng'. 3Chu anyun lumeiywek che ki lumda Solomon agobo teekseetap kootap Kamuktaindet. Ki ek koindo mitainik tiptem ak tisap ak ki ek tebeesindo mitainik sogool. 4Ki aechin tebeesindap koot ak kooindap keterut ne ki mi taitap koot, ki mitainik sogool, ak ki ek kooindap tononennyi mitainik konom ak ang'wan. Ki iliige thahabu che tiliileen komostap oriit. 5Kitetee koot ne oo keetiigap piribirinik che ki iliige thahabu che korooron ak kiwachinot itoonwegap tiironigap sosik ak nyororosyek. 6Ak kilelesonji koot eng' koik che po kamanuutyet ne oo si kogararanit. Ak thahabu che kiboisyee ko ki punu Parbaim. 7Ki iliige kogeny thahabu koot, kimurtoinik, tugatugik, inatusyek, kereiywegap kurgotikyik, ak kiwachi inatusyek itoonwegap karubisyek. 8
3.8:
Kom 26.33-34
Ki teech koot ne tiliil miising'. Ki aechin tebeesindap koot ak koindonyi, ki ek mitainik sogool. Ki iliigote thahabu che korooron, che ki itei tanisyek tiptem. 9Ki ek nyigiisindap kipchumarisyek shekelisyek konom che po thahabu. Ak ki iliige thahabu kooriik che po parak.

10

3.10-13:
Kom 25.18-20
Ki inde itoonwek aeng' che po kerubisyek koot ne tiliil miising' ak koliige thahabu. 11Ki ek mitainik sogool kooindap kebebaigap kerubisyek tuwai. Koindap kebepchet agenge ko ki mitainik aeng' ak robo, ak ki itei inaatutap koot, ak ki mitainik aeng' ak robo kebepchet age, ak kitiinyegei kebepchetap kerubit age ak ne po age. 12Ak ki mitainik aeng' ak robo kebepchetap kerubit age, ak ki itei inaatutap koot, ak ki mitainik aeng' ak robo kebepchet age agine, kotiinyegei ak kebepchetap kerubit age. 13Kiga uitogei kebebaigap kerubisyechuuto tuwai koit mitainik sogool. Ki tonondos eng' keelyekwak ak kiga tokyigei togoochikwak koot. 14
3.14:
Kom 26.31
Kinap angeet ne kioiye koot, che buluu ak che arusen ne piriir, ak che piriireen ak katanit ne karaaran, ak kinapchi chooto kerubisyek.

Tolochik aeng' che po sugunonik

(1Lai 7:15-22)

15Ak ki yai kogeny tolochik aeng' eng' taitap koot, che po mitainik taman ak lo kooindap tononennyi, ak ki mitainik aeng' ak robo, metit age tugul ne ki mi tuguuchooto parak. 16Ki yai nyororosyek eng' koot ne po oriit, ak konde paragusyegap tolochik. Ki yai kora itoonwegap logoek pogol agenge ak koiywachi paragutap sirimwechooto. 17Ki lumda tolochichooto eng' taitap Hekaluut, ki lumda age eng' komostap tai ak kolumda age eng' komostap kaataam. Kiguure ne ki mi komostap tai Jakin ak koguure ne ki mi komostap kaataam Boaz.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]