Revised Kalenjin Bible (KAPR)
11

Terchinetap Paulo ak che kiyooktoi che po lembech

111Ee, kata kaigai ndomuuchi omuitaiwa eng' perberyo kitigin: ee omuitaiwa iman. 2Amu ama ng'etkong' agobo okweek, eng' ng'etkonda ne po Kamuktaindet: amu ki achamwok obunji manong'otyot agenge, si kobiit amutyok Kristo ko uu pergeiyat ne tiliil. 3

11.3:
Tau 3.1-5,13
Ago aiywei ale, si ma ng'emogis eng' oor age tugul kabwaatutikwok eng' lititindo ak tiliilindo ne tokyingei Kristo ko uu ye ki iberber ereneet Hawa eng' ng'aalseennyi. 4Amu ineendet ne nyoonei, ngo amda Jeso age, ne ki ma kiamde acheek, anan ngo taach Kabuuset ne Tiliil ne teer, ne ki ma otaach okweek, anan logoiywek che myach che teer, che ki ma oyan, ko kaagaa anyun omuitochini ineendet komyee.

5Amu aiitige ale ma mi let eng' kiy age tugul eng' che eecheen miising' eng' che kiyooktoi. 6Agot ngo uu ng'alaalennyu ne po chii ne ma ineetkei, koma uu nooto eng' naet; achicha, ki kibartech acheek eng' okweek eng' kiy age tugul eng' kwenutap piik tugul.

7Anan ki ayai tengek ye kinga ming'inge si kobiit kitoroorok okweek, amu ki aamwok logoiywek che myach che po Kamuktaindet ama melekto? 8Ki arebee kanisosyek alak, aibe melekto eng' icheek si kobiit aboisyeunenok; 9

11.9:
Phlp 4.15-18
ak ye kinga mi kobootok ak abanani, ko ki ma agoochi chii age tugul nyigiisin; amu kingo it tupchosyek kobunu Makedonia, kogoono che tee che ki abanani; ak ki ariipkei eng' kiy age tugul ale si ma egu nyigiisin eng' okweek, ak ta ariibegei. 10Ko uu ye mi imanitap Kristo eng' anee, ma mi chii ne kirindoa eng' kalasunoni eng' korotinwegap Akaia. 11Amu nee anyun? Amu ma chamok? Ingen Kamuktaindet.

12Ago kiit ne ayae, ayae nooto, si kobiit atile poroindo icheeget che machei poroindo; si kobiit kogergeit ak icheek eng' kioto ilasunegei. 13Amu piik che uu chooto ko che kiyooktoi che po lembech, kiboitinigap keniisyet, che walegei koek che kiyooktoi che po Kristo. 14Ama mi kwong'eet; amu agot Setani kowalegei koek malaikaiyatap lapkeiyet. 15Ma kiy ne oo anyun ngo walegei otwogikyik koigei kiboitinigap imanda; ne kagesunennywa konamegei ak poisyonikwak.

Nyalilwogigap Paulo

16Amwae kogeny ale, Amat kobwaat chii kole aa perber; ago ngo uu nooto, otaacha okweek ngo aa perber, si kobiit aloske agane kitigin. 17Nooto amwae, koma mwaei eng' Kiptaiyat, ago ko uu eng' perberyo, eng' nyiganataniito po kalasunetapkei. 18Amu ngo lasugei che chaang' eng' poorto, alasuge agane. 19Amu omuitochini che perberen eng' poiboiyet, amu oo utaatiin. 20Amu omuitochini chiito, ngo yaak oegu otwogik, ngo amok, ngo namak, ngo toroorgei, ngo rabachok. 21Ang'alaali eng' sasetapkei, ko uu ye kinyalulyotin. Ago ngot ko nyigan chii eng' kiy age tugul (ang'alaali eng' perberyo), aa nyigan agane. 22Tos Yahudik icheek? Aa uu nooto agane. Tos Israelik icheek? Aa uu nooto agane. Tos kesweegap Abraham icheek? Auu nooto agine. 23

11.23:
Poi 16.23
Tos kiboitinigap Kristo icheek? (Ang'alaali ko uu chii ne amei iywek) aa siirtoot; eng' pirtaosyegapkei che siirtoot, eng' korgorosyek miising', eng' pirutik che ma kirarei, eng' meosyek konyil che chaang'. 24
11.24:
NKNg'a 25.3
Ki anyooru eng' Yahudik konyil muut pirutik artam, ki pet agenge. 25
11.25:
Poi 16.22; 14.19
Ki kibirena kirokweek konyil somok, ki kilagena koik konyil agenge, king'emak moinget ne ki ami konyil somok, ki atebee nyanjet peetuut agenge ak kemout agenge. 26
11.26:
Poi 9.23; 14.15
Eng' panwek konyil che chaang', ng'oiyonditap ainoosyek, ng'oiyondit ne punu rebiik, ng'oiyondit ne punu piigap pororyennyu, ng'oiyondit ne punu Pororyosyek, ng'oiyondit eng' nganaseet, ng'oiyondit eng' surkwen, ng'oiyondit eng' nyanjet, ng'oiyondit eng' kwenutap tupchosyek che po lembech; 27eng' pirtoetapkei ak nyalilda, eng' riipsosyek konyil che chaang', eng' rubeet ak melelda, eng' rugutosyek konyil che chaang', eng' kaititindo ak aach ngorit. 28Kobooto tuguuchooto po saang', komi agine nooto ne igiicha peetuut age tugul, tononjinetap kanisosyek tugul. 29Ng'oo ne nyalulat, ama aa nyalulat anee? Ng'oo ne koginach, ama agas agane ng'wanindo?

30Ngot ko nyolu aloske, alasuge agobo tuguuk che po nyalulennyu. 31Ingen Kamuktaindet Kwandap Kiptaiyat Jeso, ne iberuurot koigeny, kole magenu. 32

11.32-33:
Poi 9.23-25
Ki riip eng' Damasko pounindetap laitoryat Areta, nganaseetap Damaskik, kole konama: 33ak ki kichoortaena mesendet eng' tirisyet ne po irimeet, ak ki achilil eng' eunnyi.

12

Keersosyek ak ng'ang'utigap Paulo

121Kanyool aloske, agot ngo ma nyolu; ago aityini keersosyek ak ng'ang'utik che po Kiptaiyat. 2Angen chiito eng' Kristo, kobooch nguno ko kenyiisyek taman ak ang'wan (ngo ki mi eng' poorto, ko mangen; anan ngo kiga komanda eng' poorto, ko mangen; ingen Kamuktaindet), ale ki kimut ineendet kotogosta agoi kipsengwet ne po somok. 3Ak angen chiichooto (ngo ki mi eng' poorto, anan ki ma kota komi eng' poorto, ko mangen; ingen Kamuktaindet), 4ale ki kimut kotogosta agoi Paradiso, ak ki kas ng'aleek che ma mwaoksei, che ma chamdaat kogetyigei komwa chii. 5Alasuge agobo chiichooto: ago malasuge agobo aneege, kobatee eng' nyalulnatosyekyuk. 6Amu ngot amache aloske, koma perberitu; amu amwae ne po iman: ago asise, si mat koiita chii age tugul kosiir ne tee ne keerchino, anan ye kasena.

7Ak eng' ooindo ne siirtoot ne po ng'ang'utik - si ma kitoroora miising', ko ki kigoono kateet eng' poorto, ne otwoget ne po Setani kobira si ma toroorgei miising'. 8Ki asoom Kiptaiyat miising' konyil somok agobo kiito, ale koistoenogei. 9Ak ki leenjo, Yamin myeeindonyu: amu kiyaei kamugennyu koek ne ititaat eng' nyalulet. Alasuge anyun eng' poiboiyet miising' kosiir amu nyalulnatosyekyuk, si kobiit kotebena kamugetap Kristo. 10Nooto anyun, abaibai eng' nyalulnatosyek, eng' ng'waninwek, eng' kagiigosyek, eng' usiisyosyek, eng' tiritinwek agobo Kristo; amu ye aa nyalulat, ko yooto anyun ye aa kiim.

Paulo ak ole keertoi kayanigap Korintho

11Kaaberberitu: ki obircha; amu kota nyolu oloswa okweek: amu ki ma aa po let eng' kiy age tugul eng' che koiyooktoi che eecheen kosiir, agot ngo ma aa kiy. 12Iman ki kiyae kwenung'wong' kaboorunoik che po kayooktoindet eng' muitaet tugul, eng' kaboorunoik ak kwang'utik ak poisyonik che po kamuktaet. 13Amu tos mi nee ne kiyaak oegu che nyerootiin eng' kanisosyek alak, kobatee ki ma aegu nyigiisin eng' okweek? Onyoiywa kaat lelutyoniito. 14Ogeero, niito ko ne po somok achoboksei ale Anyoonjok; ak manyone aegu nyigiisindo eng' okweek: amu ma cheeng'e tuguukwok, ago okweeget: amu ma nyooljin lagok kogonorchi tuguuk sigiik, ago konorchin sigiik lagok. 15Ak abaibai miising' aboisyee chechuuk ak keboisena agobo saboonwekwok. Ngot achamok miising' kosiir, ko tos ki chama kitigin?

16Ago ngo uu nooto, ko ki ma agoonok nyigiisindo; ago atinye ng'omnateet, ak ki anamak eng' mesteet. 17Tos ki aibenok kiy eng' chii age tugul eng' icheeget che ki ayookwok? 18Ki atechi Tito, ak ki ayookte ne kitupche koba tuwai. Tos ki ibenok Tito kiy? Ki ma kebendoti eng' Kabuusonooto agenge? Tos ma eng' tyegutik che kergei?

19Obwaati agoi nguno oleen kisaruge eng' taing'wong'. Eng' taitap Kamuktaindet keng'alaali eng' Kristo. Ago tuguuk tugul, ko si keteechak, chamanichu. 20Amu aiywei, ale si ye anyoo, koma nyoorwok eng' oor age tugul ko uu ye ma mache, ak onyoorwo ko uu ye momache; si ma piit eng' oor age tugul, pooryosyek, ng'etkonda, nereegek, suryosyek, ng'ooksosyek, chaamsosyek, menootosyek, polatosyek; 21si ye tuun anyoo kogeny, koma iming'ina Kamuktaindet nenyu eng' taing'wong', ak ariir agobo che chaang' eng' icheek che ki yai tengekwogik kobooch yooto, ama sik eng' simdo ak sokseet ak mageet ne ya agobo tuguuk che yaach che ki yai icheek.

13

Kateunoik ak ng'aleek che po let

131

13.1:
NKNg'a 17.6; 19.15
Ni ko ne po somok anyonjinok. Ki kimiiti ng'olyoot age tugul eng' kutusweegap paorinik aeng' anan ko somok. 2Ki asip amwa, ak asip amwae kogeny, ko uu ye ki ami eng' panda ne po aeng', ko uu nooto nguno ye ma mi kobootok, eng' icheeget che ki yai tengekto, kobooch yooto, ak eng' chuun alak tugul, ale, si ma ye anyoo kogeny, koma rireegei; 3amu ocheeng'e kaboorunetap Kristo ne ng'alaali eng' anee; ne ma nyalulat eng' okweek, ago tinyei kimnateet eng' okweek: 4amu ki kigartaat eng' nyalulet, ago sabei eng' kamuktaetap Kamuktaindet. Amu kinyalulyotin ak acheek eng' ineendet, ago kisoptosi kobooto ineendet eng' kamuktaetap Kamuktaindet agobo okweek.

5Osiaige okweegei, ngo mi eng' kayaneet; otyemge okweegei. Anan mongen okweegei ole miitei Jeso Kristo eng' okweek? Iyois ko oo eesyootin iman. 6Ago amang'u ale ongen ole ma ki eesyootin. 7Kisaae Kamuktaindet anyun si moyai yaityo age tugul; ma si ketaagu keele ki kiyanech, ago si kobiit oyai nooto myee, agot nganda ko uu che kiesyoi. 8Amu ma kimuuchi keyai kiy ne kirindoi imanit, ago ne toreti imanit. 9Amu kiboiboen ye kinyalulyotin, ago oo kiimeen: kisaae agobo niito agine, keele oegu che ititaatiin. 10Amu nooto anyun, asire tuguuchu koma ami, si ma ye tuun ami koma poisyee koroomnateet, ko uu ole tee pounateet ne ki koono Kiptaiyat agobo teekseet, ma agobo putet. 11Ne po let anyun, che kitupche, ko saisere. Oegu che chobootiin; oegu che po kagaigaet; oegu che po kabwaatet agenge; otebi eng' kaalyeet: ak mi Kamuktaindet ne po chamyet ak kaalyeet kobootok.

12Ogatkei eng' ng'ututet ne tiliil. 13Igatok piik tugul che tiliileen. 14Ingotebi ak okweek tugul myeeindap Kiptaiyat Jeso Kristo, ak chamyetap Kamuktaindet, ak yamdaetap Kabuuset ne Tiliil.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]