Revised Kalenjin Bible (KAPR)
2

21Ago ki atil ni ale ma anyonjinok kogeny eng' arageneet. 2Amu ngot agoonok oaragense, ko ng'oo anyun ne iboiboa, kobatee ineendet ne kaagoochi koaragen? 3Ak ki asirwak ng'olyoondoniito, si ma ye anyoo, koma tinye arageneet eng' icheek che kanyoolja agasegei; atinye kamang'unet eng' okweek tugul, ale poiboiyennyu ko neng'wong' okweek tugul. 4Amu ki asirwak eng' pichiindo ne oo ak ng'wanindap muguleldo kobooto peegap kong' che chaang'; ma si oaragense, ago si kobiit onai chamyet ne ating'enok miising' kosiir.

Nyoetap kaat

5Ago ngot ko koing'eet chii arageneet, ko koing'eet arageneet, ma eng' anee, ago eng' kebeber, (si ma koonok anee nyigiisindo ne siirei) eng' acheek tugul. 6Yamei chiito ne uu niito kagikyinoni kitilji piik che chaang'; 7ago kaigai onyochi kaat ineendet ak ogaigai, si ma lugui, eng' ooreet age tugul, chiito ne uu nooto aragenennyi ne siirtoot. 8Nooto anyun asoomok ale ogimiit chamyeng'wong' eng' ineendet. 9Amu ki asir agobo ng'olyoondoniito, ale anaak komyee ngo kase iit eng' tuguuk tugul. 10Ago ineendet ne onyochini kaat kiy age tugul, anyochini kaat agane. Ne ki anyochi kaat agane, ngo ki anyochi kaat eng' kiy age tugul, ko ki anyochi kaat agobo okweek eng' taitap Kristo, 11si ma nyoor Setani kiit ne iterteerenech; amu ma kiberberen, ago kingen chobutikyik.

Logoiywek che myach

12

2.12-13:
Poi 20.1
Ak ye kinga nyo Traos amu logoiywek che myach che po Kristo, ak ye ki ngeyatwa kurgeet eng' Kiptaiyat, 13ki ma nyooru kamuung'et eng' saboondanyu, amu ki ma anyooru Tito ne kitupche. Ara ki amwachi icheek saisere ak atestai awe Makedonia.

Kayanik ak nyamdutyet

14Ago kongoi eng' Kamuktaindet, ne imutatech kotugul kibelisye eng' Kristo, ak koboortoi nyamdutyetap naennyi eng' acheek eng' komosta age tugul. 15Amu kinyamdutyet ne anyiny ne po Kristo eng' Kamuktaindet, eng' icheek che kisaru, ak eng' icheek che lustos; 16eng' alak ko ki nyamdutyet ne po meet agoi meet; eng' alak ko ki nyamdutyet ne po saboondo agoi saboondo. Ak tos ng'oo ne yamegei ak tuguuchu? 17Amu acheek koma ki uu che chaang', che poisyee ng'olyootap Kamuktaindet eng' ng'aalseet: ago ki che poisyei eng' ooreet ne ma tinyei ng'aalseet, ago ki po Kamuktaindet, ak eng' taitap Kamuktaindet, keng'alaali eng' Kristo.

3

Kiboitiinik che po arorutyet ne leel

31Ara anyun, kagitau kogeny kemwauge acheeget? Anan kimache, ko uu ye machei piik alak, paronok che po mwaitaetapkei che pwonjinok ak che punwok? 2Oo parweennyo ne siraat eng' mugulelwekyok, ne naat ak kosomani piik tugul; 3

3.3:
Kom 24.12; Jer 31.33; Ezk 11.19; 36.26
oboortoige ole oo parweet ne po Kristo, ne ki kiyai, ne ki kisir ama eng' wino, ago eng' Kabuuset ne po Kamuktaindet ne sabei; ma eng' koik che lebeleen, ago eng' koik che lebeleen che mugulelwek che po poorwek.

4Ak ketinye kamang'unet ne uu nooto eng' Kristo, ne tokyingei Kamuktaindet: 5ma keele ki tinyei kiy acheegei ne yamegei ak kiy, kiit kiy age tugul keele punwech acheeget; ago punu Kamuktaindet che yamech; 6

3.6:
Jer 31.31
ne kiyaech keegu che yamei, kiboitiinik che po arorutyet ne leel; ma che po ng'atuutyet, ago po Kabuuset ne Tiliil; amu parisyei ng'atuutyet, ago Kabuuset ne Tiliil ne igoitoi saboondo.

7

3.7:
Kom 34.29
Ago ngo ki pwa kobooto toroornatet poisyetap meet, ne ki kisir, ak kewachi koik parak, kot kogimata komuuch piigap Israel kogeer togeet ne po Musa komyee amu liilindap togeennyi; liilindo ne ki igeesugei: 8tos ma tesat kosiir poisyetap Kabuuset ne Tiliil eng' toroornatet? 9Amu ngo poisyetap kirwooget ko toroornatet, ko siirtoot miising' poisyetap imanda eng' toroornatet. 10Amu iman, nooto ne ki kitoroor, ko ki ma kigoochi toroornatet agobo niito, amu toroornatet ne siirtoot. 11Amu ngo ki mi nooto siirtoi kobooto toroornatet, komiitei anyun eng' toroornatet ne tya, nooto ne ng'etunot.

12Nooto anyun, amu ki tinyei kamang'unet ne uu ni, keboisyee anyun nyiganateet ne po keny eng' ng'alaalet, 13

3.13:
Kom 34.33
ama ki uu Musa, ne kituge togeennyi angeet, si ma keer piigap Israel komyee kagesunet ne po nooto ki igeesugei: 14ago kiuegitu kabwaatutikwak: amu agoi peetuuni, eng' somaneetap kayomiset ne po keny, kota komi anganooto po togeet, tomo keisto; nooto ne kigeisto eng' Kristo. 15Ago agoi peetuuni, ko eng' peetuut age tugul ye kisomani Musa, kota komiitei anganooto mugulelwekwak. 16
3.16:
Kom 34.34
Ago ye kaweekyinegei Kiptaiyat, keisto anganooto. 17Kiptaiyat ko Kabuuset ne Tiliil anyun: ak ole mi Kabuusetap Kiptaiyat komi katyaget.

18Ago acheek tugul koboortoi toroornatetap Kiptaiyat ko uu ki oit eng' togoochikyok che ma tugootiin, kewalech eng' itoonooto kobunu toroornatet agoi toroornatet, ko uu ye punu Kiptaiyat ne Kabuuset ne Tiliil.

4

Konorwet eng' tereenigap ng'ung'unyek

41Nooto anyun, amu ki tinyei poisyoni, ko uu ye ki kenyooru rireenetapkei, ko mameech mugulel: 2ago kigeeesye tuguuk che ung'ootiin che po kalilanet, ama kibendoti eng' ng'aalseet, anan keboisyee ng'olyootap Kamuktaindet eng' kaberberisyet; ago eng' kabartaetap imanit, kiboorchinigei kabwaatetap chii age tugul eng' taitap Kamuktaindet. 3Ago ngo tugootiin logoiywekyok che myach, ko tugootiin eng' icheek che lustos: 4eng' icheek che katuch kamuktaindetap ng'wonyuni kabwaatutigap che ma iyani, si ma iluuchi icheek lapkeiyetap logoiywek che myach che po toroornatetap Kristo, ne ineendet ko itoondap Kamuktaindet. 5Amu ma ki amdoti agobo kei, ago Kristo Jeso ne Kiptaiyat, ak acheeget ko ki otwogikwok amu Jeso. 6

4.6:
Tau 1.3
Amu Kamuktaindet ne ki mwa kole, “Tuun iluu lapkeiyet eng' mesundeito,” ineendet ne ki iluuchi mugulelwekyok, si kogoon lapkeiyet ne po naetap toroornatetap Kamuktaindet eng' togeetap Jeso Kristo.

7Ago ki tinyei konorwani eng' tereenik che po kimindeet, si kobiit kobunji Kamuktaindet ooindo ne siirtoot miising' ne po kamuktaet, ago ma acheek; 8kinyalilech eng' komosta age tugul, ago ma kigichech; kitoptobeni, ago ma petwech kamang'unet; 9Ki onwech, ago ma kibagaaktaech; ki wiirtaech ago ma ki parech; 10ki ibooti kotugul eng' poorto meetap Jeso, si kobiit kong'ang'ak agine saboondap Jeso eng' poorwekyok. 11Amu acheeget che kisoptosi kimutyinech meet kotugul amu Jeso, si kobiit kong'ang'ak agine saboondap Jeso eng' poorwekyok che pegu. 12Nooto anyun poisyei meet eng' acheek, ago saboondo eng' okweek.

13

4.13:
T.Kal 116.10
Ago amu ki tinyei Kabuuset ne Tiliil nooto po kayaneet, ko uu ye ki kisir keele ki ayan, nooto anyun ki ang'alaali; kiyani agacheek, ak keng'alaali amu nooto; 14kingen keele ineendet ne ki ing'eet Kiptaiyat Jeso ko tuun ing'eetech agacheek kobooto Jeso, ak kobartech kobootok. 15Amu tuguuk tugul ko agobo okweek, si ye tesak myeeindo eng' che chaang', koyai kagoitoetap kongoi kotesak eng' katorooretap Kamuktaindet.

Pichiindo ak toroornatet ne po koigeny

16Nooto anyun, mameech mugulel; ago agot ngo ng'emak chiinyo ne po parak, kewalei chiinyo ne po oriit kileeliti peetuut age tugul. 17Amu pichiindanyo ne nyumnyum, ne ma tebyei, koyaiywech toroornatet ne oo ne po koigeny, ne tesoksei miising' kosiir; 18ye ma kigeere tuguuk che taagu, ago tuguuk che ma taagu, amu tuguuk che taagu kosiirtoi; ago tuguuk che ma taagu ko po koigeny.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]