Revised Kalenjin Bible (KAPR)
21

Manasseh, laitoryatap Judah

(2A.Pet 33:1-20)

211Ki po kenyiisyek taman ak aeng' Manasseh ye ki tau kolaitorani, ak ki laitoran kenyiisyek konom ak muut eng' Jerusalem. Ki kiguure kamennyi Hepsi-ba. 2

21.2:
Jer 15.4
Ki yai yaityet eng' taitap Kamuktaindet ne Toroor, koosup tuguuk che kiwechei che po pororyosyek, che ki oon Kamuktaindet ne Toroor eng' taitap piigap Israel. 3Amu ki teech kogeny komoswek che torooreen che kiga kobut Hezekiah kwandanyi; kiteekyi Baal kapkorosusyek ak koyai Asera ko uu ye kiga yai Ahab laitoryatap Israel. Kigutung'ji ineendet tuguuk tugul che po kipsengwet ak koot. 4
21.4:
2Sam 7.13
Ki teech kapkorosusyek eng' kootap Kamuktaindet ne Toroor ne ki mwa Kamuktaindet ne Toroor agobo koyooto kole, “Andoi kainennyu Jerusalem.” 5Kiteekyi kapkorosusyek tuguuk tugul che po kipsengwet eng' seremusyek tuwai che po kootap Kamuktaindet ne Toroor. 6Ki igoito weeriinnyi kobun maat, king'orso ak koboisyee ponisyet, ak kobois kobooto piik che poisyee oik ak pooniik. Ki yai yaityet eng' taitap Kamuktaindet ne Toroor, kotach ineendet konereech. 7
21.7-8:
1Lai 9.3-5; 2A.Pet 7.12-18
Ki inde kanamwet ne ki kiwai ne po Asera koot ne ki kamwachi Kamuktaindet ne Toroor Daudi ak weeriinnyi Solomon, koleenji, “Andoi kainennyu koigeny koi ak Jerusalem, ne ki alewen eng' ortinwek tugul che po Israel. 8Ama agoochini keelyegap Israel koombenot kogeny koba eng' emet ne ki agoochi kwanisyekwak; ngot koriip koyai ko uu tugul che ki ang'at icheek, ko uu ng'atuutyet tugul ne ki ng'at otwogindennyu Musa icheek.” 9Ago ma kas icheek. Ki ichuut Manasseh icheek koyai yaityet kosiir ne ki yai pororyosyek, che ki par Kamuktaindet ne Toroor eng' taitap piigap Israel.

10Ki ng'alaal Kamuktaindet ne Toroor eng' otwogikyik maotik kole, 11“Amu kogoyai Manasseh laitoryatap Judah tuguuchu kiwechei, koyai yaityet kosiir tugul che ki yai Amorik, che ki mi eng' tai, ko tomo kobiit ineendet ak kogoochi Judah agine koyai tengekto eng' kanamonikyik; 12ko kamwa anyun Kamuktaindet ne Toroor, Kamuktaindetap Israel kole: Aipchini yaityet Jerusalem ak Judah kot kotildilyo itiik eng' chii age tugul ne kagas. 13Aiitoi anweetap Samaria kobun Jerusalem, kobooto kiit ne kikwaise ne po kootap Ahab. Abuchi Jerusalem ko uu ye ibuchi chiito sanit, ye ibuchi ak kogabui. 14Atoortai che kang'et che po porotennyu, ak ande icheek eunegap puunikwak. Egu icheek luulenik che luulei puunikwak tugul, 15amu ki koyai yaityet eng' tainnyu ak ki kotacha anereech, kobooch peetuut ne ki mong'u kwanisyekwak eng' Misiri, agoi rani.”

16Kitumda kogeny Manasseh korotiik che chaang' kot, che ma tinyei tengek, kot konyiit Jerusalem kong'etee komosta age agoi komosta age; kobooto tengektanyi ne ki ibeete Judah si koyai tengekto, eng' yaityet ne ki yai eng' taitap Kamuktaindet ne Toroor.

17Poisyonik che ng'etunotiin che po Manasseh, tuguuk tugul che ki yai, kobooto tengektanyi ne ki yai, ko tos ma siraatiin eng' kitabuutap ateptap peetuusyek ne po laitorinigap Judah? 18Ki ru Manasseh kobooto kwanisyekyik ak ki kitupchi mbareetap koonnyi, eng' mbareetap Uzzah. Ak ki laitoran Ammon weeriinnyi kogeer ineendet.

Ammon, laitoryatap Judah

(2A.Pet 33:21-25)

19Ki po kenyiisyek tiptem ak aeng' Ammon ye ki tau kolaitorani, ak ki laitoran kenyiisyek aeng' eng' Jerusalem. Kainetap kamennyi ko ki Mesulemet cheptap Harus ne po Jotba. 20Ki yai yaityet eng' taitap Kamuktaindet ne Toroor, ko uu ye kiga yai Manasseh kwandanyi. 21Kiwendote ortinwek tugul che kiwendote kwandanyi, ak koot kanamonik che kiotei kwandanyi, ak kogutung'ji. 22Ki meto Kamuktaindet ne Toroor, Kamuktaindetap kwanisyekyik, ama isup ortinwegap Kamuktaindet ne Toroor.

23Kichaam otwogikyik Ammon, ak kobar otwogichooto laitoryat eng' koonnyi. 24Ago ki par piigap emet icheek tugul che kichaamei Laitoryat Ammon, ak ki yai icheek Josiah weeriinnyi koek laitoryat.

25Poisyonik che ng'etunotiin che po Ammon che ki yai, ko tos ma siraatiin eng' kitabuutap ateptap peetuusyek ne po laitorinigap Judah? 26Ki kitupchi kererinnyi eng' mbareetap Uzzah. Ak ki laitoran Josiah weeriinnyi kogeer ineendet.

22

Josiah, laitoryatap Judah

(2A.Pet 34:1-2)

221

22.1:
Jer 3.6
Ki po kenyiisyek sisiit Josiah ye ki tau kolaitorani, ak ki laitoran kenyiisyek sosom ak agenge eng' Jerusalem. Ki kiguure kamennyi Jedida cheptap Adaiah ne po Boskat. 2Ki yai ne myee eng' taitap Kamuktaindet ne Toroor ak kowendote ortinwek tugul che po Daudi kwandanyi, ama masta kwo tai anan ko kaataam.

Kenyooru kitabuutap ng'atuutik

(2A.Pet 34:8-28)

3Ak eng' kenyiitap taman ak sisiit ne po laitornatennyi, kogiyookto Laitoryat Josiah siriindet, Sapan weeriitap Asalia, weeriitap Mesulam, kwo kootap Kamuktaindet ne Toroor, koleenji, 4“Togoste kap Hilkiah tisiindet ne oo, ileenji koiit fedhaisyek che kigeip kobwa kootap Kamuktaindet ne Toroor che ki koyum eng' piik riibiigap kurgeet. 5Ingogoochi kiboitiinikyik che poisyei eng' kootap Kamuktaindet ne Toroor. Ak ingogoochi kiboitiinik che mi kootap Kamuktaindet ne Toroor, chooto teechei ole ki kobutok eng' koot; 6che icheeget ko musogik che po pagoinik, teegik ak piik che waei koik si koalee pagoinik ak koik che waatin ak koteege koot ole ki kobutok. 7

22.7:
2Lai 12.15
Ago ma kiit fedhaisyek che kiga kigoochi pichooto; amu kiboisyei eng' imanda.”

8Ki leenji `Hilkiah tisiindet ne oo Sapan siriindet, “Koanyooru bukuitap Ng'atuutik eng' kootap Kamuktaindet ne Toroor.” Ak ki igoochi Hilkiah Sapan bukuinooto, ak kisooman. 9Ki nyo Sapan siriindet kaplaitoryat ak koipchi laitoryat ng'olyoot kogeny, ak kole, “Kogogesta otwogiguk fedhaisyek che ki mi koot ak kogoochi kiboitiinik che riibei kootap Kamuktaindet ne Toroor.” 10Ki mwachi Sapan siriindet laitoryat, koleenji, “Kagoono Hilkiah tisiindet bukuit.” Ak kisooman Sapan eng' taitap laitoryat. 11Kingo kas laitoryat ng'aleegap bukuitap Ng'atuutik, kogereer ngoroikyik. 12Ki ng'at `laitoryat Hilkiah tisiindet, Aikam weeriitap Sapan, Akbor weeriitap Mikaia, kobooto Sapan siriindet ak Asaiah otwogindetap laitoryat koleenji, 13“Oba, oteebwa eng' Kamuktaindet ne Toroor, ak agobo piik, kobooto Judah komugul, agobo ng'aleegap kitabuuni kaginyoor. Eechen nereegegap Kamuktaindet ne Toroor che laldos agobo acheek amu ma kas iit kwanisyekyok ng'aleegap bukuini, koyai ko uu tugul che ki kisir agobo acheek.” 14Ki pa anyun Hilkiah tisiindet ak Aikam, Akbor, Sapan ak Asaiah, ole ki mi maotyot Hulda ne ki osotyotap Shallum weeriitap Tikba, weeriitap Haras, ne ki riibindetap ngoroik. Ki menyei kwonyooto Jerusalem kebebertap aeng', ak ki ng'alaal `icheek kobooto ineendet. 15Ki mwachi icheek koleenji, “Kamwa Kamuktaindet ne Toroor, Kamuktaindetap Israel, kole: ‘Oleenji chiichoo kaiyokwok obwa oldanywa, 16Kamwa Kamuktaindet ne Toroor kole: Aibu yaityet konyonji koroni kobooto piikyik, ko uu ng'aleek tugul che po bukuinooto kasomani laitoryatap Judah. 17Amu kimetaa icheek ak kobeelji nyamdutik kamuktaik ak kotacha anereech eng' poisyonikwak tugul che po eunekwak, eng' nooto anyun, kolaldos nereegekyuk agobo koroni, ama kimisi.’ 18Ago omwachini laitoryatap Judah, ne kaiyokwok obwa oteepse Kamuktaindet ne Toroor, oleenjini, ‘Kale Kamuktaindet ne Toroor, Kamuktaindetap Israel, agobo ng'aleecho kegas, 19amu kang'arng'arit muguleldang'ung', ak iming'ingei eng' taitap Kamuktaindet ne Toroor, ye kangi kas kiit ne ki amwa agobo olito ak piik che menyei olito, ale egu karaatya ak chubeet, ak amu kegereer ngoroiguk ak iriir eng' tainnyu, kaagasin agane, mwaei Kamuktaindet ne Toroor. 20Ara anyun ayumin iwe ole mi kwanisyeguk, ak kiyumin iwe kerering'ung' eng' kaalyeet, ama keerei konyeguk yaityonooto tugul aipchini olito.’ ” Ak ki ipchi ng'olyoot laitoryat kogeny.

23

Koibu waleet `Josiah eng' emet

(2A.Pet 34:3-7, 29-33)

231Ki iyookto laitoryat kiyumji ineendet poisyek tugul che po Judah ak che po Jerusalem. 2Ki togosta laitoryat kootap Kamuktaindet ne Toroor kobooto piik tugul che po Judah, piik tugul che ki menyei Jerusalem, tisiik, maotik, kobooto piik tugul, che mengech ak che eecheen. Kisoman ng'aleek tugul che po bukuitap arorutyet ne ki kinyooru eng' kootap Kamuktaindet ne Toroor. 3Ki tonon laitoryat eng' ye po toloita ak koyai arorutyet eng' taitap Kamuktaindet ne Toroor, koosup Kamuktaindet ne Toroor ak koriip ng'atuutikyik, paornatosyekyik ak kayomisutikyik eng' muguleldanyi tugul ak saboondanyi tugul, kogimit ng'aleegap arorutyoni che ki kisirchi bukuini. Kitononso piik tugul koyan arorutyonooto.

4

23.4-6:
2Lai 21.3; 2A.Pet 33.3
Ki ng'at `laitoryat Hilkiah tisiindet ne oo, tisiik che rubei ne po tai ak riibiigap kurgeet, koip komong' eng' Hekaluutap Kamuktaindet ne Toroor tereenik tugul che ki kiyachin Baal, che po Asera ak che po tuguuk tugul che po kipsengwet. Ki peel eng' Jerusalem saang' eng' mbareetap Kidron ak koip oreek koba Bethel. 5Ki isto tisiigap kanamonik, che kiga konde laitorinigap Judah, kobeelei nyamdutik eng' komoswek che torooreen eng' nganasoogap Judah ak eng' komoswek che kiyiem Jerusalem, kobooto icheek che kibeeljin Baal nyamdutik, asiista, arawet, kecheik che eecheen ak tuguuk tugul che po kipsengwet. 6Ki ip Asera komong' eng' kootap Kamuktaindet ne Toroor, koip komanda eng' Jerusalem, agoi kererutap Kidron, ak kobeel, ak kotuatui komengegitu koek pusbusiik, ak koseer koba kereeriisyegap piik. 7Kibut kooriigap sodomik, che ki mi kootap Kamuktaindet ne Toroor, ole kiyae kwonyiik ngoroik che songinindos che po Asera. 8Ki imut Josiah tisiik tugul komong' eng' nganasoogap Judah ak kong'waniit komoswek che torooreen ole kibeelee tisiik nyamdutik, kobooch Geba agoi Beer-sheba. Kibut komoswek che torooreen che po ormariichok che ki mi ye kimandoe eng' ormariichetap Joshua pounindetap nganaseet, che ki mi komostap kaataam eng' ormariichetap nganaseet. 9Ago ma togos tisiigap komoswek che torooreen kobwa ye miitei kaptisisyetap Kamuktaindet ne Toroor eng' Jerusalem, ago ki amei magatiinik che ma kinde mermereek eng' kwenutap tupchosyekwak.

10

23.10:
A.La 18.21; Jer 7.31; 19.1-6; 32.25
Ki ing'wanit Topet, ne mi atebweetap lagogap Hinom, si ma igoito chii weeriinnyi anan ko cheptonyi kobun maat kogoochi Molek. 11Ki isto paraisisyek che kiga kogoochi laitorinigap Judah asiista. Ki mi ye kimandoe kebendi kootap Kamuktaindet ne Toroor, ye neegitee kootap Natan-melek riibindet, ne mi serem. Ki peel kariisyek che po asiista eng' maat. 12
23.12:
2Lai 21.5; 2A.Pet 33.5
Kibut laitoryat kapkorosusyek che ki mi koot parak eng' koot ne tabanu parak ne po Ahaz, che kiga koyai laitorinigap Judah, ak kapkorosusyek che kiga koyai Manasseh eng' seremusyek tuwai che po kootap Kamuktaindet ne Toroor. Kiturur ak kotuatui yeityo koseer koba kererutap Kidron. 13
23.13:
1Lai 11.7
Ki ing'wanit laitoryat komoswek che torooreen che ki mi taitap Jerusalem, che ki mi eutap tai ne po tulweetap ng'emisyet, ne kiga teekyi Solomon laitoryatap Israel Astoret ne kiwechei ne po Sidonik, kobooto Kemos ne kiwechei ne po Moab, ak Milkom ne kiwechei ne po lagogap Ammon. 14Kituatui anyun ineendet tolochik ak koep Aserik koluul, ak ki inyiit olooto kawegap piik.

15

23.15:
1Lai 12.33
Kibut kapkorosuut ne ki mi Bethel, komosta ne toroor ne kiga koyai Jeroboam weeriitap Nebat, ne ki igoochi Israel koyai tengekto; ki peel komosta ne toroor ak kotuatui koek pusbusiik, ak kobeel Asera. 16
23.16:
1Lai 13.2
Kingo welelgei Josiah, ko ki keer kereeriisyek che ki mi tulweet. Ki iyookto piik koba koip kawek eng' kereeriisyechooto ak kobeel eng' kapkorosunooto, ak kong'wanit ko uu ng'olyootap Kamuktaindet ne Toroor, ne kimwaita chiitap Kamuktaindet ne kimwaitoi tuguuchooto. 17
23.17:
1Lai 13.30-32
Kiteep ineendet kole, “Nee ki o po kabwaatet no ageere?” Ak ki mwachi piigap nganaseet ineendet koleenji, “Kereritap chiitap Kamuktaindet, ne ki punu Judah, ne ki nyo komwaita tuguuchuuto kaiyai iyachi kapkorosutap Bethel.”

18Ak ki le, “Omete, amat koisto chii kawekyik.” Kobagaakta anyun kawekyik, kobooto kawegap maotyot ne ki punu Samaria.

19Ki isto Josiah kooriik tugul che po komoswek che torooreen che ki mi nganasoogap Samaria, che kiga koteech laitorinigap Israel kotage Kamuktaindet ne Toroor konereech, ki yachi chooto tugul ko uu ye kiga koyachi che ki mi Bethel. 20Ki par tisiik tugul che po komoswek che torooreen che ki mi yooto, eng' kapkorosusyek, ak kobeel kawegap piik eng' paragunnywa. Yeityo koweek kwo Jerusalem.

Paska

(2A.Pet 35:1-19)

21Ki ng'at `laitoryat piik tugul koleenji, “Oriipchi Kamuktaindet ne Toroor Kamuktaindeng'wong' paska, ko uu ye ki kisir eng' bukuini po arorutyet.” 22Ki mata keyai paska ne uu nooto kobooch peetuusyegap kirwoogik che ki irwookyin Israel, anan eng' peetuusyek tugul che po laitorinigap Israel, anan che po laitorinigap Judah. 23Ago ki kiyai paska niito eng' kenyiitap taman ak sisiit ne po Laitoryat Josiah, keyachi Kamuktaindet ne Toroor eng' Jerusalem.

Tuguuk alak che ki wal Josiah

24Ki isto `Josiah icheek che kiboisyee oik, pooniik, terapik, kanamonik ak tuguuk tugul che kiwechei che ki kigeerei eng' emetap Judah ak eng' Jerusalem. Ki yai niito si kobiit kogimit ng'aleegap Ng'atuutik che kiga kisir eng' bukuit ne kinyoor Hilkiah tisiindet eng' kootap Kamuktaindet ne Toroor. 25Ki ma piit eng' tai anan eng' let laitoryat ne kergei ak ineendet, ne ki isup Kamuktaindet ne Toroor eng' muguleldanyi tugul, eng' saboondanyi tugul ak eng' kamugennyi tugul, ko uu Ng'atuutik tugul che po Musa.

26Agot nganda uu nooto koma meto Kamuktaindet ne Toroor koroomnatetap nereegekyik che eecheen, che kiga nereekyine Judah, amu tagisyet tugul ne kitach Manasseh ineendet. 27Ki le Kamuktaindet ne Toroor, “Aistoi Judah agine eng' tainnyu, ko uu ye ki aiste Israel, ak amete nganasani ki alewen, Jerusalem, kobooto koot ne ki ale, ‘Tebee kainennyu yooto.’ ”

Meetap Josiah eng' Megiddo

(2A.Pet 35:20-36:1)

28Poisyonik che ng'etunotiin che po Josiah, ak tuguuk tugul che ki yai, ko tos ma siraatiin eng' kitabuutap ateptap peetuusyek ne po laitorinigap Judah? 29Ki togosta Pharaoh-neko laitoryatap Misiri eng' peetuusyegap Josiah kobookyi laitoryatap Assyria, eng' aineetap Yufrets. Ki wo Laitoryat Josiah kwo kobargei ak ineendet; ak ki par laitoryandanooto Josiah eng' Megiddo, ye kingo keer ineendet. 30Kila ineendet otwogikyik eng' chepkichutit eng' Megiddo ko kagome ak kola agoi Jerusalem ak kotupchi ineendet kererinnyi. Ak ki imut `piigap emet Jehoahas weeriitap Josiah, koiil ak koyai ineendet koek laitoryat, kogeer kwandanyi.

Jehoahas, laitoryatap Judah

(2A.Pet 36:2-4)

31Ki po kenyiisyek tiptem ak somok Jehoahas ye ki tau kolaitorani, ak ki laitoran arawek somok eng' Jerusalem. Ki kiguure kamennyi Hamutal cheptap Jeremiah ne po Libna. 32Ki yai yaityet eng' taitap Kamuktaindet ne Toroor ko uu tugul che kiga yai kwanisyekyik. 33Ki rat `Pharaoh-neko ineendet eng' Ribla eng' emetap Hamath, si ma laitoran eng' Jerusalem, ki ng'at emet kogoon aisuruut, keruutik eliphuusyek somok ak pogol ang'wan che po fedha, ak kiloisyeksosom ak ang'wan che po thahabu. 34

23.34:
Jer 22.11-12
Ki yai `Pharaoh-neko Eliakim weeriitap Josiah koek laitoryat kogeer Josiah kwandanyi, ak ki wal kainennyi koek Jehoiakim. Ago ki imut Jehoahas koisto ak ki nyo Misiri, ak ki nyo kome eng' olooto.

Jehoiakim, laitoryatap Judah

(2A.Pet 36:5-8)

35Ki igoochi Jehoiakim fedha ak thahabu Pharaoh, ago ki ng'at emet kogoon fedhaisyek ko uu ng'atuutyetap Pharaoh. Kimage fedha ak thahabu piik che po emet, chii age tugul ko uu ye ki king'at, si kogoochi Pharaoh-neko.

36

23.36:
Jer 22.18-19; 26.1-6; 35.1-19
Ki po kenyiisyek tiptem ak muut Jehoiakim ye ki tau kolaitorani, ak ki laitoran kenyiisyek taman ak agenge eng' Jerusalem. Ki kiguure kamennyi Sebida cheptap Pedaiah ne po Ruma. 37Ak ki yai yaityet eng' taitap Kamuktaindet ne Toroor, ko uu tugul che kiga yai kwanisyekyik.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]