Revised Kalenjin Bible (KAPR)
13

Amnon ak Tamar

131Ki tinyei Absalom weeriitap Daudi chepkamet ne karaaran, ne ki kiguure Tamar. Ki cham `Amnon weeriitap Daudi Tamar. 2Ki iimgei Amnon kot komyan amu chepkametinnyi Tamar, amu ki pergeiyat, ak ki keer Amnon kouuit koyachi kiy age tugul ineendet. 3Nguno anyun ko ki tinyei Amnon chorweet, ne kainennyi ko ki Jonadab, weeriitap Simea, ng'eetap kametap Daudi. Ki chii ne ng'aaliin miising' Jonadab. 4ki teebee `Jonadab Amnon koleenji, “Kolya o, weeriitap laitoryat, si isagiti peetuut age tugul?” Kowolji `Amnon ineendet koleenji, “Koacham ak amache Tamar chepkametap tupchennyu Absalom.”

5Koleenji `Jonadab ineendet, “Ui ru eng' itogung'ung' ak iigei chiito ne myani, si ye nyo kwandang'ung' kogeerin, ileenji, Asoomin ale konyo tupchennyu Tamar nyoo kogoono amitwogik aam ak kochobwa amitwogik eng' tainnyu, si kobiit ageer yeityo kogoono eng' eunnyi aam.” 6Ara ki ru anyun Amnon, koigei chiito ne myani. Kingo nyo laitoryat kogeer ineendet, koleenji Amnon laitoryat, “Asoomin ale konyo tupchennyu Tamar ak kochobwa magatiinik aeng' ageere si kobiit kogoono eng' eunnyi aam.”

7Koyookto anyun Daudi keguur Tamar eng' kaa ak koleenji, “Ui kootap ng'eetap kamenng'ung' Amnon si ichopchi amitwogik.” 8Ko uu nooto anyun, kogiwo Tamar kootap ng'eetap kamet Amnon ne kiruei. Ki nam peek che kagitesyi peek ak kokwanykwany yeityo kochop magatiinik eng' tainnyi ak kobeel. 9Yeityo konam taabeetap karnet ak koluluk eng' tainnyi kogoochi, ago ki eesyo koam. Ki le `Amnon, “Ingomanda piik tugul eng' yu ami.” Ak kimanda chii tugul eng' ye ki mi ineendet. 10Ki leenji `Amnon Tamar, “Ibu amitwogik kobwa kooi arue si kobiit igoono eng' eung'ung' aam.” Ki ip Tamar magatiinik che kagochop, koip koba koyooto koipchi ng'eetap kamet Amnon. 11Ago ye kingo kagoip magatinichooto koba ye neegitee ineendet si koam, kosuup ineendet ak koleenji, “Nyoo keruiye tuwai, tupchennyu.” 12Ak ki wolji `Tamar koleenji, “Achicha, tupchennyu, amesuuba, amu ma mi kiy ne uu no ne nyolu keyai eng' Israel; ameyai yaityoni. 13Si awo ano anyun anee eng' teweernatennyu? Ak iigei inyee age eng' che yaacheen che abusotiin eng' Israel. Ara anyun, asoomin ale ng'alaalji laitoryat; amu maetenen abunjin.” 14Ago ma cham kogas ng'aleekyik, ago amu ki kiim kosiir chebooto, ko kisuup ak koruiyo ak ineendet. 15Kingo pata kosas `Amnon ineendet eng' saset ne oo miising', amu kieet weget ne kiwech ineendet kosiir chamyet ne kiga chame ineendet. Ki leenji `Amnon ineendet, “Ng'eet, ui.” 16Kowol Tamar koleenji ineendet, “Ma uu nooto, amu ya yaityoni oo keonena kosiir kiit ne kaiyaiywo.” Ago ma cham kogas ng'aleekyik. 17Yeityo koguur otwogindet ne kiboisyechin konyo ole mi ak koleenji, “Imaande kwonyi kwo eng' yu ami, ak itemel kurgeet ko kagomanda.” 18Ki ilaachi chebooto ngoryeet ne kooi, amu ki cham kolaachi tiibiigap laitoryat che pergeinik ngoroik che uu chooto. Ki imut anyun otwogindennyi ineendet konyo saang' ak kotemel kurgeet ko kagomong' konyo saang'. 19Ki inde Tamar oreek metinnyi ak kogereer ngoryennyi ne kooi ne ki ilaachi. Kinamatkei met ak kwo koriiroti eng' kutit ne oo. 20Ki leenji `Absalom ng'eetap kametap Tamar ineendet, “Koomi ak Amnon ng'eetap kamenng'ung'? Siis nguno anyun, tupchennyu; ineendet ko ng'eetap kamenng'ung'. Mende kiito muguleldang'ung'.” Ki tebi Tamar anyun ineegei eng' kootap ng'eetap kamet Absalom.

21Ago kingo kas Laitoryat `Daudi tuguuchuuto tugul, konereech miising'. 22Ma mwachi `Absalom Amnon kiy ne myee anan ko ne ya. Ki sas `Absalom Amnon, amu kiga suup chepkamennyi Tamar.

Kobare `Absalom Amnon

23Ye kingo siirto kenyiisyek aeng'u, ko ki mi Absalom ak piik che kitilei koroorigap keechiirek eng' Baal-hasor ne mi ye neegitee Ephraim, ak kiguur Absalom weeriik tugul che po laitoryat. 24Ki wo Absalom ole mi laitoryat ak koleenji, “Keero, tinyei otwogindeng'ung' piik che tilei koroorigap keechiirek. Ara asoomin ale ingoba laitoryat ak otwogikyik kobooto otwogindeng'ung'.”

25Kowolji `laitoryat Absalom koleenji, “Achicha, weeriinnyu, ma myee keebe tugul, si ma kigoonin nyigiisindo. Ki igaigai ineendet,” ago nganda ma cham kwo, ko ki iberuur ineendet. 26Ki soom anyun Absalom kole, “Ngot ko mewendi, asoomin ale keebe kobooto Amnon tupchennyu.” Ki teebee `laitoryat ineendet koleenji, “Amu nee si imache obe tuwai?” 27Ago ki igaigai `Absalom ineendet, kochamji Amnon ak weeriik tugul che po laitoryat koba kobooto ineendet. 28Ki ng'at `Absalom otwogik koleenji, “Ye kagobaibait muguleldap Amnon eng' maiyek, ko ye aleenjok, ‘Okwer Amnon,’ obar anyun ineendet matoiywei. Ma anee ne kang'atak? Ogimegitu ak onyiganitu.” 29Ki yachi `otwogigap Absalom Amnon ko uu ye kiga ng'at Absalom. Ki ng'eetyo anyun weeriik tugul che po laitoryat kolaany chii tugul nyumbunnyi ak komwei.

30Ye kita kobendi eng' ooreet, koit ng'aleek ole kimi Daudi keele, kagobar `Absalom weeriik tugul che po laitoryat, ak ma ng'et agot agenge eng' icheek. 31Ki ng'eet anyun laitoryat kogereer ngoroikyik ak koru eng' ng'wony. Ki tononso otwogikyik tugul eng' ole mi ineendet ko kagogereer ngoroikwak. 32Ki wol Jonadab weeriitap Simea, ng'eetap kametap Daudi kole, “Mat kobwaat kiptaiyandennyu kole kagebar weeriigap laitoryat tugul, amu Amnon ineegei ne kame. Amu kiga kotil niito eng' ng'atuutyetap Absalom kobooch peetuut ne kigasuup Amnon chepkamennyi Tamar. 33Nooto anyun, amat konde kiptaiyandennyu laitoryat kii muguleldanyi, kobwaat kole kagobek weeriik tugul che po laitoryat. Amnon ineegei ne kame.” 34Kimwei Absalom. Ak kitabendo murenet age ne kiriipsei, ak kingo keer, kogeer kobwanei piik che chaang' kobunu ooreetap tegeiyat ne ki mi let eng' ineendet. 35Ki leenji `Jonadab laitoryat, “Keero, kagobwa weeriigap laitoryat, ko uu ye kamwa otwogindeng'ung' ko uu nooto.” 36Kingo kagogees ng'alaalet, koit weeriigap laitoryat ak kowaakyo ak kooteeiyo. Ki ite laitoryat agine ak otwogikyik tugul eng' kateet ne oo.

37

13.37:
2Sam 3.3
Ago ki mwei Absalom kwo ole mi Talmai weeriitap Amiur laitoryatap Gesur. Ki riirchi `Daudi weeriinnyi peetuut age tugul. 38Kimwei anyun Absalom kwo Gesur ak ki tebee olooto kenyiisyek somok. 39Ak kimach miising' Laitoryat Daudi kwo ole mi Absalom, amu kiga konyoor kagaigaet agobo Amnon, amu kiga kome.

14

Koweeksei Absalom

141Ki nai Joab weeriitap Zeruiah kole tokyingei kabwaatutigap muguleldap Laitoryat Absalom. 2Ara anyun ki iyookto `Joab keguur kwondo ne utaat eng' Tekoa yeityo koleenji, “Asaain ale iyaigei ogergeitu ak chiito ne riirei. Ilaach ngoroigap riirek, amat iilegei mwaita, ago ogergeitu ak kwondo ne ki koriir keny agobo chiito ne kime. 3Yeityo iwe kaplaitoryat ak ing'alaalji ko uu ni.” Ki inde anyun Joab ng'aleek kutitap kwonyooto. 4Ara anyun ki wo kwonyotok po Tekoa kaplaitoryat, ak ye kingo ng'alaaljin laitoryat, kobutyi ng'wony koting'e togeennyi ng'wony, kogutung'ji ak kole, “Toreto, ee laitoryat.”

5Ki teebee `laitoryat ineendet koleenji, “Amin nee?” Ak ki wolji koleenji, “Aa kwony ne ki kosiirtoe manong'otyot iman. Ki kome manong'otyondennyu. 6Ak ki tinyei otwogindeng'ung' weeriik aeng', ak kiboryo tuwai eng' timiin, ama piit chii ne ki ibesyo icheek ak kikwer `age age ak kobar. 7Ki ng'eetyo koot komugul koborye otwogindeng'ung' ak ki le, ‘Koonu ineendet ne kobar ng'eetap kamet si kobiit kebar ineendet agobo saboondap ng'eetap kamennyi nooto kobar, si kebar agine ne kata namei tuguuk, si komis mannyu ne kong'et, ama ituukyi manong'otyondennyu kainet anan ko ne ng'etu eng' ng'wony.’ ”

8Ki leenji `laitoryat kwonyooto, “Ui koong'ung', si ang'at keyaun ng'aleechooto.” 9Ago ki leenji kwonyooto po Tekoa laitoryat, “Kiptaiyandennyu, ee laitoryat, ingotebena tengegi ak kotebee kootap abba, ak ingoek ne ma tinyei ng'oogisto laitoryat ak ng'echerennyi ne po laitornatet.”

10Kowol laitoryat kole, “Chii age tugul ne mwaun ng'olyoo imutwaa, si mata kotwain kogeny.” 11Yeityo komwa kwonyooto kole, “Asoomin ale ingobwaat `laitoryat Kamuktaindet ne Toroor Kamuktaindeng'ung', si mata kobaris ne yaaktoi korotiik, si ma par weeriinnyu.” Ak ki le laitoryat, “Ko uu ye sabei Kamuktaindet ne Toroor, koma ibutyin ng'wony agot sumeiyot agenge ne po weeriing'ung'.” 12Kole anyun kwonyooto, “Asoomin ale chamji cheptong'ung' ne otwogindet komwachi ng'olyoot kiptaiyandennyu laitoryat.” Ak ki le, “Mwa.” 13Ki le kwonyooto, “Kilya si ibwaat kiit ne uu no agobo piigap Kamuktaindet? Amu ngo mwa laitoryat ng'olyoot ne uu ni, ko kaigei chii ne tinyei ng'oogisto, amu ma imut laitoryat konyo kaa nenyi ne ki kioon. 14Amu nyoljinech kebegu ne matiny ak ki uu peek che kagitumji ng'wony, che ma kimuuchi keram kogeny. Ama istoi `Kamuktaindet saboondo, ago chobei ooreet si mata koigei ne ki kioon ne ki king'eeto. 15Nooto anyun kaanyo amwachi ng'olyoondoni kiptaiyandennyu laitoryat, amu ki imua piik. Ki ale anee otwogindeng'ung' ne chepto, ‘Ang'alaaljini laitoryat, abeere imuuchi laitoryat koyachi otwogindennyi soomennyi.’ 16Amu kasei laitoryat ak kosarwo anee otwogindennyi eng' eutap chiito ne machei kobara ak weeriinnyu koistoenech poroteetap Kamuktaindet. 17

14.17:
2Sam 19.27
Amwa anyun anee otwogindeng'ung' ale, ‘Asoomin ale, ingomyeeit ng'olyootap kiptaiyandennyu laitoryat. Iguitos kiptaiyandennyu laitoryat kiit ne myee ak ne ya ko uu malaikaiyatap Kamuktaindet ne Toroor, ak ingotep Kamuktaindet ne Toroor Kamuktaindeng'ung' kobooten.’ ”

18Ki wolji anyun laitoryat kwonyooto koleenji, “Asoomin ale, ameung'ena kiy age tugul ne ateebenen.” Ak ki wol kwonyooto kole, “Ingong'alaal kiptaiyandennyu laitoryat nguno.” 19Koteebee laitoryat koleenji, “Tos omi ak Joab eng' ng'aleechu tugul?” Kowol kwonyooto kole, “Ko uu ye sabei saboondang'ung', kiptaiyandennyu laitoryat, ma mi chii ne imuuchi komasta kwo eutap tai anan kwo murot kaataam eng' kiy age tugul ne kagomwa kiptaiyandennyu laitoryat. Amu kong'ata otwogindeng'ung' Joab, ak komwaiwo anee otwogindeng'ung' ng'aleechuuto tugul. 20Ki yai otwogindeng'ung' Joab kiito, si kobiit kewal kiit ne uu ng'olyoondoniito. Tinyei kiptaiyandennyu utaatyet ne uu utaatyetap malaikaiyatap Kamuktaindet, konai tuguuk tugul che mi ng'wony.”

21Ki leenji anyun `laitoryat Joab, “Keer anyuno, ayae kioto. Ui anyun, imutu nerananooto Absalom.”

22Ki ibutyi ng'wony Joab, kong'uruuk ak koberuur laitoryat. Ki le Joab, “Kagonai otwogindeng'ung' rani kole kaanyooru myeeindo eng' taing'ung', kiptaiyandennyu, ee laitoryat, amu kagoyachi laitoryat otwogindennyi soomennyi.” 23Ki ng'eet anyun Joab kwo Gesur, kwo komut Absalom konyo Jerusalem. 24Ago ki le laitoryat, “Amat konyo kogeero togoch, ago ingowo koonnyi.” Kwo anyun Absalom koonnyi, ama keer laitoryat togoch.

Kotuitos Absalom ak laitoryat

25Ki ma komi eng' Israel tugul chiito ne ki kilasu eng' korooronindo ko uu Absalom. Ki ma kotinyei perutyet kong'etee keldebesyet agoi metinnyi parak. 26Kingo nem metinnyi, amu ki inemu suumeekyik eng' kagesunetap kenyiit age tugul, amu kinyigiisen eng' ineendet, ko ki ngebiman suumeekyik ko ki egu keruutik pogol aeng' ak kiy, eng' ratilitap laitoryat. 27Ki kisikyi Absalom weeriik somok ak chepto agenge, ne ki kiguure kainennyi Tamar, ak ki chepto ne karaaran kot.

28Ki tebee Absalom kenyiisyek aeng' Jerusalem koma keerei laitoryat togoch. 29Ki iyookto anyun Absalom keguur Joab, si kobiit koyookto kwo kaplaitoryat, ago ma cham konyo ole mi ineendet. Ki iyookto kogeny ne po aeng', ago ma cham konyo. 30Ki leenji anyun Absalom otwogikyik, “Ogeero, neegitee mbareetap Joab mbareennyu, ak tinyei baale eng' mbaranooto. Oba obeel.” Ak ki peel otwogigap Absalom mbaranooto. 31Kong'eet anyun `Joab ak konyo ole mi Absalom eng' koonnyi, ak koteebe ineendet koleenji, “Amu nee si kobeel otwogiguk mbareennyu?” 32Ak ki wolji `Absalom Joab koleenji, “Koaguurin ale, nyoo yu si kobiit ayookten iwe kaplaitoryat, ileenji, Amu nee si anyo eng' Gesur? Kita myee atebee olooto agoi. Chamwo anyun nguno ageer togeetap laitoryat. Nguno anyun, ngot atinye tengekto, kobara.” 33Ki nyo anyun `Joab kaplaitoryat ak komwachi; ak kingo kageguur Absalom, konyo anyun kaplaitoryat ak kong'uruuk kot kotiiny togeennyi ng'wony eng' taitap laitoryat. Ki ng'utut `Laitoryat Absalom.

15

Komachei Absalom korep laitornatet

151Kingo pata ni, kochopchigei Absalom chepkichutit kobooto paraisisyek, ak murenik konom che rwae kondoe ineendet. 2Ki ng'eetei Absalom karon miising' ak kotonon eng' ye neegitee ormariichet. Ak kingo tinyei chii age tugul ng'olyoo ne ibei kwo kaplaitoryat kirwookyinechi, koguurei Absalom konyo ye mi ineendet ak koleenji, “Ii po nganaseet ingiro?” Ak kole, “Po otwogindeng'ung' age eng' pororyosyegap Israel.” 3Yeityo koleenji Absalom ineendet, “Keero, myach ng'aleeguk ak ko lititen, ago ma mi chii ne ki inde laitoryat kogasun.” 4Ki le kogeny Absalom, “Oiye, nda kiga kiyaa aek kirwoogindet eng' emet, ko ngo nyo ole ami chii age tugul ne tinyei ng'olyoo anan kirwooget, ayachini imanda!” 5Kingo riikyi chii age tugul kwo kong'uruuk eng' tainnyi, koyogooito eunnyi, konam ineendet ak kotorooch. 6Ki yachi Absalom ko uu nooto Israel tugul che ki pendi kaplaitoryat agobo kirwooget, ak ki chamak ko uu nooto anyun Absalom mugulelwegap piigap Israel.

7Kingo keskei kenyiisyek ang'wanu,15:7 Ang'wanu: Mwaei alak eng' kaweegunetap siruutik che po keny kole ‘artam.’ koleenji `Absalom laitoryat, “Kaigai ichamwo awo agoito kaarortaennyu, ne ki aaroorchi Kamuktaindet ne Toroor eng' Hebron. 8Amu ki aaroorte anee otwogindeng'ung' ye kita ami Gesur eng' Syria ale, ‘Ngot koweektaa Kamuktaindet ne Toroor kogeny iman awo Jerusalem, aboisyechini anyun Kamuktaindet ne Toroor.’ ” 9Kingo leenji laitoryat ineendet, “Ui eng' kaalyeet,” kong'eet anyun ak kwo Hebron. 10Ago ki iyookto Absalom segeik koba pororyosyek tugul che po Israel, koleenji, “Eng' sait ne kogas iryageet, omwa ole, Laitorani Absalom eng' Hebron.” 11Ki pa piik pogolwogik aeng'u eng' Jerusalem kobooto Absalom che kiga kiguur ak ki pa eng' perberindanywa komengen kiy. 12Ki iyookto Absalom keguur Ahitopel Gilonindet, toretindetap Daudi eng' nganasennyi, Gilo, ye ki igoitoi tiseiywot. Kitesak chaamset, amu kitesaksei piik che namegei ak Absalom.

Komweei Daudi eng' Jerusalem

13Ki nyo chiito kap Daudi ne ki ibu ng'aleek, ak koleenji, “Mi mugulelwegap piigap Israel ak Absalom.” 14Ak ki leenji `Daudi otwogikyik tugul che ki mi ak ineendet eng' Jerusalem, “Ong'eetyee, kanyool kemwei, amu ngo ma uu nooto, koma mi chii ne chilili eng' Absalom. Ongechaakte, si ma nyoorwech nguno ak koibwech yaityet ak kobar nganaseet eng' rotwetap chok.” 15Kowolji `otwogik laitoryat koleenji, “Ki chobootiin acheek otwogiguk keyai kiit age tugul ne kalewen kiptaiyandennyo laitoryat.” 16Ki manda laitoryat ak ki isup ineendet `piik tugul che po koonnyi. Ago ki pagaakta laitoryat chebaigeinik taman koriip kootap laitornatet. 17Ki manda laitoryat anyun ak ki isup ineendet `piik tugul, ago ki tebi kitigin eng' koot ne mi tabanuutap nganaseet. 18Ki pa otwogikyik tugul kobun ye neegitee ineendet. Ki indoe ineendet Keretik, Peletik tugul ak Gitik che ki murenik pogol lo che ki isubu ineendet kobunu Gath.

19Yeityo koleenji laitoryat Itai Gitindet, “Amu nee si inyoo keebe tugul aginye? Weektegei, ui otebi ak Laitoryat Absalom. Ii punootyo inyee ne ki kionun eng' oldang'ung', ara weektegei ui oldang'ung'. 20Amu koiitu amut, tos myee amutatin ketogostoi ak kerektoi? Amu awendi ole kamach. Weege anyun ak iweech tupchosyeguk, ak ingotep kobooten rireenet ak imanit.” 21Ago ki wolji `Itai laitoryat koleenji, “Ko uu ye sabei Kamuktaindet ne Toroor ak ko uu ye sabei kiptaiyandennyu laitoryat, ko oldo tugul ole mi kiptaiyandennyu laitoryat, ami olooto agane iman, anee otwogindeng'ung' ngo eng' meet anan eng' sabeet.” 22Koleenji `Daudi Itai, “Ui lande.” Ki landa anyun Itai Gitindet ak piikyik tugul kobooto lagok tugul che ki mi ak ineendet. 23Ki waach emet komugul eng' kutit ne oo yooto ki pendi kolondoi, ak ki landae laitoryat kererutap Kidron ak piik tugul kotokyingei surkwen.

24Ki mi Zadok agine kobooto Lawiik tugul che ki mi ak ineendet koibei moingetap arorutyetap Kamuktaindet. Ki itu, konde ng'wony moingetap Kamuktaindet, yeityo kogoito Abiathar kagoochinoik agoi komanda piik tugul eng' nganaseet. 25Yeityo koleenji `laitoryat Zadok, “Oweekte moingetap Kamuktaindet koweek kwo nganaseet. Ngot anyooru chameet eng' taitap Kamuktaindet ne Toroor, ko tuun komutwaa kogeny ineendet ak koboorwo moingonooto ak ole tebee. 26Ago ngot komwa kole, Ma abaibai eng' inyee, ami yu, ingoyaiywo ko uu ye keerei kole myee.” 27Ki mwachi anyun laitoryat kogeny Zadok tisiindet koleenji, “Tos ma ii keerindet? Weektegei nganaseet eng' kaalyeet ak weeriiguk tuwai; Ahimaaz weeriing'ung', ak Jonathan weeriitap Abiathar. 28Atebee ole kilandoe kebendi surkwen, agoi agas ng'olyoo eng' inyee ne imwaiwo.” 29Ki ip anyun Zadok ak Abiathar moingetap Kamuktaindet kogeny kwo Jerusalem, ak ki pa kotebee olooto.

30Ki togosta Daudi kobun ooreet ne kitogostoe kebendi tulweetap mseituni koriiroti. Kiga tuchkei met ago ma tinyei kweonik. Kituchkei met chii age tugul eng' piik tugul che ki mi kobooto ineendet ak kotogostoi, koriiryoti. 31Ak ki kimwachi Daudi keleenji, “Mi Ahitopel kobooto njaamigap Absalom.” Ak ki sa Daudi kole, “Ee Kamuktaindet ne Toroor, asoomin ale, wal kirwoogetap Ahitopel koek perberyo.”

32Kingo it `Daudi tulweet parak ole ki cham kilasune Kamuktaindet, ko ki nyo Hushai Arkindet kotorook ineendet, ko kagogereer ngoryennyi ak komi ng'ung'unyek metinnyi. 33Ki leenji `Daudi ineendet, “Ngot inyone keebe tuwai iegu mileet eng' anee. 34Ago ngot iweege iwe nganaseet ak ileenji Absalom, ‘Aegu otwogindeng'ung', ee laitoryat ko uu ye ki aa otwogindetap kwandang'ung' eng' peetuusyek che ki kosiirto, aegu anyun nguno otwogindeng'ung'.’ Eng' yooto anyun, iterteerwa kirwoogetap Ahitopel. 35Tos ma mi kobooten tisiik, Zadok ak Abiathar? Ko ye igase ng'olyoo age tugul ne punu kootap laitoryat, imwachi Zadok ak Abiathar, tisiik. 36Tinyei icheek eng' yooto weeriikwak aeng', Ahimaaz weeriitap Zadok ak Jonathan weeriitap Abiathar. Ara oyogune icheek kiy age tugul ne ogase.” 37Ki it anyun nganaseet Hushai chorweetap Daudi ye kingo itei Absalom Jerusalem.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]