Revised Kalenjin Bible (KAPR)
1

Kagateet

11

1.1:
Poi 17.1
Paulo, ak Silvano, ak Timoteo, kisirchini kanisetap Thessalonikek eng' Kamuktaindet Kwandanyo ak Kiptaiyat Jeso Kristo: 2Ingotep kobootok myeeindo ak kaalyeet che punu Kamuktaindet Kwanda ak Kiptaiyat Jeso Kristo.

Kongoi ak saaet

3Kanyool kemwachi Kamuktaindet kongoi peetuusyek tugul agobo okweek, che kitupche, ko uu ye nyolu, amu nerei kayaneng'wong' miising', ak ko tesoksei chamyet ne oting'egei okweek tugul; 4kot kichounenok kei okweek eng' kanisosyegap Kamuktaindet amu muitaeng'wong' ak kayaneet eng' usiisyosyekwok tugul ak nyalilwogik che omuitoi; 5niito kaboorunet ne tagunoot ne po kirwoogetap imanda ne po Kamuktaindet; si kobiit kiitok keele onyolu eng' laitornatetap Kamuktaindet, ne onyoorunee agine nyalilda: 6si ngo kiy ne po imanda eng' Kamuktaindet koyaakyi mugetuut ne po nyalilda icheeget che inyalilok, 7ak kogoonok kamuung'et kobootech, okweek che kiusei, eng' ng'ang'eetap Kiptaiyat Jeso kobunu kipsengwet kobooto malaikaisyek che po kamuktaennyi 8eng' maat ne lalei, koyaakyi mugetuut icheeget che ma nai Kamuktaindet, ak icheek che ma kase iit logoiywek che myach che po Kiptaiyandennyo Jeso: 9

1.9:
Isa 2.10
che tuun nyooru pireet, nooto ng'emisyet ne po koigeny ko kageisto eng' taitap Kiptaiyat ak eng' toroornatetap kimnateennyi, 10ye tuun nyo si kobiit kitoroor eng' chechiik che tiliileen; ak kekwong'ee icheek tugul che iyani (amu ki kiyan paornatennyo eng' okweek), eng' peetuunooto.

11Nooto anyun kisaiywok kotugul, si kobiit koiitok Kamuktaindet nenyo kole onyolu eng' kuurseng'wong', ak kosulda mageet age tugul ne po myeeindo ak poisyet age tugul ne po kayaneet, eng' kamuktaet; 12si kobiit kitoroor kainetap Kiptaiyandennyo Jeso eng' okweek, ak okweek eng' ineendet, ko uu myeeindap Kamuktaindet nenyo ak Kiptaiyat Jeso Kristo.

2

Chiito ne po tengekto

21

2.1:
1Thes 4.15-17
Kisoomok anyun, che kitupche, agobo nyonunetap Kiptaiyandennyo Jeso Kristo, ak kayumennyo pogei ne kiyumjinigei ineendet; 2si motoptobense ochokyi eng' kabwaatutikwok anan oaragense, ngot ko eng' kabwaatut anan eng' ng'olyoo, anan eng' parweet ne oleen punwech, oleen kagoit peetuutap Kiptaiyat; 3amat kong'alak chii eng' kiy age tugul; amu ma itu peetuunooto, kobatee indou katuituet ak keng'aany chiito ne po tengekto, weeriitap luseet, 4
2.4:
Dan 11.36; Ezk 28.2
ineendet ne kirindoi ak kotorooregei kogirindoi tugul che kiguure Kamuktaindet anan che kilasu; si kotep anyun eng' hekaluutap Kamuktaindet, koboorugei ineendet ko uu ne Kamuktaindet.

5Tos mobwaati, yu ki ami kobootok, ole ki amwaiwok tuguuchu? 6Ak nguno ongen nooto ne raanyei, si kobiit keng'aany eng' peetuusyekyik. 7Amu poisyei nguno ung'ootyetap ngelelnateet; kobatee mi agenge ne raanyei nguno, agoi keisto. 8

2.8:
Isa 11.4
Ak yeityo keng'aany ngelelyot, ne tuun parei Kiptaiyat Jeso eng' kabuusetap kutinnyi, ak kong'em koek puch eng' ng'ang'eetap nyonunennyi; 9
2.9:
Mat 24.24
nyonunennyi konamegei ak poisyetap Setani kobooto kamuget tugul ak kaboorunoik ak kwang'utik che po lembech, 10kobooto keniisyet tugul che ma po imanda agobo icheek che lustos; amu ma taach chamyetap imanit, si kobiit kesar. 11Amu niito anyun, iyookyin Kamuktaindet icheek kamaaset ne poisye si kobiit koyan lembeita: 12si kobiit kirwookyi icheek tugul che ma iyan imanit, ago che kiboiboitune che ma po imanda.

Ki lewenjook yetunet

13Ago kanyool kemwachi Kamuktaindet kongoi kotugul agobo okweek, che kitupche che chamanigap Kiptaiyat, amu ki lewenjok Kamuktaindet yetunet kobooch taunet eng' katabaanetap Kabuuset ne Tiliil ak kayaneetap imanit: 14kiguurok anyun eng' chooto eng' logoiywekyok che myach, si kobiit onyooru toroornatetap Kiptaiyandennyo Jeso Kristo. 15Nooto anyun, che kitupche, olumdegei, ak onam pitonwek che ki kinetak, ngot ko eng' ng'olyoot, anan eng' parweennyo.

16Nguno anyun, ingogaigai Kiptaiyandennyo Jeso Kristo, ak Kamuktaindet Kwandanyo ne ki chamech ak kogoonech kagaigaet ne po koigeny ak kamang'unet ne myee eng' myeeindo, 17kogaigai mugulelwekwok ak kogimit icheek eng' poisyet age tugul ne myee ak ng'olyoot.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]