Revised Kalenjin Bible (KAPR)
1

Kagateet

11Paulo, kayooktoindet ne po Kristo Jeso eng' mageetap Kamuktaindet, ko uu arorutyet ne po saboondo ne miitei eng' Kristo Jeso, 2

1.2:
Poi 16.1
asirchini Timoteo, lakweennyu ne achame miising': Ingotep kobooten myeeindo, rireenetapkei, kaalyeet, che punu Kamuktaindet Kwanda ak Kristo Jeso Kiptaiyandennyo.

Kongoi ak kemwachi piik ko kiilgei

3Amwachini Kamuktaindet kongoi, ne aoote ko uu ye kiyaei kwanisyekyuk che po tai eng' kabwaatet ne tiliil, ale masisei kabwaatet ne abwaatin eng' soomutikyuk, kemoi ak peet, 4atinye emosto ageerin, abwaati peeguk po kong', si konyiia poiboiyet; 5

1.5:
Poi 16.1
ye kingi pwatwa kayaneet ne ma tinyei keniisyet ne mi eng' inyee; ne ki menyei korook eng' ingogo Lois, ak kamenng'ung' Eunike; ak, ayani ale menyin aginye. 6Abwaatun anyun amu niito ale iywokyi konunet ne po Kamuktaindet, ne mi eng' inyee amu kagonooretap eunekyuk. 7Amu ki ma koonech Kamuktaindet muguleldap nyogoryet, ago ne po kamuget ak chamyet ak riibetapkei.

8Amelilanji anyun paornateetap Kiptaiyandennyo, anan anee kimonjororyondennyi: ago nam yamdaetap nyalilwogik amu logoiywek che myach ko uu ye tee kamuktaetap Kamuktaindet; 9ne kisarwech ak koguurech eng' kuurseet ne tiliil, ma ko uu poisyonikyok, ago ko uu magennyi ak myeeindonyi, ne ki kigoonech eng' Kristo Jeso kobooch kenyiisyegap koigeny, 10ago kagotook nguno eng' tagunetap Yetindennyo Kristo Jeso, ne ki kobar meet, ak kong'aany saboondo ak ng'emisyet ne ma komi, eng' logoiywek che myach, 11

1.11:
1Tim 2.7
ki kindea agobo nooto aek amdoindet, ak kayooktoindet, ak kaneetindet. 12Anyooru anyun nyalilwogichu ak icheek agobo nooto: ago ma lilani; amu angen ineendet ne ki ayan, ak ayani komyee ale imuuchi koriip nooto ne ki agoochi ineendet agoi peetuunooto. 13Nam itoondap ng'aleek che po iman che ki igasena, eng' kayaneet ak chamyet ne miitei eng' Kristo Jeso. 14Riip eng' Kabuuset ne Tiliil ne menyei eng' acheek, nooto myee ne ki kigoonin.

15Ingen ni ile, kigoistoenagei tugul che mi Asia; eng' icheek ko Pugelo ak Hermogene. 16Ingogoochi Kiptaiyat rireenet kootap Onesiporo: amu kitoreta konyil che chaang', ama ililan amu monjororitinnyu; 17ago, ye kingo mi Rome, kocheeng'a eng' kagiiletapkei, ak kinyoorwo, 18ingogoochi Kiptaiyat ineendet konyoor rireenet ne po Kiptaiyat eng' peetuunooto! Ak ingen komyee ole tee poisyet ne ki yai eng' Epheso.

2

Asigarindet ne myee ne po Jeso Kristo

21Kimitu anyun, lakweennyu, eng' myeeindo ne miitei eng' Kristo Jeso. 2Ak tuguuk che ki igasena eng' kwenutap paorinik che chaang', igoochi chooto piik che kiyani, che imuuchi koneet alak ak icheek. 3Nam yamdaet ne po nyalilda, ko uu asigarindet ne myee ne po Kristo Jeso. 4Ma mi asigarindet, ne ngo mi poisyet, koratyingei tuguuk che po ng'wony; si kobiit kobaibai ne kisirei ineendet koek asigarindet. 5Ak ngot koyai chii agine kabeletapkei eng' ureryosyek, koma kigoochin kuutweet, ngo ma ibelis ko uu ye mwaei ng'atuutik. 6Nyoljin kabatindet ne yaei poisyet ne uui, kosip kotongoi logoek. 7Ruchi komyee kiit ne amwae; amu koonin Kiptaiyat kaguiyet eng' tuguuk tugul.

8Ibwaat Jeso Kristo, ne king'eet eng' che ki kobek, ne po kesweegap Daudi, ko uu logoiywekyuk che myach: 9ne anyoorunee nyalilda, agoi monjorornatosyek; ko uu chiito ne yaei yaityo; ago ma rataat ng'olyootap Kamuktaindet. 10Nooto anyun amuitoi eng' tuguuk tugul amu che ki kilewen, si kobiit konyoor ak icheek yetunet ne miitei eng' Kristo Jeso kobooto toroornatetap koigeny. 11Po iman ng'olyoondoni: Amu ngo kigebegu kobooto ineendet, kesaptosi kobooto ineendet: 12

2.12:
Mat 10.33; Luk 12.9
ngemuite, ko tuun ki pou kobooto ineendet: ngot keeesye ineendet, ko tuun eesyoech agine: 13ngo ma ki po iman, kotebyei ineendet eng' iman; amu ma imuuchi koeesyogei.

Kiboityot ne iyanaat eng' Kamuktaindet

14Ibwaatyi icheek tuguuchuuto, ng'at icheek eng' taitap Kiptaiyat, si ma ibelgei agobo ng'aleek che ma kisige kiy, che ng'emei icheek che kasei. 15Igiilgei ibartegei ile ki koyanun Kamuktaindet iegu kiboityot ne manyol kolilaan, ne poisyee komyee ng'olyootap imanit. 16Istoegei ng'aleek che ma namegei ak ooreetap Kamuktaindet: amu tesoksei koyaagitu kosiir eng' yaityet, 17ak amei ng'olyoonnywa ko uu chepsergechet: eng' icheek ko Humenayo ak Pileto; 18piik che ki kochiliil eng' imanit, mwaei kole ki kosiirto ng'eetyeet, ak koweleli kayaneetap piik alak. 19

2.19:
Kai 16.5.
Ago tononi lumeiywot ne kiim ne po Kamuktaindet, kotinyei ng'ooksoni keele, Ingen Kiptaiyat icheek che chechiik; ak, Ingoistoegei yaityet age tugul ne mwaei kainetap Kiptaiyat.

20Ago eng' koot ne oo koma mi tereenigap thahabu ak fedha kityo, ago che po keetiik ak ng'ung'unyek ak icheek; ak po alage teegisto, koma po alage teegisto. 21Ngo tiliilgei anyun chii eng' tuguuchuuto, koegu tereet ne po teegisto, ne itabaanat, ne nyoljin koboisyee kiptaiyat, ne ki kichopchi poisyet age tugul ne myee. 22Ago mwee maguutik che po neranik, ak isup imanda, chamyet, kayaneet, kaalyeet, kobooto icheeget che kuurei Kiptaiyat eng' mugulelwek che tiliileen. 23Ago eesye teebutik che perberen che ma punu kaneetisyet, ingen ile yiei pooryosyek. 24Ama nyoljin otwogindetap Kiptaiyat koyai pooryeet, ago koek ne tala eng' tugul, ne chepchep koneetis, ago muitoi, 25ne kere kong' eng' mutyonet icheek che kirindoi; tamangap kogoochi Kamuktaindet icheek siguunet ne po naetap imanit, 26ak kosargei icheek komang'une mesteetap chesawilyet, ko kagoluul icheek si koyai magennyi.

3

Kayaneet ne ma mi eng' peetuusyek che po let

31Ago nai ni ile pwoonei eng' peetuusyek che po let egosyek che pichiien. 2Amu egu piik che chamegei icheegei, che chamei silingisyek, che ichaugei, che mendos, che poisyee chemerereet, che ingeleljin sigiikwak, che ma tinyei kongoi, che ma tiliileen, 3che ma tinyei chamyet, che ma tinyei nyoetap kaat, che itaamsei, che ma riibegei, che kolgoleen, che ma chamei che myach, 4ng'wektoik, ngelelik, che ilasugei, che chamei ureryet kosiir koek che chamei Kamuktaindet; 5che tinyei kergeindap kayweet ne kiywei Kamuktaindet, ago eesyoi kimnateet ne po kaiyweonooto: istoegei chuuto ak icheek. 6Amu pitunee chuuto che itoti kooriik, ak koluul kobogorisyek che perber che tinyei chalwogik che chaang', che indochin maguutik che teerchiin. 7Che ineetegei kotugul, ago ma koi imuuch koityi naetap imanit. 8

3.8:
Kom 7.11
Ak ko uu Janne ak Jambre, che ki kirinda Musa, koyaei chu ak icheek ko uu nooto, kirindoi imanit; piik che ki kong'emogis ng'omnatosyekwak, che petyotiin eng' ooreetap kayaneet. 9Ago matesei tai: amu taagu perberindanywa eng' piik tugul, ko uu ne po chugai ak icheek.

Ng'aleegap Paulo che po let agobo Timoteo

10Ago ki isup inyee kaneetisyennyu, atebeet, kiit ne atokyinige, kayaneet, mutyonet, chamyet, muitaet, 11

3.11:
Poi 13.14-52; 14.1-20
usiisyosyek, nyalilwogik; tuguuchooto che kibwanjo eng' Antiok, ak Ikonia, ak Lystra; ki amuite eng' usiisyosyechooto tugul: ak kisarwo Kiptaiyat eng' chooto tugul. 12Ee, tugul che machei kotebi eng' atebeet ne myee eng' Kristo Jeso, konyooru usiisyet. 13Ago tesoksei kiptengeginik ak keniik eng' yaityet, koberberisyei ak kiberberi. 14Ago tebi inyee eng' tuguuk che ki ineetkei, ak che ki kiguiyeun, ingen icheeget che ki ineetegei; 15ak kobooch ko ii lakwa ko ki ingen siruutik che tiliileen che imuuchi kong'omitin agoi yetunet eng' kayaneet ne miitei eng' Kristo Jeso. 16Punu kabuusetap Kamuktaindet siruutyet age tugul, ak kotoreti eng' kaneetisyet, eng' kergong'yet, eng' kateechinet, eng' katigonet ne mi eng' imanda: 17si kobiit koek chiitap Kamuktaindet, ne ineetat, ne ki kichop koek ne ititaat eng' poisyet age tugul ne myee.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]