Revised Kalenjin Bible (KAPR)
1

Ng'aleek che po tai

11

1.1:
Luk 1.1-4
Eng' kitabuut ne po tai, ee Theophilus, ko ki atet agobo tuguuk tugul che ki toi Jeso koyai ak koneet. 2Ki atet anyun chooto tugul agoi peetuut ne ki kimuti kwo parak, ye kingo kagong'at `inee eng' Kabuuset ne Tiliil che kiyooktoi, chooto kiga kolewen. 3Ye kingo pata nyalildanyi, koboorchigei icheeget kole sabei eng' kaboorunoik che chaang', kong'aang'jingei `inee icheek eng' peetuusyek artam, ak kong'alaaljin icheek agobo tuguuk che po laitornatetap Kamuktaindet. 4
1.4:
Luk 24.49
Ak ye ki amisye tugul, kong'at icheek koleenji, “Amat obe eng' Jerusalem, ago ogen kayomiset ne po Kwanda, nooto ki ogasena. 5
1.5:
Mat 3.11; Mar 1.8; Luk 3.16; Jhn 1.33
Ki ibatisanis Johana iman eng' peek; ago kotom kogeskei peetuusyek che chaang' kibatisanook eng' Kabuuset ne Tiliil.”

Kotogostoi Jeso

6Nooto anyun, ye kingo kagoyumgei, koteebe ineendet koleenji, “Kiptaiyat, iweekyini Israel laitornatet eng' peetuusyechuuto?” 7Koleenji `Jeso icheek, “Mabootok onai peetuusyek anan kenyiisyek che ki konde Kwanda eng' pounatennyi ineegei. 8

1.8:
Mat 28.19; Mar 16.15; Luk 24.47-48
Ago otaache kamuktaet ye tuun kanyonjok Kabuuset ne Tiliil; ak oegu paorinikyuk eng' Jerusalem, eng' Judea komugul ak Samaria, ak agoi tabandap ng'wony.” 9
1.9:
Mar 16.19; Luk 24.50-51
Ye kingo kagomwa tuguuchuuto, kimut ineendet kwo parak kogeerei icheek, ak kitaach pooldet ineendet ak kobetito eng' tainnywa.

10Ye kingo ta konyali kipsengwet kochiiljin kong' kowendi, ogeero, kitononso piik aeng'u eng' ye neegitee icheeget kolaachi ngoroik che leelachen, 11ak ki mwa kole, “Okweek piigap Galilaya, kalya si otononse ak onyali kipsengwet? Jeso niito, ne kagimut kwo kipsengwet, ko tuun nyoonei ko uu yu kogeere kowendi kipsengwet.”

Keleweni kayooktoindet age

12Koweek anyun koba Jerusalem kobunu tulweet ne kiguure tulweetap Mseituni, ne neegitee Jerusalem, ne yamegei ak pandap peetuutap sabato. 13

1.13:
Mat 10.2-4; Mar 3.16-19; Luk 6.14-16
Ye kingo kagoba ko, kolaany koot ne po parak, ole ki tebee agot Petero, Johana, Jakobo ak Andrea, Philipu ak Thomas, Bartolomayo ak Matayo; Jakobo ne po kap Alphayo ak Simion Selote, ak Judas ne po kap Jakobo. 14Ki tebi chu tugul eng' kabwaatet agenge eng' kagiiletapkei ne po saaet, kobooto kobogorisyek ak Maria kametap Jeso, ak tupchosyegap Jeso.

15Eng' peetuusyechooto ko ki tonon Petero eng' kwenutap che tupcho (piik che kigatuiyo, ki olo po pogol agenge ak tiptem), ak kole, 16“Che kitupche, konyolu kosulda siruutik che ki kamwa Kabuuset ne Tiliil eng' tai eng' kutitap Daudi agobo Judas, ne ki kandoindet ne ki indochin icheek che kinamei Jeso. 17Amu ki kiititech, ak kinyoor kebebertanyi eng' poisyoni.”

18

1.18-19:
Mat 27.3-8
(Ak kinyoor chiichi mbareet eng' melektap tengektanyi; ak kingo put kosyep moo, kobetak moet, komong' agutanikyik tugul. 19Kinaak ng'olyoondonooto eng' tugul che menyei Jerusalem, kot keguure mbaranooto Akeldama eng' kutinnywa, nooto ko, Mbareet ne po korotiik.) 20
1.20:
T.Kal 69.25; 109.8
“Amu siraat eng' kitabuut ne po Tyenwogigap Kalasunet kole,

‘Ingoguber ole menyei,

amat komeny chii olooto’;

ak

‘Ingonam chiito age poisyennyi.’

21Ingobiit age eng' piik che ki cham kebendoti tugul eng' peetuusyek tugul ye ki cham komong'u Kiptaiyat Jeso ak komandoi eng' kwenunnyo, 22
1.22:
Mat 3.16; Mar 1.9; 16.19; Luk 3.21; 24.51
kotaune kabatisanetap Johana agoi peetuut ne ki kimuti kwo parak. Kanyool koek age eng' pichuuto paoryat kobootech agobo ng'eetyeennyi.”

23Ara ki lewen piik aeng', Joseph ne ki kiguure Barsaba, (ak ki kiguure kora Justo) ak Matia. 24Ak ki sa kole, “Ee Kiptaiyat, inyee ne ingen mugulelwegap piik tugul, iboorwech eng' pichu aeng', ne kailewen, 25si kobiit konam kebeberta eng' poisyoni ak kayooktaoni, ne ki ibute Judas, si kobiit kwo oldanyi.” 26Kiseer parbareek agobo icheek, ak ki ibutyi parbaryat Matia; ak ki kiitito che kiyooktoi taman ak agenge.

2

Konyonei Kabuuset ne Tiliil

21

2.1:
A.La 23.15-21; NKNg'a 16.9-11
Kingo it peetuutap Pentekoste, ko ki mi tugul komosta agenge. 2Ak ki mong' eng' sainooto cheet ne punu kipsengwet ko uu usoonet ne usei eng' kimnateet ne oo, ak ki nyi koot komugul ole ki tebee. 3Ak ki mong'ji ng'elyebwek che pcheotin, che uu che po maat; ak ki tebee age tugul eng' icheek. 4Ki nyi icheek tugul Kabuuset ne Tiliil ak ki toi kong'alaale kutusweek alak, ko uu ye ki igoochi Kabuuset ne Tiliil icheek kamuget kong'alaal.

5Ki mi Yahudik che ki menyei Jerusalem, piik che ki konyiti Kamuktaindet, che ki punu pororyet age tugul ne mi kurereetap kipsengwet. 6Kingo kas cheonooto, koyumgei tuiyet ak kokwong'yo, amu ki kas chii tugul pichooto kong'alaali eng' kutinnyi. 7Ak ki tang'any tugul ak kokwong'yo komwaei koleen, “Ogeero, tos ma piigap Galilaya chu tugul ng'alaaldos? 8Ak katepto ano si kegas acheek chii tugul eng' kutinnyo, ne ki kisiktech? 9Echeek alak ko Partik, alak ko Medoik ak alak ko Elamik, alak kora ko che menyei Mesopotamia, Judea ak Kapadokia, Ponto ak Asia, 10Phrygia ak Pamphylia, Misiri ak komoswek che po Libya che neegitee Kurene, ak toek che punu Rome, Yahudik kobooto che ki punji Yahudik eng' kayanennywa, 11Kretik ak Arabuuk, kigase icheek kong'alaali eng' kutusweekyok poisyonik che eecheen che po Kamuktaindet.” 12Ki tang'any tugul ak kogereer met, koleenjingei icheegei, “Egu nee ng'olyoondoni?” 13Ago kichombil alak kole, “Kabogityo eng' divaik che leelach.”

Kong'alaaljin `Petero tuiyet

14Ago ki tonon Petero kobooto taman ak aeng' ak koleenji eng' kutit ne oo: “Okweek piigap Judea ak okweek tugul che omenye Jerusalem, ingonaak ni eng' okweek, ak oepchi iit ng'aleekyuk. 15Ma pogityo pichu, ko uu ye obwaati; amu ta ko sait somok kityo. 16Achicha, niito ne kimwaei maotyot Joel kole,

17

2.17-21:
Joel 2.28-32
‘Tuun eng' peetuusyek che po let, mwaei Kamuktaindet,

aroong'jini piik tugul Kabuusennyu ne Tiliil,

ak komaoten weeriikwok ak tiibiikwok,

ak kogeer murenikwok ng'ang'utik,

ak korwotyi poisyekwok karwotitaosyek.

18Ee, agot otwogikyuk, che murenik ak tiibiik,

eng' peetuusyechooto aroong'jini Kabuusennyu ne Tiliil;

si komaoten.

19Ak abarte kwang'utik eng' kipsengwet parak,

ak kaboorunoik eng' oli po ng'wony,

korotiik, maat ak koiyenetap iyeto.

20Kiwolei asiista koek mesundeito,

ak kewal arawet koek korotiik,

kotom koit peetuutap Kiptaiyat, peetuut ne oo ak ko ne tagunoot.

21Ak age tugul

ne kuurei kaineetap Kiptaiyat ko tuun kisaru.’

22“Okweek piigap Israel, ogas ng'aleechu: Jeso ne po Nazareth, chiito ne ki ibarta Kamuktaindet eng' okweek eng' poisyonigap kimnateet ak kwang'utik ak kaboorunoik, che ki yai Kamuktaindet eng' ineendet eng' kwenung'wong', ko uu ye ongen okweek. 23

2.23:
Mat 27.35; Mar 15.24; Luk 23.33; Jhn 19.18
Ineendet ne ki igoito Kamuktaindet eng' pegechinetap ng'olyoondennyi ak naet ne kiga kechop eng' tai, ki ogartaat okweek ineendet ak obar eng' eunegap piik che pistoe ng'atuutik. 24
2.24:
Mat 28.5-6; Mar 16.6; Luk 24.5
Ago ki ing'eet `Kamuktaindet ineendet, ko kagotyach eng' ng'wanindo ne po meet, amu ki ma komuuchi meet konam ineendet. 25
2.25-28:
T.Kal 16.8-11
Amu ki mwa Daudi agobo ineendet kole,

‘Ki ageere Kiptaiyat kotugul komi tainnyu,

amu mi ineendet eunnyu ne po tai si ma kitumduma.

26Amu nooto anyun kogasegei muguleldanyu ak kibaibait ng'elyeptanyu;

kobooto nooto komeng'iisyei poortanyu agine eng' kamang'unet.

27Amu mebagakyini saboondanyu ye mi che ki kobek,

Amegoitoi neng'ung' Ne Tiliil kogeer nunet.

28Ki igoono anai ortinwegap saboondo;

inyiitwa poiboiyet eng' taing'ung'.’

29“Che kitupche, amwaiwok komyee agobo poiyot ne oo Daudi, ale, kime ak ki kitup, ak miitei kererinnyi kwenunnyo agoi ra. 30

2.30:
T.Kal 132.11; 2Sam 7.12-13
Ak amu kimaotyo, ak ki ingen kole kiga koyasyechi `Kamuktaindet ineendet kole, indoi Kamuktaindet ng'echerennyi chiito ne tuun punu iyotennyi. 31Kingo keer niito anyun kong'alaal agobo ng'eetyeetap Kristo kole,

‘Ma kibagakyin ineendet ye mi che kibek,

ama nunei poortanyi.’

32Ki ing'eet `Kamuktaindet Jeso niito, ne ki paorinikyik acheek tugul. 33Amu itoroorot ineendet eng' eutap tai ne po Kamuktaindet, ak ko kagetaach eng' Kwanda kayomiset ne po Kabuuset ne Tiliil, ko kagoroong' anyun niito ogeere ak ogase. 34
2.34-35:
T.Kal 110.1
Amu ki ma togosta Daudi kipsengwet, ago ki mwa ineendet kole,

‘Ki leenji Kiptaiyat Kiptaiyandennyu,

Tebee eunnyu ne po tai,

35agoi ayai puuniguk koek ng'echereetap keelyeguk.’

36“Ingonai anyun komyee koot komugul ne po Israel kole, kigoyai `Kamuktaindet ineendet koek Kiptaiyat ak ko Kristo, Jeso niito ne ki ogartaat.”

37Kingo kas anyun niito, kotoor mugulelwekwak, ak koleenji `icheek Petero ak che kiyooktoi chuun alak, “Che kitupche, ki yai nee?” 38Koleenji `Petero icheek, “Osigu, si kibatisan age tugul eng' okweek eng' kaineetap Jeso Kristo agobo nyoetap kaat ne po tengekwogikwok; si otaach konunetap Kabuuset ne Tiliil. 39Amu neng'wong' kayomisoni, ak lagokwok, ak tugul che mi ole loo, ak tugul che ta koguurei Kiptaiyat Kamuktaindet nenyo kobwonji ineendet.”

40Ak kibaoryan eng' ng'aleek alak che chaang' ak ko ki il koleenji, “Osaruge eng' ibini kunuur.” 41Ki kibatisan anyun icheeget che kitaach ng'olyoondennyi, ak ki kitesyi icheek peetuunooto piik olo po eliphuusyek somok. 42Ki igiiljingei icheek tugul kaneetisyetap che kiyooktoi ak yamdaet, eng' putuletap magatyat ak saautik.

Sabeetap piigap Kristo

43Ki nyoor chii tugul kaiyweisyet, ak kiyaak kwang'utik che chaang' ak kaboorunoik eng' che kiyooktoi. 44

2.44:
Poi 4.32-35
Ki mi tugul kibagenge che kiga koyan ak ki yamdoi tuguuk tugul. 45Ki alda mbareenikwak ak tuguuk alak che ki tinyei ak kopchechi icheek tugul che tee che kinyaliili chii age tugul. 46Ki mi Hekaluut peetuut age tugul kotebyei eng' kabwaatet agenge, ak eng' putuletap magatyat eng' kaa ak ki amisyei eng' kaagaasetapkei, ak eng' muguleldo agenge, 47kolasu Kamuktaindet ak ki poiboi piik tugul agobo icheek. Ak eng' peetuut age tugul ko ki tesyin `Kiptaiyat icheek piik chooto ki nyooru sorunet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]