Revised Kalenjin Bible (KAPR)
16

Kotuitos Timoteo ak Paulo ak Sila

161Ki wo kora Paulo agoi Derbe ak Lystra. Ki mi olooto agenge eng' kasubik ne ki kiguure Timoteo, weeriitap chepyahudyot ne ki kayanindet; ago kwandanyi ko ki Yunanindet. 2Kibaoryanjin ineendet `tupchosyek che ki mi Lystra ak Ikonio kole myee. 3Ki machei Paulo chiichito koba tuwai; ak ki imut ineendet ak komuratan amu Yahudik che ki mi komoswechooto, amu ki ingen tugul kole Yunanindet kwandanyi. 4Ak ye kibendi pandanywa kobunoti nganasook kogoochi icheek ng'atuutik, che kiga ng'at che kiyooktoi ak poisyek che ki mi Jerusalem, si koriip. 5Ki kigimit anyun kanisosyek eng' kayaneet, ak kotesak koiitennywa peetuut age tugul.

Kuurset kobun Makedonia

6Ki pa anyun kobun kooret ne po Phrygia ak Galatia, ko kagoete icheek `Kabuuset ne Tiliil komwaita ng'olyoot eng' Asia. 7Ye kingo toorchigei Mysia, kotyem koba Bithynia, ago ma chamji icheek `Kabuusetap Jeso; 8ak kingo siir Mysia, kochoortagei Traos. 9Ki nyoonji anyun ng'ang'utyet Paulo kemoi; ki mi chiitap Makedonia ne kitononi, kogoigoi ineendet koleen, “Long'u Makedonia, nyoo toretech.” 10Ye kingo kagogeer ng'ang'utyet, eng' sainooto kemach keebe Makedonia, ko kagenai keele kogoguurech Kamuktaindet si kobiit keamji icheek logoiywek che myach.

Konyooru waleet Lydia

11Ki kibun anyun moinget kebunu Traos, kitoorchigei Samothrase, ak peetuut ne ki isubi nooto keit Neapoli. 12Ak keng'eetyo eng' olooto keebe Philippi, ne nganaseetap Makedonia, ne ki tagunoot eng' emonooto, ne ki uuchi Romanik. Ki kitebee nganasanooto eng' peetuusyo. 13Ak eng' peetuutap sabato kemandae ormariichet keebe ole neegitee aineet, ole ki kileen ole kisaae; ak ki kitep ng'wony ak keng'alaalji kobogorisyek che kiga tuiyo. 14Ki mi kobogoryot age ne ki kiguure Lydia, ne ki ilasu Kamuktaindet. Ki po nganaseet ne kiguure Thyatira, ak ki aldaindetap ngoroik che arusen ne piriir. Ye kigaseech, koyaat Kiptaiyat muguleldanyi koepchi iit ak kotaach tuguuk che ki mwaei Paulo. 15Ye kiga kibatisan ineendet ak piigap koonnyi, kogaigaech kole, “Ngo kaogeer ole ayani Kiptaiyat, obwa koonnyu ak otebi.” Ak kibirchech keebe.

Paulo ak Sila eng' korgoreet

16Peetuut age ye ki kibendi ole kisaae, kotuiyenech chepto ne ki tinyei tamirmiryet ne ng'oorsei ne ki ipchi kiptainikyik tuguuk che chaang' amu ng'oorset. 17Ki isubot Paulo kebendi tugul, ak komwaei eng' kutit ne oo koleen, “Pichu ko otwogigap Kamuktaindet Ne Toroor Miising', che mwaiwok ooreetap yetunet.” 18Ak ki yai ineendet ko uu nooto eng' peetuusyek che chaang'. Ago ki aragen Paulo miising', ak kowelelgei ak koleenji oindonooto murwon, “Kang'atiin eng' kainetap Jeso Kristo ale, mong'u eng' ineendet.” Ak ki mong' eng' sainooto.

19Ago kingo keer kiptainikyik kole kagobet kamang'unetap keljinennywa, konam Paulo ak Sila, ak kochuut koba taitap pounik eng' ye kiyae mung'aaret. 20Kingo kagomut icheek kobwa taitap kirwoogik, komwa kole, “Inyaliili pichu nganasennyo miising', ago icheeget ko Yahudik, 21ak ineeti pitonwek che ma chamdaat eng' ng'atuutik ketaach anan kisup, amu acheek ko ki Romanik.” 22Ak ki ng'eet tuiyet kibagenge kobookyi icheek, ak kogereer kirwoogik ngoroigap pichooto ak kong'at kebir eng' kirokweek. 23Ak kingo kagobir icheek miising', kotoorchi korgoreet ak kong'at riibindetap korgoreet koriip komyee. 24Kingo kagonyoor ng'atuutyet ne uu nooto, kotoorchi icheek koot ne po oriit ak koratyi keelyekwak temeleiywek.

25Eng' olo po kemoi kween ko ki saaei Paulo ak Sila ak kotyenjin Kamuktaindet tyenwogik ak ki epchin iit tyenwagikwak kimonjororinik alak. 26Ak ki potan emet miising' eng' sainooto kot kotumdumgei lumeiywegap korgoreet; ak eng' sainooto koyatagis kurgotik tugul ak kotyagogis tuguuk che ki kirate chii tugul. 27Kingo siir eng' rwondo riibindetap korgoreet ak kogeer kurgotigap korgoreet ko yaatatin, kong'us rotwennyi po chok ak ki neegit kobargei, koleen kagochiliilyo kimonjororinik. 28Ago ki mwa Paulo eng' kutit ne oo kole, “Ameyachigei kiy ne ya, amu kimi yu acheek tugul.”

29Ak kiguur keip taisyek, ak kotorombenji ko oriit, ak ki ibutyi keelyegap Paulo ak Sila kobotananu eng' kaiyweisyet. 30Ak ki imut komong' saang' ak kole, “Kiptainichu, ayai nee si kesarwo?” 31Koleenji, “Iyan Kiptaiyat Jeso, si kesaruun, inyee ak koong'ung'.” 32Ak ki amdechi ineendet ng'olyootap Kiptaiyat, kobooto tugul che ki mi koonnyi. 33Ki imut icheek sainooto po kemoi ak kounji pirutikwak; ak ki kibatisan ineendet ak piikyik eng' sainooto. 34Ara ki imut koba koonnyi ak kogoochi amitwogik, ak kiboiboitu miising' ineendet kobooto koonnyi tugul amu kagoyan Kamuktaindet.

35Ak ye kingo kagoeech, koyookto kirwoogik kiptainigap kiplugotinik, kole, “Ounde pichoo koba.” 36Ak ki mwachi riibindetap korgoreet Paulo ng'aleechooto kole, “Kagoyok kirwoogik kole keundak obe; omong'u anyun ak obe eng' kaalyeet.” 37Ago ki leenji Paulo icheek, “Kagobirech eng' taitap piik, ama kirwookwech, acheek piik che ki Romanik, ak kogotoorchech korgoreet; ak nguno komachei koonech eng' ung'oot? Achicha, ma uu nooto; ago ingobwa icheeget komutech kemande.” 38Ki mwachi kiptainigap kiplugotinik ng'aleechuuto kirwoogik ak ki iywei kingo kas kole icheeget ko Romanik. 39Ki pwa anyun kogaigai icheek. Kingo kagomut icheek kobwa saang' kosoom kole koba eng' nganaseet. 40Ki manda anyun eng' korgoreet ak ki pa agoi kootap Lydia; ak kingo kagogeer tupchosyek kogaigai icheek ak koba.

17

Komi Thessalonike

171Kingo kagobun icheek Amphipoli ak Apolonia, koit Thessalonike, ole ki mi sinagogitap Yahudik. 2Ak ki wo Paulo ole mi icheek, ko uu ye ki cham koyaei, ak kong'alaal kobooto pichooto eng' sabatoisyek somok agobo siruutik, 3kong'aang'jin ak koboorchin komyee kole kiga nyoljin Kristo konyalil ak kong'eet kogeny eng' che ki pek; ak kole “Jeso niito aamwok, ko Kristo.” 4Ki iyan anyun alage eng' icheek ak konamgei ak Paulo ak Sila. Ki yai ko uu nooto tuiyet ne oo ne po Yunanik che ki konyiti Kamuktaindet ak che chaang' eng' kobogorisyek che taagunotiin.

5Ago ki am ng'etkonda Yahudik, ak ki namgei ak piik che yaacheen che ma tilei kiy ak koiyum tuiyet kole kong'eetyi chemargeet nganaseet. Ye ki cheeng'ei `icheek Paulo ak Silas komachei kole si komut icheek saang' koba ole mi piik, kobookyi kootap Jason. 6Ye ki mata konyoor, kochuut Jason ak tupchosyek alak koba taitap kirwoogigap nganaseet, koboldos koleen, “Pichu ko kowas emet ko kagobwa oli kogeny, 7ak kagotaach `Jason icheek. Yaei pichuuto tugul tuguuk che etei ng'atuutigap Caesarea, komwaei koleen miitei laitoryat age ne ineendet ko Jeso.” 8Ye kingo kas tuguuchuuto, ko ki iim tuiyet ak kirwoogigap nganaseet. 9Ak kingo kagonam `icheek tuguugap katyaget kobun Jason ak piik alak, kounda koba.

Komi Berea

10Ak ne matyanit koyookto tupchosyek Paulo ak Sila kemoi koba Berea; ak kingo it olooto, koba sinagogitap Yahudik. 11Ak ki myachen pichu kosiir chooto po Thessalonike, amu kitaach ng'olyoot ak kocham miising' ak kosyachi siruutik peetuut age tugul, si kobiit konai ngo iman tuguuchu. 12Ki iyan anyun che chaang' eng' icheeget ak kobogorisyek che po Yunanik, ak murenik che taagunotiin.

13Ago kingo nai Yahudik che po Thessalonike kole amdoi Paulo ng'olyootap Kamuktaindet eng' Berea agine, koba olooto agine, ak kowas ak konyalil tuiyosyek. 14Ki iyookto anyun koma tyanit `tupchosyek Paulo kot koit araraita, ak kita kotebi eng' olooto Sila ak Timoteo. 15Ago icheeget che ki imuti Paulo ko ki imut agoi Athens; ak kingo taach ng'atuutyet koipchi Sila ak Timoteo kole koba ole mi ineendet kochook, koba anyun.

Komi Athens

16Kingo ta koogeni `Paulo icheek eng' Athens, ko ki iimak eng' oriitinnyi, ye kingo keer nganaseet ko nyiitaat kanamonik. 17Kong'alaal anyun eng' sinagogit kobooto Yahudik ak piik che konyiti Kamuktaindet, ak eng' ye mi ole keyae mung'aaret eng' peetuut age tugul kobooto che kituitos ak ineendet. 18Ak ki tuiyo kobooto ineendet alak che po ng'amotigap Epikurio ak Stoiko. Ak kole alak, “Mwaei nee kipchang'alaini?” Kole alak, “Uu kabartaindet ne po kamuktaik che teer.” Ki mwa ng'aleechu amu ki amdoi agobo Jeso ak ng'eetyeet. 19Ara ki nam `icheek ineendet ak komut kwo agoi Areopago ak kole, “Tos kimuuchi kenai keele nee kaneetisyoni leel, imwae? 20Amu keipchi iitiikyok tuguuk alak che leelach: nooto anyun kimache kenai kiit ne ibooru tuguuchuuto.” 21Ki ma kotinyei piik tugul che po Athens ak toek che ki mi olooto, poroindo ne po kiy age kobatee komwa anan kogas ng'al che too.

22Ki tonon anyun Paulo eng' kwenutap Areopago ak kole, “Okweek piigap Athens, kaageer ale eng' tuguuk tugul ogiiligei miising' eng' saautik. 23Amu ye ki asiirtoi ak ageer tuguuk che osaae, anyooru agine kapkorosuut ne tinyei siruutichu, ‘Po kamuktain ne ma naei chii.’ Nooto anyun ne osaae amongen, aboorwok anyun niito. 24

17.24:
1Lai 8.27; Isa 42.5
Kamuktaindet ne ki yai ng'wony ak tuguuk tugul che miitei olooto, ineendet ko Kiptaiyatap kipsengwet ak ng'wony, koma menyei hekalusyek che ki kiyae eunek. 25Ama kiboisyechin eng' eunegap piik, ko uu ne panani kiy, amu ineendet ne igoochin tugul saboondo ak kabuuset, ak tuguuk tugul. 26Ki yai eng' `chiito agenge pororyet age tugul ne po piik si komeny ng'wony komugul, ko kagoboorchi kenyiisyek che ki king'at, ak kiwotosyegap meng'ootennywa; 27si kobiit kocheeng' Kamuktaindet, komang'u kole tamangap kotamdamat, ak konyoor ineendet, nganda ma loo eng' age tugul eng' acheek. 28Amu

‘Eng' ineendet kesaptosi ak kebendoti ak kemi’;

ko uu ye ki komwa alage eng' siriikwok che po tyenwogigap kalasunet kole,

‘Amu ki lagokyik ak acheek.’

29Ngo ki lagogap Kamuktaindet anyun, ko manyoljech kibwaat keele kergei Kamuktaindet ak thahabu, anan fedha, anan koita, che ki kiyai eng' musoknateet ak eng' ng'omnatetap piik. 30Ki ma mage kiy anyun Kamuktaindet peetuusyek che ki ma komi naet; ago kang'at anyun nguno kole kosik piik tugul eng' komosta age tugul. 31Amu Ki kochop peetuut ne tuun irwookyine ng'wony eng' imanda eng' chiichooto ki kolewen; ak agobo niito ko ki koboorchi komyee piik tugul ye ki ing'eet ineendet komong' eng' che ki pek.”

32Ye kingo kas anyun agobo ng'eetyeetap che ki pek, kochombil alage; ago ki le alak, “Ta kegasun niito peetuut age.” 33Eng' yooto ko kimanda anyun Paulo eng' kwenunnywa. 34Ago ki namgei piik alak ak ineendet ak koyan; ki age eng' icheeget ko Dionusio Areopagindet, ak kobogoryot ne kiguure Damaris, ak alak che ki mi kobooto icheeget.

18

Komi Korintho

181Kingo pata tuguuchu kwo Paulo eng' Athens, ak koit Korinto. 2Ki nyoorchi yooto Yahudyot age ne kiguure Aquila, chiito ne po Ponto, ne kita kobunu Italy kobooto osotyonnyi Prisila, amu kiga ng'at Klaudio kole koba Yahudik tugul eng' Rome. Ki nyo Paulo ole mi icheek; 3amu ki kergei poisyennyi ak nenywa, kotebi anyun kobooto icheek, ak kobois tugul; amu ki nabiik che po emaisyek icheeget. 4Ak eng' sabato age tugul ko ki ng'alaali eng' sinagogit, kole tamangap kotoret Yahudik ak Yunanik.

5Ago ye kingo choorgei Sila ak Timoteo kobunu Makedonia, konyonji Paulo kachirchiret ne po ng'olyoot, kobaoryanjin Yahudik kole Jeso ko Kristo. 6Ye kingo kirinda ak komwa icheek ng'aleek kochup ineendet, koleglekta ineendet ngoryennyi ak koleenji, “Ingotebi korotiikwok eng' metowekwok; aa tiliil anee. Kobooch nguno ko kawe ye mi Pororyosyek.” 7Ki wo anyun eng' olooto ak kwo kootap chiito age ne kiguure Tito Justo, chiito ne ki ilasu Kamuktaindet, ne kinamegei koonnyi ak sinagogit. 8Ak Krispo, ne ki pounindetap sinagogit, ko ki iyan Kiptaiyat kobooto koonnyi tugul; ak kingo kas che chaang' che po Korintoek, koyan, ak ki kibatisan.

9Ak kemout age ko ki leenji `Kiptaiyat Paulo eng' ng'ang'utyet, “Meiywei, ago ng'alaal inyee amat isiis; 10amu ami kobooten, ama mi chii ne twain koyaun ne ya, amu atinye piik che chaang' eng' nganasani.” 11Ki tebee olooto kenyiit agenge ak arawek lo, koneeti ng'olyootap Kamuktaindet eng' kwenunnywa.

12Ago ye kingo kirwoogindetap Akayo Galio, kong'eetyi `Yahudik Paulo eng' mageet agenge, ak komut ineendet kwo taitap ng'echereetap kirwooget. 13Kole icheek, “Ichuuti chiichi piik kole kolas Kamuktaindet eng' ooreet ne etei Ng'atuutyet.” 14Ago ye kimachei Paulo kotwek, koleenji `Galio Yahudik, “Okweek Yahudichu, nda po yaityo ng'aleechu iman, anan ko po chalwok ne ya, ta nyolu agaswok; 15ago ngo teebutik agobo ng'aleek ak kainaik ak ng'atuutyeng'wong' okweeget, oyai okweegei; ma mache aek kirwoogindetap ng'aleechuuto.” 16Ak ki oon icheek koba eng' ye mi ng'echereetap kirwooget. 17Ak ki nam tugul Sosten, pounindetap sinagogit, ak kobir ineendet eng' taitap ng'echeranooto po kirwooget. Ak ki ma mage kiy Galio ng'aleechooto tugul.

Koweeksei Jerusalem ak Antiok

18

18.18:
Kai 6.18
Ak kingo kagotebi Paulo peetuusyek che chaang', kobagaakta `ineendet tupchosyek ak kobun moinget kwo Syria, kobooto Prisila ak Aquila. Eng' Kenkrea ko ki kicherchi metit, amu kiga koarorta kiy eng' kayasyoet. 19Kingo it Epheso, kobagaakta icheek eng' olooto, ago ki wo ineendet sinagogit ak kong'alaal ak Yahudik. 20Ak kingo mwachi kole, kota kotebi ak icheek, koma kocham; 21ago kingo pagaktoi icheek, komwa kole, “Aweekyinoge kogeny, ngo cham Kamuktaindet.” Ak ki wo eng' Epheso kobune moinget.

22Ye kingo kagolanda Caesarea, kotogosta kwo kogat kaniset, ak kochoortagei kwo Antiok. 23Ak kingo kagotebi olooto eng' peetuusyo, kwo kobunoot kooret ne po Galatia ak ne po Phrygia, ko uu ye rubegei, kogimitoti kasubik tugul.

Apolo eng' Epheso

24Ki nyo Epheso Yahudyot age ne keguure Apolo, ne po Alexandria. Ki chiito ne ng'oom, ak ki kiim eng' siruutik. 25Kiga kineet chiichito ooreetap Kiptaiyat; ak amu ki tinyei kagiiletapkei eng' muguleldanyi, kong'alaal ak koneet komyee ng'aleek agobo Jeso, kongen kabatisanetap Johana kityo. 26Ki toi kong'alaal eng' nyiganateet eng' sinagogit. Ago ye kingo kas Prisila ak Aquila, komut ineendet kwo taban, ak koboorchi ineendet ooreetap Kamuktaindet komyee kosiir. 27Ak ye ki machei Apolo kolanda kwo Akaia, ko ki igimit `tupchosyek ineendet ak kosirchi kasubik kole kotaach ineendet. Ye kingo kagoit, kotoret `ineendet icheek miising' che kiga koyan eng' myeeindo, 28amu ki iguiyechi Yahudik komyee eng' kimnateet eng' taitap piik, koboorchin eng' siruutik kole Jeso ko Kristo.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]