Revised Kalenjin Bible (KAPR)
25

Kirwoogyin Paulo eng' taitap Pesto

251Kingo kagoit Pesto koronooto, kotogosta Jerusalem kobunei Caesarea, ko kagobata peetuusyek somogu. 2Ak ki mwachi tisiik che eecheen ak piik che taagunotiin che po Yahudik ng'aleek che kiting'e Paulo; ak kogaigai icheek ineendet, 3kosoom chamdaet agobo ineendet, kole koyookto ineendet kimut konyo Jerusalem; si kobiit korat ooreet kobar ineendet. 4Ago ki wol Pesto kole keriip Paulo eng' Caesarea, ak kole, Neegit si awo aneendet olooto. 5Ak kole ineendet, “Ongechoortegei ak che eecheen eng' okweek, si ngo mi ng'olyoo age tugul ne ya eng' chiichito, komwa icheek.”

6Ak kingo kagotebi eng' kwenunnywa kobooto icheek eng' peetuusyek che ma siirei sisiit anan ko taman, kochoortagei Caesarea; ak mutai kotebee ng'echereetap kirwooget, ak kong'at kole kimut Paulo. 7Ak kingo kagoit, koyiem ineendet Yahudik che ki punu Jerusalem, koibu ng'aleek che chaang' che koroomen che ki itaame ineendet, che ki ma imuuch koboor komyee kiit ne ineet; 8ago ki mwa Paulo eng' ng'aleek che kisaruunegei, kole, “Tom ayai tengek agot kitigin agobo Ng'atuutyetap Yahudik, anan agobo Hekaluut, anan agobo Caesarea.” 9Ago ye kimachei Pesto kobaibai Yahudik, kowolji Paulo, koleenji, “Tos imache itogoste Jerusalem, si kirwoogun eng' olooto agobo tuguuchu eng' tainnyu? 10Ago ki le Paulo, Atononi eng' taitap ng'echereetap kirwooget ne po Caesarea, ole kanyool kirwoogunena: tomo ayachi kiy ne ya Yahudik, ko uu ye ingen inyee komyee. 11Ngo aa kiptengekyo, ak ngot ko koayai kiy ne nyoljin meet, koma eesyoi ame: ago ngot koma po iman tuguuchooto, che itaamjino pichu, koma mi chii ne imuuchi kondea eunekwak. Ariirchini Caesarea.”

12Ak kingo kagong'alaal anyun Pesto ak piigap kapkirwook, kowol kole, “Kairiirchi Caesarea; ara anyun, iwendi kap Caesarea.”

Pesto ak laitoryat Agripa

13Ak kingo kagosiirto peetuusyek alage, koit laitoryat Agripa ak Bernike Caesarea, si kogat Pesto. 14Ak ye kita kobeniei peetuusyek che chaang', koboorchi Pesto laitoryat ng'aleegap Paulo, koleenji, “Miitei chii age ne ki pagaakta Felix ko rataat. 15Ne kimwaiwo ng'aleekyik tisiik che eecheen ak poisyegap Yahudik ye ki ami Jerusalem, ki soomei ng'aleek che kigikyine ineendet. 16Ak ki awolji icheek aleenji, ma piteetap Romanik kigoito chii kotomo kogeergei kimni chiito ne kitaami ak che itaamsei, ak konyoor poroindo ne saruunegei eng' ng'aleek che ki kitaamjin. 17Ye kingo yumgei anyun eng' yu, ko mata agagei, ago eng' peetuut ne po aeng' atebee ng'echereetap kirwooget, ak ang'at kimut chiichooto. 18Ak kingo tononso icheeget che ki itaami ineendet, koma koip ng'olyoo ne ya ne po kagikyino agobo ineendet ko uu ye ki abwaati; 19ago kiting'e ineendet teebutik agobo kayanennywa, ak agobo chii ne kileen Jeso, ne ki kome, ne igiiljingei Paulo kole, sabei. 20Ago ki aleen agin ole teptoi ng'aleechu kotemena, ateebee ngo machei kwo Jerusalem, si kirwookyi eng' oliindo agobo ng'aleechuuto. 21Ago kingo riirchi Paulo kotebi kole si kotil kirwooget pounindet ne oo, ang'at ale keriip agoi tuun ayookte kwo kap Caesarea.” 22Ak ki leenji Agripa Pesto, “Amache agas agane ng'aleegap chiichito.” Koleenji, “Igase mutai.”

Paulo eng' taitap Agripa

23Ak mutai ko kagoit Agripa, kobooto Bernike, eng' etunateet ne oo, ak ko kagoba koot ne kigase ng'aleek, kobooto kiptainik che eecheen, ak piik che taagunotiin che po nganaseet, kimut Paulo eng' ng'atuutyetap Pesto. 24Komwa Pesto anyun, kole, “Laitoryat Agripa, ak piik tugul che kimi yu tugul, ogeere chiichi, ki koriircho tuiyet tugul ne po Yahudik agobo ineendet, eng' Jerusalem ak eng' olito, koboldos, koleen, manyol kota kosap. 25Ago ki ageer ale ma yai kiy ne nyoljin meet: ak ko uu ye ki riirchi ineendet pounindet ne oo, acham anyun ayookto ineendet. 26Ma tinyei ng'olyoo ne po iman ne asirchini kiptaiyandennyu agobo ineendet. Nooto anyun kamutu ineendet konyo taing'wong', ak ne siirei ko konyo taing'ung', inyee, laitoryat Agripa, si ye kageteebse, asich ng'olyoot ne asire. 27Amu ageere ale, ma nyolu kiyookto kimonjororyo, ama kibor tuguuk che ki kitaamjin.”

26

Koetegei Paulo eng' taitap Agripa

261Koleenji anyun Agripa Paulo, Kagichamun iwolu ng'aleeguk. Kochuul anyun Paulo eunnyi, ak komwa ng'aleek che saruunegei, kole: 2Abwaati ale abaibai, ee laitoryat Agripa, amu amuuchi asarge rani eng' taing'ung' agobo tuguuk tugul che koitaamja Yahudik: 3ne siirei ko amu ingen komyee pitonwek tugul ak teebutik tugul che tinyei Yahudik; nooto anyun, kasoomin ale igasa eng' muitaet.

4Ingen Yahudik tugul ateptap sabeennyu, kobooch ko aa ming'in, ne ki atinye kobooch ko ka piitu eng' pororyennyu, ak eng' Jerusalem; 5

26.5:
Poi 23.6; Phlp 3.5
ak kongeno icheek kobooch eng' tai, nda chamei icheek kobaoryan, ko uu ye ki aa Pharisaindet ne isubi piteet ne koroom ne po kayanennyo. 6Ak katonon nguno eng' yu si kirwookwo agobo kamang'unet ne po arorutyet ne kichopchi Kamuktaindet kwanisyekyok; 7nooto ne imang'u ortinwekyok tamanu ak aeng' kole nyooru, koboisyechin Kamuktaindet eng' kagiiletapkei peet ak kemoi. Kagogikyo Yahudik agobo kamang'unoniito, ee, laitoryandani! 8Amu nee si kibwaat keele ma iyanaksei eng' okweek keele, ing'eeti Kamuktaindet che ki kobek? 9
26.9-11:
Poi 8.3; 22.4-5
Ki abwaati aneendet iman ale kanyool ayai tuguuk che chaang' che kirindoi kainetap Jeso ne po Nazareth. 10Ak ki ayai niito agine eng' Jerusalem: ak atoorchi korgorosyek piik che chaang' eng' che tiliileen, ko kagogoono kimnateet tisiik che eecheen, ak ki achame ye ki kibarei icheek. 11Ak ki abirote konyil che chaang' eng' sinagogisyek tugul, abirchini kochubis; ak ye kiga konyita icheek miising', ausote agoi nganasook che po toek.

Koaroru Paulo agobo kayanennyi

(Poi 9:1-19; 22:6-16)

12Ak ye kinga wendi Damasko atinye kimnateet ak kayooktoet ne po tisiik che eecheen, 13ageer lapkeiyet ne ki punu kipsengwet, ne siirei kaluunetap asiista, koluucha komoswek tugul kobooto che ki kibendi tugul, eng' ooreet peet kween, ee, laitoryandani. 14Ak kingo kagibutyi ng'wony tugul, agas kutit ne leenjino eng' kutitap Yahudik, Saulo, Saulo, amu ne si iusoo? Pichiy eng' inyee ityar kiplitwet. 15Ak ki ale, ii ng'oo inyee, Kiptaiyat? Kole Kiptaiyat, Aa Jeso ne iuse. 16Ago ng'eet, tonon eng' keelyeguk: kang'ang'unge amu ni, ale andein iegu kiboityot ak paoryatap tuguuchu kaigeer agobo anee, ak tuguuk che tuun ang'ang'unenegei; 17asaruun eng' piik, ak eng' Pororyosyek, ole tuun ayooktoin iwe, 18si kobiit ing'aany konyekwak, ak koweek eng' mesundeito kobwonji lapkeiyet, ak eng' kimnateetap Setani kobwonji Kamuktaindet, si konyoor icheek nyoetap kaat ne po tengekwogik ak poroteet eng' icheek che ki kitiliil amu kayaneet ne mi eng' anee.

Komwaitoi Paulo agobo poisyetap amdaennyi

19Nooto anyun, ee, laitoryandani Agripa, ma abistoe kaboorunet ne po kipsengwet: 20

26.20:
Poi 9.20; 28-29
ago ki aboorchi che mi Damasko korook, ak eng' Jerusalem, ak eng' emet komugul ne po Judea, ak eng' Pororyosyek ak icheek, si kosik ak koyan Kamuktaindet, koyaei poisyonik che nyoljin siguunet. 21Ki nama anyun Yahudik eng' Hekaluut amu niito, ak kotyem kobara. 22Ye kinga nyooru toreteet ne punu Kamuktaindet, atonon agoi rani abaoryanjini che mengech ak che eecheen, amamwae kiy age kobatee che ki mwa maotik ak Musa, kole tuun pwoonei; 23
26.23:
Isa 42.6; 49.6; 1Kor 15.20
kole kanyool konyalil Kristo, ak kole komwaita korook eng' ng'eetyeetap che ki pek, lapkeiyet, komwachi piik ak Pororyosyek.

24Ak ye kita kosarugei ko uu nooto, komwa Pesto eng' kutit ne oo, kole, “Paulo, ii kibiywa; kagogoonin iywek `kaneetetapkei ne oo.” 25Ago ki le Paulo, “Ma aa kibiywa, ee Pesto ne ii tagunoot: ago amwae ng'aleek che po iman ak che po ng'omnateet. 26Amu ingen laitoryat ng'aleechuuto, ineendet ne ang'alaaljini eng' nyiganateet: amu angen komyee, ale ma ung'ootiin ng'aleechu eng' ineendet, agot agenge; amu mayaak ng'olyoondoniito eng' taban. 27Laitoryat Agripa, tos iyani inyee maotik? Angen ale iyani.” 28Ak ki leenji Agripa Paulo, Ka neegit igaigaa eng' ng'aleek che ng'ering' aek Kristyanindet. 29Kole Paulo, “Achame ko uu nooto eng' Kamuktaindet, ale ngo eng' che ng'ering' anan eng' che chaang', ma inyee kityo, ago tugul ak icheek che kasa rani, ale kotebi ko uu anee, ago ama eng' ratuutichu.”

30Kong'eet anyun laitoryat, ak pounindet ak Bernike, kobooto icheek che ki mi tugul: 31ak kingo kagoba, kong'alaaljigei icheegei, kole, “Ma yai chiichi kiy ne nyoljin meet anan ratisyosyek.” 32Koleenji anyun `Agripa Pesto, “Kota kityaachi chiichi, nda ki ma riirchi Caesarea.”

27

Pandap Paulo agoi Rome

271Ak kingo kagetil ng'aleek keele kebun moinget keebe Italy, ki kigoochi Julio chemogetap kiplugotinik pogol, ne po lugeetap Augusto, Paulo ak kimonjororinik alak. 2Kelaany anyun meeliit ne po Adramutio, ne kimachei kwo komoswek alak che mi ngeguutap Asia, keebe ak Aristarko Makedonianindet ne po Thessalonike. 3Ak eng' peetuut ne po aeng' keit Sidon: ak ki riiree `Julio Paulo, ak kochamji kwo ole mi choronokyik si konyoor toreteet. 4Ak ki kibun moinget eng' olooto ak ki kiteektaegei Cyprus, amu ki kirindaech usoonet. 5Ak ye kiga kebun moinget kelande eng' nyanjet ne po Cilicia ak Pamphylia, keit Myra, nganaseet ne po Lycia. 6Ak ki nyoorchi olooto chemogetap kiplugotinik pogol meeliit ne po Alexandria, ne wendi Italy; kondeech meeliit anyun.

7Ak ye kiga keebe mutyo eng' meeliit eng' peetuusyek che chaang', agoi keit Cnido eng' pichiindo, koraanyech usoonet, keebe keteektaegei Krete, ne itoorchingei Salmone. 8Ki kibun ngeguut eng' pichiindo agoi keit komosta age ne kiguure Luukwek che Myach; ole neegitee nganaseetap Lasea.

9Ak kingo kagosiirto peetuusyek che chaang', ak kobichiit pandap nyanjet, amu kiga kosiirto peetuusyegap Karugutetapkei, koteechi Paulo icheek, 10koleenji, “Murenju, kaageer ale miitei ng'oiyondit ak luseet eng' paniito po nyanjet, ma ne po meeliit kityo ak tuguuk che mi oriit, ago ne po saboonwekyok ak icheek.” 11Ago ki kas chemogetap kiplugotinik pogol ng'aleegap pounindet ak chiitap ko po meeliit, kosiir ng'aleek che kamwaei Paulo. 12Ak amu ki ma ko luuita ne yamei ketebee eng' peetuusyegap kaitityet, komwa che chaang' kole, myee kota kinaakte eng' olito, tamangap keit Phoenisia, si ketebee olooto eng' peetuusyegap kaitityet; nooto ko ki luuitap Krete, ne kitokyingei murot kaataam kitigin ak murot tai kitigin.

Usoonet ne oo

13Ak ye kingo us mutyo usoonet ne punu komostap tai, koleen icheek kagonyoor kiit ne kamachei, konem nanget ak kobun tabandap Krete, ye neegit ngeguut. 14Ak ne matenit kous kipchurchuryet ne oo, ne kiguure Eurakulo: 15ak ye ki ngenam meeliit, ak mata komuuch kootap usoonet, keistochigei, ak koonech. 16Ak ki ngerwai keteektaategei emet ne ki ikween peek ne kiguure Kauda, kimuuch eng' pichiindo keganap moinget ne ming'in. 17Kingo kagotogosune moingonooto, koboisyee tuguuk che kitorete, koratune moinget oriit; ak kingo iywei icheek kole si ma kiwiirchi Surti, kochoor angook, ak ki oon usoonet koba. 18Ak ye kita keboisyei miising' eng' kagiiletapkei, ketabe usoonooto oo, ketau eng' peetuut ne po aeng' kewiirte tuguuk che mi meeliit, 19ak eng' peetuutap somok kowiirta icheeget eng' eunekwak tuguuk che kiboisyee eng' meeliit. 20Ak ye ki mata koluuchech asiista anan kecheik eng' peetuusyek che chaang', ak kogiichech usoonet ne oo, kogeskei anyun kamang'unet ne ki kileen, tos kisarwech.

21Ak ye kiga kotar peetuusyek che chaang' ama amis, kotonon Paulo eng' kwenunnywa, ak kole, “Murenju, kita myee nda ki kogasa, ak kita myee nda ki ma obwa eng' Krete, ak onyooru nyalili ak lusoni. 22Amwaiwok nguno ale onyiganitu: amu ma mi chii ne meei eng' okweek, kobatee meeliit. 23Amu kotonon malaikaiyatap Kamuktaindet eng' ye neegiteena kemouni, ne aa nenyi, ak ne aoote, 24kole, ‘Ameiyweisye, Paulo; kanyool itonon eng' taitap Caesarea: ak keero, kagogoonin Kamuktaindet tugul che obendi tugul eng' moinget.’ 25Ara anyun, murenju, onyiganitu, amu ayani Kamuktaindet, ale yaaksei ko uu ye kogomwaiwo. 26Ago kanyool kewiirchech emet ne ki ikween peek.”

27Ago ye kingo it kemoutap taman ak ang'wan, ye kita kowiirchinech usoonet komosi ak komosi eng' nyanjet ne kiguure Adria, ko ki ibwaati piigap moinget olo po kemoi kween koleen kagoriikta emet age. 28Ara ki irooch peek kiit ne kikwaise, ak konyoor kakwautik artam; ak kita koba kitigin korooch peek kogeny kioto, konyoor kakwautik sosom. 29Ak kingo iywei icheek kole abeere togot kewiirchech pitet ne mi rwandosyek, kounda nangaisyek ang'wan eng' moinget olo po let, kosoom kole nda kaech. 30Ak ye kimachei piigap moinget komwaei kobagaakta moinget, ko kagochoorta moinget kwo araraita, koleen si kobwaat piik kole wiirtoi icheek nangaisyek eng' olo po moinget tai, 31koleenji Paulo chemogetap kiplugotinik pogol ak kiplugotinik, “Ngot koma tebi pichu eng' moinget, ko momuuchi osapche.” 32Kotil anyun kiplugotinik rogoosyek che po moinget, ak kobagaakta kobut. 33Ak ye kimachei koeech, kogaigai Paulo icheek tugul koamis, koleenjin, Rani ko peetuutap taman ak ang'wan ogeni ak kota orugutige, ak tomo oam kiy. 34Nooto anyun asoomok ale oamisye: amu niito sabeeng'wong'; amu ma petei sumeiyot agot agenge eng' metitap chii age tugul eng' okweek. 35Ak ye kingo kagomwa ko uu nooto, ak konam magatyat, kogoochi Kamuktaindet kongoi eng' taitap tugul: ak kiton, ak kotoi koamis. 36Konyiganitu anyun icheek tugul, ak koamis. 37Ak acheek tugul ko ki piik pogol aeng' ak tamanwogik tisap ak lo eng' meeliit. 38Ak kingo kagobiyong'so, kowiirchi araraita nganuuk si kowisisiit meeliit.

Ng'emetap meeliit

39Ak kingo kagoeech, koma konai emonooto: ki keer luuita age ne tinyei ng'aniek, ne ki ibwaati kole, ngo mugak kokweri meeliit kwo olooto. 40Kotyach anyun nangaisyek, ak kobagaakta eng' araraita, ak kotyach rogoosyek che ki kirate pagoinik che kindochine moinget; ak ye kingo kagonamji parak angeet ne mi oliin po tai kotokyi usoonet, koba ngeguut. 41Ago kingo it ye tuiyechin nyanjosyek aeng'u, kochunda icheek meeliit koryep ng'aniek; ak kinamak moinget ole po tai kot koma kotwau, ago ki toi moinget kong'asur eng' ole po let eng' kimnateetap mildaetapkei ne po peek.

42Ak ng'olyoot ne ki tinyei kiplugotinik ko kobar kimonjororinik, kole si ma pir peek alage eng' icheek, kochililyo. 43Ago amu kimachei chemogetap kiplugotinik pogol kosar Paulo, koeete icheek si ma yai kiit ne kamachei; ak kong'at icheek che ki imuuchi kobirot peek kole, kowiirchigei nyanjet, si kosip koit ngeguut: 44ak ki pun alage pagoinik, kobun alage tuguuk alak che po meeliit. Kolong'ji anyun tugul emet kochamegei.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]