Revised Kalenjin Bible (KAPR)
8

81Ak ki iyan Saulo agine agobo pareetap Stepano.

Kotau usiisyet

Ki ng'eet peetuunooto usiisyet ne oo agobo kaniset ne ki mi Jerusalem, ak kiyesta icheek tugul koyom emotinwegap Judea ak Samaria, kobatee che kiyooktoi. 2Kotup anyun Stepano `piik che ki konyiti Kamuktaindet, ak koteiyo miising' agobo ineendet.

3

8.3:
Poi 22.4-5; 26.9-11
Ago ki inyaliil miising' `Saulo kaniset, kowendi koot age tugul ak kochuutu murenik ak kobogorisyek ak kotoorchin korgoreet.

Philipu eng' Samaria

4Ki pa anyun icheek che kiga koyesta, koamdaat ng'olyoot. 5Ak kichoortagei Philipu nganaseet ne po Samaria, ak koamji icheek Kristo. 6Ak ki epchi iit tuiyosyek eng' yamdaet agenge ng'aleek che kimwaei Philipu, ye kingo kas ak kogeer kaboorunoik che ki yai. 7Amu kimanda tamirmirik che murwonen eng' che chaang' che ki tinyei, kowaaktos eng' kutit ne oo; ak ki kisoop che chaang' che meiyotiin poorwek, ak che ki ing'waldos. 8Ara ki piit poiboiyet ne oo eng' nganasanooto.

9Ki mi chiito age ne ki kiguure Simion, ne ki cham kong'orsei eng' peetuusyek alak eng' nganasanooto, ak ki igoochi pororyetap Samaria kokwong'yo, komwaei ineendet kole chiito ne oo. 10Ki epchin iit `icheek tugul ineendet, kobooch ne ming'in agoi ne oo, koleen, “Kimnateetap Kamuktaindet chiichi ne kiguure Ne Oo.” 11Ak ki epchin iit ineendet, amu ki cham kogoochin kokwong'yo eng' peetuusyek che chaang' eng' ng'oorsosyekyik. 12Ago ye kingo yan ng'aleegap Philipu ye ki amdoi logoiywek che myach agobo laitornatetap Kamuktaindet ak kainetap Jeso Kristo, kibatisan anyun murenik kobooto kobogorisyek. 13Ki iyan Simion agine ak kingo kagibatisan kotebi kobooto Philipu. Ak kingo keer koyaogis kaboorunoik ak poisyonigap kimnateet kokwong'.

14Kingo kas anyun che kiyooktoi che ki mi Jerusalem kole kogotaach Samaria ng'olyootap Kamuktaindet, koyookyi Petero ak Johana. 15Ye kingo kagochoorgei icheek, kosa agobo icheek kole si kotaach Kabuuset ne Tiliil; 16amu kitom kochoorchigei agot agenge eng' pichooto. Kiga kibatisan icheek eng' kainetap Kiptaiyat Jeso kityo. 17Yeityo kogonoor icheek eunekwak, ak kitaach Kabuuset ne Tiliil. 18Ye kingo keer anyun Simion kole kaga kigoochin chii Kabuuset ne Tiliil ngo konoor `che kiyooktoi eunekwak, kogoochi `silingisyek che kiyooktoi 19ak kole, “Ogoono agane kimnatoni si ngagonoor chii age tugul eunekyuk, kotaach Kabuuset ne Tiliil.”

20Ago ki leenji Petero ineendet, “Ingobetyo siling'isyeguk kobooten, amu keleen inyooru konunetap Kamuktaindet eng' silingisyek. 21Metinye kebeberta anan motwet eng' ng'olyoondoni, amu ma myee muguleldang'ung' eng' taitap Kamuktaindet. 22Sigu anyun eng' tengeging'ung'et ak isaa Kiptaiyat, tamangap kenyoun kaat amu kabwaatetap muguleldang'ung'. 23Amu ageere ale imi eng' ng'wanindo ak eng' ratuutyetap tengekto.” 24Ak ki wol Simion kole, “Osaiywa Kiptaiyat, si ma pwanjo agot agenge tuguuk che kaomwaiwo.”

25Ye kingo kagobaoryan anyun Petero ak Johana ak komwa ng'olyootap Kiptaiyat, koweektagei Jerusalem, ak koamji logoiywek che myach nganasook che chaang' che po Samarik.

Philipu ak chiitap Ethiopia

26Ki mwachi malaikaiyatap Kiptaiyat anyun Philipu koleenji, “Ng'eet ak iwe murot tai agoi ooreet ne choortogei kong'etee Jerusalem ne wendi agoi Gaza” (punei oranooto ole melewet). 27Ara king'eet anyun ineendet ak kwo. Ak keero ki mi chiitap Ethiopia ne ki kimooch, ne ki tinyei pounateet ne oo eng' eutap Kandake, laitoryat kwondo ne po Ethiopik, ne kiriibei tuguukyik tugul che po kamanuutyet ne oo. Kiga nyo Jerusalem kosa; 28ak ki weeksei kaa anyun, kotebee chepkichutinnyi, ak kosomani bukuitap maotyot Isaiah. 29Ak ki leenji `Kabuuset ne Tiliil Philipu anyun, “Ui riikte, onamgei ak chepkichutina.” 30Ak ki labat Philipu ak kogas ineendet kosomani bukuitap maotyot Isaiah, ak ki leenji, “Iguitosi kiit ne isomani?” 31Ak ki le, “Amuktoi ano, ngo ma iboorwo chii?” Ak ki igaigai Philipu `ineendet kole kolaany chepkichutit ak kotebi tuwai. 32

8.32-33:
Isa 53.7-8
Ak chu siruutik che kisomanoti,

“Ki kimut ko uu keechiiryet ne ki kweryei kwo eng'seet;

ak ko uu aarwetap keechiiryet ne siisei eng' taitap chiito ne tilei koroorikyik,

uu nooto agine mang'aany kutinnyi.

33Ki kiisto kirwoogennyi eng' kaming'inennyi pogei.

Ng'oo ne tuun mwaitoi ibindanyi?

Amu kinemu saboondanyi eng' ng'wony.”

34ki teebee `chiichooto ki kimooch Philipu koleenji, “Asoomin ale, mwaei maotyot ng'olyoondoni agobo ng'oo? Agobo ineendet anan agobo chiito age?” 35Kong'aany anyun Philipu kutinnyi, ak kotoi eng' siruutyoni koamji ineendet agobo Jeso. 36Ye kingo ta kobendi eng' ooreet, koit ye mi peek, kole chiichooto, “Keer peek o; nee ne kera si ma kibatisana?” 37Ak ki le Philipu, “Ngiyan eng' muguleldang'ung' tugul, kimuuchi kibatisanin.” Ak ki wol kole, “Ayani ale Jeso Kristo ko Weeriitap Kamuktaindet.” 38Kong'at anyun kotonon chepkichutit, ak kichoortagei tuwai koba peek, Philipu ak chiichooto; ak ki ibatisan `Philipu ineendet. 39Ye kingo long' eng' peek, komut `Kabuusetap Kiptaiyat Philipu. Ak mata kogeer anyun kogeny `chiichooto ki kimooch Philipu, ago ki wo kotestai chiichooto eng' poiboiyet. 40Ak ki took Philipu eng' Azoto. Ye kisiirtoi kobune emonooto, ko ki amjinoti logoiywek che myach nganasook tugul agoi koit Caesarea.

9

Kowalaksei Saulo

(Poi 22:6-16; 26:12-18)

91Ye kita konereechi Saulo koboisyee kamuiset ak parisyet agobo kasubigap Kiptaiyat. Ki wo kaptisiindet ne oo, 2ak kosoom ineendet paronok che ibei koba Damasko agobo sinagogisyek, kole ngo nyoor alak tugul che po Oranooto, ngo murenik anan kobogorisyek, komuuchi komut kobwa Jerusalem ko ratotiin.

3Ye kita kowendi ak ko kariikta Damasko, kooluu sainooto lapkeiyet ne ki punu kipsengwet koluuchi ineendet komoswek tugul. 4Ki ibutyi, ak kogas kutit koleenji ineendet, “Saulo, Saulo, amu nee si iusa?” 5Ak ki le, “Ii ng'oo, Kiptaiyat?” Ak ki le, “Aa Jeso ne iuse. 6Ago ng'eet, ui nganaseet, si kemwaun kiit ne kanyool iyai.” 7Ak kitononso konam kuut piik che kibendi kobooto ineendet, kogasei tweguunet, ama keerei chii. 8Ki ng'eet anyun Saulo, ak kingo kagoyatagis konyekyik, koma kogeerei kiy; komut anyun `icheek ineendet konamoti euut agoi Damasko. 9Ki tar ineendet peetuusyek somok ama keerei kiy, ama amisyei anan koeeiso.

10Ki mi kasubindet age Damasko ne ki kiguure Anania. Ki leenji `Kiptaiyat ineendet eng' ng'ang'utyet, “Anania.” Kowol Anania kole, “Ami yu, Kiptaiyat.” 11Koleenji Kiptaiyat, “Ng'eet, ui ooreet ne kiguure Ne Litit, ak iteep eng' kootap Judas chiito ne kiguure Saulo, chiitap Tarsis. Keero, saaei; 12ak kagogeer ineendet eng' ng'ang'utyet chiito ne kiguure Anania, konyonei agoi ko, ak kogonoor ineendet eunekyik si kogeerto.” 13Ago ki wol Anania kole, “Kiptaiyat, ki agas eng' piik che chaang' agobo chiichito, ole tee yaityet ne ki koyachi piiguk che tiliileen eng' Jerusalem; 14ak tinyei eng' yuto kimnateet ne punu tisiik che eecheen si korat tugul che kuurei kaineng'ung'.” 15Ago ki leenji Kiptaiyat, “Ui inyee, amu kinnyu ineendet ne aboisyee ne ki alewen, si koip kainennyu taitap Pororyosyek ak laitorinik, ak piigap Israel: 16amu aboorchini ineendet ole tee chaang'indap tuguuk che kanyool konyoorunee nyalilda agobo kainennyu.”

17Ki wo anyun Anania, ak ki wo agoi ko, yeityo kogonoor eunekyik Saulo ak koleenji, “Tupchennyu Saulo, kagiyokwo Kiptaiyat, ineendet Jeso, ne kichunjin eng' ooreet ne ki ibunu, kole igeerte, ak kinyiitun Kabuuset ne Tiliil.” 18Ak eng' sainooto kobutyo eng' konyekyik tuguuk che uu peerik, ak kigeerto. Ki ng'eet anyun ak ki kibatisan; 19ak ki amis ak ki nyoor kimnateet.

Koamdoi Saulo eng' Damasko

Ki tebi ineendet peetuusyo alak kobooto kasubik che ki mi Damasko. 20Ak ne matyanit koamda agobo Jeso eng' sinagogisyek kole, “Ineendet ko Weeriitap Kamuktaindet.” 21Ki kwong'yo tugul che ki kas ineendet ak kole, “Tos ma chiichi ne kotar piik eng' Jerusalem, icheeget che cham koguurei kainani? Ak kogonyo oli agobo ng'olyoondoniito si kobiit komut icheek ko ratotiin koba taitap tisiik che eecheen.”

22Ago kitesak Saulo kogimit, ak ki igoochi kokwong'yo Yahudik che ki menyei Damasko, koboorchin icheek komyee kole Jeso niito ko Kristo. 23

9.23-25:
2Kor 11.32-33
Ak ye kingo keskei peetuusyek che chaang', kotuiyo Yahudik korwooch kole kobar ineendet, 24ago kinaak eng' Saulo chobennywa ne po ung'oot. Ki riip icheek ormariichok peet ak kemoi kole si kobar ineendet; 25ago ki imut `kasubikyik ineendet kemoi, ak kochoorta kosiir irimeet, komiitei mesendet oriit.

Saulo eng' Jerusalem

26Ye kingo nyo `Saulo Jerusalem kotyem kole koyomogei ak kasubik; ago ki iywei `icheek tugul ineendet, ama iyan kole kasubindet ineendet. 27Ago ki imut Barnaba ineendet kwo ole mi che kiyooktoi, ak kotetyi anyun ole kigeerto `ineendet Kiptaiyat eng' ooreet, ak kole kiga kong'alaalji ineendet, ak ko uu ye kigoamda eng' nyiganateet eng' Damasko eng' kainetap Jeso. 28Ara ki mi kobooto icheek ak komong'u eng' Jerusalem, komandoi eng' nyiganateet eng' Kainetap Kiptaiyat. 29Ki ng'alaali ak kobeligei kobooto Yahudik che ki kutinnywa ko Yunanik; ago ki cheeng'ei kotugul kole kobar ineendet. 30Ye kingo nai tupchosyek, komut ineendet kochoortagei kwo Caesarea ak koyookto kwo Tarsis.

31Konyoor anyun kamuung'et kaniset eng' emet komugul ne po Judea, Galilaya ak Samaria ak koteegak. Ak ye kibendoti eng' kayweetap Kiptaiyat ak eng' kagaigaet ne po Kabuuset ne Tiliil, kotesak.

Kisoobi Ainea

32Ye kiwendote Petero komoswek tugul, kochoortagei ole ki mi che tiliileen che ki menyei Lydda. 33Ak kinyoorchi olooto chiito age ne ki kiguure Ainea, ne kiga korue itogunnyi kenyiisyek sisiit, amu ki meat poorto. 34Koleenji anyun `Petero ineendet, “Ainea, isaabin Jeso Kristo; ng'eet ak iite itogung'ung'.” Kong'eet anyun sainooto. 35Ak kigeer ineendet tugul che ki menyei Lydda ak Sharon, ak koyan Kiptaiyat.

Kisoobi Dorkas

36Ki mi agenge eng' kasubik Joppa ne ki kiguure Tabita, ne ye kiweech eng' kutitap Yunanik ko Dorkas. Ki tinyei kobogoryondoni poisyonik che chaang' che myach ak kagoochinoik che ki igoitoi. 37Ak kimyan eng' peetuusyechooto, ak kime. Kingo kagoun, konde koot age ne mi parak. 38Ak amu kineegityin Lydda ak Joppa, ko ye kingo kas kasubik kole mi Petero olooto, koyookyi piik aeng' ineendet, kosoom kole, “Nyonjech, amegagei.” 39Kong'eet anyun Petero ak koba ak icheek. Ak kingo kagoit, komut ineendet kwo koot ne po parak. Ak kitonondos mosoogik tugul koriirtos eng' ye neegit ineendet ak koboorchi sumotik ak ngoroik che kinabei Dorkas ye kita komi kobooto icheek. 40Komaanda Petero tugul koba saang', yeityo kogutuny ak kosa. Ki weleljigei muusto ak koleenji, “Ng'eet, Tabita.” Ak ki yaat konyekyik, ak kingo keer `ineendet Petero, kong'eet kotep ng'wony. 41Ki igoochi ineendet eunnyi ak konam kotoret ineendet kong'eet. Ye kingo kagoguur che tiliileen ak mosoogik, konde ineendet tainnywa ko kagosap. 42Kinaak niito eng' Joppa komugul, ak ki iyan che chaang' Kiptaiyat. 43Ak ki tebi eng' Joppa peetuusyek che chaang' kobooto chiito age ne ki kiguure Simion ne teiteindetap muiywek.

10

Petero ak Korneli

101Ki mi chiito age Caesarea ne ki kiguure Korneli, ki kiptaiyatap kiplugotinik pogol chooto ki kiguure asigarigap Italy.

2Ki chiito ne kigonyiti ak koywei Kamuktaindet kobooto koonnyi tugul; ki igoochin piik kagoochinoik che chaang' ak kosaaei Kamuktaindet kotugul. 3Eng' koskoleng'ut age olo po sait sogool ne po peet ko ki keer eng' ng'ang'utyet kimni, ne eng' ng'ang'utyonooto ko ki keer malaikaiyatap Kamuktaindet konyonjin ineendet ak koleenji, “Korneli.” 4Keer `Korneli ineendet miising' eng' kaiyweisyet ak kole, “Tos nee, Kiptaiyat?” Koleenji, “Kigoit parak saautiguk ak kagoochinoiguk koek kabwaatet eng' taitap Kamuktaindet. 5Iyookte nguno anyun piik koba Joppa, koguur chii ne kiguure Simion ne kainennyi ne po aeng' ko Petero; 6ineendet ko toondetap Simion ne teiteindetap muiywek, ne mi koonnyi ngeguutap araraita.” 7Ye kingo kakwa malaikaiyat ne ki ng'alaalji ineendet, koguur otwogik aeng' che po koonnyi, ak asigarindet ne kigonyiti Kamuktaindet ne ki age eng' che kiboisyechin ineendet kotugul; 8ak kingo kagomwachi icheek ng'aleek tugul, koyookto koba Joppa.

9Eng' peetuut ne ki isubi ye kita kobendi, ko kariikta nganaseet, kotogosta Petero koot parak, eng' olo po sait lo, kwo kosa. 10Ak ki am rubeet ak kimach koamis; ak ye ki kichobei amitwogik, kobutyi kiy ne uu rwon. 11Ki keer kipsengwet koyaatak, ak kochoorugei kiit ne uu angeet ne oo kot, kechooru eng' kuinoik ang'wan agoi ng'wony. 12Ki mi oriit tyong'ik alak tugul che po keelyek ang'wan ak tuguuk che ichuutegei che po ng'wony ak toriitik che po parak. 13Ki nyoonji anyun tweguunet koleenji, “Ng'eet, Petero; eeny ak iam.” 14Ago ki le Petero, “Ma uu nooto, Kiptaiyat; amu tomo aam kiy ne ma tiliil anan ne ng'waan kobooch atkinye kora.”

15Ki nyoonji anyun tweguunet kogeny ne po aeng' koleenji, “Kiit ne kagotiliil Kamuktaindet, ko mata ile ng'waan.” 16Ki yaak kiito konyil somok, ak eng' yooto ketaach kioto eng' kipsengwet.

17Ak ye kita koiimegei Petero miising' eng' muguleldanyi kole ibooru nee ng'ang'utyoni kagogeer, ogeero, kotononso eng' kurgat piik che kiga koyook Korneli, ko kagoteep ole mi kootap Simion, 18ak koguurso ak koteep ngo mi Simion olooto, ne kainennyi ne po aeng' ko Petero.

19Ye kita kobwaati Petero agobo ng'ang'utyonooto, koleenji `Kabuuset ne Tiliil ineendet, “Keero, cheeng'in piik somogu. 20Ng'eet anyun nguno, ak ichoortegei, ak obe tugul, amesage kiy; amu kaayogu icheek.” 21Ara kichoortagei anyun Petero kwo ole mi pichooto ak kole, “Aa ineendet ne ocheeng'e. Nee ne kagoonok obwa?” 22Ak ki le, “Ki iboorchi komyee Kamuktaindet Korneli, eng' malaikaiyat ne tiliil, koyook piik kobwa koguurin iwe koonnyi ne ineendet ko kiptaiyatap pogol, chiito ne po imanda ak koywei Kamuktaindet, ak paoryanjin pororyet tugul ne po Yahudik kole myee ineendet, kole si kogasenen ng'aleek.” 23Koguur anyun kobwa ko ak kochopchi icheek ole ruitos. Ak king'eet karon koba kobooto pichooto ak tupchosyek alak che ki punu Joppa. 24Ak peetuut ne ki isubi peetuunooto koit Caesarea. Ki igeni icheek `Korneli, ko kagoguur tupchosyekyik ak choronokyik che ki ingengei komyee. 25Ye kingwo ko Petero, kotorooch `Korneli ineendet ak kobutyi keelyekyik, kogutung'ji. 26Ago ki ing'eet `Petero ineendet koleenji, “Tonon; aneendet ko aa chiito agane.” 27Ak kingo ta kong'alaaljindos tuwai, kwo ko ak konyoor piik che chaang' che kagoyumgei: 28koleenji anyun icheek, “Ongen okweek ole kiy ne eesyoot eng' ng'atuutik eng' chii ne Yahudyo konamgei ak chii ne po poror age anan konyo ole mi; ago kagoboorwo anee Kamuktaindet kole si mata aguure chii age ne ma tiliil anan ne ng'waan. 29Amu nooto anyun, ye kingo kageguura ko kaanyo amata asich kiy ne amwae. Nooto anyun ateebee ale nee ne koguurcho.” 30Kole anyun Korneli, “Peetuusyek ang'wan rani kobooch yooto agoi saini, ye ki asaae eng' sait sogool eng' koonnyu; ak keero, ki tonon eng' tainnyu mureno ne ilaachi ngoroik che liilei piich, 31ak kole, ‘Korneli, kigegas saaeng'ung', ak ki koek kabwaatet eng' taitap Kamuktaindet kagoochinoiguk. 32Iyookte anyun piik koba Joppa si koguurun Simion ne kainet ne po aeng' ko Petero; miitei ineendet ko toondet eng' kootap Simion teiteindetap muiywek, ye neegitee ngeguutap araraita.’ 33Ki ayoogu anyun piik eng' sainooto kobwa ole imi; ak kaiyai ne myee amu kainyo. Ki mi anyun yu nguno acheek tugul eng' taitap Kamuktaindet, si kegas tuguuk tugul che king'atin Kiptaiyat.”

Koityin Pororyosyek alak Logoywek che Myach

34

10.34:
NKNg'a 10.17
Ki ng'aany anyun Petero kutinnyi, kole, “Iman ageere ale ma chamei `Kamuktaindet piik alak kosiir alak: 35ago taachaksei eng' ineendet chiito ne iywei ineendet ak koyaei iman eng' pororyet age tugul. 36Ng'olyoot ne ki iyookyi ineendet piigap Israel, ko koamda ng'aleek che myach che po kaalyeet eng' Jeso Kristo, ineendet ko Kiptaiyat ne po tugul. 37Ongen okweek ng'olyoondonooto, ne ki kiamda eng' Judea komugul ketaune Galilaya, kingo pata kabatisanet ne ki amdoi Johana; 38ongen ole ki iil `Kamuktaindet Jeso ne po Nazareth eng' Kabuuset ne Tiliil ak eng' kamuktaet; kiwendot ineendet ak koyaei ne myee, ak kosoobi tugul che ki inyaliili chesawilyet, amu ki mi Kamuktaindet kobooto ineendet. 39Ki paorinik acheek che po tuguuk tugul che ki yai eng' emetap Yahudik ak eng' Jerusalem. Ki par `icheek ineendet kogartaat eng' keetit; 40ago ki ing'eet `Kamuktaindet ineendet eng' peetuutap somok ak kogoito kotook, 41ma eng' piik tugul ago eng' paorinik che kiga sip kolewen Kamuktaindet, acheeget chooto che ki kiamisyei ak keeisei kobooto ineendet ko kagong'eet komong' eng' che ki pek. 42King'atech keamji piik ak kebaoryan keele niito ko ineendet ne ki inde Kamuktaindet koek Kirwoogindet ne po che saptos ak che ki kobek. 43Paoryani maotik tugul agobo ineendet kole nyooru nyoetap kaat amu tengekwogikyik eng' kainennyi age tugul ne iyani ineendet.”

Kotaachei Pororyosyek alak Kabuuset ne Tiliil

44Ye kita komwaei Petero ng'aleechu, kochoorchigei Kabuuset ne Tiliil tugul che kigasei ng'olyoot. 45Icheek che po kamuratanet che ki iyani che kibwanei kobooto Petero ko ki kwong'yo amu kageroong'ji Pororyosyek ak icheek konunetap Kabuuset ne Tiliil; 46amu kigasei icheek kong'alaali eng' kutusweek che teerchiin ak kotoroori Kamuktaindet. Koteep anyun Petero kole, 47“Imuuchi chii koete peek, si ma kibatisan pichu, che kagotaach Kabuuset ne Tiliil ko uu acheek?” 48Ki ng'at anyun kole kibatisan icheek eng' kainetap Jeso Kristo. Kosoom anyun `icheek ineendet kole kota kobeni peetuusyek alak.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]