Revised Kalenjin Bible (KAPR)
1

Kagateet

11Paulo, kayooktoindet ne po Kristo Jeso eng' mageetap Kamuktaindet, ak Timoteo tupchennyo, 2kisirchini che tiliileen che kitupche che iyanotin eng' Kristo, che mi Kolosae: Ingotebi kobootok myeeindo ak kaalyeet che punu Kamuktaindet Kwandanyo.

Kongoi ak saaet

3Kigoochini kongoi Kamuktaindet Kwandap Kiptaiyandennyo Jeso Kristo, kesaiywok kotugul, 4ye ki ngegas agobo kayaneng'wong' eng' Kristo Jeso, ak chamyet ne oting'e tugul che tiliileen 5amu kamang'unet ne kigegonorwok eng' kipsengwet, ne ki osip ogas eng' ng'olyootap imanit ne po logoiywek che myach, 6ne kigoityok; ko uu ole teptoi agine eng' ng'wony komugul koiyiei logoek ak ko tesoksei, ko uu eng' okweek, kobooch peetuut ne ki ogas ak onai myeeindap Kamuktaindet eng' iman; 7

1.7:
Kol 4.12; Phlm 23
ko uu ye ki oneetkei eng' Epapra chamanennyo ne kiboisyei tugul, ne kiboityot ne iyanaat ne po Kristo agobo acheek, 8ne ki iboorwech chamyeng'wong' ne mi eng' Kabuuset ne Tiliil. 9Amu niito anyun, koma kimete kesaa ak kesoom agobo okweek kobooch peetuut ne ki ngegas, keele konyiiak naetap magennyi eng' utaatyet tugul ak kaguiyet ne punu Kabuuset ne Tiliil, 10si obendate ko uu ye nyolu eng' Kiptaiyat, oboiboi ineendet, oitosi logoek eng' poisyet age tugul ne myee, ak otesage eng' naetap Kamuktaindet; 11kigimitok eng' kamuktaet tugul, ko uu kamugetap toroornatennyi, agoi muitaet tugul ak talasyet eng' poiboiyet, 12ogoochini kongoi Kwanda, ne kiyaech keegu che nyoljin keyamde poroteetap che tiliileen eng' lapkeiyet; 13ne kisarwech kemang'une kimnateetap mesundeito, ak kouutech keebe laitornatetap Weeriit ne po chamyennyi; 14
1.14:
Eph 1.7
ne ki tinyei eng' ineendet katyagennyo, nyoetap kaat ne po tengekwogikyok.

Ooindap Kristo

15Ineendet itoondap Kamuktaindet ne ma taagu, ineendet ne kisip kesich eng' kiit age tugul ne ki kitoi keyai; 16amu ki kitoi keyai tuguuk tugul eng' ineendet, che mi kipsengwet ak che mi ng'wony, tuguuk che taagu ak tuguuk che ma taagu, anan laitornatosyek, anan kiptainatosyek, anan pounatosyek anan kimnatosyek; ki kitoi keyai tuguuk tugul eng' ineendet ak ko po ineendet; 17ak po tai ineendet eng' tuguuk tugul, ak namegei tuguuk tugul eng' ineendet. 18

1.18:
Eph 1.22-23
Ak ineendet metitap poorto, nooto kaniset: ineendet taunet, taunindetap che ki mong' eng' che ki pek; si kobiit koek ne oo eng' tuguuk tugul. 19Amu ki chamak komyee keele komeny nyiyet tugul eng' ineendet; 20
1.20:
Eph 2.16
si kotuiyechigei tuguuk tugul ineendet, ye kingo kagoyai kaalyeet eng' korotiigap kimurtoiyondennyi; eng' ineendet, ngo tuguuk che mi ng'wony anan tuguuk che mi kipsengwet.

21Ak nganda ki oo kipsagarek eng' peetuusyek che ki kosiirto, ak ki oo puunik eng' kabwaatutikwok eng' poisyonikwok che yaacheen, ko kagotuiyok ineendet nguno, 22eng' poortanyi ne po panyeek, eng' meet, si kobiit komutak ko oo tiliileen ko motinye tisya, amotinyei kiy ne kirwoogunenok eng' tainnyi: 23ngo tebi iman eng' kayaneet, ko oo lumdootin ak ko oo tononiotiin komyee, ama ki istok eng' kamang'unetap logoiywek che myach che ki ogas, che ki kiamda eng' yautyet tugul eng' kurereetap kipsengwet; ki kiyaa anee Paulo amu nooto aek kiboityot.

Poisyetap Paulo agobo kayanik

24Abaibai anyun nguno eng' nyalilwogikyuk agobo okweek, ak anyiiti eng' komostanyu nooto ne rarunoot agobo nyalilwogigap Kristo eng' poortanyu agobo poortanyi, nooto kaniset; 25ak, ki kiyaa agobo nooto aek kiboityot, eng' tononjinetap Kamuktaindet ne ki kigoono amu okweek, si ayai ng'olyootap Kamuktaindet kosulda, 26ung'ootyet ne ki kiuny kobooch kenyiisyek tugul che ki kosiirto ak ibinwek: ago nguno, ko kagiboorchi chechiik che tiliileen, 27che ki cham Kamuktaindet kong'aang'ji kiit ne uu mogornatosyegap toroornatet ne po ung'ootyoniito eng' Pororyosyek, nooto Kristo eng' okweek, kamang'unetap toroornatet: 28ineendet ne kimwaitoi, ak kiteechini chii age tugul ak kineeti chii age tugul eng' utaatyet tugul, si kobiit kimut chii age tugul kogesunotkei eng' Kristo; 29abirtochinigei agine nooto, agiiligei ko uu poisyennyi, ne poisyei eng' anee eng' kamuktaet.

2

21Amu amache onai ole agiiligei miising' agobo okweek, ak icheek che mi Laodikia, ak alak tugul che tomo kogeero togoch eng' poorto; 2si kobiit kigaigai mugulelwekwak, ak keropchin eng' chamyet, ak eng' mogornatosyek tugul che po nyiietap kaguiyet, si kobiit konai icheek ung'ootyetap Kamuktaindet, ineendet Kristo, 3ki kiuny eng' ineendet konoraik tugul che po utaatyet ak naet.

4Amwae niito ale, si ma kenaak chii age tugul eng' ng'aleegap lomset. 5Amu agot ngo ma mi anee eng' poorto, ami kobootok eng' Kabuuset ne Tiliil, ko abaibai eng' atebeeng'wong', ne ageere, ak kimnateetap kayaneng'wong' eng' Kristo.

Sabeet ne igeesunotkei eng' Kristo

6Ko uu ye ki otaach anyun Kristo Jeso Kiptaiyat, obendate eng' ineendet, 7ko oo lumdootin ak ko oo teegotin eng' ineendet, ak kigimitok eng' kayaneng'wong', ko uu ye ki kinetak, otese omwae kongoi.

8Oriipkei si ma iluulok chii age eng' ng'omnatennyi ak kaberberisyet ne po puch, eng' pitonwegap piik, eng' kaneetisyosyek che po tai che po ng'wony, ak ma eng' Kristo: 9amu menyei eng' ineendet eng' poorto nyiyet tugul ne po Kamuktaindet, 10ak keyaok oegu che nyiitootiin eng' ineendet, ne metitap pounateet tugul ak kimnateet: 11ki kimuratanak eng' ineendet eng' kamuratanet ne ki ma kiyae eunek, eng' istoetap poortap panyeek, eng' kamuratanetap Kristo; 12

2.12:
Rom 6.4
ko kagetubok kobooto ineendet eng' kabatisanet, ak ki king'eetak eng' nooto kobooto ineendet amu kayaneet eng' yaeet ne yaei Kamuktaindet, ne ki ing'eet ineendet komong' eng' che ki pek. 13
2.13:
Eph 2.1-5
Ak okweek, che ki oo pegunotin eng' yaitwogikwok ak poorwekwok che ma kimuratan, ki isaabok okweek, kobooto ineendet, ko kagonyoiywech kaat yaitwogikyok tugul; 14
2.14:
Eph 2.15
ko kagobuch sireet ne po arorutik ne kiga kogikyech, ne kiraanyech: ak kigoisto, kobirchi kimurtoiyot; 15ko kagorek pounatosyek ak kimnatosyek, koboor kotook, koterteeri icheek eng' kimurtoiyot.

16

2.16:
Rom 14.1-6
Nooto anyun amat korwokwok chii age tugul agobo amitwogik, anan agobo che kieei, anan agobo peetuutap igoorto anan agobo arawet ne kaleel anan peetuutap sabato: 17che urwetap tuguuk che pwoonei; ago poorto ko po Kristo. 18Amat korebenak chii melektang'wong' eng' ooreet ne machei ineendet, ne po kaming'inetapkei ak kalasunetap malaikaisyek, ak kogimitegei tuguuk che ki kogeer, ak komenee kabwaatutikyik che po poorto, 19
2.19:
Eph 4.16
ama namei komyee Metit, ne nyoorunee poorto tugul teset eng' teset ne punu Kamuktaindet, ko kagonyoor tugul, ak konamatkei eng' kebeberwek ak tigitik.

Kateunoik agobo kaneetigap lembech

20Ko uu ye ki obegu kobooto Kristo omang'une kaneetisyosyek che po tai che po ng'wony, amu nee anyun si ogas iit arorutik, ko uu ye osaptosi eng' ng'wony, 21amonam, anan ochamcham, anan otwaa 22(petos tuguuchuuto tugul ye kiboisye), ko uu ng'atuutik ak kaneetisyosyegap piik? 23Tinyei tuguuchooto kaboorunet ne po utaatyet eng' chameet ne po kalasunet, ak eng' kaming'inetapkei, ak nyalilda ne kinyaliili poorto; matoreti kiy age tugul eng' katerteretap magutigap poorto.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]