Revised Kalenjin Bible (KAPR)
6

Kaimetapkei agobo mogornatosyek

61Mi yaityet ne ki ageer eng' kurereetap asiista, ak nyigiis nooto eng' piik miising': 2chiito ne igoochin `Kamuktaindet mogornatosyek, chaang'indap tuguuk ak teegisto, kot ko marerchin kiy saboondanyi eng' tuguuk tugul che machei, ago ma igoochin Kamuktaindet kimnateet ne ame tuguuchooto, ago amei toondet. Puch niito ak ko myando ne ya. 3Ngot kosich chiito lagok pogol ak kosap kenyiisyek che chaang', si kochang'a peetuusyegap kenyiisyekyik, ago ma piyonyi saboondanyi kiit ne myee, ama tinyei ole kitupchin. Amwae ale kaigai ne ki kioos, kosiir ineendet: 4amu nyoonei puch ak kowendi eng' mesundeito, ak kituchei kainennyi eng' mesundeito, 5ama keer asiista anan konai. Tinyei niito kamuung'et kosiir ni Kai. 6Agot ngo sap kenyiisyek eliphuut konyil aeng', ama paibaitune kiy ne myee, tos ma pendi tugul oldo agenge?

7Po poisyet tugul ne po chiito kutinnyi, ago ma piyonyi. 8Amu tinyei keljinet nee chiito ne utaat kosiir ne perber? Anan tinyei nee chiito ne panan, ne ingen kowendot eng' taitap che saptos? 9Kaigai keereetap konda kosiir mageet ne ombenoti. Puch niito agine ak ko kaimetapkei ne po puch.

10Kiy age tugul ne mi, ko kiga ketoochi kainennyi keny, ak konaat ole uu ng'aleegap chii. Amaimuuchi kotiiyo kiy ak ineendet ne kiim kosiir ineendet. 11Ng'aleek che chaang' kotesei tangoita, ma tesei chii. 12Ng'oo anyun ne ingen kiit ne myee agobo chii eng' sabeennyi, eng' peetuusyek tugul che po sabeennyi ne po puch che poisye ko uu urwet? Ng'oo anyun ne imuuchi komwachi chiito tuguuk che piitu let eng' ineendet eng' kurereetap asiista?

7

Katigonet agobo sabeet

71

7.1:
Kale 22.1
Kaigai kainet ne myee kosiir mwanik che po kamanuutyet ne oo.

Ak kaigai peetuutap meet kosiir peetuut ne kisichei chii.

2Kaigai keba koot ne kiteiye,

kosiir keba koot ne mi igoorta.

Amu nooto kagesunetap piik tugul,

ak konori nooto eng' muguleldanyi chiito ne sabei.

3Kaigai arageneet kosiir roryot,

amu kiboiboi muguleldo eng' arageneetap togeet.

4Mi mugulelwegap che utaatiin koot ne kiteiye,

ago mi mugulelwegap che perber koot ne po poiboiyet.

5Kaigai kegas kereetap kong' ne po chiito ne utaat,

kosiir kegas tyendap piik che perber.

6Amu uu kateretap katook che mi maat ne mi tereet ne kotkotaat,

roryotap chiito ne perber.

Puch niito agine.

7Igoochin iman sastaet chiito ne utaat koberberit;

ak ng'emei `kiit ne kigoigoisye naet.

8Kaigai kagesunetap kiy kosiir taunennyi;

kaigai ne muitoi eng' muguleldonyi kosiir ne meenei.

9

7.9:
Jak 1.19
Amesartae nereek eng' saboondang'ung',

amu tebee nereegek tegetigap che perber.

10Ameteep ile, kilyon si ko korooronitu peetuusyek che po tai kosiir peetuusyechu?

Amu ma iteep agobo niito eng' utaatyet.

11Myee utaatyet ko uu ye myee poroteet.

Ee, myee miising' eng' icheek che keerei asiista.

12Amu riibei piich utaatyet ko uu riibseetap fedhaisyek.

Ago telunatetap naet ko ni, riibei ng'omnateet saboondap chiito ne tinyei.

13Ibwaat poisyetap Kamuktaindet;

tos ng'oo ne imuuchi kolitit kiit ne ki yai ineendet kogunuurit?

14Paibaitu eng' peetuutap perurto, ak eng' peetuutap nyalilda ibwaat komyee. Ki iyai Kamuktaindet chooto kogergeit tuwai, si ma nai chiito kiit age tugul ne piitu let.

15Ki ageer chooto tugul eng' peetuusyekyuk che po puch. Mi chiito ne po iman ne meitoi imandanyi ak mi chiito ne ya ne sabei keny ak koyaei yaityennyi. 16Ameegu ne tinyei imanda ne siirtoot, anan isich utaatyet miising'; amu nee si ing'emge? 17Ameegu ne ya miising' anan iegu ne perber. Amu nee si imee kotom koit peetuung'ung'? 18Karaaran iguiye niito komyee, ameistoe eung'ung' ng'olyoondoni agine; amu ineendet ne iywei Kamuktaindet komang'une chooto tugul.

19Utaatyet ko kimnateetap chiito ne utaat ne siirei pounik taman che mi nganaseet.

20Iman, ma mi chii ne po iman eng' ng'wony, ne yaei ne myee ama yaei tengekto. 21Ameepchi iit kogeny ng'aleek tugul che kimwaei, si me kas kochubin otwogindeng'ung'. 22Amu ingen agine muguleldang'ung' konyil che chaang' kole ki ichup aginye alak ko uu nooto.

Soometap naet

23Ki ageer chuuto tugul eng' ng'omnateet ak ki ale, “Ang'omitu”, ago kilooena utaatyet. 24Kiit ne mi, komi ye loo ak ki wo oriit miising'; ng'oo ne imuuchi konyoor? 25Ki aweege ak kimach muguleldanyu konai ak kosyach ak kocheeng', utaatyet ak ole teptoi tuguuk, ak konai kole yaityet ko perberyo, ak kole perberyo ko iywek.

26Ak anyooru kiit ne ng'waan kosiir meet, nooto kwony ne muguleldanyi ko mesteet ak regereywot ak ko uu eunekyik ratuut. Age tugul ne iboiboi Kamuktaindet kochililee kwonyooto, ago namei `kwonyooto kiptengekyot. 27Ogeero, ki anyooru niito, mwaei Amdoindet, ki atuiye kiit age ak age si kobiit anai kieuu. 28Ne ta kocheeng'ei saboondanyu, ago tomo anyooru. Ki anyooru chiito agenge eng' piik eliphuut, ago ma anyooru kwondo eng' chooto tugul. 29Ogeero, ki anyooru niito kityo, ale, ki yai Kamuktaindet chiito kobunji iman; ago kigocheeng' icheek tuguuk che chaang' che taunen.

8

81Ng'oo ne kergei ak chiito ne utaat?

Ak ng'oo ne ingen kaweegetap kiy?

Igoochin ng'omnatetap chiito togeennyi kooluu,

ak kowalak uuindap togeennyi.

Koonyit laitoryat

2Aboorun ale, riip ng'atuutyetap laitoryat ak ibwaat ile ki iyasye eng' Kamuktaindet. 3Amesip iwe eng' tainnyi; ameyai kiy ne ya kotugul. Amu yaei laitoryat kiy age tugul ne iboiboegei. 4Amu tinyei kimnateet ng'olyootap laitoryat; ak ng'oo ne imuuchi koleenji ineendet, “Iyae nee?” 5Ma naei kiy ne ya age tugul ne riibei ng'atuutyet, ak ibestos muguleldap chiito ne utaat peetuusyek ak kirwooget. 6Amu mi peetuut ak kirwooget ne po ng'olyoot age tugul, amu oo nyalilda ne tinyei chiito eng' chooto. 7Amu ma naei kiit ne piitu, amu tos ng'oo ne imuuchi komwachi ineendet ole piitundoi kioto? 8Ma mi chii ne tinyei kimnateet eng' koriisto si kogirinda koriis; anan kotinyei kimnateet koboi peetuutap meet; ama mi undaet eng' lugonooto. Ama saru yaityet ineendet ne igoochingei yaityonooto.

9Ki ageer chuuto tugul, ki agiilji muguleldanyu poisyet age tugul ne kiyaei eng' kurereetap asiista. Miitei peetuut ne tinyei chiito age kimnateet koboi age si kogoochinegei nyalilda. 10Ak ki ageer ketubei kiptengeginik, ak ki pa kererit. Ki pa eng' ole-tiliil piik che ki yai ne myee ak ki kiutye icheek eng' nganaseet. Puch niito agine.

11Amu ma sip kirwookyin poisyet ne ya, konyooru anyun mugulelwegap piik mageet koyai yaityet. 12Agot ngo yai kiptengekyot yaityet konyil pogol, ak kotesak peetuusyekyik, angen ui tugul ale, myeeitu eng' icheek che iywei Kamuktaindet, che iyweisyei ineendet eng' tainnyi. 13Ago ma myeeitu eng' kiptengeginik, ama tesoksei peetuusyekyik che uu urwet, amu ma iyweisyei eng' taitap Kamuktaindet. 14Mi tangoita ne yaaksei eng' ng'wony; amu mi piik che po iman, che piityin kiy ko uu poisyonigap kiptengeginik; komi piik che yaach che piityin kiy ko uu poisyonigap che po iman. Ki amwa ale, tangoita niito agine.

15Ki alasu anyun poiboiyet, amu ma tinyei chii kiy ne myee eng' kurereetap asiista kobatee koam, koeei ak kobaibait. Amu tebyei nooto kobooto ineendet eng' poisyennyi, eng' peetuusyek tugul che po sabeennyi, che ki igoochi `Kamuktaindet ineendet eng' kurereetap asiista.

16Ye ki agiil muguleldanyu konai utaatyet ak ageer poisyet ne kiyaei eng' ng'wony, ko ki ageer ale mi ne ma inuuchi peet anan kemoi. 17Ki ageer anyun poisyonik tugul che po Kamuktaindet, ale ma imuuchi chii konai poisyet ne kiyaei eng' kurereetap asiista. Amu agot ngo kiilgei chiito ne tai, kole kocheeng', koma nyooru; ee, agot ngo leen chiito ne utaat konai, koma imuuchi konyoor.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]