Revised Kalenjin Bible (KAPR)
2

Keyae Esta koek osotyotap laitoryat

21Kingo pata tuguuchuuto ko kagogeskei nereegegap Aasuerus, kobwaat `ineendet Basti, kiit ne kiga kayai kwonyooto ak kiit ne kiga king'at agobo ineendet. 2Yeityo komwa otwogigap laitoryat che kiboisyechin ineendet kole ingecheeng'ji laitoryat pergeinik che neranik ak ko tinyei itoon, 3ak ingonde laitoryat kiptainik emotinwek tugul che po laitornatennyi, si kobiit koyum pergeinik tugul che neranik ak ko tinyei itoon kobwa Susa, nganaseet ne oo. Ngo pwa kootap kwonyik, konyo koriip Hegai riibindetap kaplaitoryat ne ki riibei kwonyik. Ingigoochi tuguukwak che ianyinyegei, 4si koek osotyotap laitoryat chepto ne iboiboi laitoryat, ne kata Basti. Ki ibaibai `laitoryat ng'olyoondoni ak ki yai ko uu nooto.

5Ki mi Yahudyot age nganasanooto oo po Susa ne ki kiguure Mordekai, weeriitap Jair, weeriitap Shimei, weeriitap Kish, Benjaminindet. 6

2.6:
2Lai 24.10-16; 2A.Pet 36.10
Kiga kimut ineendet eng' Jerusalem koba ak luulenik che kiga komut Nebukadnezar laitoryatap Babilon kobooto Jekoniah laitoryatap Judah.

7Ki igui `Mordekai Hadasa, nooto ko Esta cheptap ne tupcho ak kwan, amu ki ma kotinyei kwanda ak kamet. Ki chepto ne ki tinyei itondo ne myee ak togeet ne karaaran ak ye kingo me kwandanyi ak kamennyi, konam Mordekai koek cheptonyi.

8Ye ki ngegas ng'olyootap laitoryat ak ng'atuutyennyi ak kingi yum tiibiik che chaang' kobwa Susa nganaseet ne oo koriip Hegai, ko ki kimut Esta agine konyo kootap laitoryat koriip Hegai ne ki riibei kwonyik. 9Ki ibaibai `chebooto ineendet. Ki nyoor chameet eng' ineendet ak kisip kogoochi tuguukyik che ianyinyegei kobooto kebeberwekyik che po amitwogik. Ki igoochi `ineendet tiibiik tisap che ki kileewenji eng' kootap laitoryat. Ki kiuu ineendet kobooto tiibiikyik koba komosta ne karaaran miising' ne po kootap kwonyik.

10Ki ma iboor Esta ole salu piikyik anan tilyonutikyik amu kiga kong'at Mordekai ineendet si ma mwa. 11Ki cham kowendoti Mordekai peetuut age tugul eng' taitap seremut ne po kootap kwonyik, si kobiit konai ole teptoi Esta ak kiit ne kiyachin ineendet.

12Ki it peetuut ne wendi chepto age tugul ole mi Laitoryat Aasuerus, ko kageyachi ko uu ye mwaei ng'atuutik agobo kwonyik eng' arawek taman ak aeng': ki uu nooto kagesunetap peetuusyegap kaanyinyennywa pogei, ki po arawek lo mwanigap tuguuk che uu igomoik, ko po arawek lo nyamdutik ak tuguuk che po kaanyinyetap kwonyik. 13Kinyonei ole mi laitoryat ko uu niito anyun chepto koga kigoochi kiit age tugul ne machei koip eng' kootap kwonyik kwo kootap laitoryat. 14Kiwendi koskoleny ak koweek mutai kwo koot ne po aeng' ne po kwonyik sip koriip Saaskas, riibindet eng' kaplaitoryat ne kiriibei chebaigeinik. Ki ma komuuchi kwo kogeny chebooto ole mi laitoryat, kobatee ngo cham laitoryat chebooto ak keguur kainennyi.

15Kingo it anyun peetuutap Esta, cheptap Abiail ne tupcho ak kwandap Mordekai ineendet ne kiga nam chebooto koek cheptonyi, ye wendi ole mi laitoryat, koma mach kiy age tugul kobatee kiit ne ki ng'at Hegai riibindet eng' kap laitoryat ne kiriibei kwonyik. Ak ki chamak Esta eng' taitap piik tugul che ki keer ineendet. 16Ki kimut anyun Esta kwo ole mi Laitoryat Aasuerus eng' koonnyi ne po laitornatet eng' arawetap taman, nooto ko arawetap Tebet, eng' kenyiit ne po tisap ne po laitornatennyi. 17Ak ki cham `Laitoryat Esta kosiir tiibiik tugul, ak kinyoor myeeindo ak chameet eng' tainnyi kosiir pergeinik tugul. Ara ki ilaakyi ineendet naaryeetap laitornatet ak koyai ineendet koek osotyotap laitoryat kogeere Basti. 18Ki yachi anyun laitoryat igoorto ne oo pounikyik tugul ak otwogikyik igoortap Esta. Kigoochi kamuung'et emotinwek ak kogoito kagoochinoik ko uu aiyebindap laitoryat.

Komwau Mordekai chaamigap pareetap laitoryat

19Ye kingo kagoyumgei pergeinik ne po aeng', kotep Mordekai eng' ormariichetap laitoryat. 20Kitom koboor Esta ole salu anan tilyonutikyik ak piikyik ko uu ye kiga ng'at Mordekai ineendet. Ma iboor amu ki kas iit Esta ng'atuutyetap Mordekai ko uu atkinyei koriibei ineendet.

21Eng' peetuusyechooto, ye kitebyei Mordekai eng' ormariichetap laitoryat, konereekso riibiik aeng' che po kaplaitoryat che kiriibei kurgeet, Bigtan ak Teres, ak kocheeng' kobar Laitoryat Aasuerus. 22Kinaak kioto eng' Mordekai ak ki mwachi Esta osotyotap laitoryat ak ki mwachi `Esta laitoryat ng'olyoondonooto, komwaitoochi Mordekai. 23Ye kingo kagegin ng'olyoondonooto ak kenai keele uu nooto, ko ki kigartaat pichooto tuwai eng' keetit ak ki kisirchi ng'olyoondonooto bukuitap ateptap peetuusyek eng' taitap laitoryat.

3

Kochobei Haman Kebar Yahudik

31Kingo pata tuguuchuuto koeet `Laitoryat Aasuerus Haman weeriitap Hamedata Agagindet. Ki itoroor ineendet ak kogoochi kotebee ng'echereet ne toroor kosiir pounik tugul che ki mi kobooto ineendet. 2Ak ki ing'uruukjin ak kogonyiti Haman `otwogik tugul che po laitoryat che ki mi ormariichetap kaplaitoryat, amu kiga kong'at laitoryat ko uu nooto agobo ineendet. Ago ki ma ing'uruuk anan kogonyit `Mordekai ineendet. 3Kotebee anyun otwogigap laitoryat che ki mi ormariichetap kaplaitoryat Mordekai koleenji, “Amu nee si ibistoe ng'atuutyetap laitoryat?” 4Kingo ng'alaalji anyun `icheek Mordekai eng' peetuut age tugul ama kas, komwachi anyun Haman kogeer ngo myee kotebi ng'aleegap Mordekai ko uu nooto, amu kiga komwachi `icheek koleenji aa Yahudyot. 5Ye kingo keer Haman kole ma ing'uruuk Mordekai anan kogonyit ineendet, konereech miising'. 6Ki iro kole ma tilei kiy kobar Mordekai ineegei, amu kiga koboorchi `icheek ineendet ole salu piigap Mordekai, kocheeng' anyun Haman kobar Yahudik tugul che ki mi laitornatet tugul ne po Aasuerus; chooto ko piigap Mordekai.

7Eng' arawet ne po tai, nooto ko arawetap Nisan, eng' kenyiitap taman ak aeng' ne po Laitoryat Aasuerus, ko ki kiseer parbareegap Pur eng' taitap Haman, kobooch peetuut agoi peetuut ak kobooch arawet agoi arawet. Ki ibutyi parbaryat peetuutap ang'wan ne po arawetap taman ak aeng', arawetap Adar.

8Kingo yaak ko uu nooto, koleenji `Haman Laitoryat Aasuerus, mi piik alak che kiyom emet ak koiyestaat eng' kwenutap piik eng' emotinwek tugul che po laitornateng'ung' ak teerchiin ng'atuutikwak ak che po piik alak tugul, ama riibei icheek ng'atuutigap laitoryat; matoreti kiy anyun eng' laitoryat kobagaakta icheek.

9Ngot kochamei laitoryat, ko ingesir keele kebar icheek, ak agoochini piik che tononjin poisyonooto keruutik eliphuusyek taman che po fedha koip kobwa ole kigonoree tuguugap laitoryat.

10Ara ki inem anyun laitoryat peteiyot eng' eunnyi ak kogoochi Haman weeriitap Hamedata Agagindet ne ki puunyootap Yahudik. 11Ak ki leenji `laitoryat Haman, “Kagigoonin fedha kobooto piik agicheek si kobiit iyachi ko uu ole makte.”

12Ki kiguur anyun siriigap laitoryat kobwa eng' arawet ne po tai eng' peetuutap taman ak somok, ak ki kisir ko uu tugul che ki ng'at Haman kong'atyi kiptainigap che mi kaplaitoryat, pounik che ki pou emet age tugul ak kiptainigap pororyet age tugul. Ki kisirchi emet age tugul ko uu sirennyi ak pororyet age tugul ko uu kutinnywa. Ki kisir eng' kainetap Laitoryat Aasuerus ak ki king'ooch eng' peteitap laitoryat. 13Ki kiyookto paronok, kiyooktoe piik koba emotinwek tugul che po laitoryat keleenji keng'em, kebar ak kiluus Yahudik tugul; neranik ak che oosen, lagok che mengeechen ak kwonyik, ak kenam tuguukwak koek parunenik. Oyai niito eng' peetuut agenge, eng' peetuutap taman ak somok ne po arawetap taman ak aeng', nooto ko arawetap Adar. 14Ki kimwachi pororyosyek tugul ng'aleegap siruutichooto, si kobiit kigoito ng'atuutyet eng' emet age tugul, si kochobogis agobo peetuunooto.

15Ki pa anyun piik che kiga kiyookto kochaakta eng' ng'atuutyetap laitoryat ak ki kigoon ng'atuutyonooto eng' Susa, nganaseet ne oo. Ki tep ng'wony laitoryat ak Haman koeeiso, ago ki iimgei nganaseetap Susa.

4

Kogaigai `Mordekai Esta kosoom rireenet

41Ye kingo nai Mordekai tuguuk tugul che kagoyaak, kogereer ngoroikyik ak kolaach kuniok ak koiilegei oreek, yeityo kwo kwenutap nganaseet ak koote eng' kutit ne oo ak riiregap ng'wanindo ne oo. 2Ago ki nyo ineegei agoi taitap ormariichetap laitoryat, amu ki ma kechamjin chii age tugul ne ilaachi kuniok kochut ormariichanooto. 3Ki piit eng' Yahudik arageneet ne oo, karugutetapkei, riirek ak kateeiyet eng' emet age tugul ne ki it ng'olyootap laitoryat ak ng'atuutyennyi, ak kisyep che chaang' eng' icheek kuniok ak oreek.

4Ye kingo pwa tiibiigap Esta ak riibiikyik ak komwachi Esta ng'olyoondonooto, ko ki aragen miising' ineendet. Ki iyookto ngoroik kilaakyi Mordekai ak kireegune kuniok, ago ma iyan kolaach ngoroichooto. 5Kiguur anyun `Esta Hatak, agenge eng' riibiigap laitoryat ne kiga konde laitoryat koboisyechi ineendet ak kong'at ineendet kwo ole mi Mordekai si kobiit konai kole nee niito ak amu nee si koyaak ko uu nooto. 6Ara ki wo anyun Hatak ole mi Mordekai eng' ole paraa eng' nganaseet ne ki mi taitap ormariichetap laitoryat. 7Ki mwachi `Mordekai ineendet tuguuk tugul che kogoyaak agobo ineendet ak agobo fedhaisyek tugul che kiga koarorchi Haman kole konde ole kigonoree tuguugap laitoryat agobo Yahudik, kole si kebar icheek. 8Ki igoochi kora ineendet ng'aleegap siruutik che po ng'atuutyet ne ki kimwaita eng' Susa keele kebar icheek, si koboorchi Esta ak koaroorchi ole teptoi, kong'at ineendet kwo ole mi laitoryat asi koriirchi ineendet ak kosoom eng' tainnyi agobo piikyik. 9Ki wo Hatak ak komwachi Esta ng'aleegap Mordekai. 10Ki ng'alaalji anyun `Esta Hatak ak kong'at ineendet koipchi ng'aleek Mordekai kwo koleenji, 11“Ingen otwogik tugul che po laitoryat ak piik che po emotinwegap laitoryat kole, age tugul ne ma kiguur ne nyoonei ole mi laitoryat eng' seremut ne mi oriit, ngo muren anan kwony, komi ng'atuutyet agenge agobo ineendet keele ki parei. Ma ng'etu kobatee icheeget che iyogoochin `laitoryat kirokto ne po thahabu si kosap. Tomo keguuro anee anyun awo ole mi laitoryat eng' peetuusyechu sosom kogosiirto.”

12Ye ki ngemwachi Mordekai ng'aleegap Esta, 13kong'at anyun Mordekai keipchi Esta waluunet keleenji, “Amat ibwaat ile amu imi kootap laitoryat ichilili kosiir Yahudyo age tugul. 14Amu ngot isiis kityo eng' peetuusyechuuto, konyooru Yahudik toreteet ak katyaget eng' komosta age, ago iluse inyee ak kootap kwandang'ung'. Ak ng'oo ne ingen ngo tos ki ma inyonji pounateet agobo peetuusyek che uu chuuto?”

15Kong'at anyun Esta keipchi Mordekai waluunet keleenji 16ui iyum Yahudik tugul che miitei Susa, ak orugutkei agobo anee amat oam kiy anan oeeise eng' peetuusyek somok, kemoi anan peet. Arugutigei agane ko uu nooto kobooto tiibiikyuk. Ye ibata, awe anyun ole mi laitoryat nganda ma chamdaat eng' ng'atuutyet; ngalus, alus. 17Ki wo anyun Mordekai ak koyai ko uu tugul che kang'at `Esta ineendet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]