Revised Kalenjin Bible (KAPR)
28

Ngoroigap tiseinateet

281“Imutu anyun Aron ng'eetap komet konyo ole ami kobooto weeriikyik, kobwa eng' ole mi piigap Israel, si kobiit koboisyeiwo eng' tisiisyet. Icheeget che imutu ko; Aron ak weeriikyik, Nadap, Abiu, Eleazar ak Ithamar. 2Napchi Aron ng'eetap komet ngoroik che itabaanatiin che po teegisto ak korooronindo. 3Yeityo ing'alaalji tugul che tinyei muguleldo ne po kaguiyet, che ki anyiit kabuusetap ng'omnateet, si konap ngoroik che po Aron si kobiit kitabaan ineendet koboisyeiwo eng' tisiisyet. 4Chu angook che nabei icheek: ngoryeet ne kilaakyin tegeet, ephod, ngoryeet ne kooi, ak age ne kooi miising' ne ki kilelesan, naaryeet ak pireneet. Ilaachi Aron ng'eetap komet ak weeriikyik ngoroichuuto itabaanatiin si koboisyeiwo eng' tisiisyet. 5Ingoboisyee icheek usiisyek che ililii, che buluu, che arusen ne piriir ak che piriireen kobooto katanit ne karaaran ne ki kileet.

6“Yae icheek ephod eng' thahabu che buluu, eng' che arusen ne piriir, eng' che piriireen ak eng' katanit ne karaaran ne ki kileet. 7Tinyei eng' tigigoik kebeberwek che ituitos ngoroichooto tuwai koek ngoryeet agenge. 8Ak ki kinap pireneet eng' ng'omnateet ki tuiyo kogergeit ak ephod si kerategei. Kinabe thahabu, buluu, che arusen ne piriir, che piriireen ak katanit ne karaaran ne ki kileet.

9“Nam koik aeng' che kiguure soam ak iwachi eng' sireet kainaigap piigap Israel ko uu ortinwekwak; 10sirchi koita age kainaik lo, ak kainaik lo che kang'et isirchi koita age. 11Sirchi koichooto aeng' kainaigap piigap Israel, eng' poisyetap waindetap koik, ko uu waet ne po ng'ookset ak inde koichooto thahabu che ki kitogul konam koik. 12Yeityo inde koichooto aeng' tigigoigap ephod si koek koichooto kabwaatet agobo piigap Israel. Ingoibot Aron kainaikwak eng' tigigoikyik aeng' eng' taitap Kamuktaindet ne Toroor koek kabwaatet. 13Iyae tuguuk che togulotin eng' thahabu, 14ak sirimoik aeng' che po thahabu che tiliileen. Ilet koigei rogoonik ak iratyi sirimwechooto kagilet tuguuchooto togulotin.

15“Nap eng' poisyetap nabiindet ne ng'oom, ngoryonooto po tegeet ne po kirwooget, inabe kogergeit ak ephod eng' thahabu ne buluu, ne aruus ne piriir, ne piriir ak eng' katanit ne karaaran ne ki kileet. 16Ingoaechin koindo ak tebeesindo ko kagiliich. Ingoek kakwautyennyi olo po sendimita tiptem ak aeng' eng' koindo ak eng' tebeesindo. 17Inde ngoryonooto koik che tetotin eng' ortinwekwak ang'wan. Inde ooreet ne po tai sardio, topasio ak bareqet28:17 bareqet: ni ko agenge eng' koik che mi Bukuit ne Tiliil ak mi tugul eng' pechisyek che po let, 18ak inde ooreet ne po aeng' sumaragdo, sapphire ak yaholom. 19Eng' ooreet ne po somok inde huakinto, sebu ak ametusto. 20Eng' ooreet ne po ang'wan inde berulo, soam ak jasipi. Kitetyin koichooto kelongonigap thahabu. 21Egu koichooto taman ak aeng' ko uu kainaigap piigap Israel. Pendi ko uu kainaikwak ko uu ye kiwaei ng'ookset, tinyei koita age tugul kainennyi ak ko pee ortinwek taman ak aeng'. 22Napchi ngoryonooto po tegeet sirimwek che uu rogoonik che po thahabu che tiliileen che ki kilet ko uu rogoet. 23Napchi kora peteinik aeng' che po thahabu ak inde peteinichooto aeng' tabanwegap luukwek aeng' che po ngoryonooto po tegeet. 24Yeityo inde sirimwechooto aeng' po thahabu che ki kilet peteinik aeng' che mi tabanwek aeng' che po ngoryonooto po tegeet. 25Nam anyun komoswechuun alak aeng' che po sirimwechooto aeng' ki kilet ak irooch kelongonik aeng' che ki kitogul yeityo ituiye ak ephod eng' komostap tigigoik ole tabanu tai. 26Chop peteinik aeng' che po thahabu yeityo inapchji ngoryonooto po tegeet eng' komostap luukwek aeng' eng' tabanwekyik che tabanu komostap oriit eng' ephod keel. 27Chop anyun peteinik aeng' che po thahabu inapchi tuguuchooto tigigoigap ngoryonooto kiguure ephod eng' komostap kapkelyen ole tabanu tai eng' ole neegitee ye ki kituiye, eng' paragutap pirenonooto po ephod ne ki kinap eng' ng'omnateet. 28Igiichi icheek ngoryeetap tegeet eng' peteinikyik koratyin ak peteinigap ephod, korate rogoet ne buluu si kotebee paragutap pireneet ne po ephod ne ki kila eng' ng'omnateet, si ma peesyo ngoryeetap tegeet ak ephod. 29Ye mandoi Aron ole-tiliil, koibe kainaigap piigap Israel ngoryonooto po tegeet ne po kirwooget eng' muguleldanyi si koek kabwaatet eng' taitap Kamuktaindet ne Toroor kotugul. 30

28.30:
Kai 27.21; NKNg'a 33.8; Ezr 2.63; Neh 7.65
Inde ngoryonooto po tegeet ne po kirwooget Urim ak Tumim si kotebee chooto muguleldap Aron ye mandoi taitap Kamuktaindet ne Toroor. Eng' nooto anyun koibei Aron kirwoogetap piigap Israel eng' muguleldanyi eng' taitap Kamuktaindet ne Toroor kotugul.

31“Inabe ngoryeet ne kiroochigei ne po ephod ne ki kisal konyalilit ne ais kityo. 32Ak inap ole kirooktoi metit eng' kwenunnyi ak igurman kaatit ko uu poisyetap laindet ak ko uu ye kichobei ngoroigap lugeet si ma kereer. 33Napchi ngoryonooto tabandap keel logoek che buluu, che arusen ne piriir, che piriireen, koyiem tabandap kapkelyen tugul ak itilate cheptingiloogap thahabu kot kotuiyo. 34Indoi twolyot ne po thahabu yeityo inde logoiyandanooto korupkei ak itilate ko uu nooto korubatkei agoi tabandap ngoryeet komugul. 35Ak ingolaach Aron si koboisyee ak kegas cheetap cheptingilinichooto ye wendi ole-tiliil eng' taitap Kamuktaindet ne Toroor, ak ye mong'u si ma me.

36“Itaany kora thahabu che tiliileen kolebelitu ak iwai eng' paragunnywa waet ne uu ne po ng'ookset, ile, Tiliil eng' Kamuktaindet ne Toroor. 37Iratee rogoet ne buluu si kotebee naaryeet chepkulet ak kotebee naaryeet ole po togoch. 38Tebee togeetap Aron ak koibot Aron tengektap tuguuk che tiliileen, che itabaani piigap Israel eng' kagoochinoikwak tugul che tiliileen. Ak kotebee nooto togeetap Aron kotugul si kobiit kochamogis eng' taitap Kamuktaindet ne Toroor. 39Inapchini Aron ngoryeet ne kooi eng' katanit ne karaaran ak inde lelesta ak inap ko uu nooto naaryeet ne po katanit ne karaaran ak inap pireneet.

40“Eng' weeriigap Aron inapchini ngoroik che kooen, pirenaik ak chepkuloik che mengeechen che po teegisto ak kororindo. 41Yeityo ilaakyi ng'eetap komet Aron tuguuchooto ak weeriikyik ak icheek ak iil, ak itoroorchi icheek poisyetap tiliilindo itabaan, si kobiit koboisyeiwo eng' tisiisyet. 42Inapchini icheek sulwalisyek che ng'ete suet agoi kubesoik che po katanit si kobiit kotuge aach ngorinnywa. 43Ilaachi Aron ak weeriikyik tuguuchooto ye pendi emaitap oriit, anan ye riikyin kapkorosuut si kobiit kobois eng' ole-tiliil si ma nam icheek tengekto, ak kobek. Egu niito ng'atuutyet eng' ineendet ak eng' iyotennyi ne piitu let.

29

Kaanyinyetap tisiik

291“Ni kiit ne iyachini icheek ianyinyi, si kobiit koboisyeiwo eng' tisiisyet: iname kirgit agenge ne neran ak mengichik aeng' che libwoben, 2kobooto magatiinik che ma kinde mermereek, magatiinik che mengeechen che ki kikwang'da mwaiita, magatiinik che tertereen che kigi iilee mwaita ak ichobe peek che ng'ootiin che tambulul che po nganuuk. 3Indoi ateruut agenge ak iibune ateruunooto yeityo igetu kirgit kobooto mengichichooto aeng'. 4Imutu Aron ak weeriikyik kobwa kurgeetap emait ne kituiyechin ak iun icheek eng' peek. 5Nam ngoroik ak ilaakyi Aron ngoryeet ne kooi, ak ngoryeet ne ki kilelesane ephod, ephod ineendet ak ngoryeetap tegeet. Kermenee ineendet `pireneet ne po ephod ne ki kinap eng' ng'omnateet. 6Kerchinee metinnyi naaryeet ak iratyi kuutweet ne tiliil ne po thahabu paragutap naryonooto. 7Yeityo inam mwaita ne ki ilse iroong'ji metinnyi ak iil ineendet.

8“Imutu weeriikyik ak icheek ak ilaakyi ngoroik che kooen. 9Yeityo igermen Aron ak weeriikyik eng' pirenaik ak igerchinee metowekwak chepkuloik che mengeechen. Si konam poisyonooto po tiseinateet eng' ng'atuutyet ne po agoi. Itoroorchi anyun Aron ak weeriikyik poisyonooto po tiliilindo.

10“Ketu anyun kirgit konyo taitap emait ne kituiyechin. Ingogonoor Aron ak weeriikyik eunekwak metitap kirgooto. 11Yeityo ieny kirgooto eng' taitap Kamuktaindet ne Toroor eng' kurgeetap emait ne kituiyechin. 12Taach korotiigap kirgooto ak iilee tolochigap kaptisisyet eng' morneng'ung' yeityo iroong'ji korotichooto tugul kaptisisyet keel. 13

29.13:
Kai 27.21; NKNg'a 33.8; Ezr 2.63; Neh 7.65
Put mwanik tugul che ki ilaach moet ak kwambelelyet ne tuchei kooet, soromok tuwai, mwanik che mi soromochooto ak ibeel chooto eng' kaptisisyet. 14Ki peel eng' maat panyeegap kirgooto, muitonyi ak eiyandennyi eng' saang'utap nganaseet. Nooto ko kagoochinet ne po tengekto.

15“Nam mengit agenge agine, ak kogonoor Aron ak weeriikyik eunekwak metitap mengoto. 16Eeny mengit ak itaach korotiikyik ak iisote kaptisisyet. 17Yeityo itonaton panyeegap mengoto, ak iun tuguugap ke tugul ak keelyekyik ak ituiye ak panyechooto kagetonaton kobooto metinnyi. 18

29.18:
Eph 5.2; Phlp 4.18
Beel mengoto komugul eng' kaptisisyet: niito ko kagoochinet ne kibeelei ne po Kamuktaindet ne Toroor; nyamdutyet ne anyiny, kagoochinet ne kigoochin Kamuktaindet ne Toroor kobunei maat.

19“Nam mengit ne po aeng', si kogonoor Aron ak weeriikyik eunekwak metitap mengoto. 20Eeny anyun mengoto ak itaach korotiik che iilee walisyegap itigap tai che po Aron ak weeriikyik, ak eng' morik che eecheen che po eunekwak che po tai ak eng' morik che eecheen che po keelyekwak che po tai. Yeityo iisote korotiik che kang'et komoswek tugul eng' kaptisisyet. 21Ye ibata inam korotiik che mi kaptisisyet parak ak mwaita ne kiilse, ak iise Aron ak ngoroikyik, ak iise weeriikyik ak ngoroikwak. Si kitabaan ineendet ak ngoroikyik, ak weeriikyik ak ngoroikwak.

22“Inemune mengit mwanikyik, mwanigap saruryet, mwanik che ki ilaach moet, kwambelelyet ne po kooet ak soromok tuwai, kobooto sunetikwak ak kubesto ne po tai, amu niito ko mengit ne po poisyetap katabaanet. 23Eng' ateruut ole mi magatiinik che ma kinde mermereek, inemu; magatyat agenge komugul, magatyat ne ming'in ne kagiilee mwaita ak magatyat agenge ne terter ne mi taitap Kamuktaindet ne Toroor. 24Yeityo inde chooto tugul eunegap Aron ak eunegap weeriikyik ak iongoi inyee koek kagoochinet ne kiruuri eng' taitap Kamuktaindet ne Toroor. 25Icheru tuguuchooto eng' eunekwak ak ibeel eng' kaptisisyet eng' paragutap kagoochinet ne kibeelei, koek nyamdutyet ne anyiny eng' taitap Kamuktaindet ne Toroor. Niito ko kagoochinet ne kigoochin Kamuktaindet ne Toroor kobunei maat.

26“Iip tagateet ne po mengitap poisyet ne po katabaanet ne po Aron, ak iongoi koek kagoochinet ne kiongoi eng' taitap Kamuktaindet ne Toroor si koek nooto kebebertang'ung'. 27Itabaan tagateet ne po kagoochinet ne kiongoi ak kubesto ne po kagoochinet ne kinamjin parak, ne kiongoi ak ne kinamjin parak che po mengoto po poisyetap katabaanet agobo Aron ak weeriikyik. 28Punjin chooto Aron ak weeriikyik koek ng'atuutyet ne po agoi eng' piigap Israel, amu niito kebebertap kagoochinet ne kagitabaan, ak koek nooto kagoochinet ne kinamjin parak ne punu lagogap Israel eng' tiseiywegap kagoochinoikwak che po kaalyeet. Niito anyun ko kagoochinennywa ne kagitabaanji Kamuktaindet ne Toroor.

29“Tuun punjin weeriikyik ngoroichooto itabaanatiin che po Aron, ilaachi icheek si ki ili kitoroorchin poisyonooto tiliil. 30Ilaachi ngoroichooto peetuusyek tisap, weerooto tuun namjin Aron tisiisyet ye mandoi emait ne kituiyechin si koboisyei eng' ole-tiliil.

31“Nam mengit ne po poisyetap katabaanet si iyo panyeekyik eng' ole ki kitiliil, 32ak koam Aron ak weeriikyik panyeegap mengoto ak magatiinik che mi ateruut eng' kurgeetap emait ne kituiyechin. 33Amei icheegei tuguuchooto che kiyae kagaigaet, ak kinde poisyetap tiliilindo, ak kitabaan icheek. Ago amat koam toondet amu tiliileen tuguuchooto. 34Ngo ng'et panyeek che po nooto ki kitabaanji poisyetap katabaanet anan eng' magatiinik, ak ngo tebi kot koeech, ibeel anyun eng' ma tugul che kong'et; amat keam amu tiliileen.

35“Yachi Aron anyun ak weeriikyik ko uu tugul che kang'atiin. Inde icheek poisyonooto tiliil eng' peetuusyek tisap. 36Igoitoi inyee peetuut age tugul kirgit ne neran ne po kagoochinet ne po tengekto kobunji kagaigaet. Ianyinyi kaptisisyet ye iyachini kagaigaet agobo ineendet. Yeityo iil ianyiny. 37Iyae kagaigaet agobo kaptisisyet eng' peetuusyek tisap ak itiliil. Si kotiliilit kaptisisyet miising', ak kanyool kotiliilit kiy age tugul ne twaei kaptisisyet.

Kogoochinoigap kotugul.

38“Chu che igoitoi eng' kaptisiisyo; igoitoi peetuut age tugul aarek aeng' che mengichik che po keechiir che ma siirei kenyiit agenge koek kiit ne po agoi. 39Igoite aarwet age karon ak igoite aarwet ne po aeng' koskoleny. 40Itesyini aarwet age keruutyet agenge ne po peek che ng'ootiin che tambulul che kagiburukto litait agenge ne po mwaita ne pitunee tuisyet, ak litait agenge ne po divaik koek kagoochinet ne kirong'u. 41Igoite aarwet age koskoleny ak iyachi ko uu kagoochinetap peek ni kabo karon ak ko uu kagoochinennyi ne kirong'u, koek nyamdutyet ne anyiny, kagoochinet ne kigoochin Kamuktaindet ne Toroor ne punei maat. 42Egu nooto kagoochinet ne kibeelei ne po kotugul eng' ibinwekwok tugul eng' kurgeetap emait ne kituiyechin eng' taitap Kamuktaindet ne Toroor, eng' ole kituiyechini ak inyee si ang'alaalun eng' olooto. 43Kituiyechini yooto ak piigap Israel ak itiliili toroornatennyu yooto. 44Atiliilii emait ne kituiyechin ak kaptisisyet. Atabaani Aron ak weeriikyik ak icheek si koboisyeiwo eng' tisiisyet. 45Amenye kwenutap piigap Israel ak aegu Kamuktaindennywa. 46Ak konai icheek kole aa Kamuktaindet ne Toroor Kamuktaindennywa ne ki among'u eng' emetap Misiri, si kobiit ameny kwenunnywa. Aa Kamuktaindet ne Toroor Kamuktaindennywa.

30

Kaptisisyetap Nyamdutik che kibeelei

301“Iyae anyun kaptisisyet ole kibeelee nyamdutik iyae keetiigap chebitoik. 2Ingoek koindonyi ak tebeesindanyi sendimita artam ak muut. Aechindos koindo ak tebeesindo. Koindap tononennyi ko egu sendimita tamanwogik sogool. Namegei kapkorosuut ak kuinoikyik koegu kiit agenge. 3Iliige thahabu che tiliileen paragunnyi ak komoswekyik tugul ak kuinoikyik. Yeityo itaany tegeleiywotap thahabu iyieme. 4Itaany peteinik aeng' che po thahabu ak inde tuguuchooto koobeesyo tegeleiywot keel eng' tegeet ne po komosi ak ne po komosin, iyachi komoswek tuwai si koek ole kiroochi keetiik che ki ibe. 5Yae keetichooto ki ibe keetiigap chebitoik ak iliige thahabu. 6Indoi kaptisisyonooto taitap angeet ne ioitos koot, ye neegitee moingetap paornateet ne miitei taitap kerwet ne po rireenet ne mi paragutap paornateet ole kituiyechini ak inyee. 7Peelei Aron nyamdutik che po tuguuk che ng'uu ne anyiny eng' olooto eng' karonet age tugul ye chobei taisyek, 8ak peelei ineendet ye inaami taisyek koskoleny, koek nyamdutyet ne kibeelei eng' taitap Kamuktaindet ne Toroor eng' ibinwekwok tugul. 9Amobeele olooto nyamdutik che teer anan tiseiywek che kibeelei anan che po peek. Amoroong'ji yooto kagoochinoik alak tugul che kiee. 10Ingoyai Aron kagaigaet eng' kuinoigap kaptisisyonooto konyil agenge eng' kenyiit age tugul. Yaei kagaigaet eng' korotiigap kagoochinetap tengekto ne po kagaigaet konyil agenge eng' kenyiit age tugul eng' ibinwekwok tugul. Nooto ne tiliil miising' eng' taitap Kamuktaindet ne Toroor.”

11Ki ng'alaalji `Kamuktaindet ne Toroor Musa koleenji, 12“Ye iit piigap Israel ko uu eng' koiitennywa, ko eng' yooto anyun kogoochi chii tugul `Kamuktaindet ne Toroor kiit ne ityage saboondanyi si ma piit koroito eng' kwenunnywa ye iiti icheek. 13

30.13:
Kom 38.25-26; Mat 17.24
Chu che koonu icheek: koonu chii age tugul kebebertap chepkondok ko uu chepkondogap ole-tiliil, ye siirtoi kowendi ole mi che kagiit. Egu kebebertap fedhaisyechooto kagoochinet ne punjin Kamuktaindet ne Toroor. 14Igoochin chii age tugul Kamuktaindet ne Toroor kagoochinet, ne siirtoi kowendi ole mi che kagiit, che po kenyiisyek tiptem ak che siirei chooto. 15Ingogon che kergei mogoryot kibananiat, koonu tugul kebebertap chepkondok, ye igoochin Kamuktaindet ne Toroor kagoochinet si oyai kagaigaet ne po saboonwekwok. 16Taach fedha che po kagaigaet eng' piigap Israel ak igoite kobunji poisyetap emaitap tuiyet. Si koek nooto kabwaatet agobo piigap Israel eng' taitap Kamuktaindet ne Toroor si koyai kagaigaet agobo saboonwekwok.”

17Ki ng'alaalji `Kamuktaindet ne Toroor Musa koleenji, 18

30.18:
Kom 38.8
“Yai karait agine ne po sugunwet ak iyae sugunwet ng'echerennyi si kiuunse. Inde kwenutap Emait ne kituiyechin ak kaptisisyet ak iroong'ji peek. 19Si koune Aron ak weeriikyik eunekwak ak keelyekwak. 20Iunegei icheek ye mandoi emait ne kituiyechin si ma pek anan ye riikyin kaptisisyet si kobois ye peelei kagoochinet ne kigoochin Kamuktaindet ne Toroor kobunei maat. 21Iuni anyun eunekwak ak keelyekwak si ma pek, ak koek ng'atuutyet ne po agoi eng' icheek, eng' ineendet ak eng' iyotennyi eng' ibinwekwak tugul.”

22

30.22-38:
Kom 37.29
Ki ng'alaalji `Kamuktaindet ne Toroor Musa kogeny koleenji, 23“Inemunote tuguuk che myachen kosiir, tuguuk che uu igomoik, keruutik lo ne po kumyat, keruutik somok ne po kinamon che anyiny, keruutik somok ne po kalamus che anyiny, 24ak keruutik lo che po kasia, ko uu che po ole-tiliil ak litaisyek ang'wan ne po mwaitap mseituni. 25Yeityo ichop tuguuchooto koburugogis koek mwaita ne tiliil ne ki iilse ne ng'uu ne anyiny ne poisyetap ng'amotyot ne puruchi tuguuk che ng'uu ne anyiny. Egu mwaita ne tiliil ne ki iilse. 26Iil emait ne kituiyechin eng' mwaita ak moinget ne po paornateet, 27ak meset ak tuguukyik tugul, keldap tait ak tuguukyik, kaptisisyet ne kibeelee nyamdutik, 28ak kaptisisyet ne kibeelee tiseiywot ak tuguukyik tugul ak taabeet ak kelunnyi. 29Itabaan anyun tuguuchooto si kotiliiliitu miising', ak kanyool kotiliilit age tugul ne twaei tuguuchooto. 30Iil Aron ak weeriikyik, ianyiny, si koboisyeiwo eng' tisiisyet. 31Ak ing'alaalji piigap Israel ileenji, ‘Egu mwai eng' anee ne tiliil ne ki ilse eng' ibinwekwok tugul. 32Ma kiroong'jin poortap chii age tugul mwai, amoyai mwai age ne uu niito. Amu tiliil niito ak egu ne tiliil eng' okweek. 33Chii age tugul ne puruchi mwai age tugul koigei niito anan chii age tugul ne iilee mwaiita toondet, king'etoi chiichooto eng' piikyik.’ ”

34Ki leenji `Kamuktaindet ne Toroor Musa, “Inemunote tuguuk che ng'uu ne anyiny, natab, shekelet, kelbena; tuguuk che ng'uu ne anyiny kobooto tuguuk che nyamdut che tiliileen: ingoaechin tugul eng' karagendoet agenge. 35Iyae eng' chooto nyamdutik, tuguuk che ng'uu ne anyiny, ne poisyetap ng'omnateet ne puruchi tuguuk che ng'uu ne anyiny che kitestoi muunyuk che tiliileen che ki kitabaan. 36Yeityo itui alak eng' chooto komengegitu ak inde chooto taitap paornateet eng' emait ne kituiyechin, ole kituiyechini ak inyee. Egu ne tiliil miising' eng' okweek. 37Amat oyachigei nyamdutik alak tugul che kergei ak chuuto. Egu ne tiliil eng' inyee ne po Kamuktaindet ne Toroor. 38Ngo yai chii age tugul alak che uu chooto kole kogas ng'uunennyi, king'etoi chiichooto eng' piikyik.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]