Revised Kalenjin Bible (KAPR)
36

Tuguuk che mi koot

361Ingobois anyun Bezalel, Aholiab ak chii age tugul ne tinyei naet ne nin, ne ki igoochi `Kamuktaindet ne Toroor naet ne nin ak kaguiyet, si kobiit konai koyai poisyet tugul ne po ole-tiliil ko uu tugul che kiga ng'at Kamuktaindet ne Toroor.

2Ki kuur `Musa Bezalel, Aholiab ak chii age tugul ne tinyei kaguiyet, ne kiga kogoochi Kamuktaindet ne Toroor ng'omnateet, agot age tugul ne ki ichirchi muguleldanyi koyai poisyonooto. 3Kitaach icheek kagoochinoik tugul eng' Musa che kiga koip piigap Israel keyae poisyetap ole-tiliil. Ki ipchi kogeny karonet age tugul kagoochinoik alak che po chamyet. 4Ara ki pwa anyun piik tugul che ng'oomen nyoo koyai poisyet tugul ne po ole-tiliil. 5Ki ng'alaalji `icheek Musa koleenji, “Ko koip piik tuguuk che siirei che kimachei eng' poisyet ne ki ng'at Kamuktaindet ne Toroor keyai.” 6Ki ng'at Musa anyun kemwaitaat eng' nganaseet komugul keele, “Amata koip chii age tugul, mureno anan kobogoryo, kiy age tugul ne kagoochinetap ole-tiliil.” Ara ki kieetee anyun piik si mata koip kogeny, 7amu kiga koyam keyae poisyonooto tuguuk che kiga keip kot kosiirto.

8Ki yai chii age tugul ne ng'oom eng' icheek che poisyei, koot, koyae angook taman che po katanit ne karaaran, ne ki kila, ak che buluu, kobooto che arusen ne piriir ak che piriireen, konapchi angook kerubisyek, ne poisyetap nabiindet ne nabei kondai lelesta. 9Ki mitainik taman ak aeng' kooindap angeet age tugul ak mitainik aeng' tebeesindap angeet age tugul. Ki aechin angoochooto tugul.

10Kiropchindos angook muut ak kiropchindos chuun alak muut ak icheek, ko uu nooto. 11Kinapchi ineendet pelelutik che buluu eng' tabandap angeet age eng' ole kurmanat, eng' ye tuiyechin. Ki yachi ko uu nooto eng' tabandap angeet ne po aeng', ne tabanu parak eng' ole ki kituiye ne po aeng'. 12Kinapchi angeet age pelelutik konom, ak kinapchi pelelutik konom eng' tabandap angeet ne po aeng', eng' ole ki kituiye ne po aeng', tabandap angeet ne po aeng', ago kitokyindos pelelutik. 13Yeityo koyai kariik konom che po thahabu che kiname angook, si kotuiyo angoochooto aeng' asi koek agenge anyun emaitap Kamuktaindet.

14Yeityo koyai angook taman ak agenge koyae koroorigap ng'oroorek koek emait ne tuge emaitap Kamuktaindet. 15Ki mitainik taman ak somok kooindap angeet age tugul, ak tebeesindo ko ki mitainik aeng'; ki aechin angoochooto tugul tamanu ak agenge. 16Ki ituiyo angook muut koek agenge icheegei ak ki ituiyo angook lo kogeny koek agenge icheegei. 17Kinapchi pelelutik konom tabandap angeet age ne tabanu parak, eng' ole ki kituiye, ak kinapchi pelelutik konom tabandap angeet eng' ole ki kituiye ne po aeng'. 18Ki itaany kariik che kiname angook konom che po sugunonik che ituiye emait koek agenge. 19Yeityo konap magatogap mengichik che ki kisal kobiriritu, si ketuge emait ak konap magatok che po mengichigap peek kotabon parak.

20Ki yai pagoinik che tonondos che po keetiigap chebitoik kobunji emaitap Kamuktaindet. 21Koindap pagoiyot age tugul ko ki mitainik ang'wan, ak ki ek tebeesindap pagoiyot age tugul sendimita tamanwogik lo. 22Ki tinyei pagoiyot age tugul ng'elyebwek aeng' che ki tuiyo. Ki yai ko uu nooto pagoinik tugul che po koot. 23Ki yai pagoinik che po koot, ak konde chooto tiptem kotabon murot tai. 24Kibarbar fedha kosikyi kong'iik artam, si kotabon kapkelyenutap pagoinichooto tiptem; chutei ng'elyebwek aeng'u che po pagoiyot agenge, kong'iik aeng' che mi kapkelyen. Chutei ko uu nooto ng'elyebwek aeng'u che po pagoiyot age, kong'iik aeng' che mi kapkelyen. 25Eng' komosta age ne po aeng' ne po emaitap Kamuktaindet, ne tokyingei murot kaataam, kondai pagoinik tiptem, 26ak kong'ichooto artam che po fedha, kong'iik aeng' eng' kapkelyenutap pagoiyot age. 27Ki yai anyun pagoinik lo kobunji emaitap Kamuktaindet patai, ole tokyingei cherongo. 28Ki yai kogeny pagoinik aeng' kobunji luukwek che po koot che mi patai. 29Ki kitwakyin aeng' kobooch ng'wony agoi parak, ak kituiye tugul peteiyot. Ki yachi ko uu nooto pagoinichooto tuwai che po luukwek aeng'. 30Ki mi pagoinik sisiitu, ak kong'iikwak che po fedha, taman ak lo; kong'iik aeng' eng' kapkelyenutap pagoiyot age tugul.

31Ki yai keetiigap chebitoik koek rateiywek; ki yai pagoinik muut che po komosta agenge ne po koot, 32ak rateiywek muut che po pagoinik che po komosta age ne po koot, ak rateiywek muut che po pagoinik che po komosta age ne po koot, ne mi patai, ole tokyingei cherongo. 33Ki yai rateiywotap kween kwo kong'etee taban agoi taban, eng' kwenutap pagoinik chuun alak. 34Ki iliige thahabu pagoinik, ak ki yai peteinikwak che po thahabu koek chooto ole kiroochi rateiywek. Ki ilige kora rateiywechooto thahabu.

35Ki yai angeet ne kioiye koot eng' ne buluu, ak ne aruus ne piriir, ne piriir ak eng' katanit ne karaaran ne ki kileet. Ki yai anganooto kobooto kerubisyek che poisyetap laindet ne ng'oom. 36Ki yachi angoonochooto lumeiywek ang'wan che po chebitoik ak koliige thahabu. Ki po thahabu ireusyekwak; ak ki itang'ji kong'iik ang'wan che po fedha che ki kibarbar. 37Kinap angeet ne po kurgeetap Emait, ne po ne buluu, ne aruus ne piriir, ne piriir ak ne po katanit ne karaaran ne ki kileet, poisyetap chiito ne nabei kondai lelesta, 38ak lumeiywekwak muut ak ireusyekwak. Ki iliige thahabu metowegap lumeiywek, kobooto rateiywekwak che kituiye, ak kong'iikwak muut ko ki po sugunonik.

37

Moing'etap kayomiset.

(Kom 25:10-22)

371Ki yai Bezalel moinget eng' keetiigap chebitoik, ne ki mitainik pogol ak taman koindonyi, mitainik tamanwogik lo ak lo tebeesindanyi ak mitainik tamanwogik lo ak lo tononennyi. 2Ki iliige thahabu che tiliileen oriit ak saang' ak kitegele tegeleiywotap thahabu koyieme paragunnyi tugul. 3Ki itang'ji peteinik ang'wan che po thahabu luukwekwak ang'wan. Ki inde aeng' komosta age ak aeng' eng' komosta age. 4Ki yai keetiik che ki ibe che po chebitoik ak koliige thahabu. 5Ki irooch keetichooto peteinik che miitei tabanwegap moinget, si keibe. 6Ki yai kerwetap rireenet eng' thahabu che tiliileen. Koindonyi kogi sendimita pogol ak taman ak tebeesindanyi kogi sendimita tamanwogik lo ak lo. 7Yeityo koyai kerubisyek aeng' eng' thahabu che kitaanyi, eng' tabanwek aeng' che po kerwetap rireenet. 8Ki tebee kerubit age komosi, kotebee age komosin. Inaamdos kerwetap rireenet ak kerubisyek eng' tabanwekyik tuwai. 9Kiiito kerubisyek kebebaikwak koba parak, kotuch kerwetap rireenet eng' kebebaikwak, ak kotoorchin togoochikwak, ing'ururi togoochigap kerubisyechooto kerwetap rireenet.

Meseetap magatiinik che itabaanatiin

10Ki yai meset eng' keetiigap chebitoik, ne koindonyi ko ki mitainik tamanwogik sisiit ak tebeesindanyi ko ki mitainik artam ak ang'wan. Tononennyi ko ki mitainik tamanwogik lo ak lo. 11Ki iliige thahabu che tiliileen ak ki yachi tegeleiywotap thahabu kotegele, koyieme paragunnyi tugul. 12Ki yachi tegeleiywot ne yamei mitainik tamanwogik tisap ak muut tebeesindanyi koyiem kioto ak ki yai tegeleiywotap thahabu koyieme tabanwekyik tugul. 13Ki itang'ji peteinik ang'wan che po thahabu ak ki inde peteinichooto luukwek ang'wan eng' komoswegap keelyekyik ang'wan. 14Ki mi peteinichooto ole neegitee tegeleiywot, ole chutei keetiik che keibe meset. 15Ki yai keetichooto eng' keetiigap chebitoik ak koliige thahabu, si keibe meset. 16Ki yai kora eng' thahabu che tiliileen tuguuk che ki mi meset parak, taabookyik, kechigosyekyik ak tageiywekyik ak kigombokyik che kiroong'jine tuguuk.

17Ki itaany kogeny tait eng' thahabu che tiliileen. Kiyae keloto po tait thahabu che kitaanyi, kelunnyi ak toloitanyi. Kigombokyik, mulonokyik ak taaptokyik, koginamdos chooto tugul ko kiit agenge. 18Kisage mooriik lo toloita nooto, kosage mooriik somogu komostanyi age ne po keloto, ak kosage mooriik somogu ko uu nooto komostanin age. 19Ki tinyei temeet agenge kigombok somok che ki kiyai koigei taaptook che kiguure almond, ak mulwet ak taapteet. Ki tinyei ko uu nooto temeet age ne po komosta age kigombok somok che ki kiyai koigei taptochooto kiguure almond, ak mulwet ak taapteet: ko uu nooto eng' mooriik tugul lo che sachei eng' kioto. 20Ki miitei ole po toloita ineendet kigombok ang'wanu che ki kiyai kogergeit ak taaptogap almond, kobooto mulonokyik ak taaptokyik. 21Eng' komaswechooto tugul lo ye kigasage mooriik aeng'u, ko ki mi keel mulwet, ne ki kituiye koek kiy agenge. 22Ki namgei mulonokwak ak mooriikwak, koek kiy agenge ak ki kitang'e kioto komugul thahabu che tiliileen. 23Ki yai taisyekyik koek tisap koyae thahabu che tiliileen, kobooto kanameiywondennyi ak taabookyik che mengeechen. 24Ki yai kioto eng' thahabu che yamei keruutik sosom ak muut kobooto tuguukyik tugul.

25Ki yai kapkorosuut ole kibeelee nyamdutik koyae keetiigap chebitoik. Ki mitainik artam ak muut koindonyi ak ki mitainik artam ak muut tebeesindanyi, ak ki mitainik tamanwogik sogool tononennyi. Kiga namgei kapkorosuut ak kuinoikyik koek kiy agenge. 26Ki iliige thahabu che tiliileen, paragunnyi ak komoswekyik tugul kotuiyo ak kuinoikyik, yeityo kotany tegeleiywotap thahabu koyieme. 27Ki itaany peteinik aeng' che po thahabu ak ki inde tuguuchooto kotabon tegeleiywot keel eng' tegeet, eng' komoswekyik tuwai, si kobiit kirooch keetiik che ki ibe, 28Ki yai keetiik che ki ibe, eng' keetiigap chebitoik ak koliige thahabu. 29

37.29:
Kom 30.22-38
Ki chop mwaita ne tiliil ne ki ilse, ak nyamdutik che tiliileen che kibeelei che po tuguuchooto anyinyen che ng'uu ne anyiny, ne poisyetap ng'amotyot ne puruchi tuguuk che ng'uu ne karaaran.

38

Kaptisisyet ole kibeelee tiseiywek.

381Ki yai kaptisisyet ole kibeelee tiseiywot eng' keetiigap chebitoik. Ki achin koindonyi ak tebeesindannyi ko mitainik aeng' ak robo eng' mitainik aeng' ak robo ak tononennyi kogimitait agenge ak robo. 2Ki yai kosikyi kuinoik eng' luukwekyik ang'wan, ki kitaany kuinoikyik konamgei ak kioto, ak ki iliige sugunwet. 3Ki itaany tuguuk tugul che po kaptisisyet, tereenik, kechigok che eecheen, taabook che mengeechen, kariik che kirutunee panyeek ak taabook che ki ibe maat. Ki itaany tuguukyik tugul eng' sugunwet. 4Ki yachi kaptisyet sugunonik che kiregeri, eng' kapkelyenutap mireiywot ne yiemei kaptisisyet keel, si komuurmuur kioto. 5Ki itang'ji peteinik ang'wan luukwek ang'wan che po kioto po sugunwet ne ki kireger, si kirooch keetiik che ki ibe. 6Ki yai keetichooto eng' chebitoik ak koliige sugunwet. 7Ki irooch keetichooto peteinik oriit che mi komoswegap kaptisisyet si kobiit ketandane. Ki yai kioto koek moinget oriit.

8

38.8:
Kom 30.18
Ki itaany taabeet ne po sugunwet, ak kiyae sugunwet ng'echerennyi ne tebee, kobun kioisyek che ki keeregei kwonyiik che kiboisyei eng' kurgeetap emait ne kituiyechin.

9Ne rubei, ko ki yai seremut ne ng'ootaat ne ki po katanit ne karaaran ne ki kileet. Angook che tabanu murot tai ko ki mitainik artam ak ang'wan koindo, 10ki tiptem lumeiywekwak ak ki tiptem kong'iikwak che po sugunonik che tononie. Ki po fedha ireusyegap lumeiywek kobooto rateiywekwak che kituiye. 11Ki mi angook murot kaataam che yamei mitainik artam ak ang'wan ak lumeiywekwak tiptem ak kong'iikwak che tononie tiptem che po sugunonik. Ki po fedha ireusyek che po lumeiywek kobooto rateiywekwak che kituiye. 12Eng' komosta ne tokyingei cherongo, ko ki mi angook che yamei mitainik tiptem ak aeng', lumeiywekwak taman ak kong'iikwak che tononie taman. Ki po fedha ireusyegap lumeiywek kobooto rateiywekwak che kituiye. 13Kitabanu komostap kong'asiis angook che yamei mitainik tiptem ak aeng'. 14Ki mitainik lo ak kebeberyat angook che po kurgeet komosta age ak ki tinyei lumeiywekwak somok, ak kong'iikwak somok, 15ak ki iliige nooto komosta ne po aeng'. Ki mi kurgeet ne po seremut komosi ak komosi angook che yamei mitainik lo ak kebeberyat, lumeiywekwak somok ak kong'iikwak somok. 16Angook tugul che kiyiemei seremut ko ki po katanit ne karaaran ne ki kileet. 17Ki po sugung'iik che kitononie lumeiywek, ak ki po fedha ireusyek che po lumeiywek kobooto rateiywekwak che kituiye. Ki tuge fedha metowegap lumeiywechooto. Rateiywek che ki kituiyote lumeiywek tugul che po seremut ko ki po fedha. 18Ki nap nabiindet konde lelesta angeet ne po kurgeetap seremunooto ng'ootaat eng' che buluu, eng' che arusen ne piriir, eng' che piriireen ak eng' katanit ne karaaran ne ki kileet. Ki ek koindonyi mitainik sogool ak ki po mitainik aeng' tononennyi ak tebeesindanyi ko uu angoogap seremut. 19Ki po sugunonik lumeiywekwak ang'wanu ak kong'iikwak ang'wan che tononie. Ki po fedha ireusyekwak ak ki kituge fedha metowegap lumeiywekwak ak rateiywekwak che kiga kituiyote. 20Ki po sugunonik tigongenik tugul che po emaitap Kamuktaindet ak tigongenik tugul che yiemei seremut.

21Koitetap tuguuk che po emaitap Kamuktaindet anyun chu, agot kootap paornateet ko uu ye ki kiit ko uu ng'atuutyetap Musa, kobunji poisyetap Lawiik eng' eutap Ithamar, weeriitap Aron tisiindet. 22Ak ki yai Bezalel, weeriitap Uri, weeriitap Hur, ne po ooreetap Judah tuguuk tugul che ki ng'at `Kamuktaindet ne Toroor Musa. 23Ki mi ak ineendet Aholiab weeriitap Aisamak, ne po ooreetap Dan, musogindet, laindet ne ng'oom, ak ko nabiindet ne nabei koindoi lelesta, eng' che buluu, eng' che arusen ne piriir, eng' che piriireen ak eng' katanit ne karaaran.

24Ki ek thahabu tugul che ki kiboisyee eng' poisyet tugul ne po ole-tiliil, agot thahabu che po kagoochinet, keruutik pogol sisiit ak tamanwogik tisap ak tisap ak kramuisyek pogol somok, chooto ko uu eng' kereetap tuguugap ole-tiliil. 25

38.25-26:
Kom 30.11-16
Fedhaisyegap icheeget che ki kiit che po tuiyet, ko ki yamei keruutik eliphuusyek somok ak taman ak tisap ak kramuisyek pogol tisap ak konom, chooto ko uu eng' kereetap tuguugap ole-tiliil. 26
38.26:
Mat 17.24
Ki kon chii tugul beka38:26 Beka: ko aechin ak kramuisyek muut ak kebeberyat., ko uu kereetap tuguugap ole-tiliil, eng' chii age tugul ne ki siirtoi kowendi ole mi che kagiit eng' murenik tugul, che po kenyiisyek tiptem ak koba tai; murenik eliphuusyek pogol lo ak somok ak pogol muut ak konom. 27Keruutik eliphuusyek somok che po fedha ko ki kitaanyi kobwa kong'iik che uu kelongonik che po ole-tiliil ak kong'iik pogol che tononie lumeiywegap angeet ne ki kioiye koot, yamegei konda agenge ak keruutik sosom. 28Ki itaany keruutik taman ak tisap ak kramuisyek tamanwogik tisap ak muut koek ireusyek che po lumeiywek ak kotuge fedha metowekwak ak koyachi rateiywek che ki kituiyote. 29Kiyamei keruutik eliphuusyek aeng' pogol agenge ak tiptem ak ang'wan che po sugunwet ne po kagoochinet. 30Ki itaany chuuto Bezalel koek kong'iik che po kurgeet che tononie lumeiywegap emait ne kituiyechin, kaptisisyet ne ki kitang'e sugunwet, karnennyi ne ki kireger eng' sugunonik, tuguuk tugul che po kaptisisyet, 31kong'iik che tononie lumeiywegap seremut, tigongenik tugul che po koot ak tigongenik tugul che yiemei seremut.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]