Revised Kalenjin Bible (KAPR)
15

Kalewenet ne po keetitap sabibuk

151Ki nyoonjo ng'olyootap Kamuktaindet ne Toroor koleenjo, 2Ee weeriitap chii, siirei eng' nee keetitap sabibuk keetit age tugul, anan temetap keetitap sabibuk ne mi kwenutap keetiigap timiin? 3Tos kiebei keetoto si kobiit keyae poisyo? Anan tos yae piik keetoto ireut si kigartate kiy age tugul? 4Ogeero, ki wiirchin ma koek kweenik: peelei maat tabanwek tuwai kobooto kwenut; tos tinyei keluno eng' poisyo age tugul? 5Ogeero, ye ki tomo keep, ko ki ma kotinyei poisyo: kotam nee anyun ye kagogas maat ye kagolal, tos ta kotinyei poisyo age tugul? 6Mwaei anyun Kiptaiyat Kamuktaindet ne Toroor kole: Ko uu keetitap sabibuk ne mi kwenutap keetiigap timiin, ne ki ande ma koek kweenik, agoitoi ko uu nooto piik che menyei Jerusalem. 7Ak auuiit togeennyu aborye icheek; mandoe maat, ago peelei maat icheek; si onai ole aa Kamuktaindet ne Toroor, ye auuiit togeennyu aborye icheek. 8Ak ayai emet koguber, amu ki kobistoe, mwaei Kiptaiyat Kamuktaindet ne Toroor.

16

Nganaseetap Jerusalem ne ma po iman

161Ki nyoonjo kogeny ng'olyootap Kamuktaindet ne Toroor, koleenjo, 2Ee weeriitap chii, iboorchi Jerusalem konai tuguukyik che kiwechei, 3ak ileenji, mwachin Kiptaiyat Kamuktaindet ne Toroor Jerusalem kole: Sigeng'ung', ak ole ki kisikyinin ko po emetap kanaanindet: ki kwandang'ung' Amorindet, ak ki kamenng'ung' Hitindet. 4Ki ma kotil mugeng'ung' eng' ole ki kisikyinin, eng' peetuut ne ki kisichin, ama kiuunin si itiliiliitu; ma ki ilenen muunyuk, ama kinamden ngor. 5Ma rireenen chii, koyaun kiy age tugul eng' tuguuchuuto, koriir moo; ago ki kiwiirchin timiin, amu ki kiwechin, eng' peetuut ne ki kisichin.

6Ak kinga siir ye ki imi, ageerin ikwarkwarane korotiguk, aleenjin, Agot nganda imi korotiguk, isap inyee; ee, ki aleenjin, Agot nganda imi korotiguk, isap inyee. 7Ki agoonin itesage ko uu ye ing'atos tuguugap mbar, ak ki itesage ieetu, ak ki igararanitu miising'; kigogun kinaiguk, ak kigogoeegitu suumeeguk; ago ki imi puch aach ngor.

8Ak kinga pun ye imi, ageerin, keero, peetuusyeguk ko ki po peetuusyegap chamyet; ak ki atugunen ngoryennyu ak atuch aach ngoryeeng'ung': ee, ki ayosyeun, ak ki koyomiske ak inyee, mwaei Kiptaiyat Kamuktaindet ne Toroor, ak ki ibunjo.

9Ki aunin anyun; ee, ki aunde miising' korotiguk, ak ki aiiliin. 10Ki alaagun ngoroik che ki kinde lelesta, ak ki alaagun kweonigap mengichigap peek, ak ki auenen katanit ne karaaran, ak atugenen aririt. 11Ki alelesanunenen kogeny tuguuk che po lelesta, ak ki alaagun kariigap eunek ak sirimdo ne po kaating'ung'. 12Ak ki ande peteiyot serung'ung', ak ki ande munaok itiiguk, ak alaagun naaryeet ne karaaran. 13Ki kilelesonun anyun eng' thahabu ak fedha; ak ki po katanit ne karaaran ngoroiguk, ak aririt, ak ngoroik che ki kinde lelesta; ki iam peek che ng'ootiin che tambulul, ak kumyat, ak mwanik: ak ki igararanitu kot, ak ki kiberuurin kot inyooru atebeetap laitornatet. 14Ak ki yom pororyosyek kalasunetap karaaranindang'ung'; amu ki igeesunotkei karaaraninooto, amu eetunatennyu ne kiga alaagun, mwaei Kiptaiyat Kamuktaindet ne Toroor.

15Ago kiitiegei karaaranindang'ung', ak iyai kugoinatet amu kalasuneng'ung', ak ki oipkei ak age tugul ne siirtoi; ki punji ineendet. 16Ak ki ip ngoroiguk ak iyachigei komoswek che torooreen che ki ilelesane saleiywek che teerchiin, ak iyae chooto kugoinatet: ma kobiitu tuguuk che uu chooto, ama ko yaaksei ko uu nooto. 17Ki ip kogeny sonoeguk che korooron che po thahabusyekyuk ak fedhaisyekyuk, che kiga agoonin ak iyachinegei itoonwegap murenik, ak oyai kugoinatet ak tuguuchooto; 18ak ki ip ngoroiguk che ki kinde lelesta, ak ituge tuguuchooto, ak ki inde tainnywa mwanikyuk ak nyamdutikyuk che kibeelei. 19Ki inde tainnywa kogeny amitwogikyuk che ki agoonin, peek che ng'ootiin che tambulul, ak mwanik, ak kumyat, che ki abaenen, ki inde tainnywa koek nyamdutyet, ak ki tebi ko uu nooto; mwaei Kiptaiyat Kamuktaindet ne Toroor.

20Ki inam kogeny weeriiguk ak tiibiiguk, che ki isikwa, ak ieng'ji icheek si kobiit koam. Tos ki kiit ne ming'in kugoinatosyeguk, 21kot ibar lagokyuk ak igoite kobun maat igoochini icheek? 22Ama ibwaat eng' tuguuguk tugul che kiwechei, ak eng' kugoinatosyeguk, peetuusyegap ming'inateng'ung', ye ki imi puch aach ngor, ak ki ikwarkwarane korotiguk.

23Ak kingo pata yaitwogiguk tugul, (Pwo! Pwo! Inyee! Mwaei Kiptaiyat Kamuktaindet ne Toroor,) 24iteekyigei ole tagunoot ak iyachigei ole kitororit eng' ooreet age tugul. 25Ki iteech oldang'ung' ole kitororit eng' tabandap ooreet age tugul, ak iyai karaaranindang'ung' koek kiit ne kiwechei, ak oipkei ak age tugul ne siirtoi, ak ites kugoinateng'ung'. 26Ki iyai kogeny kugoinatet kobooto Misiriik, piigap kokweng'ung', piigap poorto; ak ki ites kugoinateng'ung', itacha. 27Keer anyun, kaachuul eunnyu atokyin, ak atil amitwogiguk che po kotugul, ak agoiten koyaun kiy age tugul icheek che wechin, tiibiigap Philistiik, che ililandos amu ortinweguk che yaach.

28Ki iyai kogeny kugoinatet kobooto Asurik, amu ki ma koyamin kiy; ee ki iyai kugoinatet kobooto icheek, ago ma yamin kora. 29Ki ites kugoinateng'ung' eng' emetap Kanaan, agoi Kaldea; ago ma yamin kora.

30Nyalulat ne tya muguleldang'ung', mwaei Kiptaiyat Kamuktaindet ne Toroor, amu iyae tuguuchuuto tugul, poisyetap chepkugoniot ne pou piik; 31amu iteeche oldang'ung' ole tagunoot, ak iyachigei oldang'ung' ole kitororit eng' ooreet age tugul; ama iige chepkugoniot, amu isase alisyet. 32Osotyot ne yaei ibeetapkei! Ne ibegei ak toek kometo manong'otyondennyi! 33Igoochin pichooto chepkugonik tugul asoya: ago igoochini inyeendet tuguuguk che po kagaigaet chamaniguk tugul, ak igaigae icheek tuguuchooto, si kobiit kobwonjin eng' komosta age tugul agobo kugoinatosyeguk. 34Ak oterchine ak kwonyiik alak eng' kugoinatosyeguk, amu ma mi chii ne suubin oipkei: ialisyei, ak amu ma ki alin, ii teer amu nooto.

Kirwookyin Jerusalem

35Kas anyun, ee chepkugoniondoni, ng'olyootap Kamuktaindet ne Toroor: 36Mwaei Kiptaiyat Kamuktaindet ne Toroor kole amu ki kirong' simdang'ung', ak keng'aanyin kegeerin imi aach ngor eng' kugoinatosyeguk che ki iyai ak chamaniguk; ak amu kanamonik tugul che po tuguuguk che kiwechei, ak agobo korotiigap lagoguk che ki igoochi icheek; 37nooto anyun, keero, ayumi chamaniguk tugul, che ki obaibaige, icheek tugul che koichame, ak icheek tugul che koiweche; ayumjinin icheek kobun komosta age tugul, ak ang'aang'ji icheek kogeerin imi aach ngor, si kobiit kogeer aach ngoryeeng'ung' tugul. 38Ak arwoogun, ko uu ye kirwookyin kwonyiik che putei kayosyetap katunisyet, ak che tumdoi korotiik; ak aibun korotiigap nereegek che ng'woneen ak ng'etkonda. 39Ak andein eunekwak, ak kobut oldang'ung' ne tagunoot, ak kobut oldinweguk che kitororitu; ak koreegunenen ngoroiguk, ak koip sonoeguk che korooron: ak kobagachin imi puch aach ngor. 40Ak komutun kogeny tuiyet kobookyin, ak kolagenen koik, ak kotoorin eng' rotonikwak po chok. 41Ak kobeel kooriguk, ak koyaun kirwoogutik eng' taitap kwonyiik che chaang'; ak aeetenen kugoinatet, ama ialisyei kogeny. 42Ageesu anyun nereegekyuk che ng'woneen eng' inyee, ak koistoenengei ng'etkondanyu, ak asiis, ma anereechi kogeny. 43Amu ma ibwaat peetuusyegap ming'inateng'ung', ago ki itacha eng' tuguuchuuto tugul; ko uu nooto, kaaweegu poisyoniguk kotebee paragung'ung', mwaei Kiptaiyat Kamuktaindet ne Toroor.

Tos ma iyai yaityoni itesyi tuguuguk tugul che kiwechei?

Kalewenet agobo kamet ak chepto

44Keero, age tugul ne poisyee kalewenaik, koboisyee kalewenoni agobo inyee, koleen, Kiit ne uu kamet, ko uu nooto chepto. 45Ii cheptap kamet, ne wechei manong'otyondennyi ak lagokyik; ak ii chepto ne otupche ak chepkametwogiguk, che kiweche manong'otaikwak ak lagokwak: ki po kamenng'ung' Hitik, ko po kwandang'ung' Amorik. 46Chepkameng'ung' ne oo ko Samaria, ne menyei komostap eung'ung' ne po kaataam, ineendet ak tiibiikyik; ak chepkameng'ung' ne ming'in, ne menyei komostap eung'ung' ne po tai, ko Sodom ak tiibiikyik. 47Ago ma isup ortinwekwak, anan isup iyai tuguukwak che kiwechei; ago, nda ki kiit ne ming'in nooto, ko ki iyaitu inyee kosiir icheek eng' ortinweguk tugul. 48Mwaei Kiptaiyat Kamuktaindet ne Toroor kole ko uu ye asabe, tomo koyai Sodom chepkameng'ung', ineendet anan ko tiibiikyik, ko uu ye ki iyai inyee kobooto tiibiiguk. 49Keero, kimii tengektap chepkameng'ung' Sodom; ki tinyei ineendet ak tiibiikyik menoteet, piyeng'do, ak poroteetap talbisto; ama igimit eunegap kibananook ak che ma tinyei kiy. 50Ak kimendos icheek, ak koyaei kiit ne kiwechei eng' tainnyu: ki aiste anyun icheek ko uu ye ki ageer ale nyolu. 51Ama yai Samaria tengekwogik che siirei kebebertap tengekwogiguk; ago koites tuguuguk che kiwechei, kosiir icheek, ak koiityi imanda chepkametwogiguk eng' tuguuk tugul che kiwechei che koiyai. 52Ip inyee kobunjiin kalilaneng'ung' amu koirwookyi chepkametwogiguk; po imanda icheeget kosiirin amu tengekwogiguk che koiyai che kiwechei kosiir chooto koyai icheeget: ee, ii teweeroksei aginye, ak iip kalilaneng'ung', amu koiityi imanda chepkametwogiguk.

Kiteechei kogeny Sodom ak Samaria

53Ak aweech kogeny icheek che kigeluul, che kigeluul che po Sodom kobooto tiibiikyik, ak che kigeluul che po Samaria, kobooto tiibiikyik, ak che kigeluul che po luuleniguk che mi kwenunnywa; 54si kobiit iipchigei kalilaneng'ung', ak ililan amu tugul che koiyai, amu ii kagaigaindennywa. 55Ak koweekyigei chepkametiniguk, Sodom ak tiibiikyik, atebwennywa ne ki po tai, ak koweekyigei Samaria ak tiibiikyik atebeennywa ne ki po tai, ak iweekyigei inyee ak tiibiiguk, atebeeng'wong' ne ki po tai. 56Amu ki ma imwa kiy agobo chepkameng'ung' Sodom eng' peetuusyegap menateng'ung'; 57ye kitom keng'aany yaityeng'ung', ko uu eng' peetuusyegap chotisyetap tiibiigap Syria, ak ne po tugul che mi komoswekyik, tiibiigap Philistik, che sasin eng' komoswek tugul. 58Koiip yaityeng'ung' ak tuguuguk che kiwechei, mwaei Kamuktaindet ne Toroor.

59Amu mwaei Kiptaiyat Kamuktaindet ne Toroor kole: Ayaun ko uu ye koiyai, ne koisas kayasyoet ibut kayomiset. 60Nganda uu nooto, abwaati kayomiset ne ki kiyomiske ak inyee eng' peetuusyegap ming'inateng'ung', ak agimiitun kayomiset ne po koigeny. 61Ibwaat anyun ortinweguk, ak ililan, ye itaache chepkametwogiguk, che eecheen ak che mengeechen: ak agoonin icheek koek tiibiiguk, ago ma eng' kayomisutyeng'ung'. 62Ak agimiit kayomisennyu kobooten; si inai ile aa Kamuktaindet ne Toroor: 63si kobiit ibwaat, ak itoptoben, ametwegu kogeny, amu kalilaneng'ung'; ye kanyoun kaat tuguuk tugul che ki iyai, mwaei Kiptaiyat Kamuktaindet ne Toroor.

17

Kipsichinik aeng' ak keetitap sabibuk

171Ki nyoonjo ng'olyootap Kamuktaindet ne Toroor, koleenjo, 2Ee weeriitap chii, mwa tangochet, ak imwachi kalewenet kootap Israel; 3ileenji mwaei Kiptaiyat Kamuktaindet ne Toroor kole; Ki nyoonji Lebanon kipsiichit ne oo ne tinyei kebebaik che eecheen ak ko kooen, che nyiitaat koroorik che ki tinyei saleiywek che teer, ak koip walitap tarakwet: 4ak ki ep temeet ne kitabanu parak ne ki namgei ak che ng'orng'oren, ak koip kwo emetap mung'aaret; ki inde nganaseetap chemung'arainik. 5Ki ip kogeny kesweek che po emonooto, ak kwo kogoolji ng'ung'unyek che akwaen; kilechi ole neegitee peek che chaang'; kimin ko uu koibeiyot. 6Ak ki piit ak koek keetitap sabibuk ne tebeesitu ne ma koitu, ne arung'jingei mooriikyik, ak komi tigitikyik kurerennyi: ki ek anyun keetitap sabibuk, ak kosich mooriik, ak kong'atyo.

7Ki mi kogeny kipsiichit age ne oo ne ki tinyei kebebaik che eecheen ak koroorik che chaang': ak ogeero, ki aruny keetito po sabibuk tigitikyik, kotokyi kipsichinooto, ak kowakta mooriikyik kotokyigei ineendet, eng' kererchosyek ole kiga kiminji, kole si kobise peek kipsichinooto. 8Kiga kiminji ng'ung'unyek che myachen eng' ole neegitee peek che chaang', si kobiit kowakta mooriik, si kobiit kooi logoek, si kobiit koek keetit ne karaaran ne po sabibuk. 9Mwa inyee ile, Mwaei Kiptaiyat Kamuktaindet ne Toroor kole: Tos myeeitu? Tos ma ituti kipsichinooto tigitikyik, ak koep logoekyik, si kobiit kores, si kobiit koresyo sogekyik tugul che ng'orng'or; agot ngo ma mi kimnateet ne wo anan piik che chaang' che itutu? 10Ee, ogeero, tos myeeitu ye kagemin? Tos maresei tugul, ye usyi usoonetap kong'asiis? Resei eng' kererchosyek ole kibiitee.

11Ki nyoonjo kogeny ng'olyootap Kamuktaindet ne Toroor koleenjo, 12

17.12-15:
2Lai 24.15-20; 2A.Pet 36.10-13
Mwachi anyun koot ne ngelelyot, ileenji, Tos mongen ole teptoi tuguuchu? Mwachi icheek, ileenji, ogeero, kigonyo Jerusalem laitoryatap Babilon, ak koluul laitoryandennyi, ak pounikyik, ak komut icheek kobwa Babilon. 13Ak kiluul iyoteetap laitoryat ak koyomiskei kobooto ineendet: kibirchi kogeny ineendet eng' kayasyoet, ak komut piik che kiimeen che po emet 14kole si kobiit konyeratit pounateet, si ma imuuch koeetkei, ago si kobiit kotonon ye riibei kayomisennyi. 15Ago ki ingelelji ineendet amu ki iyookto tononjinikyik koba Misiri, si kobiit kogoochi ineendet paraisisyek ak piik che chaang'. Tos kiberuuri? Tos chilil ineendet ne yaei tuguuk che uu chooto? Tos put kayomiset, ak kochilil? 16Mwaei Kiptaiyat Kamuktaindet ne Toroor kole ko uu ye asabe, meei ineendet iman eng' ole menyei laitoryat ne ki indoi ineendet koek laitoryat, ne ki sas kayosyennyi, ak kibut kayomisennyi, meei kobooto ineendet eng' Babilon. 17Ama tilei kiy eng' ineendet Pharaoh kobooto lugeennyi ne kiim, ak kweanet ne oo, eng' lugeet, ye irurugot ng'ung'unyek koek tuloonook ak koteech irimoik, si kobar piik che chaang'. 18Amu Ki kogas kayasyoet kobut arorutyet, ak ogeero, kigonde eunnyi ago ki koyai tuguuchooto tugul; ma chilili. 19Mwaei anyun Kiptaiyat Kamuktaindet ne Toroor kole: Ko uu ye asabe, aipchini iman metinnyi kayosyennyu ne Ki kogas ak kayomisennyu ne ki kobut. 20Ak aiitochini mestennyu ineendet, ak konam mestennyu ineendet ak amut ineendet kwo Babilon, ak ager kong' ineendet eng' olooto amu ngelelnateet ne ki ingelelja. 21Ak kebare rotwetap chok piikyik tugul che kimweei eng' kweanaikyik tugul, ak kiseerat che ng'etu koba usoonet age tugul: si onai ole aa Kamuktaindet ne Toroor ne koamwa ng'olyoondoniito.

22Mwaei Kiptaiyat Kamuktaindet ne Toroor kole: Aibe kogeny walitap tarakwet ne kooi ak amin; ak aep temeet ne ng'arng'ar, eng' mooriikyik che ng'orng'or che tabanu parak, ak aminji tulweet ne kooi ne tagunoot. 23Aminjini tulweet ne kooi ne po Israel: ak kowakta, ak kooi logoek, ak koek tarakwet ne myee: ak komeny kelunnyi toriitik alak tugul che tirirendos; menyei toriitichooto urwetap mooriikyik. 24Si konai keetiik tugul che po timiin kole aa Kamuktaindet ne Toroor ne ki achooru keetit ne kooi, ak aeet keetit ne ming'in, ak ayaam keetit ne tuon, ak agoochi keetit ne yaamaat kotunen: kaamwa anee Kamuktaindet ne Toroor, ak ayae.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]