Revised Kalenjin Bible (KAPR)
20

Kandochinetap Israel nganda ngelelik

201Ak eng' kenyiit ne po tisap, eng' arawetap muut, peetuut ne po taman ne po arawanooto, kobwa poisyek alage che po Israel kobwa koteepse Kamuktaindet ne Toroor, ak kotep ng'wony eng' tainnyu. 2Ak ki nyoonjo ng'olyootap Kamuktaindet ne Toroor, koleenjo, 3Weeriitap chii, ng'alaalji poisyegap Israel, ileenji, mwaei Kiptaiyat Kamuktaindet ne Toroor kole, kaobwa oteepsena? Mwaei Kiptaiyat Kamuktaindet ne Toroor kole, ko uu ye asabe, koma chame oteepsena.

4Tos irwookyini icheek, ee weeriitap chii, tos irwookyini icheek? Iboorchi icheek konai tuguuk che kiwechei che po kwanisyekwak; 5

20.5-6:
Kom 6.2-8
ak ileenji, mwaei Kiptaiyat Kamuktaindet ne Toroor kole: Eng' peetuut ne ki alewen Israel, ak ayogoochi eunnyu iyoteetap kootap Jakobo, ak aboorchigei icheek eng' emetap Misiri, ye ki ayogoochi eunnyu icheek aleenji, Aa Kamuktaindet ne Toroor Kamuktaindeng'wong'; 6ki ayogoochi eunnyu icheek eng' peetuunooto, amutu icheek komong' eng' emetap Misiri kobwa emet ne ki amararchi icheek, ne nyiitaat cheego ak kumyat, ne toroornatetap emotinwek tugul: 7ak ki amwachi icheek aleenji, Ingometo chii age tugul eng' okweek tuguuk che kiwechei che kochamei konyekyik, amat ong'wanitegei kanamonigap Misiri: aa Kamuktaindet ne Toroor Kamuktaindeng'wong'. 8Ago ki ingelelja, ma cham kogasa iit; ma meto chii age tugul eng' icheek tuguuk che kiwechei che ki chamei konyekwak, ama meto kanamonigap Misiri: amwa anyun ale, Aroong'jini icheek nereegekyuk che ng'woneen, si kobiit ayai nereegekyuk kosulda eng' icheek eng' emetap Misiri. 9Ago ki aboisye amu kainennyu, si ma kimurwon kogeerei pororyosyek, che ki mi icheek kwenunnywa, pororyosyek che kigeerei aboorchinigei icheek, amutu komong' eng' emetap Misiri.

10Amutu anyun icheek komong' eng' emetap Misiri, amutu kobwa surkwen. 11

20.11,13:
A.La 18.5
Ak ki agoochi icheek ng'atuutikyuk, ak aboorchi kirwoogutikyuk, che ngo yai chii kosabei eng' chooto. 12
20.12:
Kom 31.13-17
Ki agoochi icheek kogeny sabatosyekyuk ak icheek, koek kaboorunet eng' kwenunnyu, anee ak icheek, si kobiit konai kole aa Kamuktaindet ne Toroor ne atabaani icheek. 13Ago ki ingelelja kootap Israel eng' surkwen: ma pendate ng'atuutikyuk, ak ki eesyo kirwoogutikyuk, che ngo yai chii kosabei eng' chooto; ki imurwon icheek miising' sabatosyekyuk: ki amwa anyun ale, aroong'jini icheek eng' surkwen nereegekyuk che ng'woneen si agees icheek. 14Ago ki aboisye anyun kainennyu, si ma kimurwon eng' taitap pororyosyek, che kigeeronu icheek amutu komong'. 15
20.15:
Kai 14.26-35
Kogeny, ki ang'werere icheek eunnyu eng' surkwen, ale mamuti icheek koba emet ne ki agoochi, ne nyiitaat cheego ak komi kumyat eng' chaang'indo, ne toroornatetap emotinwek tugul; 16amu ki eesyo kirwoogutikyuk, ama pendate ng'atuutikyuk ak komurwon sabatosyekyuk: amu ki isubot mugulelwekwak kanamonikwak. 17Nganda uu nooto, kogiriree kondanyu icheek si ma ng'em, ama ageesu icheek eng' surkwen.

18Ak ki aleenji lagokwak eng' surkwen, Amobendate ng'atuutigap kwanisyekwok, anan osup kirwoogutikwak, anan ong'wanitegei kanamonikwak; 19aa Kamuktaindet ne Toroor Kamuktaindeng'wong'; obendate ng'atuutikyuk, ak oriip kirwoogutikyuk ak oyai; 20ak otabaan sabatosyekyuk; si koek kaboorunet eng' kwenunnyo, anee ak okweek, si kobiit onai ole aa Kamuktaindet ne Toroor Kamuktaindeng'wong'.

21Ago ki ingelelja ak icheek lagok; ma pendate ng'atuutikyuk anan koriip kirwoogutikyuk, koyai, che ngo yai chii kosabei eng' chooto; ki imurwon icheek sabatosyekyuk: amwa anyun ale aroong'jini icheek nereegekyuk che ng'woneen si kobiit ayai nereegekyuk kosulda eng' icheek eng' surkwen. 22Ago ki aiste eunnyu, ki aboisye amu kainennyu, si ma kimurwon eng' taitap pororyosyek, che kigeeronu icheek amutu komong'. 23

20.23:
A.La 26.33
Ak ki ang'werere icheek eunnyu eng' surkwen, si kobiit aseer icheek eng' pororyosyek, ak aiyeste icheek koyom emotinwek; 24amu ma yai kirwoogutikyuk, ago ki eesyo ng'atuutikyuk, ak komurwon sabatosyekyuk, ak ki isuboti konyekwak kanamonigap kwanisyekwak.

25Ki agoochi anyun kogeny ng'atuutik che ki ma ko myachen, ak kirwoogutik che masabe; 26ak ki amurwon icheek eng' konunoikwak icheegei, amu ki igoito lagok tugul che yaatei iyoteet kobun maat, si kobiit agoochi icheek kobononso, si konai kole aa Kamuktaindet ne Toroor.

27Nooto anyun, ee weeriitap chii, ng'alaalji kootap Israel ileenji icheek, Mwaei Kiptaiyat Kamuktaindet ne Toroor kole: Kigochuba kwanisyekwok kogeny eng' niito amu kachiliilutyet ne ki yaiywo. 28Amu ye kinga muutu icheek kobwa emet, ne ki aitoochi eunnyu agoochi, kogeer tulweet age tugul ne kooi, ak keetit age tugul ne nyigiis, ak ki igoito eng' olooto korosekwak, ak ki igoito eng' olooto kagoochinoikwak che po tagisyet, kibeelei kogeny nyamdutikwak, ak koroong'ji olooto kagoochinoikwak che kieei. 29Yeityo aleenji icheek, Po nee komosta ne toroor ole obendi? Ki kiguure anyun yooto Bama agoi rani. 30Mwachi anyun kootap Israel ileenji, mwaei Kiptaiyat Kamuktaindet ne Toroor kole: Tos omurwonige ko uu piteetap kwanisyekwok? Ak oyae kugoinatet osubi tuguukwak che kiwechei? 31Ak ye ogoitoi kagoochinoikwok, ye ogoitoi weeriikwok kobun maat, ko tos ma omurwonegei kanamonikwok agoi rani? Ko tos oteepsena, okweek kootap Israel? Mwaei Kiptaiyat Kamuktaindet ne Toroor kole, ko uu ye asabe, koma achame oteepsena: 32ak ma piitu agot kitigin nooto obwaati; amu omwae ole, “Kigergeitu ak pororyosyek, ak kergeitu ak ortinwegap emotinwek, keoot keetiik ak koik.”

Kaweegunetap Israel

33Mwaei Kiptaiyat Kamuktaindet ne Toroor kole, iman, ko uu ye asabe, aegu laitoryat aboiywok eng' euut ne kiim, ak eng' euut ne chuulaat, ak eng' nereegek che ng'woneen che rong'ugei. 34Ak amutwok omong'u eng' pororyosyek, ak ayumak eng' euut ne kiim, ak eng' euut ne chuulaat, ak eng' nereegek che ng'woneen che rong'ugei, omang'une emotinwek ole ki kiseerchok; 35ak amutwak obwa surkwen ne po pororyosyek, ak agerak kong' kimni eng' olooto. 36Ko uu ye ki agere kong' kwanisyekwok eng' surkwen ne po emetap Misiri, agerok kong' anyun ko uu nooto, mwaei Kiptaiyat Kamuktaindet ne Toroor.

37Ak amutak obun kurereetap kirokto, ak amutwak obwa ratuutyetap kayomisutyet. 38Ak atiliilok aiste ngelelik eng' kwenung'wong', ak icheek che ki ingelelja; amutu icheek komong' eng' emet ne kigaba kotebee, ago ma pendi emetap Israel: si kobiit onai ole aa Kamuktaindet ne Toroor.

39Ago eng' okweek, ee kootap Israel, mwaei Kiptaiyat Kamuktaindet ne Toroor ko uu ni kole: Ngot ko moepcha iit; obe anyun ak koot chii tugul kanamonikyik eng' peetuusyek che pwoonei ak icheek: ago ma omurwoni kainennyu ne tiliil kogeny eng' kagoochinoikwok, ak eng' kanamonikwok. 40Amu tuun ota koot komugul ne po Israel eng' tulweennyu ne tiliil, eng' tulweet ne kooi ne po Israel, ota icheek tugul eng' emet, mwaei Kiptaiyat Kamuktaindet ne Toroor: ataache icheek eng' olooto, ak amagenak eng' olooto kagoochinoikwok, ak tongoanigap kagoochinoikwok, kobooto tuguukwok tugul che tiliileen. 41Ataachok ko uu nyamdutyet ne anyiny, ye amutwok omang'une pororyosyek, ak ayumak omang'une emotinwek ole ki kiseerchok; ak aegu ne itabaanat eng' okweek kogeerei pororyosyek. 42Ak onai ole aa Kamuktaindet ne Toroor, ye amutwok obwa emetap Israel, emet ne ki aitoochi eunnyu ale agoochini kwanisyekwok. 43Ak obwaat eng' olooto ortinwekwok ak poisyonikwok tugul, che ki ong'wanitegei; ak osaske amu yaitwogikwok tugul che ki oyai. 44Ak onai ole aa Kamuktaindet ne Toroor, ye kaaboisye agobo okweek amu kainennyu, ma ko uu ortinwekwok che yaacheen, ama ko uu poisyonikwok che samis, ee okweek kootap Israel, mwaei Kiptaiyat Kamuktaindet ne Toroor.

Maonateet agobo Murot ne po Tai

45Ak ki nyoonjo ng'olyootap Kamuktaindet ne Toroor, koleenjo, 46Ee, weeriitap chii, tokyi togeng'ung' murot tai ak imwachi ng'aleeguk murot tai, ak imaotenji timdap emetap Negeb; 47ak imwachi timdap murot tai, ileenji, kas ng'olyootap Kamuktaindet ne Toroor; Mwaei Kiptaiyat Kamuktaindet ne Toroor kole: Keero, anaami maat eng' kwenung'ung', ak kobeel keetit age tugul ne tuon, ak keetit age tugul ne yaamaat: ma kimisi liplibenetap maata, ak komel togoochik tugul kobooch murot tai agoi murot kaataam. 48Ak kogeer piik tugul kole aa Kamuktaindet ne Toroor ne kanaami maata: ma kimisi. 49Amwa anyun ale, ee, Kiptaiyat Kamuktaindet ne Toroor! Mwaei icheek agobo anee kole, tos ma ng'alaalindet ne po kalewenaik ineendet?

21

Rotwetap Kamuktaindet

211Ki nyoonjo ng'olyootap Kamuktaindet ne Toroor, koleenjo, 2Ee, weeriitap chii, tokyi togeng'ung' Jerusalem, mwachi ng'aleek komoswek che tiliileen, ak imaotenji emetap Israel; 3ak ileenji emetap Israel, Mwaei Kamuktaindet ne Toroor kole: Keero, aboryenen ak ang'usu rotwennyu po chok, ak aiste eng' inyee chiito ne po iman ak ne ya. 4Amu aistoi eng' inyee chiito ne po iman ak ne ya, ng'usugei anyun rotwennyu po chok kwo kobar piik tugul kobooch murot tai agoi murot kaataam: 5si konai piik tugul kole, aa Kamuktaindet ne Toroor ne kang'usu rotwennyu po chok; ma kogetitagei kogeny.

6Tigen anyun, inyee weeriitap chii; tigen eng' iletap sueng'ung' ak eng' ng'wanindo kogeerei icheek. 7Ak ye teebenen, koleenjin, Amu nee si itigen? Ile anyun, Amu ng'aleek, amu nyoonei: ak kome muguleldo age tugul ak konyalulso eunek tugul, ak konyaluul sabeet age tugul, ak kochootyo kutung'oik tugul ko uu peek: ogeero, nyoonei, ak ko yaaksei, mwaei Kiptaiyat Kamuktaindet ne Toroor.

8Ak ki nyoonjo ng'olyootap Kamuktaindet ne Toroor, koleenjo, 9Ee, weeriitap chii, maoten, mwaa ile, Mwaei Kamuktaindet ne Toroor kole; Mwa ile, Rotwetap chok, rotwetap chok, kagelit, ak kagesit kogeny: 10kagelit si kobiit kobaris; kagesit si kobiit koigei kalyeleet: tos kiboiboitu anyun? Kirokto ne po weeriinnyu ne sasei keetit age tugul. 11Ak ki kigon si kobiit kesit, si kimuuch kenam: kilitei rotwetap chok, ee, kisitei, si kobiit kinde eutap parindet. 12Waach ak ite, ee, weeriitap chii: amu kagong'urur piikyuk, kobooto pounik tugul che po Israel: kagigoito icheek kobar rotwetap chok kobooto piikyuk: irabaach anyun kubestang'ung'. 13Amu mi tyemisyet; egu nee anyun ngot koma komi kirokto ne sasisyei? Mwaei Kiptaiyat Kamuktaindet ne Toroor. 14Maoten anyun inyee weeriitap chii, ak irabaach euneguk; ak ingotesak rotwetap chok konyil aeng', ingotesak ne po somok, rotwetap chok ne po che ki kiguoten ne po meet: rotwetap chok ne po ineendet ne oo ne ki kiguoten ne po meet, ne kichut kooriikwak che po oriit. 15Koatokyi rotwetap chok ormariichokwak tugul, si komeiyo mugulelwekwak, ak kotesagis kanagutikwak: haa! Kogeyai koigei kalyeleet, kogelit si kobaris. 16Iyumge, ui komostap tai; chopkei, chopkei, ui komostap kaataam; oldo tugul ole ketokyi togeng'ung'. 17Arabachi eunekyuk, ak ageesu anyun nereegekyuk che ng'woneen: kamwae anee Kamuktaindet ne Toroor ng'olyoondoniito.

18Ki nyoonjo kogeny ng'olyootap Kamuktaindet ne Toroor, koleenjo, 19Ee, weeriitap chii, lewenjige kogeny ortinwek aeng', si kobiit konyo rotwetap chok ne po laitoryatap Babilon; punu chooto tuwai emet agenge; ak iaror komosta eng' sireet, iaror eng' tabandap ooreet ne wendi nganaseet. 20Lewen ooreet si kobiit koit rotwetap chok Rabbah ne po lagogap Ammon, ak koit Judah eng' Jerusalem ne ng'ootaat. 21Amu ki tonon laitoryatap Babilon eng' ole pesiap oor, eng' ole pesyechin ortinwek aeng'u, si kong'orso: kisaisach kipchabonik, ki sa kanamonik, kibir moet kogeer kooet. 22Ki mi eunnyi ne po tai ng'oorset agobo Jerusalem, si konde injinisyek che kibutisye, si koseng'eng'ji parisyet, ak kowaach miising', konde injinisyek taitap ormariichok, kowasyi ng'ung'unyek, koteech irimoik. 23Ak egu nooto eng' icheek ng'oorset ne po puch eng' tainnywa, eng' icheeget che ki koyasyechi kayasyosyek: ago ibwaatyin icheek yaityet, si kobiit kenam. 24Mwaei anyun Kiptaiyat Kamuktaindet ne Toroor kole: Amu ki ogoonu kibwaat yaityeng'wong', amu kigeng'aany pistaosyekwok kotook, kot kotook tengekwogikwok eng' poisyonikwok tugul; amu ki kibwaatak, kenamok anyun kityo.

25Ee inyee ne ya, ne ki kiguotenin ne po meet, pounindetap Israel, ne kagonyo peetuunnyi, eng' peetuusyegap yaityet ne po let; 26mwaei Kiptaiyat Kamuktaindet ne Toroor kole: Inemu chepkulet ak ireegu naaryeet: ma koigeitu niito kogeny: ieet nooto ming'in, ak iming'in nooto toroor. 27Agabui, agabui, agabui; ma kobiitu nooto kogeny, kot konyo ne nyoljin kobunji; si agoochi ineendet.

28

21.28-32:
Jer 49.1-6; Ezk 25.1-7; Amo 1.3-15; Zep 2.8-11
Maoten inyee weeriitap chii, ile, Mwaei Kiptaiyat Kamuktaindet ne Toroor agobo lagogap Ammon, ak agobo teweernatennywa, kole; mwaa ile, Rotwetap chok, kaging'us rotwetap chok, kagesit agobo parisyet, si kobiit kobaris, si koigei kalyeleet: 29kota kogeerchinin tangoita, kota kong'orei lembechek agobo inyee, si kondein kaatwegap kiptengeginik che ki kiguoten ne po meet, che kagonyo peetuunywa, eng' peetuusyegap yaityet ne po let.

30Ker rotwetap chok. Arwoogun eng' ole ki kiyaenen, eng' emet ne ki kisikyinin. 31Ak aroong'jin nereegekyuk; aguutyinin maatap nereegekyuk: ak andein eunegap piik che uu tyong'ik, che ng'oomen eng' ng'emisyet. 32Iegu kweenik che kilaali; kitumjin korotiguk kwenutap emet. Ma kibwaatin kogeny; amu kamwae anee Kamuktaindet ne Toroor ng'olyoondoniito.

22

Nganaseetap korotik

221Ki nyoonjo kogeny ng'olyootap Kamuktaindet ne Toroor koleenjo, 2Ee, inyee weeriitap chii, tos irwookyini, irwookyini nganaseet ne po korotiik? Iboorchi anyun konai tuguukyuk tugul che kiwechei. 3Ak imwa ile, Mwaei Kiptaiyat Kamuktaindet ne Toroor kole: Nganaseet ne tumdoi korotiik eng' kwenunnyi, si kobiit konyo peetuunnyi, ne yachinegei kanamonik, kong'wanitegei! 4Kanamin ng'oogisto amu korotiguk che kiitumde, ki king'wanitin eng' kanamoniguk che ki iyai; ak ki igoochi peetuusyeguk koriik, ak kaiit ye pooch kenyisyeguk. Ko uu nooto kaayain koteweerin pororyosyek, ak ne kichotei eng' emotinwek tugul. 5Chotin che neegit kobooto che looen, inyee ne ii murwoon ak ko nyiitaat wasetapkei.

6Ogeero, pounigap Israel, mi age tugul eng' kimnateennyi, eng' kwenung'ung', si kobiit kotumda korotiik. 7

22.7:
Kom 20.12; 22.21-22; NKNg'a 5.16; 24.17
Ki kosas icheek eng' inyee kwanda ak kamet; kigonyalil icheek toek eng' kwenung'ung': ki koyachi ne ya eng' inyee ne ma tinyei sigiik ak mosoget. 8
22.8:
A.La 19.30; 26.2
Ki isas tuguukyuk che tiliileen, ak imurwon sabatosyekyuk. 9Ki kotebee chaamik kwenung'ung' si kotumdoi korotiik: ak kigoamisye tuloonook eng' inyee: ki koyai yaityet eng' kwenung'ung'. 10
22.10-11:
A.La 18.7-20
Ki kong'aany eng' inyee kwanisyekwak kotebee aach ngor: kigosuup eng' kwenung'ung' kwondo ne ki itabaanat eng' peetuusyekyik che po arawet. 11Ak ki koyai age kiit ne kiwechei kobooto osotyotap chiitap kokwennyi, koyai age yaityet kong'wanit osotyotap weeriinnyi; ak kigosuup age chepkamet, cheptap kwandanyi, eng' inyee. 12
22.12:
Kom 22.25; 23.8; A.La 25.36-37; NKNg'a 16.19; 23.19
Kigotaach icheek eng' inyee asoya si kotumda korotiik; ki ip kelunet ne siirtoot ak che tesatiin, ak ki inyooru poroteet eng' keiyandit amu ki isastae piigap kokweng'ung', ak ki iutyeno, mwaei Kiptaiyat Kamuktaindet ne Toroor.

13Keer anyuno, ki arabach eunekyuk agobo keluneng'ung' ne ma po iman ne ki inyooru, ak eng' korotiguk che mi kwenung'ung'. 14Tos imuuchi komuita muguleldang'ung', anan kogimegitu euneguk, eng' peetuusyek che agerin kong'? Kamwae anee Kamuktaindet ne Toroor ng'olyoondoniito, ak ayae. 15Ak aseerchin pororyosyek, ak ayestochin emotinwek; ak ageesu simdang'ung'. 16Ak imurwongei inyegei, eng' taitap pororyosyek; si kobiit inai ile aa Kamuktaindet ne Toroor.

17Ak ki nyoonjo ng'olyootap Kamuktaindet ne Toroor koleenjo, 18Ee, weeriitap chii, ki koek eng' anee kootap Israel michikyigek che kigenendoe fedha: ki koek icheek tugul sugunwet ak kibatit ak karnook ak ngosyelait, che mi maat ne oo; icheek ko michikyigek che kigenendoe fedha. 19Mwaei anyun Kiptaiyat Kamuktaindet ne Toroor kole: Amu ki oegu okweek tugul michikyigek che kigenendoe fedha, ogeero, ayumjinok Jerusalem. 20Ko uu ye kiyumjin maat ne oo fedha ak sugunwet ak karnook, ak ngosyelait ak kibatit, si kobiit keguut maat kobeel kochootyo; ayumok anyun ko uu nooto eng' nereegekyuk, ak eng' nereegekyuk che ng'woneen, ak andeok olooto, si ochootye. 21Ee, ayumok tugul, ak aguutak eng' maatap nereegekyuk, ak ochootye eng' maata. 22Ko uu ye chotoos fedha eng' maat ne oo, ochotosi ak okweek eng' maata; si onai ole aa Kamuktaindet ne Toroor ne kaarong'jok nereegekyuk che ng'woneen.

Tengekto ne po kandoigap Israel

23Ak ki nyoonjo ng'olyootap Kamuktaindet ne Toroor koleenjo, 24Ee, weeriitap chii, ileenji emonooto, ii emet ne tomo ki anyiny, anan kerobonji eng' peetuutap nereegek. 25Miitei kwenunnyi chaamset ne po maotikyik, ne uu ng'etundo ne pooriseni kobarisyei: ki kobar saboonwek; ibei konoraik ak tuguuk che po kamanuutyet ne oo; ki kotes mosoogik eng' kwenunnyi. 26

22.26:
A.La 10.10
Ki kobut tisiikyik ng'atuutyennyu, ak komurwon tuguukyuk che tiliileen: ma ibesyo che tiliileen ak che ma tiliileen, ama ineet piik koguiyo tuguuk che ma ianyinyotin ak che ianyinyotin, ak ki kotuch konyekwak si ma keer sabatosyekyuk, ak ki king'wanita eng' kwenunnywa. 27Kaigei pounikyik eng' kwenunnyi suik che parisyei; si kotumda korotiik, ak kong'em saboonwek, si kobiit konyoor poroteet ne ma po iman.
28Ak ki komalse maotikyik taartaarik che ma myachen, komalsechi icheek, kogeerei tangoita, ak kong'orchin icheek lembechek, koleenjin, Mwaei ko uu ni Kiptaiyat Kamuktaindet ne Toroor, ye ma mwa kiy Kamuktaindet ne Toroor. 29Kigoboisye piigap emet sastaet, ak korebisyei; ee, kigoiim kibananook ak che ma tinyei kiy, ak Ki kogastae toondet eng' ooreet ne ya. 30Ki acheeng' anyun chii eng' kwenunnywa, si kotuur ng'ootweet, ak kotonon eng' tainnyu eng' ole kibutok, agobo emet, si ma ng'em emonooto: ago ma anyooru chii. 31Kaaroong'ji anyun nereegekyuk icheek amu nooto; kaagesu eng' maatap nereegekyuk: ki ande ortinwekwak metowekwak, mwaei Kiptaiyat Kamuktaindet ne Toroor.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]