Revised Kalenjin Bible (KAPR)
42

Koorik che mi seremutap hekaluut

421Ki imutwaa anyun anyo seremut ne sip kemong'jin, eng' ooreet ne tokyingei murot kaataam: ak ki imutwaa anyo koot ne ming'in ne kitokyingei komosta ne mi taban, ne ki mi taitap inaatut ole tokyingei murot kaataam. 2Ki mitainik pogol agenge che po euut kooindap kooriik che ki mi murot kaataam, ak ki mitainik konom tebeesindo. 3Ki mi komoswek aeng'u che ki kibendote che kiitoorchindos, che ki po kooriik che ki kiyap koba parak konyil somok, che kitokyingei mitainik tiptem che po euut che po seremut ne po oriit, ak che kitokyingei ole ki kimale koik che po seremut ne sip kemong'jin. 4Ak kimi taitap koorichooto ole ki kibunoti, ki mitainik taman che po euut tebeesindo ngeba oriit, ko po mitainik pogol agenge che po euut, koindo; ak kitokyingei kurgotikwak murot kaataam. 5Ki nwagen anyun kooriik che kitabanu parak; amu ki ibe poroindo komoswek che ki kibendote, kosiir kooriik che kitabanu ng'wony, ak che po kween, che ki mi koyooto. 6Amu kimitoti kooriik che ki kiyap koba parak, konyil somok, ak ki ma kotinyei tolochik che uu tolochigap seremusyek: kitenden anyun ne kitabanu parak kosiir ne kitabanu ng'wony ak ne po kween, kong'etee ng'wony. 7Ki mitainik konom kooindap tooteet ne kitabanu saang' ole neegitee koorchooto mengeechen, ne tokyingei seremut ne sip kemong'jin eng' taitap koorchooto mengeechen. 8Amu ki mitainik konom che po euut kooindap koorchooto kimi seremut ne sip kemong'jin: ak ogeero, ki mitainik pogol agenge che po euut che ki mi taitap Hekaluut. 9Ak kimi kurgeet eng' kurereetap koorchooto mengeechen, eng' komostap kong'asiis ye wendi chii koorchooto kobunei seremut ne sip kemong'jin. 10Ki mi kooriik che mengeechen tooteet oriit ne po seremut ne tokyingei kong'asiis, ne tokyindos ak komosta ne mi taban eng' taitap koot. 11Ak ki uu ooreet ne ki mi tainnywa kergeindap ooreet ne ki po kooriik che mengeechen che kitokyingei murot kaataam; ki aechin koindonywa ak tebeesindanywa: ak ki uu atebeennywa tugul ak kurgotikwak, ole kibunei kebendi saang'. 12Ak kimi kurgeet ne ki uu kurgotigap kooriik che mengeechen che kitokyingei murot tai, eng' ooreet meto, ooreet ne ki mi taitap tootoonooto, ne kitokyingei kong'asiis, ye wendi chii oriit.

13Ki leenjo anyun, Kooriik che mengeechen che mi murot kaataam ak che mi murot tai, che tokyindos ak komosato mi taban, chooto ko kooriik che tiliileen, ole ame tisiik che neegitee Kamuktaindet ne Toroor tuguuk che tiliileen miising': konoree olooto tuguuk che tiliileen miising', kobooto kagoochinoigap peek che ng'ootiin, ak kagoochinoigap tengekto, ak kagoochinoigap chalwokto; amu tiliil komosato. 14Ye pa tisiik oriit, koma mandoi eng' ole-tiliil kobendi seremut ne sip kemong'jin, ama konoree yooto ngoroikwak che kaboisyee; amu tiliileen ngoroichooto: yeityo kolaach ngoroik alak, si koriiktoi ole mi piik.

15Ak kingo kagogees kakwaetap koot ne po oriit, komutwaa amang'une ooreet ne po ormariichet ne tokyingei kong'asiis, ak kokwa komoswek tugul. 16Ki ikwae tegat ne kikwaise komostap kong'asiis, koek tegandanooto pogol muut, ki ikwae tegandanooto komoswek tugul. 17Ki ikwa komostap murot kaataam, koek tegandanooto pogol muut, ki ikwae tegandanooto komoswek tugul. 18Ki ikwa komostap murot tai, koek tegandanooto pogol muut, ki ikwae tegandanooto. 19Kiwelelgei kotokyigei komostap cherongo, ak kokwae tegandanooto koek pogol muut, ki ikwae tegandanooto. 20Ki ikwa komoswek ang'wan: ki kiyieme inaatut, ne koindonyi ko ki mitainik pogol muut, ak tebeesindanyi ko ki mitainik pogol muut, si kobiit ko oiyo komosta ne tiliil ak komosta ne po piik.

43

Liilindap Kamuktaindet eng' hekaluut

431Ye ibata komutwaa anyo ormariichet, ormariichanooto tokyingei kong'asiis: 2

43.2:
Ezk 10.3-4,18-19; 11.22-23; Ng'a 1.15
ogeero, ki mang'une ooreetap kong'asiis liilindap Kiptaiyat Kamuktaindetap Israel: ak ki uu tweguunennyi cheetap peek che chaang': ak ki iluu ng'wony eng' liilindanyi. 3Ak ki uu itoondap liilinooto ng'ang'utyet ne kigageer, ko uu ng'ang'utyet ne ki ageer ye ki anyoone ang'eme nganaseet; ak ki uu ng'ang'utichooto ng'ang'utyet ne ki ageer eng' ye neegitee aineetap Kebar: ak ki abut kot kotiiny togeet ng'wony.

4Ak ki nyo ko liilindap Kamuktaindet ne Toroor kobun ooreetap ormariichet ne tokyingei kong'asiis. 5Ak kiganaba Kabuuset ne Tiliil, ak komutwaa anyo seremut ne po oriit; ogeero, ki nyi liilindap Kamuktaindet ne Toroor koot. 6Ak ki agas kong'alaalwo chii eng' ko; ak ki tonon chii eng' ye ami. 7Ak ki leenjo, Ee, weeriitap chii, yuto ko ye mi ng'echerennyu ne po laitornatet, ole tebee keelyekyuk, ole amenye koigeny eng' kwenutap piigap Israel: ama komurwoni kogeny kootap Israel kainennyu ne tiliil, icheeget anan ko laitorinikwak, eng' kugoinatennywa, ak eng' muuswegap laitorinikwak eng' komoswekwak che torooreen; 8ye kingo nde tugatukyennywa koriikyi tugatukyennyu, ak konde tolochikwak koriikyi tolochikyuk, ak kimi tooteet ineegei ne ki ibestoseech, anee ak icheek; ak ki komurwon kainennyu ne tiliil eng' tuguukwak che kiwechei che ki yai: ki ageesu anyun icheek eng' nereegekyuk. 9Ingoisto anyun nguno kugoinatennywa ak muuswegap laitorinikwak, kolooitena, si ameny kwenunnywa koigeny.

10Ee, inyee weeriitap chii, iboorchi koiito kootap Israel, si kobiit kolilaanso amu tengekwogikwak: ak ingokwa icheek kiit ne uu. 11Ak ngot kolilaanso amu tuguuk tugul che ki koyai, iboorchi kiit ne uu koot, ak itoondanyi, ak ole kibunei kebendi saang', ak ole kibunei kebendi ko, kobooto ole uu tuguuk, ak etanutikyik tugul, ak ole teptoi tugul, ak ng'atuutikyik tugul, ak isir kogeerei: si kobiit koriip ole uu kiit komugul, kobooto etanutikyik tugul, ak koyai. 12Niito ko ng'atuutyetap koot: egu ne tiliil miising' eng' tulweet parak komoswek tugul ole pooch. Ogeero, niito ko ng'atuutyetap koot.

Kaptisisyet

13

43.13-17:
Kom 27.1-2; 2A.Pet 4.1
Chu ko kakwautigap kaptisisyet eng' mitainik che po euut: (kakwautyet ko kakwautyet agenge ne po euut ak tebeesindap euut:) egu kelut kakwautyet agenge ne po euut, koek tebeesindo kakwautyet agenge ne po euut, ak ki ek mireiywondennyi ne ki kimire, ole po inchisyek sogool: egu niito anyun kelutap kaptisisyet. 14Ak egu mitainik aeng' che po euut kobooch ng'wony agoi tegeleiywot ne tabanu ng'wony, ak tebeesindo ko kakwautyet agenge ne po euut; ak egu mitainik ang'wan che po euut kobooch tegeleiywot ne nwach agoi tegeleiywot ne kooi, ak tebeesindo ko kakwautyet agenge ne po euut. 15Ak egu mitainik ang'wan che po euut kaptisisyet ole tabanu parak; ak kobooch ole kibeelse eng' kaptisisyet ak kwo parak, komiitei kuinoik ang'wanu. 16Ak egu kooindap ole kibeelse mitainik taman ak aeng' che po euut, ak mitainik taman ak aeng' eng' tebeesindo, ki aechin komoswekyik tugul ko ang'wan. 17Ak egu mitainik taman ak ang'wan che po euut, kooindap tegeleiywot, ak koek taman ak ang'wan tebeesindo agine eng' komoswekyik ang'wan; ak koek kebeberta kakwautyet ne po euut, mireiywot ne ki kimire; ak koek kakwautyet agenge ne po euut, kelunnyi, eng' komoswek tugul: ak kotokyigei kong'asiis lang'eiywondennyi.

Katabaanetap kaptisisyet

18

43.18-27:
Kom 29.35-37
Ak ki leenjo, Ee, weeriitap chii, Mwaei Kiptaiyat Kamuktaindet ne Toroor ko uu ni kole: Chu ko ng'atuutigap kaptisisyet eng' peetuut ne tuun kayai icheek, si kogoitoe kagoochinoik che kibeelei, ak koisee korotiik. 19Mwaei Kiptaiyat Kamuktaindet ne Toroor kole, igoochini tisiik Lawiik che po iyoteetap Zadok, che riikyino si koboisyeiwo, kirgit ne parnotyot, koek kagoochinetap tengekto. 20Ak itaach korotiikyik, si iilee kuinoik ang'wan che po kaptisisyet ak luukwek ang'wan che po tegeleiywot, kobooto mireiywot eng' komoswek tugul: itiliili ko uu nooto ye iyachini kagaigaet. 21Ikwerye kogeny kirgit ne po kagoochinetap tengekto, si kobeel eng' ole ki king'at eng' ko, eng' saang'utap ole-tiliil. 22Ak igoite eng' peetuut ne po aeng' kwesta ne libwoop koek kagoochinetap tengekto; yeityo koanyiny icheek kaptisisyet ko uu ye kagagoanyinye kirgit. 23Ye kaigeesu kaanyinyet, igoite kirgit ne parnotyot ne libwoop, kobooto mengit ne libwoop ne punu akweet. 24Ak igetu koriik taitap Kamuktaindet ne Toroor, ak koseerchi tisiik icheek muunyuk, yeityo kogoito icheek koek kagoochinet ne kibeelei kigoochin Kamuktaindet ne Toroor. 25Ichobe eng' peetuusyek tisap kwesta koek kagoochinetap tengekto: chobei kirgit ne parnotyot kogeny, kobooto mengit ne punu akweet, che libwoben tuwai. 26Yaei icheek kagaigaet agobo kaptisisyet eng' peetuusyek tisap koanyinyi; itabaani anyun ko uu nooto. 27Ak ye kagobata peetuusyechooto, kobeel anyun tisiik kagoochinoikwok che kibeelei, eng' kaptisisyet, kobooto kagoochinoikwok che po kaalyeet, eng' peetuutap sisiit ak kwo tai; si ataachak, mwaei Kiptaiyat Kamuktaindet ne Toroor.

44

Ormariichet ne ki keraat

441Yeityo komutwaa aweek abun ooreetap ormariichet ne sip kemong'jin, ne po ole-tiliil, ne tokyingei kong'asiis; ak kigeraat ormariichanooto. 2Ak ki leenjo Kamuktaindet ne Toroor, Kigerei ormariichani, ma kiyatei, ama punei chii kowendi oriit, amu kagobun Kamuktaindet ne Toroor, Kamuktaindetap Israel, kowendi oriit; kigerei anyun amu nooto. 3Ago pounindet, kotebee olooto ko uu pounindet, si koam amitwogik eng' taitap Kamuktaindet ne Toroor; wendi oriit kobunei ooreetap keterutap ormariichet, ak komandae oranooto.

Chamjinet kechut hekaluut

4Yeityo komutwaa anyo ooreet ne po ormariichet ne po murot kaataam ne po taitap koot; ak ki ageer, ogeero, ki nyi kootap Kamuktaindet ne Toroor liilindap Kamuktaindet ne Toroor: ak ki abut, kot kotiiny togeet ng'wony. 5Ak ki leenjo Kamuktaindet ne Toroor, ee weeriitap chii, nam komyee, ak igeer eng' konyeguk, ak igase itiiguk tuguuk tugul che amwaun agobo etanutik tugul che po kootap Kamuktaindet ne Toroor, ak ng'atuutikyik tugul; ak inai komyee ole kibetitoi koot oriit, kobooto komosta age tugul ne kimandoe eng' ole-tiliil. 6Ak imwachi ngelelyot, kootap Israel, ileenji, mwaei Kiptaiyat Kamuktaindet ne Toroor kole: Ee, okweek kootap Israel, tuguukwok tugul che kiwechei, ko ingoyamak, 7amu ki omutu kipsagarek, che ma kimuratan mugulelwek, ama kimuratan tuguuk tugul che saptos, kotebee oldanyu ole-tiliil, si komurwon, nooto koonnyu, ye kogoitoi amitwogikyuk, mwanik ak korotiik, ak ki kobut kayomisennyu, si kotesyi tuguukwok tugul che kiwechei. 8Ama oriip ng'atuutyetap tuguukyuk che tiliileen: ago ki ondechigei okweegei riibiigap poisyennyu eng' oldanyu ne tiliil. 9Mwaei Kiptaiyat Kamuktaindet ne Toroor kole ma wendi oldanyu ne tiliil toondet age tugul ne Pororyosyek che ma kimuratan muguleldo ak poorto, agot toondet age tugul ne mi kwenutap piigap Israel.

Keistoi Lawiik eng' tiseinateet

10Ago ibei tengektonywa Lawiik che ki koistoenagei kolooegitu, ye kingo petyo Israel, che ki koba kometaa koosup kanamonikwak. 11Ago egu icheek kiboitiinik eng' oldanyu ne tiliil, koriipsei eng' ormariichok che po koot, ak koboisyei eng' koot: enyei kagoochinet ne kibeelei ak tiseiywot agobo piik, ak kotononso eng' taitap piik koboisyechi. 12Ko uu ye kiboisyechin icheek piik eng' taitap kanamonikwak, ak koek kanagutyetap tengekto eng' kootap Israel; ki anamji parak anyun eunnyu atokyi icheek, mwaei Kiptaiyat Kamuktaindet ne Toroor, ak ibei icheek tengektonywa. 13Ama riikyino, si koyaiywo poisyetap tisiindet, anan koriikyi tuguukyuk che tiliileen alak tugul, koriikyi tuguuk che tiliileen miising': ago ibei kalilanennywa, kobooto tuguukwak che kiwechei che ki koyai. 14Nganda uu nooto, ayae icheek koek riibiigap ng'atuutyetap koot, amu poisyennyi tugul, ak amu tuguuk tugul che kiyaei eng' oriit.

Tisiik

15Ago pwoonei koriikyino koboisyeiwo tisiik Lawiik, weeriitap Zadok, che ki riibei poisyetap oldanyu ne tiliil, ye kingo pa piigap Israel kometaa; si kotononso eng' tainnyu kogoono mwanik ak korotiik, mwaei Kiptaiyat Kamuktaindet ne Toroor: 16pendi oldanyu ne tiliil, ak koriikyi mesennyu, si koboisyeiwo, ak koriip ng'atuutyennyu. 17

44.17-18:
Kom 28.39-43; A.La 16.4
Ak ye pa oriit kobun ormariichogap seremut ne po oriit, kilaakyin ngoroik che po katanit; ama ilaachi icheek ngoroigap koroorigap keechiirek, ye poisyei eng' seremut ne po oriit, ak eng' ko. 18Ilaachi chepkuloigap katanit, ak kolaach sulwalisyek che po katanit; ma ilaachi kiy age tugul ne igoochin kong'etyi kaot. 19
44.19:
A.La 16.23
Ak ye mandoi kobendi seremut ne sip kemong'jin, seremut ne sip kemong'jin, agoi ole mi piik, koreegu anyun ngoroichooto kaboisyee, ak kogonor eng' kooriik che mengeechen che tiliileen, ak kolaach ngoroik alak, si ma itabaan piik eng' ngoroikwak.

20

44.20:
A.La 21.5
Ma icheru metowekwak, anan kobagaakta suumeekwak kogoeegitu; tilei kityo konwagitu. 21
44.21:
A.La 10.9
Ama eei tisiindet age tugul divaik ye wendi seremut ne po oriit. 22
44.22:
A.La 21.7,13-14
Ama ituni mosoogik, anan ne kigeon: ago ituni pergeinik che po iyoteetap kootap Israel, anan ko mosoget ne ki po tisiindet. 23
44.23:
A.La 10.10
Ak koneet piikyuk koobeesyo che tiliileen ak che ma tiliileen, ak koneet icheek koguiyo tuguuk che ma ianyinyotin ak che ianyinyotin. 24Ak korwookyi che ibeligei; korwookyi ko uu kirwoogutikyuk: ak koriip ng'atuutikyuk ak kaneetisyosyekyuk eng' igoorwekyuk tugul che ki king'at; ak kotabaan sabatosyekyuk. 25
44.25:
A.La 21.1-4
Ama riikyin muusto si ma ing'wanitkei: ago imuuchi kong'wanitkei amu kwanda anan kamet, anan weeriit, anan chepto, anan ng'eetap kamet, anan chepkamet ne ma kitun. 26Ak ye kagianyiny, kiityi peetuusyek tisap. 27Ak eng' peetuut ne wendi ole-tiliil, seremut ne po oriit, kwo kobois eng' ole-tiliil, kogoito kagoochinennyi ne po tengekto, mwaei Kiptaiyat Kamuktaindet ne Toroor.

28

44.28:
Kai 18.20
Ak konyoor poroteet; aa porotennywa: ak mogoochini icheek kiit ne namei kobunji eng' Israel; aa nenywa. 29
44.29-30:
Kai 18.8-19
Amei kagoochinetap peek che ng'ootiin, ak kagoochinetap tengekto, ak kagoochinetap chalwokto; ak nenywa kiit age tugul ne kitabaani eng' Israel. 30Ak punjin tisiik tongoanik tugul che po tai che po kiy age tugul, ak kagoochinet age tugul ne kinamjin parak ne po kiy age tugul, che po kagoochinoikwok tugul che kinamjin parak: ogoochini kogeny tisiindet magatinikwok che tuonen che po tai, si kogoochi perurto kotebee koong'ung'. 31
44.31:
A.La 22.8
Ma amei tisiik kiy age tugul ne kamee ineegei, anan ne kobarei tyong'ik, ngo toriit anan ngo tyony.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]