Revised Kalenjin Bible (KAPR)
44

Ormariichet ne ki keraat

441Yeityo komutwaa aweek abun ooreetap ormariichet ne sip kemong'jin, ne po ole-tiliil, ne tokyingei kong'asiis; ak kigeraat ormariichanooto. 2Ak ki leenjo Kamuktaindet ne Toroor, Kigerei ormariichani, ma kiyatei, ama punei chii kowendi oriit, amu kagobun Kamuktaindet ne Toroor, Kamuktaindetap Israel, kowendi oriit; kigerei anyun amu nooto. 3Ago pounindet, kotebee olooto ko uu pounindet, si koam amitwogik eng' taitap Kamuktaindet ne Toroor; wendi oriit kobunei ooreetap keterutap ormariichet, ak komandae oranooto.

Chamjinet kechut hekaluut

4Yeityo komutwaa anyo ooreet ne po ormariichet ne po murot kaataam ne po taitap koot; ak ki ageer, ogeero, ki nyi kootap Kamuktaindet ne Toroor liilindap Kamuktaindet ne Toroor: ak ki abut, kot kotiiny togeet ng'wony. 5Ak ki leenjo Kamuktaindet ne Toroor, ee weeriitap chii, nam komyee, ak igeer eng' konyeguk, ak igase itiiguk tuguuk tugul che amwaun agobo etanutik tugul che po kootap Kamuktaindet ne Toroor, ak ng'atuutikyik tugul; ak inai komyee ole kibetitoi koot oriit, kobooto komosta age tugul ne kimandoe eng' ole-tiliil. 6Ak imwachi ngelelyot, kootap Israel, ileenji, mwaei Kiptaiyat Kamuktaindet ne Toroor kole: Ee, okweek kootap Israel, tuguukwok tugul che kiwechei, ko ingoyamak, 7amu ki omutu kipsagarek, che ma kimuratan mugulelwek, ama kimuratan tuguuk tugul che saptos, kotebee oldanyu ole-tiliil, si komurwon, nooto koonnyu, ye kogoitoi amitwogikyuk, mwanik ak korotiik, ak ki kobut kayomisennyu, si kotesyi tuguukwok tugul che kiwechei. 8Ama oriip ng'atuutyetap tuguukyuk che tiliileen: ago ki ondechigei okweegei riibiigap poisyennyu eng' oldanyu ne tiliil. 9Mwaei Kiptaiyat Kamuktaindet ne Toroor kole ma wendi oldanyu ne tiliil toondet age tugul ne Pororyosyek che ma kimuratan muguleldo ak poorto, agot toondet age tugul ne mi kwenutap piigap Israel.

Keistoi Lawiik eng' tiseinateet

10Ago ibei tengektonywa Lawiik che ki koistoenagei kolooegitu, ye kingo petyo Israel, che ki koba kometaa koosup kanamonikwak. 11Ago egu icheek kiboitiinik eng' oldanyu ne tiliil, koriipsei eng' ormariichok che po koot, ak koboisyei eng' koot: enyei kagoochinet ne kibeelei ak tiseiywot agobo piik, ak kotononso eng' taitap piik koboisyechi. 12Ko uu ye kiboisyechin icheek piik eng' taitap kanamonikwak, ak koek kanagutyetap tengekto eng' kootap Israel; ki anamji parak anyun eunnyu atokyi icheek, mwaei Kiptaiyat Kamuktaindet ne Toroor, ak ibei icheek tengektonywa. 13Ama riikyino, si koyaiywo poisyetap tisiindet, anan koriikyi tuguukyuk che tiliileen alak tugul, koriikyi tuguuk che tiliileen miising': ago ibei kalilanennywa, kobooto tuguukwak che kiwechei che ki koyai. 14Nganda uu nooto, ayae icheek koek riibiigap ng'atuutyetap koot, amu poisyennyi tugul, ak amu tuguuk tugul che kiyaei eng' oriit.

Tisiik

15Ago pwoonei koriikyino koboisyeiwo tisiik Lawiik, weeriitap Zadok, che ki riibei poisyetap oldanyu ne tiliil, ye kingo pa piigap Israel kometaa; si kotononso eng' tainnyu kogoono mwanik ak korotiik, mwaei Kiptaiyat Kamuktaindet ne Toroor: 16pendi oldanyu ne tiliil, ak koriikyi mesennyu, si koboisyeiwo, ak koriip ng'atuutyennyu. 17

44.17-18:
Kom 28.39-43; A.La 16.4
Ak ye pa oriit kobun ormariichogap seremut ne po oriit, kilaakyin ngoroik che po katanit; ama ilaachi icheek ngoroigap koroorigap keechiirek, ye poisyei eng' seremut ne po oriit, ak eng' ko. 18Ilaachi chepkuloigap katanit, ak kolaach sulwalisyek che po katanit; ma ilaachi kiy age tugul ne igoochin kong'etyi kaot. 19
44.19:
A.La 16.23
Ak ye mandoi kobendi seremut ne sip kemong'jin, seremut ne sip kemong'jin, agoi ole mi piik, koreegu anyun ngoroichooto kaboisyee, ak kogonor eng' kooriik che mengeechen che tiliileen, ak kolaach ngoroik alak, si ma itabaan piik eng' ngoroikwak.

20

44.20:
A.La 21.5
Ma icheru metowekwak, anan kobagaakta suumeekwak kogoeegitu; tilei kityo konwagitu. 21
44.21:
A.La 10.9
Ama eei tisiindet age tugul divaik ye wendi seremut ne po oriit. 22
44.22:
A.La 21.7,13-14
Ama ituni mosoogik, anan ne kigeon: ago ituni pergeinik che po iyoteetap kootap Israel, anan ko mosoget ne ki po tisiindet. 23
44.23:
A.La 10.10
Ak koneet piikyuk koobeesyo che tiliileen ak che ma tiliileen, ak koneet icheek koguiyo tuguuk che ma ianyinyotin ak che ianyinyotin. 24Ak korwookyi che ibeligei; korwookyi ko uu kirwoogutikyuk: ak koriip ng'atuutikyuk ak kaneetisyosyekyuk eng' igoorwekyuk tugul che ki king'at; ak kotabaan sabatosyekyuk. 25
44.25:
A.La 21.1-4
Ama riikyin muusto si ma ing'wanitkei: ago imuuchi kong'wanitkei amu kwanda anan kamet, anan weeriit, anan chepto, anan ng'eetap kamet, anan chepkamet ne ma kitun. 26Ak ye kagianyiny, kiityi peetuusyek tisap. 27Ak eng' peetuut ne wendi ole-tiliil, seremut ne po oriit, kwo kobois eng' ole-tiliil, kogoito kagoochinennyi ne po tengekto, mwaei Kiptaiyat Kamuktaindet ne Toroor.

28

44.28:
Kai 18.20
Ak konyoor poroteet; aa porotennywa: ak mogoochini icheek kiit ne namei kobunji eng' Israel; aa nenywa. 29
44.29-30:
Kai 18.8-19
Amei kagoochinetap peek che ng'ootiin, ak kagoochinetap tengekto, ak kagoochinetap chalwokto; ak nenywa kiit age tugul ne kitabaani eng' Israel. 30Ak punjin tisiik tongoanik tugul che po tai che po kiy age tugul, ak kagoochinet age tugul ne kinamjin parak ne po kiy age tugul, che po kagoochinoikwok tugul che kinamjin parak: ogoochini kogeny tisiindet magatinikwok che tuonen che po tai, si kogoochi perurto kotebee koong'ung'. 31
44.31:
A.La 22.8
Ma amei tisiik kiy age tugul ne kamee ineegei, anan ne kobarei tyong'ik, ngo toriit anan ngo tyony.

45

Emetap tisiik, lawiik ak pounindet

451Ak ye opchee emet eng' seretap parbareek koek poroteet, ogoochi Kamuktaindet ne Toroor kagoochinet, kebeberta ne tiliil ne po emet: egu koindo tegat eliphuusyek tiptem ak muut, ak koek tebeesindo eliphuusyek taman: egu emonooto ne tiliil eng' kiwotennyi tugul eng' komoswek tugul. 2Punjin kebebertap emonooto komosta ne tiliil ne egu koindo pogol muut, koek tebeesindo pogol muut, aechin komoswek tugul ko ang'wan; ak emotinwekyik che kiyagisye, koegu mitainik konom che po euut komoswek tugul. 3Ak eng' niito kaikwa, ikwa koindo koek eliphuusyek tiptem ak muut, ak koek tebeesindo eliphuusyek taman: ak komi olooto ole-tiliil eng' ye Tiliil Miising'. 4Nooto ko kebeberta ne tiliil ne po kooret, punjin tisiik, kiboitinigap ole-tiliil, che riikyin Kamuktaindet ne Toroor koboisyechin; ak kobunji olooto kooriikwak, ak kobunji ole-tiliil komosta ne tiliil. 5Punjin Lawiik kiboitinigap koot, koindo ne po eliphuusyek tiptem ak muut, ak tebeesindo ne po eliphuusyek taman, konamjigei kobunji, koek nganasook che menyei.

6Ak omarar komosta ne punjin nganaseet koek eliphuusyek muut tebeesindo, koek koindo eliphuusyek tiptem ak muut, kotetkei ak kagoochinetap kebeberta ne tiliil: punjin koot komugul ne po Israel.

7Ak kobunji pounindet emet ne mi komosi ak komosi ne po kagoochinet ne tiliil ak ne po emet ne punjin nganaseet, eng' taitap kagoochinet ne tiliil, ak eng' taitap emet ne punjin nganaseet eng' ole tokyingei cherongo, ak eng' ole tokyingei kong'asiis. Ak aechin koindonyi ak age eng' kebeberwechooto, kobooch kiwoteet ne po cherongo agoi kiwoteet ne po kong'asiis. 8Punjin ineendet emonooto eng' Israel. Ama kousei kogeny pounikyuk piikyuk; ago igoochin emet kootap Israel kobee pororyosyekwak.

Keruutik ak Kakwautik

9Mwaei Kiptaiyat Kamuktaindet ne Toroor kole: Ingoyamak nooto, ee pounigap Israel: oiste koroomnateet ak ng'emisyet, ak oyai kirwooget ak imanda; oiste yaakset ne oyaache piikyuk eng' kimnateet, mwaei Kiptaiyat Kamuktaindet ne Toroor. 10

45.10:
A.La 19.36
Oboisyee keruutik ak mitainik che po iman. 11Aechin epah45:11 Aechin epah: ‘Tetuutik agobo Keruutik ak Kakwautik’ che mi Bukuit eng' pechisyek che po let. ak debeisyek aeng', ak debeisyek aeng' che kanyi tuguuk ko kergei ak kebeberta agenge eng' taman che po homer, ak epah agenge ko kergei ak kebeberta agenge eng' taman ne po homer; egu homer kiit ne kigerisye kotugul. 12Ak yamei shekel agenge ak gerahisyek tiptem. Shekelisyek muut ko egu shekelisyek muut, shekelisyek taman ko egu shekelisyek taman, ak shekelisyek konom ko egu mina agenge.

13Ni ko kagoochinet ne ogoitoi; kebeberta agenge eng' lo ne po epah eng' homer ne po nganuuk, ak ogoite kebeberta agenge eng' lo ne po epah eng' homer ne po baale. 14Ak kebebertap mwaita ne ki king'at ne po debeisyek aeng' che po mwaita, koegu kebeberta agenge eng' taman ne po debeisyek aeng' che po Kor, chooto ko debeisyek tiptem, nooto ko homer agenge, amu debeisyek tiptem ko yamei homer: 15kobooto aarwet agenge ne po akweetap keechiirek, ne ki leweni eng' pogol aeng', ne punu emet ne pitat ne po Israel; egu chuuto kagoochinetap peek che ng'ootiin ak kagoochinet ne kibeelei, ak kagoochinoigap kaalyeet, si kobiit koyai kagaigaet agobo icheek, mwaei Kiptaiyat Kamuktaindet ne Toroor. 16Igoitoi piik tugul che po emet kagoochinoni agobo pounindet eng' Israel. 17Ak koek poisyetap pounindet kagoochinoik che kibeelei, ak kagoochinoik che po peek che ng'ootiin, ak kagoochinoik che kieei eng' igoorwek, ak eng' ye kaleel arawet, ak eng' sabatoisyek, eng' igoorwek tugul che ki king'at che po kootap Israel: chobei ineendet kagoochinetap tengekto, ak kagoochinetap peek che ng'ootiin, ak kagoochinet ne kibeelei, ak kagoochinoik che po kaalyeet, si koyai kagaigaet agobo kootap Israel.

Peetuut ne oo

(Kom 12:1-20; A.La 23:33-43)

18Mwaei Kiptaiyat Kamuktaindet ne Toroor kole: Eng' arawet ne po tai, eng' peetuut ne po tai ne po arawanooto, igetu kirgit ne libwoop ne parnotyot, si ianyiny ole-tiliil. 19Ak konam tisiindet korotiigap kagoochinetap tengekto, ak konde tugatugigap koot, ak koilee luukwek ang'wan che po tegeleiywotap kaptisisyet, ak koilee tugatugigap seremut ne po oriit. 20Ak iyai ko uu nooto eng' peetuutap tisap ne po arawet agobo age tugul ne lelei, ak agobo ineendet ne abusat: oyae anyun ko uu nooto kagaigaet agobo koot.

21

45.21:
Kom 12.1-20; Kai 28.16-25
Eng' arawet ne po tai eng' peetuutap taman ak ang'wan ne po arawanooto, ochop paska, igoorto ne po peetuusyek tisap; ki amei magatiinik che ma kinde mermereek. 22Ak chobei eng' peetuunooto pounindet kirgit ne po kagoochinetap tengekto, agobo kei ak agobo piik tugul che po emet. 23Ak kochopchi Kamuktaindet ne Toroor kagoochinet ne kibeelei eng' peetuusyek tisap che po igoorto, kiruugik tisap ak mengichik tisap che libwoben tugul, eng' peetuut age tugul ne po peetuusyechooto tisap; ak kwesta ne po kagoochinetap tengekto ne po peetuut age tugul. 24Chobei kagoochinetap peek che ng'ootiin kiloinik taman agobo kirgit age tugul, ak kiloinik taman agobo mengit age tugul, ak litainik somok che po mwanik agobo kiloinik taman age tugul che po peek che ng'ootiin.

25

45.25:
A.La 23.33-36; Kai 29.12-38
Yaei ineendet ko uu niito eng' arawetap tisap, eng' peetuutap taman ak muut ne po arawanooto, eng' peetuusyek tisap che po igoorto; yaei ko uu nooto eng' kagoochinetap tengekto, ak eng' kagoochinet ne kibeelei, ak eng' kagoochinetap peek che ng'ootiin ak eng' mwanik.

46

Kagoochinoik alak

461Mwaei Kiptaiyat Kamuktaindet ne Toroor kole: Kigerei eng' peetuusyek lo che po poisyet ormariichet ne po seremut ne po oriit, ne tokyingei kong'asiis; ak kiyatei eng' peetuutap sabato, ak kiyatei eng' peetuut ne kaleel arawet. 2Ak kwo oriit pounindet kobunei ooreet ne po keterut ne po ormariichet ne po saang', ak kotonone ye neegitee tugatukyetap ormariichet, ak kochop tisiik kagoochinennyi ne kibeelei ak kagoochinoikyik che po kaalyeet, ak kosa eng' tugatugigap ormariichet; yeityo komanda: ago ma kigerei ormariichet agoi koimen. 3Ak kosa piigap emet eng' kurgeetap ormariichet eng' taitap Kamuktaindet ne Toroor eng' sabatoisyek, ak eng' ye kaleel arawet. 4Ak kagoochinet ne kibeelei ne igoitoi pounindet kogoochin Kamuktaindet ne Toroor eng' peetuutap sabato, ko aarek lo che libwoben che po keechiir, kobooto mengit ne libwoop; 5ak kobooto mengit age tugul ko ibu kagoochinetap peek che ng'ootiin litainik taman ak tisap ak kebeberyat, ak kobooto aaregap keechiirek age tugul ko koon ko uu ye imuuchi. Ak agobo kagoochinet age tugul ne po peek ko koon litainik somok che po mwanik. 6Ak eng' peetuut ne kaleel arawet kigoito kirgit ne libwoop ne parnotyot; ak aarek lo che po keechiir, ak mengit; libwoben tugul: 7Ak agobo kirgit age tugul ak agobo mengit age tugul ko nyolu kochop ineendet litainik taman ak tisap ak kebeberyat che po kagoochinetap peek che ng'ootiin. Ak agobo che po aarek ko ingochop ko uu ye imuuchi, ak kobooto tugul kogoitoi kora mwaita litainik somok.

8Ak ye wendi pounindet oriit, kobunei ooreetap keterut ne po ormariichet, ak komanda kobun oranooto. 9Ago ye pwa piigap emet taitap Kamuktaindet ne Toroor eng' igoorwek che ki king'at, ko ineendet ne wendi oriit kobunei ooreet ne po ormariichetap murot kaataam, kowendi kosaaei, komandoe ooreet ne po ormariichetap murot tai; ak ineendet ne wendi oriit kobunei ooreet ne po ormariichetap murot tai, komandoe ooreet ne po ormariichetap murot kaataam: maweegunegei ooreetap ormariichet ne kabunei kowendi oriit, ago wendi kochuuldos. 10Ak ye pendi oriit, kowendi pounindet kobooto icheek, ak ye mandoi, komandoi tugul. 11Ak eng' peetuusyegap igoorwek ak igoorwek che ki king'at, ko agobo kagoochinetap peek che ng'ootiin kogoito litainik taman ak tisap ak kebeberyat kobooto kirgit age tugul anan ko mengit. Ak agobo che po aaregap keechiir ko ingochop ko uu ye imuuchi, ak kobooto tugul kogoitoi kora mwaita litainik somok. 12Ak ye chobei pounindet kagoochinetap chamyet, kagoochinet ne kibeelei anan kagoochinoigap kaalyeet koek kagoochinetap chamyet ne igoochin Kamuktaindet ne Toroor, keyatyin ormariichet ne tokyingei kong'asiis, ak kochop kagoochinennyi ne kibeelei kobooto kagoochinoikyik che po kaalyeet, ko uu ye yaei eng' peetuutap sabato: yeityo komanda; ak ye kagomanda, keger ormariichet.

Kagoochinoigap peetut age tugul

13Ak ichobe aarwetap keechiir ne libwoop ne ma siirei kenyiit agenge koek kagoochinet ne kibeelei kigoochin Kamuktaindet ne Toroor peetuut age tugul: ichobe nooto karonet age tugul. 14Ak ichop kagoochinetap peek che ng'ootiin kiloinik aeng' eng' karonet age tugul kobooto arwanooto po keechiir ak litaiyat agenge ne po mwaita si keburukto peek che ng'ootiin che tambululeen. Egu niito ng'atuutyet ne po agoi ne po kagoochinetap peek che ng'ootiin ne kigoochin Kamuktaindet ne Toroor kotugul. 15Kichobei anyun ko uu nooto aarwetap keechiir, kobooto kagoochinetap peek che ng'ootiin, ak mwaita, karonet age tugul, koek kagoochinet ne kibeelei ne po kotugul.

Pounindetap emet

16Mwaei Kiptaiyat Kamuktaindet ne Toroor kole: Ngot kogoochi pounindet kagoochinet age eng' weeriikyik, koegu nooto poroteetap weerooto, punjin weeriikyik; punjin icheeget amu porotennywa. 17

46.17:
A.La 25.10
Ago ngot kogoochi kebebertap porotennyi age eng' otwogikyik, kobunjin otwogindonooto agoi kenyiitap katyaget; si keeweekyi pounindet; ago punjin porotennyi weeriikyik. 18Ago ma ibei pounindet poroteetap piik, si korebe icheek tuguukwak; igoochin poroteet weeriikyik eng' tuguukyik: si ma kiseer piikyuk, kobagaakta chii age tugul tuguukyik.

Ole kichobe kagoochinoik

19Ki imutwaa anyun abun ole kibunei kebendi oriit, ne ki mi tabandap ormariichet, anyo kooriik che tiliileen che po tisiik, che kitokyingei murot kaataam: ak ogeero, kimi komosta ole po patai ne kitokyingei cherongo. 20Ak ki leenjo, Olito ole iyoe tisiik kagoochinetap chalwokto ak kagoochinetap tengekto, ole watane kagoochinetap peek che ng'ootiin; si ma ip koba seremut ne sip kemong'jin, si koanyiny piik.

21Yeityo komutwaa anyun anyo seremut ne sip kemong'jin, ak komuta abun luukwek ang'wan che po seremut; ak ogeero, kimi seremut luuita age tugul ne po seremunooto. 22Ki mi seremusyek che mengeechen che ki king'ot eng' luukwechooto ang'wan che po seremut, che koindonywa ko ki mitainik artam che po euut, ak mitainik sosom che po euut tebeesindo: ki aechin seremusyechuuto ko ang'wan che ki mi luukwechooto. 23Ak ki kiteech inaatut koyiem seremusyechooto ang'wan, ak ki kichop ole kiyoise eng' kurereetap inatusyechooto komoswek tugul. 24Ki leenjo anyun, Chuuto kooriik che kiyoise, ole iyoe kiboitinigap koot kagoochinoigap piik.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]