Revised Kalenjin Bible (KAPR)
8

Tuguuk che wechotin eng' hekaluut

81Ki nyoonjo eutap Kiptaiyat Kamuktaindet ne Toroor eng' kenyiit ne po lo, eng' arawetap lo, eng' peetuut ne po muut ne po arawanooto, ye ki atebye eng' koonnyu, ak kotebyei poisyegap Judah eng' tainnyu. 2

8.2:
Ezk 1.27
Ageer anyun, ogeero, kergeindo ne uu itoondap maat; kong'etee itoondap suennyi ak kwo ng'wony, ko ki uu maat, ak kong'etee suennyi ak kwo parak, ko uu itoondap kakweng'et, ko uu itoondap taet. 3Ak ki iyogoi kiit ne uu euut, konam suumeekyuk ak kiganaba Kabuuset ne Tiliil eng' kwenutap ng'wony ak kipsengwet, ak komutwaa eng' ng'ang'utigap Kamuktaindet anyo Jerusalem, agoi kurgeetap ormariichet ne po seremut ne po oriit ne tokyingei murot kaataam; ole ki mi ng'echereetap kanamwetap ng'etkonda, ne tagisyei kogoonu ng'etkonda. 4
8.4:
Ezk 1.28
Ak ogeero, kimi olooto liilindap Kiptaiyat Kamuktaindetap Israel, ko uu itoondo ne ki ageer ami warenget.

5Ki leenjo anyun ineendet, Ee weeriitap chii, tooben anyun komostap murot kaataam. Atoben anyun komostap murot kaataam, ak ogeero, kimi kanamwonooto po ng'etkonda komostap murot kaataam ne po ormariichetap kaptisisyet eng' ole kimandoe.

6Ak ki leenjo ineendet, Ee weeriitap chii, igeere kiit ne yaei icheek? Chooto ko tuguuk che eecheen che kiwechei che yaei kootap Israel eng' yu, si awo alooit eng' oldanyu ne tiliil? Ago ta igeere kogeny tuguuk alak che eecheen che kiwechei.

7Ak ki imutwaa anyo kurgeetap seremut; ak kinga keer, ogeero, kimi konda tooteet. 8Yeityo koleenjo, Weeriitap chii, undur tooteet: ak kinga undur tootoonooto, ogeero, kimi kurgeet. 9Ak ki leenjo, Ui oriit, si igeer tuguuk che yaach che kiwechei che yaei icheek eng' olito. 10Ki awe anyun oriit, ak ageer, ak ogeero, kimi itoondap age tugul ne po tyong'ik che ichuutegei, ak tyong'ik che kiwechei, ak kanamonik tugul che po kootap Israel, che ki kisirchi itoonwekwak tooteet komoswekwak tugul. 11Ak kitononie taitap kanamonichooto piik tamanwogik tisap che po poisyegap Israel, ak kitonone kwenunnywa Jaasania weeriitap Sapan, kotinyei chii age tugul tereennyi eng' eunnyi, ne kibeelse; ak kitogosta iyeto ne po ng'uunetap nyamdutik. 12Ki leenjo anyun ineendet, Ee weeriitap chii, tos kaigeer kiit ne yaei poisyegap kootap Israel, eng' ole imen, komi chii age tugul kooriikyik che po oriit che po kanamonik? Amu leen icheek, Mageerech Kamuktaindet ne Toroor; ki kometo Kamuktaindet ne Toroor emoni. 13Ki leenjo kogeny, Ta igeere kogeny tuguuk alak che eecheen che kiwechei che yaei icheek.

14Yeityo komutwaa anyo kurgeetap ormariichet ne po kootap Kamuktaindet ne Toroor ne kitokyigei murot kaataam; ak ogeero, kimi kwonyiik eng' olooto che kitebyei koriirchin Tamus. 15Yeityo koleenjo, Kaigeer niito o, weeriitap chii? Ta igeere tuguuk alak che eecheen che kiwechei kosiir chuuto.

16Ak ki imutwaa seremut ne po oriit ne po kootap Kamuktaindet ne Toroor, ak ogeero, kimi piik che neegit tiptem ak muut eng' kurgeetap Hekaluutap Kamuktaindet ne Toroor, eng' kwenutap keterut ak kaptisisyet, che kaituktoochi patai Hekaluutap Kamuktaindet ne Toroor, ak kotokyigei kong'asiis; ak ki sa asiista kotokyingei kong'asiis. 17Yeityo koleenjo, Kaigeer niito o, weeriitap chii? Tos kiy ne ming'in eng' kootap Judah ngo yai icheek eng' olito tuguuk che kiwechei? Amu kigonyiit emet koroomnateet, ak ki kowelelgei kogeny kotacha: ak keero, indoi temetap keetit seruunekwak. 18Ayae anyun agane eng' nereegek che ng'woneen: ma rireenen kondanyu, ama riira moo: agot nganda riircho eng' waagaat ne oo, koma kasyini.

9

Kebarei che saae kanamonik

91Yeityo komwaiwo eng' kutit ne oo, agase, koleenjo, Mwachji icheeget che riibei nganaseet koriik, kotinyei chii age tugul karnennyi ne parisye eng' eunnyi. 2Ak ogeero, ki pwa piik lo kobunu ooreetap ormariichet ne po meto, ne tokyingei murot kaataam, kotinyei chii age tugul karnennyi ne parisye; ak ki ilaachi chiito agenge eng' icheek ngoryeetap katanit, kotinyei age tugul laletap wino eng' suennyi. Ak ki pa oriit, ak kotononie ole neegitee kaptisisyetap sugunwet.

3Ak kitogosta liilindap Kiptaiyat Kamuktaindetap Israel eng' ole mi kerubindet, ole kitebee, kwo ole po tugatugigap koot: ak kitwekyi chiito ne ki ilaachi ngoryeetap katanit, ne ki tinyei laletap wino eng' suennyi. 4

9.4:
Ng'a 7.3; 9.4; 14.1
Ak ki leenji `Kamuktaindet ne Toroor ineendet, Ui pun kwenutap nganaseet, kwenutap Jerusalem, ak ing'ooch turyosyegap togoochigap piik che tigendos ak koriirtos agobo tuguuk tugul che kiwechei che ki yai eng' kwenunnyi. 5Ak ki mwachi alak agase, koleenji, oba obun nganaseet, osup ineendet, ak obarisyote amat koriiree konyekwok, anan koriiraak moo: 6obar ogesu poiyo, muren, chepto, ak lagok che mengeechen, ak kwonyiik: ago amat ooriikyi chii age tugul ne ki king'ooch; ak otaune oldanyu ne tiliil. Kitaune anyun poisyek che ki mi taitap koot. 7Ak ki leenji icheek, Ong'wanit koot, ak onyiit seremusyek piik che kagebar: oba anyun. Ki pa anyun ak ki paris eng' nganaseet. 8Ak ye kita kobarisyoti, ak kigang'etu eng' yooto, abut kot kotiiny togeennyu ng'wony, ak ariir, ak amwa ale, ee, Kiptaiyat Kamuktaindet ne Toroor! Tos ibare piik tugul che ki ng'et che po Israel eng' nereegeguk che ng'woneen che roong'jingei Jerusalem? 9Koleenjo anyun, Oo kot tengektap kootap Israel ak ne po Judah, kanyi emoni korotiik, ak kanyi nganasani kamaaset ne po kirwoogutik: amu mwaei kole ki kometo Kamuktaindet ne Toroor emoni, ama keerei Kamuktaindet ne Toroor. 10Ago ne uu anee, ko marire kondanyu, ama riira moo, ago aipchini ooreenywa metowekwak.

11Ak ogeero, kimwaita ng'olyoondonooto chiichooto ki ilaachi ngoryeetap katanit, ne ki tinyei laletap wino eng' suennyi, kole, kaayai ko uu ye kageng'ata.

10

Ng'emisyetap Jerusalem

101

10.1:
Ezk 1.26; Ng'a 4.2
Ki ageer anyun, ak ogeero, ki took eng' sengwetyet, ne ki mi paragutap kerubik, kiit ne ki uu koitap sapphire, ne uu itoondap kergeindap ng'echereetap laitornatet. 2
10.2:
Ng'a 8.5
Ak ki mwachi chiito ne ki ilaachi ngoryeetap katanit, koleenji chut kwenutap tirook che wirwirendos eng' kurereetap kerubik, ak inyiit euneguk tuwai ng'etetyot ne mi kwenutap kerubik, ak iseerchi nganaseet. Ak ki wo ineendet oriit ageere.

3Ki tonondos anyun kerubik eng' komostap tai ne po koot, ye ki wendi chiichooto oriit; ak ki nyi pooldet seremut ne po oriit. 4Ak ki togosta liilindap Kamuktaindet ne Toroor eng' kerubik, ak kotonone tugatugigap koot; ak ki nyi koot pooldet, ak ki nyi seremut kakweng'eetap liilindap Kamuktaindet ne Toroor. 5Ak ki kigasei kirgirenetap kebebaigap kerubik agoi seremut ne po saang', ko uu kutitap Kamuktaindet Ne po Kamuktaet ye ng'alaali.

6Ak ye kingo ng'at ineendet chiito ne ki ilaachi ngoryeetap katanit, koleenji, inemu maat eng' kwenutap tirook che wirwirendos eng' kwenutap kerubik. Ki wo oriit anyun ak kotonone ye neegit tireet. 7Ak ki iito kerubindet eunnyi eng' kwenutap kerubik kotokyi maat ne ki mi kwenutap kerubik ak konem, ak konde eunegap ineendet ne ki ilaachi ngoryeetap katanit, ne ki nam maata ak komanda. 8Ak ki took eng' kerubik ne uu eutap chiito eng' kurereetap kebebaikwak.

9

10.9-13:
Ezk 1.15-21
Ak ki ageer, ogeero, tirook ang'wan che ki mi ole neegitee kerubik, ki neegitee tireet age kerubindet age, ko neegitee tireet age kerubindet age; ak ki uu itoondap tiroochooto, itoondap koita ne kiguure berulo. 10Ki tinyei kergeindo agenge icheek tugul ko ang'wan eng' itoondanywa, ko uu ye ki mi tireet kwenutap tireet age. 11Ye ki pendi, kobun komoswekwak ang'wan; ki ma kowelelegei kobendi, ago ki isubi komosta ne kagotokyigei ne tai ki ma kowelelegei ye ki pendi. 12
10.12:
Ng'a 4.8
Ak ki nyiitootiin koonyek komoswek tugul che po poorwekwak tugul, ak patoikwak, ak eunekwak, ak kebebaikwak, ak tirook, tiroochooto che ki tinyei kerubichooto ang'wanu. 13Ki kiguure tiroochooto agase, tirook che wirwirendos.

14

10.14:
Ezk 1.10; Ng'a 4.7
Ak ki tinyei age tugul togoochik ang'wan: togeet ne po tai ko ki togeetap kerubindet, ak togeet ne po aeng' ko ki togeetap chiito, ak ne po somok ko ki togeetap ng'etundo, ak ne po ang'wan ko ki togeetap kipsiichit. 15Ak kitogosta kerubik: niito ko ki it ne sabei ne ki ageer eng' ye neegitee aineetap Kebar. 16Ak ye kingo pa kerubik, koba tiroochooto ak icheek koboiyotyin: ak kingo tirirenso kerubik kong'eetyo eng' ng'wony, koma istoegei tirook icheek. 17Kingo tononso icheek, kotononso chu ak icheek; ak kingo togosta, kotogosta chu ak icheek: amu ki mi kabuusetap kioto sabei kobooto icheek.

18Ak ki wo liilindap Kamuktaindet ne Toroor eng' tugatugigap koot, ak kitonone paragutap kerubik. 19Ak kitirirenso kerubik, ak kotogosta eng' ng'wony ageere, ye kibendi, ak kimi tirook kobooto icheek; ak kitononso eng' kurgeet ne po ormariichetap kong'asiis ne po kootap Kamuktaindet ne Toroor; ak kimi paragunnywa liilindap Kiptaiyat Kamuktaindetap Israel.

20Niito ko kioto sabei ne ki ageer eng' kurereetap Kiptaiyat Kamuktaindetap Israel eng' ole neegitee aineetap Kebar ak ki anai ale kerubichooto. 21Ki tinyei age tugul togoochik ang'wan ak ki tinyei age tugul kebebaik ang'wan; ak kimi kergeindap eunegap chiito kurereetap kebebaikwak. 22Ak ki kergei togoochikwak ak togoochik che ki ageer eng' ole neegitee aineetap Kebar, icheeget kobooto itoonwekwak; kibendi age tugul kogeerei tai.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]