Revised Kalenjin Bible (KAPR)
39

Komi Joseph kootap Potipar

391Ki kimut Joseph anyun kochoortagei kwo Misiri, ak ki al ineendet Potipar kiboityotap Pharaoh, kiptaiyatap riibiik, Misirindet, eng' eunegap Ismaelik, che ki imuti ineendet kwo olooto. 2

39.2:
Poi 7.9
Ki mi Kamuktaindet ne Toroor kobooto Joseph, ak ki ek chiito ne iberuurot, komi kootap kiptaiyandennyi Misirindet. 3Ki keer kiptaiyandennyi kole, mi Kamuktaindet ne Toroor kobooto ineendet ak ki iberuur Kamuktaindet ne Toroor tuguuk tugul che kiyaei. 4Ki chamak anyun Joseph eng' ineendet, ak kiboisyechin ineendet. Ki inde `Potipar ineendet koek riibindetap poisyennyi, ak ki inde tuguukyik tugul eunekyik. 5Ki iberuur `Kamuktaindet ne Toroor kootap Misirindet amu Joseph kobooch ye kingo Poi koonnyi ak tuguuk tugul che po misirindonooto, ak ki tebee perurtap Kamuktaindet ne Toroor tuguuk tugul che ki tinyei eng' koonnyi ak eng' mbareenikyik. 6Ki pagaakyi tuguuk tugul che ki tinyei eunegap Joseph, ak ki ma kota kongen tuguukyik, kobatee amitwogik che ki amei. Ki chiito ne karaaran kot Joseph eng' poortanyi.

7Ak ye kingo pata tuguuchuuto, kogeer `kwondap kiptaiyandennyi Joseph, ak koleenji, “Ngeruiye tuwai.” 8Ago ki eesyo ak koleenji kwondap kiptaiyandennyi, “Keero, ma naei kiptaiyandennyu agot tuguukyik che ariibe eng' koonnyi, ak ki konde eunekyuk tugul che tinyei. 9Ma mi age agoi ne oo ne siira; ama mi kiy ne etena kobatenen inyee, amu ii kwondonyi. Amuktoi ano anyun ayai tengegi tee ni, ak achalwogenji Kamuktaindet?” 10Agot nganda ki cham kong'alaaljin `kwonyooto Joseph peetuut age tugul, ago ki ma cham kogasyi koruiyo tuwai, anan kotebi icheegei. 11Ago ki wo anyun Joseph eng' peetuut age koyai poisyennyi eng' ko, ak ki ma komi mureno age ne po koyooto kobooto ineendet eng' ko. 12Ki nam anyun ngoryennyi, ak koleenji, “Ngeruiye tuwai!” Ago ki metoochi Joseph ngoryennyi eutap kwonyooto, ak komwei komanda saang'. 13Ye kingo keer kwonyooto kole, kagometoochi ngoryeet eunnyi ak komwei, 14koguur anyun murenik che po koonnyi, ak kong'alaalji koleenji, “Ogeero, ki komutwech ineendet Hebranindet kochotech! Kanyo ole ami kole keruiye tuwai, ak kaawaach. 15Ye ka ngo kas ineendet awaach eng' kutit ne oo, kometoiywa ngoryennyi ak komwei, komanda saang'.”

16Kigonor ngoryonooto kwonyooto agoi koit kaa kiptaiyatap Joseph, 17ak ye kingo it komwachi ng'aleechooto, koleenji, “Konyoonjo kochota otwogindet Hebranindet ne ki imutwech, 18ago ye kinga waach eng' kutit ne oo, kometoiywa ngoryennyi ak komwei kwo saang'.”

19Ye kingo kas kiptaiyandennyi ng'aleegap kwondonyi, che ki mwachi koleenji, “Ki yaiywo ko uu ni otwogindeng'ung',” kong'waneegitu nereegekyik. 20Ak ki nam Joseph `kiptaiyandennyi ak kotoorchi korgoreet, ole ki kiratyin kimonjororinigap laitoryat, ak ki tebee korgoronooto. 21

39.21:
Poi 7.9
Ago ki mi Kamuktaindet ne Toroor kobooto Joseph, ak ki riiregei ineendet ak ki igoochi konyoor chameet eng' pounindetap korgoreet. 22Ki igoochi pounindetap korgoreet Joseph koboi kimonjororinik tugul che ki mi korgoreet, ak tuguuk tugul che ki kiyaei eng' olooto, ko ineendet ne kiyaei. 23Ki ma kota koriibei pounindetap korgoreet kiy age tugul ne kinamu Joseph, amu ki mi Kamuktaindet ne Toroor kobooto ineendet, ak ki iberuur Kamuktaindet ne Toroor kiy age tugul ne ki yaei Joseph.

40

Karwotitaosyegap Otwogik aeng' che po Pharaoh

401Kingo pata tuguuchu, kochalwogenji riibindetap tuguuk che kieei, ak riibindetap kwang'set, kiptaiyannywa laitoryatap Misiri. 2Ak ki nereekyi Pharaoh kiboitiinikyik tuwai, ne oo eng' che riibei tuguuk che kieei, ak ne oo eng' che riibei kwang'set, 3ak ki kiger icheeget eng' ole kiga kiratyi Joseph. 4Ki inde kiptaiyatap riibiik Joseph koriip icheek, ak ki tebi ko kerotin eng' peetuusyek che matya.

5Ki irwotyi tuwai karwotitoet, chii tugul karwotitoennyi eng' kemout agenge, age tugul ko uu weeksetap karwotitoennyi, riibindetap tuguuk che kieei, ak riibindetap kwang'set ne po laitoryatap Misiri, che kiga kiratyi korgoreet. 6Ye kingo nyo Joseph karon ole mi icheek, kogeer kole ki tinyei arageneet. 7Ki teebe Joseph anyun kiboitinichooto po Pharaoh che ki mi tugul ko ratotiin eng' kootap kiptaiyandennyi, koleenji, “Kalya si oaragense rani?” 8Koleenji icheek ineendet, “Kogirwotyi karwotitoet, ak ma mi chii ne imuuchi koboorwech ole teptoi.” Ak koleenji Joseph, “Tos ma po Kamuktaindet weekset? Kaigai anyun omwaiwo.”

9Ki mwachi anyun riibindet ne oo ne po tuguuk che kieei, Joseph, karwotitoennyi, koleenji, “Keero, komi tainnyu keetitap sabibuk eng' karwotitoennyu, 10ak ki tinyei keetoto mooriik somok. Ki uu che ing'atos, ak kiyesyo taaptokyik, ak kii sabibuk che ruryotiin.

11Ki mi eunnyu kigombetap Pharaoh, ak ki abut logoechooto, ak abirchi kigombetap Pharaoh, ak ki ande eutap Pharaoh kigombanooto.” 12Koleenji `Joseph ineendet, “Ye kiweech ko uu ni: temenichooto somok ko peetuusyek somok; 13kotomo kobata peetuusyek somogu koeetin Pharaoh, ak koweekyin poisyeng'ung', ak iwe inde eutap Pharaoh kigombennyi, ko uu ye ki cham iyae yu kita ko ii riibindennyi ne po tuguuk che kieei. 14Ago myee tuun ibwaata ye tuun kagomyeeit atebeeng'ung', ak irireena anyun, kaigai, ak imwaite eng' kap Pharaoh, si kimaanda eng' kooi. 15Amu ki kichoora iman eng' emetap Yahudik, ak ma ayai kiy eng' olito ne yamei ketoorcho keriinget.”

16Kingo keer ne oo eng' riibiik che pou kwang'set kole myee weeksonooto, koleenji Joseph, “Koarwotyi agane komi metinnyu ateruusyek somogu che po magatiinik che leelachen, 17ak komiitei ne po parak eng' tugul amitwogik alak tugul che po Pharaoh che kwanyei kwong'ik, ago koam toriitik amitwogik che po ateruunooto komi metinnyu.” 18Ak ki wolji Joseph koleenji, “Ye kiweech ko ni: ateruusyechooto somok ko peetuusyek somok; 19kotom kogeskei peetuusyek somogu kotil Pharaoh meting'ung', ak kosongininin eng' keetit, ak koam toriitik poortang'ung'.”

20Eng' peetuutap somok, koit peetuut ne ki kisige Pharaoh, koyachi igoorto otwogikyik tugul. Ak ki ieet riibindet ne oo ne po tuguuk che kieei, ak ne oo ne po kwang'set eng' otwogikyik. 21Ki weekyi anyun ne oo ne po riibiik che po tuguuk che kieei, poisyennyi, ak ki igoochi anyun riibindonooto Pharaoh kigombet konam. 22Ago ki isonginin riibindet ne oo ne po kwang'set, ko uu ye kiga koweekyi `Joseph icheek ole teptoi karwotitoet. 23Ago ki ma ibwaat `Joseph ne oo ne po tuguuk che kieei, ki utye ineendet.

41

Koweechi Joseph karwotitaosyegap Pharaoh

411Ye kingo keskei kenyiisyek aeng'u, korwotyi Pharaoh kotononi eng' ye neegitee aineet. 2Ki keer kotogosune tuuga tisabu aineet, che korooron ak ko neryootiin miising', ak ki agete morong'yot. 3Yeityo kotogosune aineet tuuga alage tisabu kosubu chugai, che ma korooron ak ki sogityotiin, ak ki tononso eng' ye mi tuuga chuun alage eng' ngeguut. 4Ak ki am tuuga che yaacheen ak ko sogityotiin tuuga chuun tisap che myachen che neryootiin. Kosiir anyun Pharaoh eng' yooto. 5Ki inuuch kogeny ak ki irwotyi ne po aeng', ki keer komang'une mopchot agenge ne po paiywat itiik tisabu che ruryotiin ak ko korooron. 6Ye kingo pata chooto komong' itiik tisabu che po paiywat, che meiyotiin, che ki imel usoonet ne punu kong'asiis. 7Ki lugui itichooto po peechooto meiyotiin chuun tisap ruryotiin ak ko neryootiin. Ki siir anyun Pharaoh ak konai kole kaagaa karwotitoet. 8

41.8:
Dan 2.2
Kingo eech karon, koiimgei eng' muguleldanyi, ak ki iyookto keguur Siriik tugul che ng'oomen che po Misiri, che ng'oorsei, ak piik tugul che ng'oomen che ki miitei. Ki tetyi `Pharaoh icheek karwotitoennyi, ago ki ma piit chii ne ki imuuch koguiyechi Pharaoh karwotitaosyekyik.

9Yeityo komwachi anyun ne oo eng' riibiigap tuguuk che kieei, `Pharaoh, koleenji, “Kabwaat rani lelutikyuk. 10Ye kiga nereekyi Pharaoh otwogikyik, kogera, anee ak ne oo eng' che riibei kwang'set, kogerchech kootap kiptaiyatap riibiik. 11Ki kirwootyi karwotitoet acheek tuwai eng' kemout agenge, ak ki kirwootyi chii tugul ko uu weeksetap karwotitoennyi. 12Ak ki mi kobootech neraneet age, Hebranindet, otwogindetap kiptaiyatap riibiik. Ki kimwachi, ki iboorwech karwotitaosyekyok ak ki iweech ko uu karwotitoetap chii age tugul. 13Ak ki yaak ko uu nooto ki iboorwech; ki iweekyo poisyennyu, ak ki kisonginin nin age.”

14Eng' yooto koyookto anyun Pharaoh keguur Joseph, ak ki kimoong' ineendet eng' keriinget, kechogune. Ki inem tamnet ak kowal ngoroikyik, ak kwo ole mi Pharaoh. 15Ki leenji `Pharaoh Joseph, “Koarwotyi karwotitoet, ma piit chii ne koimuuch koweech. Koagas agobo inyee keele, ngigas karwotitoet imuuchi iweech.” 16Ki wolji `Joseph Pharaoh koleenji, “Ma pota anee; igoochin `Kamuktaindet Pharaoh waluunet ne po kaalyeet.” 17Ki ng'alaalji anyun `Pharaoh Joseph, koleenji, “Keero, koatononi eng' ngeguutap aineet eng' karwotitoennyu, 18ageer anyun kotogosune aineet tuuga tisabu, che neryootiin miising' ak ko korooron; ak koagete morong'yot. 19Ki togos tuuga alage tisabu kosubu chugai, che nyalulyotin ak ko yaacheen ak ko sogityotiin, che kitom ageere eng' emetap Misiri komugul che yaacheen che uu chooto. 20Ki am tuuga chooto sogityotiin ak ko yaacheen tuuga chuun kabo tai tisap neryootiin, 21ago ye kingo kagoam, koma kotook keele kagoam, amu kota ko yaacheen ko uu eng' tai, ak eng' yooto anyun, asiiru. 22Koaru ne po aeng' ak koageer eng' karwotitoennyu, komang'une itiik tisabu mopchot agenge, che ruryotiin ak ko myachen. 23Yeityo komong' itiik tisabu kosubu chooto che resyotiin ak ko meiyotiin, che ki imel usoonet ne punu kong'asiis. 24Ak kolugui itichooto meiyotiin itiik chuun tisap myachen. Kinga mwachi piik che ng'oorsei, koma piit ne koimuuch koboorwo.”

25Yeityo koleenji `Joseph Pharaoh, “Agenge karwotitoetap Pharaoh. Kagoboorchi `Kamuktaindet Pharaoh kiit ne machei si koyai ko neegit. 26Tuuga chooto tisap che myachen ko kenyiisyek tisap, ak itichooto tisap myachen ko kenyiisyek tisap; agenge karwotitaoniito. 27Tuuga chooto tisap sogityotiin ak ko yaacheen che koisubu chuun ko kenyiisyek tisap, ak kogeny itichooto tisap che ma ruryotiin che ki imel usoonet ne punu kong'asiis, koegu kenyiisyek tisap che po rubeet. 28Nooto ko kiit ne kaamwachi Pharaoh. Kagoboorchi `Kamuktaindet Pharaoh kiit ne machei si koyai ko neegit. 29Pwoonei kenyiisyek tisabu che po rurateet ne oo eng' emet komugul ne po Misiri. 30Ago ye ibata chooto koit kenyiisyek tisabu che po rubeet; ak keutye rurateet eng' emetap Misiri, ak tuun iwong'u emet tugul rubeet. 31Ma konaaksei ruratonooto eng' emet amu rubonooto isubu, amu egu rubeet ne ng'waan miising'. 32Kogiboorchi anyun Pharaoh karwotitaoniito konyil aeng' amu ki kochobok nooto eng' Kamuktaindet, ak chogune Kamuktaindet kiito kosulda.

33“Ara ingocheeng' `Pharaoh chiito ne tinyei naet ne nin ak utaatyet si konde koboi emetap Misiri. 34Ingoyai Pharaoh niito, ak ingonde riibiik koriip emet, si kobas kebeberta agenge eng' muut eng' emetap Misiri eng' kenyisyechooto tisap po rurateet. 35Ingoyum amitwogik tugul che po kenyisyechooto tisap myachen, che ma koit, ak kogonor peek eng' pounatetap Pharaoh koek amitwogigap nganasook ak ingoriip. 36Ak koek amitwogichooto pasanik che ki pasyin emet eng' kenyisyechooto tisap po rubeet, che tuun piitu eng' emetap Misiri, si ma me emet eng' rubeet.”

37Ki myeiit ng'olyoondonooto eng' `Pharaoh ak eng' otwogikyik tugul. 38Ki leenji Pharaoh otwogikyik, “Kimuktoi ano kenyooru chiito ne uu chiichi ne tinyei Kabuusetap Kamuktaindet?” 39Ki leenji anyun `Pharaoh Joseph, “Amu kagoboorun Kamuktaindet chooto tugul, ma mi anyun chiito ne tinyei naet ne nin ak utaatyet ko uu inyee. 40

41.40:
Poi 7.10
Inyee ne kebou koonnyu ak ko uu ng'olyoondeng'ung' ko kebou piikyuk tugul, kobatee eng' ng'echereetap laitornatet, ko anee ne oo eng' inyee eng' nooto.” 41Ki leenji anyun `Pharaoh Joseph, “Keero, kandein ibou emet komugul ne po Misiri.” 42
41.42:
Dan 5.29
Ki inem Pharaoh eng' eunnyi peteiyot ne po ng'ookset, ak konde eutap Joseph, ak kolelesonji ineendet eng' ngoroik che korooron che po katanit, ak konde sirimdo ne po thahabu kaatinnyi. 43Ak ki igoochi `Pharaoh Joseph kolaany chepkichutinnyi ne po aeng' ne ki tinyei, ak kiboldos piik eng' tainnyi koleen, “Ogutuny!” Ak ki inde ineendet koboi emet komugul ne po Misiri. 44Ki leenji kogeny `Pharaoh Joseph, “Aa Pharaoh, ak ma imuuchi chii kochuul eunnyi anan keldanyi eng' emet komugul ne po Misiri ama ichamji.” 45Ki kuure `Pharaoh Joseph Sapenatpanea, ak ki igoochi kotun Asenat cheptap Potipera tisiindet ne po On. Ak kiwendot Joseph kobunoot emetap Misiri.

46Ki po Joseph kenyiisyek sosom ye ki tononi eng' taitap Pharaoh, laitoryatap Misiri. Ak ki wo Joseph eng' ole mi Pharaoh, ak ki punoot emet komugul ne po Misiri. 47Ki ruryo peek miising' eng' emet eng' kenyisyechooto tisap po piyendo. 48Ki iyum amitwogik tugul che po kenyisyechooto tisap che ki mi emetap Misiri, ak ki konoree amitwogichooto nganasook. Ki konor anyun amitwogigap mbareenik che kiga yiem nganaseet age tugul, kogonoree nganasochooto. 49Ki iyum anyun Joseph peek che chaang' miising', che tee ng'aniegap nyanjet, kot kometo koitet, amu ki ma kota koiitoksei.

50Ki kisikyi Joseph weeriik aeng' kotom koit kenyiitap rubeet, che ki sikyi Asenat, cheptap Potipera, tisiindetap On. 51Ki kuure Joseph kainetap ne oo Manasseh, kole, “Amu kagoono Kamuktaindet autye kaimutikyuk tugul, ak koot tugul ne po abba.” 52Ki kuure ne po aeng' Ephraim, kole, “Amu kagoono Kamuktaindet iyoteet eng' emet ne ki anyoorunee nyalilda.” 53Ki igeskei anyun kenyisyechooto tisabu po rurateet eng' emetap Misiri. 54

41.54:
Poi 7.11
Yeityo kotoi anyun kobwa kenyiisyek tisabu che po rubeet ko uu ye ki kamwa Joseph. Ki piit anyun rubeet eng' emotinwek tugul, ago ki mi amitwogik emet komugul ne po Misiri. 55
41.55:
Jhn 2.5
Ye kingo am rubeet emetap Misiri komugul koriirchi `piik Pharaoh kosoom amitwogik. Ki leenji `Pharaoh piik tugul che po Misiri, “Oba kap Joseph ak oyai kiit age tugul ne kamwaiwok.” 56Ye kingo yom rubonooto emet komugul, koyaat anyun Joseph chogenik tugul, ak koaldochi Misiriik, ak kieet rubonooto miising' eng' emetap Misiri. 57Ki pwa anyun emotinwek tugul kap Joseph eng' Misiri kobwa koal peek; amu kieet rubonooto eng' ng'wony komugul.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]