Revised Kalenjin Bible (KAPR)
45

Koboorchingei `Joseph tupchosyekyik

451

45.1:
Poi 7.13
Ki ma imuuch Joseph anyun komuita eng' taitap piik tugul che ki tonondos eng' ole neegitee ineendet. Ki ng'at ak komwa eng' tuugeet ne oo kole, “Omaande chii tugul eng' ole ami.” Ki ma ng'et chii ne ki mi ak Joseph, ye king'aang'jigei `ineendet tupchosyekyik. 2Ago ki riir kowaach kot kogas Misiriik, ak ki kas kap Pharaoh ak icheek. 3Ak ki leenji `Joseph tupchosyekyik, “Aa Joseph! Tos ta kosabei abba?” Ago ki ma imuuch kowolji tupchosyekyik, amu ki iyweis eng' tainnyi. 4Ki leenji anyun `Joseph tupchosyekyik, “Kaigai oriigu yu ami.” Ak kiriikta anyun. Ak ki leenji, “Aa tupcheng'wong' Joseph, ne ki oalde kwo Misiri. 5Nooto anyun, ama ta oaragense, anan onereekyigei okweegei eng' okweegei agobo aldaet ne ki oaldocho oli, amu ki iyookwo Kamuktaindet andounenok si kobiit asar piik. 6Ki kobiit rubeet eng' emet eng' kenyisyechu aeng', ak ta komi kenyiisyek muutu alage, che ma piitu kabatisyet anan kesisyet. 7Ak ki iyookwo Kamuktaindet andounenok, si kobiit ariibwok che ng'etu eng' ng'wony, ak asarwok osapche eng' saruunet ne oo. 8Ara anyun, ki ma ko okweek che ki omutwaa anyo oli, ago Kamuktaindet ne ki koyaa aek kwanda eng' Pharaoh, ak aegu kiptaiyatap koonnyi tugul, ak pounindetap emet komugul ne po Misiri. 9
45.9-11:
Poi 7.14
Ara anyun, ochakte otogoste ole mi abba, ak oleenji, ‘Kamwa ko uu ni weeriing'ung' Joseph, kiyaa Kamuktaindet aek kiptaiyatap Misiri komugul, chooruge nyoo ole ami, amegagei. 10Ak inyoo imeny emetap Goshen, si ineegitena, inyee ak lagoguk kobooto mochogoroniguk, kechireguk, tuuga cheguuk ak tuguuk tugul che itinye. 11Abain eng' olooto si mebanan, inyee ak koong'ung', ak tugul che itinye; amu ta komi kenyiisyek muutu che pwoonei che po rubeet.’ 12Ogeere nguno eng' konyekwok, ak kogeerei Benjamin tupchennyu agine, kole kutinnyu ne ng'alaalwok. 13Omwachi abba teegistanyu tugul eng' Misiri, ak tuguuk tugul che kaogeer, ak ochakte omutu abba konyo oli.” 14Yeityo kosuup kaatitap ng'eetap kamet Benjamin, ak koriir, ki riir Benjamin agine komi kaatitap Joseph. 15Ak ki ng'utut tupchosyekyik tugul, koriirei. Ak ye ibata nooto kong'alaalji tupchosyekyik ineendet.

Koguurei Pharaoh Jakobo konyo Misiri

16Ki kigas ng'aleechooto eng' kootap Pharaoh, keele, “Kagoit tupchosyegap Joseph,” ak ki ibaibai Pharaoh nooto, kobooto otwogikyik. 17Ki leenji `Pharaoh Joseph, “Ileenji tupchosyeguk, ‘Oyai ni; oratyi sigirokwok tuguukwok, ak obe, agoi emetap Kanaan. 18Omutu kwandang'wong' ak piigap kooriikwok, ak obwa ole ami, si agoonok tuguuk che myach che po emetap Misiri, ak oam akwaiyetap emet.’ 19Ara anyun, kaging'atak, ‘Oyai ko uu ni: oip kariisyek che po emetap Misiri amu lagokwok, ak kwonyiikwok, ak obwa, omutu kwandang'wong'. 20Ago amobwaat tuguukwok, amu chekwok tuguuk tugul che myachen che po emetap Misiri.’ ”

21Ki yai ko uu nooto weeriigap Israel. Ki igoochi `Joseph icheek kariisyek ko uu ng'atuutyetap Pharaoh, ak kogoochi amitwogik che amoti eng' ooreet. 22Ki igoochi chii age tugul ngoroik che kiwalawale alak, ago ki igoochi Benjamin silingisyek pogol somok, ak ngoroik muut che walawali. 23Ki iyookyi kwandanyi tuguuk ko uu ni: sigiroik taman che kilae tuguuk che myach che po Misiri, sigiroik che iyuogik taman che kilae peek ak magatiinik ak amitwogik alak che tuun amonu eng' ooreet. 24Kimonorisyechi anyun Joseph tupchosyekyik ak ye ki inamei panda, koleenji, “Amonereekyinotegei eng' ooreet.” 25Ki pa anyun kotogosta eng' Misiri agoi koit emetap Kanaan kap Jakobo kwandanywa. 26Ak ki mwachi koleenji, “Ta kosabei Joseph! Ak ineendet ko pounindetap emet komugul ne po Misiri.” Ak ki tanui muguleldap Jakobo, amu ma iyan icheeget. 27Ago ye ki ngemwachi ng'aleek tugul che po Joseph, che kiga komwachi Joseph weerchooto, ak ye kingo keer Jakobo kariisyek che ki iyook Joseph si kimutee ineendet, kosap muguleldap Jakobo kwandanywa. 28Ak ki le Israel, “Yamei ko uu nooto! Ta kosabei weeriinnyu Joseph. Awendi anyun ageere ineendet kotom amei.”

46

Kochoortogei `Jakobo Misiri kobooto piigap koonnyi

461Ki nam panda anyun Israel kobooto tugul che ki tinyei, ak ye kingo it Beer-sheba kogoochi tiseiywot Kamuktaindet ne po kwandanyi Isak. 2Ki ng'alaalji `Kamuktaindet Israel eng' ng'ang'utik che po kemoi, koleenji, “Jakobo! Jakobo!” Ak ki le, “Ami yu.” 3Koleenji Kamuktaindet, “Aa Kamuktaindet, Kamuktaindet ne po kwandang'ung'. Meiywei, ichoortegei iwe Misiri; amu ayain iegu pororyet ne oo eng' olooto. 4Achoortoigei agane kobooten awendi Misiri, ak tuun amutun iman itogosu kogeny, ak kotwae Joseph eunnyi konyeguk.”46:4 Kotwae Joseph eunnyi konyeguk: Tuun mi iman Joseph kobooten eng' kalileng'ung'.

5Ki ng'eet anyun Jakobo eng' Beer-sheba; ak ki imut `weeriigap Israel kwandanywa Jakobo, ak lagokwak ak kwonyiikwak eng' kariisyek che kiga koyook Pharaoh si kobiit kimute ineendet. 6

46.6:
Poi 7.15
Ki kweri tuukwak, ak ki ip tuguukwak che kiga konyoor eng' emetap Kanaan. Ki it anyun Misiri `Jakobo kobooto lagokyik tugul; 7weeriikyik, tiibiikyik kobooto mochogoronikyik che weeriik ak che tiibiik, ak ki imut lagokyik tugul koba Misiri.

8Chu kainaigap piigap Israel, che ki it Misiri, Jakobo ak weeriikyik: Reuben, weeriit ne po tai ne po Jakobo, 9ak weeriigap Reuben chu: Hanok, Palu, Hesron ak Karmi. 10Weeriigap Simion chu: Jemuel, Jamin, Ohad, Jakin, Sohar ak Shaul weeriitap Chepkanaanindet. 11Weeriigap Lawi chu: Gerson, Kohat ak Merari. 12Weeriigap Judah chu: Er, Onan, Shelah, Peres ak Zerah. (Ago ki pek Er ak Onan eng' emetap Kanaan). Ak weeriigap Peres ko ki Hesron ak Hamul. 13Weeriigap Issakar chu: Tola, Pupa, Job ak Simron. 14Weeriigap Zebulun chu: Zereth, Elon ak Jaleel. 15Chuuto ko weeriigap Leah che ki sikyi Leah Jakobo eng' Padan-aram, kobooto cheptonyi Dina. Ki sosom ak somok weeriikyik kobooto tiibiikyik.

16Weeriigap Gad chu: Sipion, Hagi, Suni, Esbon, Eri, Arodi ak Areli. 17Weeriigap Asher chu: Jimna, Isba, Isbi, Beriah ak Zerah chepkametinnywa. Weeriigap Beriah chu: Heber ak Malkiel. 18Chuuto ko weeriigap Silpa ne ki igoochi Laban Leah cheptonyi, ki sikyi Jakobo chooto - ki piik taman ak lo. 19Chu weeriigap Rael kwondap Jakobo: Joseph ak Benjamin. 20

46.20:
Tau 41.50-52
Ki kisikyi Joseph eng' emetap Misiri Manasseh ak Ephraim, che ki sikyi Asenat cheptap Potipera tisiindet ne po On. 21Weeriigap Benjamin chu: Bela, Beker, Asbel, Gera, Naaman, Ei, Rosh, Hupim ak Ard. 22Chuuto weeriigap Rael che ki sikyi ineendet Jakobo - ki piik taman ak ang'wan.

23Weeriitap Dan ko Husim. 24Weeriigap Naphtali chu: Jaseel, Guni, Jeser ak Silem. 25Chuuto ko weeriigap Bila, ne ki igoochi Laban Rael cheptonyi, ki sikyi Jakobo chuuto - ki piik tisap tugul.

26Piik tugul che ki it Misiri kobooto Jakobo, ko ki piik tamanwogik lo ak lo che ki mang'une poortap Jakobo, kobatee kwonyiigap weeriigap Jakobo. 27

46.27:
Poi 7.14
Weeriigap Joseph, che ki kisikyi eng' Misiri, ko ki aeng'. Piik tugul che po kootap Jakobo che ki it Misiri, ko ki tamanwogik tisap.

28Ki iyookto `Jakobo Judah kondoe ineendet kwo kap Joseph, koarorchi ooreet ne wendi Goshen, ak ki it anyun emonooto kiguure Goshen. 29

46.29-30:
Tau 49.29-32; 50.6
Ki chop anyun Joseph chepkichutinnyi, ak kwo kotorookta kwandanyi Israel agoi Goshen. Ki iboorchigei Joseph ak kotoroigei, ak koriir eng' kaatinnyi konyil ak konyil. 30Ki `leenji Israel Joseph, “Kamee anyun, amu kaageer togeng'ung', kaagaa taisabe kora.” 31Ki leenji Joseph tupchosyekyik, ak piigap kootap kwandanyi, “Katogoste anyun awe amwachi Pharaoh aleenji, ‘Kagobwanjo weeriik che ketupche, ak piigap kootap abba, che ki mi emetap Kanaan. 32Pichooto ko kayogik, ak icheeget ko piigap tuuga; ak kaget keechiirekwak, tuukwak ak tuguukwak tugul che tinyei.’ 33Ye kuurok anyun Pharaoh, koteebenak kole, ‘Poisyeeng'wong' ko nee?’ 34Oleenji, ‘Acheek otwogiguk ko ki piigap tuuga kong'etee ko kimengech agoi kora, acheek, ak kwanisyekyok agicheek’ si kobiit omeny emet ne kiguure Goshen, amu chii age tugul ne iyagisyei ko ng'waan eng' Misiri.”

47

Komi Jakobo ak weeriikyik taitap Pharaoh

471Ki wo anyun Joseph komwachi Pharaoh, koleenji, “Kagoit abba ak weeriik che kitupche, ak keechiirekwak, ak tuukwak, ak tuguukwak tugul che tinyei kobunu emetap Kanaan, miitei nguno emetap Goshen.” 2Ki imut weeriik muut eng' weeriik che tupcho, ak kobarta eng' taitap Pharaoh. 3ki teebee `Pharaoh weeriik che tupcho ak Joseph koleenji, “Nee poisyeng'wong'?” Ak ki wolji Pharaoh, koleenji, “Acheek otwogiguk ko ki riibiikap kiyagiik, ko uu ye ki uu kwanisyekyok.” 4Ki leenji `icheek Pharaoh, “Kageuchi emoni ko ki toek, amu ma mi ole kiyage akwotisyegap otwogiguk; amu ng'waan rubeet eng' emetap Kanaan. Ara anyun, kaigai chamwech acheek otwogiguk kemeny emetap Goshen.” 5Ak ki ng'alaalji `Pharaoh Joseph, koleenji, “Kagoit oldang'ung' kwandang'ung' ak weeriik che otupche, 6mi taing'ung' emoniito po Misiri. Igoochi kwandang'ung' ak weeriik che otupche komeny emet ole karaaran miising' kosiir tugul, ingomeny anyun emetap Goshen. Ak ngot ingen piik eng' icheek che ng'oomen, igoochi koriip tuukyuk.”

7Ki imut anyun `Joseph kwandanyi kwo taitap Pharaoh, ak ki iberuur `Jakobo Pharaoh. 8ki teebee `Pharaoh Jakobo, koleenji, “Ata kenyisyeguk?” 9Ak ki wolji `Jakobo Pharaoh, koleenji, “Kenyiisyekyuk che ki atar eng' rutoitanyu ko pogol ak sosom. Ng'ering' ak ko yaacheen kenyiisyekyuk che ki atar, ak ma iit kenyiisyekyuk che ki it kenyiisyegap kwanisyekyuk eng' rutoitonywa.” 10Ki iberuur `Jakobo Pharaoh, yeityo kwo eng' ole ki mi ineendet. 11Ki yai anyun Joseph komeng'iis kwandanyi ak weeriik che tupcho, ki igoochi icheek ole punjin eng' emetap Misiri, ole karaaran kosiir tugul eng' emonooto, eng' emetap Rameses, ko uu ye kiga ng'at Pharaoh. 12Kibai `Joseph kwandanyi, tupchosyekyik ak piik tugul che po kootap kwandanyi, eng' amitwogik, ko uu ye ki tee lagokwak.

Kandoinatetap Joseph eng' peetuusyegap rubeet

13Ki ma kota komi amitwogik eng' emet komugul, amu king'wanit miising' rubeet, ak kinyalul emetap Misiri ak emetap Kanaan amu rubanooto. 14Ki iyum Joseph robiinik tugul che ki piit eng' emetap Misiri ak emetap Kanaan che ki koip piik koale peek, ak ki ip fedhaisyechooto kobwa kootap Pharaoh. 15Ye kingo keskei robiinik che po emetap Misiri, ak che po emetap Kanaan, kobwonji Misiriik tugul Joseph, ak koleenji, “Koonech amitwogik. Amu nee si kebegu eng' taing'ung'? Amu kogogeskei robiinik.” 16Ak ki leenji Joseph, “Ogoonu tuukwok, si agoonok amitwogik che ogeere tuukwok, ngot ko kogogeskei robiinik.” 17Kigetyi anyun `icheek Joseph tuukwak; ak ki igoochi Joseph amitwogik che ki ale paraisisyek, akwotisyek, tuuga ak sigiroik. Kibae kenyinooto amitwogik che ki ale tuukwak tugul. 18Ye kingo keskei kenyinooto, kobwonji ineendet eng' kenyiit ne po aeng', ak koleenji, “Ma kimuuchi keung'e kiptaiyandennyo, keele kogogeskei silingisyekyok tugul, ak ki kobunji tuukyok kiptaiyandennyo. Ma komi kiy ne ng'etunot neta keipchini kiptaiyandennyo, kobatee poorwekyok kityo, ak koratinwekyok. 19Amu nee anyun si kebegu eng' taing'ung', acheek ak emennyo? Alech acheek kobooto emennyo, si kenyooru amitwogik, ak kebunji acheek Pharaoh kobooto emennyo keegu otwogikyik. Koonech kesweek, si kesapchee, si ma kibegu, si ma kuber emet.”

20Ki alji anyun `Joseph Pharaoh emet komugul ne po Misiri. Ki alda chii tugul eng' Misiriik mbareennyi, amu kieetyi rubeet icheek, ak ki punji anyun Pharaoh emet. 21Ki yai anyun `ineendet piik koek otwogikyik kong'etee tabanda age agoi tabanda age ne po Misiri. 22Kobatee emetap tisiik ne ma al ineendet, amu ki cham konyooru tisiik amitwogik chechwaak eng' Pharaoh, si koamei kebebertanywa ne ki igoochin Pharaoh. Ki ma alda anyun emennywa amu nooto. 23Ki leenji `Joseph piik anyun, “Ogeero, kaalak rani, okweek ak emeng'wong' obunji Pharaoh. Irochu kesweek, si ogoole mbareenik. 24Si ye ogesisye ogoochi Pharaoh kebeberta ne po muut. Ak kobunjook kebeberwek ang'wanu: si koek kesweegap mbareenik ak koek amitwogikwok, che po piigap kooriikwok ak amitwogik che po lagokwok.” 25Ki le icheek, “Kaisaru saboonwekyok. Myee kenyooru chameet eng' taitap kiptaiyandennyo, ak keegu otwogigap Pharaoh.” 26Ki yai anyun Joseph ng'olyoondonooto koek ng'atuutyet eng' emetap Misiri ne mi agoi rani, keele kobunji Pharaoh kebeberta ne po muut, kobatee emetap tisiik ineegei ne ma punjin Pharaoh.

27Ki meny anyun `Israel Goshen, eng' emetap Misiri, Ak ki ek mogore eng' olooto, ak ki sigiis ak kotesagis miising'. 28Ki meny Jakobo emetap Misiri kenyiisyek taman ak tisap, ak kenyiisyek tugul che ki tar Jakobo kosabei ko ki pogol ak artam ak tisap.

29Ye kingo riik anyun peetuusyek che po kalilotetap Israel, koguur anyun weeriinnyi Joseph ak koleenji, “Ngo kaanyooru chameet eng' taing'ung', inde anyun eung'ung' kubestanyu, iyaiywo ne myee, ak ne po iman. Kaigai ametupcha Misiri, 30ago ye aru kobooto kwanisyekyuk, isuta amanda eng' Misiri, ak itupcha kereeriisyekwak.” Ak ki le, “Ayae ko uu ye kaimwa.” 31Ak ki le, “Iyosyeiwo.” Ak ki iyasyechi. Yeityo kong'uruuk Israel eng' itogunnyi meto.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]