Revised Kalenjin Bible (KAPR)
11

Kaguiyetap Kayaneet

111Nooto anyun kayaneet ko naetap tuguuk che kimang'u, ak kaboorunetap tuguuk che tomo kegeer. 2Amu ki kibaoryanjine nooto poisyek.

3

11.3:
Tau 1.1; T.Kal 33.6,9; Jhn 1.3
Kinae eng' kayaneet keele ki kiyai ng'wonyusyek eng' ng'olyootap Kamuktaindet, nooto anyun tuguuk che kigeerei ko ki ma kiyae tuguuk che taagu.

4

11.4:
Tau 4.3-10
Ki igoochi Abel Kamuktaindet eng' kayaneet tiseiywot ne myee kosiir ne po Kain, ne ki kibaoryanjine ineendet keele ki po imanda, ak kibaoryan Kamuktaindet agobo kagoochinoikyik: ak eng' nooto, agot nganda ki kome kota kong'alaali.

5

11.5:
Tau 5.21-24
Ki kimut Enok eng' kayaneet si ma keer meet; ak ki mata kogeer chii ineendet, amu ki imut Kamuktaindet: amu ye kitom kimut ko kiga kibaoryan agobo ineendet keele ki ibaibai Kamuktaindet; 6ak ngo ma mi kayaneet koma imugaksei kibaibai ineendet: amu ineendet ne riikyin Kamuktaindet konyaaljin koyan kole mi ineendet, ak kole igoochin melekto icheeget che cheeng'ei ineendet.

7

11.7:
Tau 6.13-22
Ki yai Noah moinget eng' kayaneet, kot kosar koonnyi, ye kingo kagiteechi agobo tuguuk che ki tomo kegeer, amu ki iywei Kamuktaindet; ki irwookyine anyun ng'wony nooto, ak ki ek ne ki nam imanda ne piitu eng' kayaneet.

8

11.8:
Tau 12.1-5
Ki kas iit Abraham eng' kayaneet ye ki ngeguur, ak kimanda kwo koma ingen ole wendi, kwo komosta ne tuun taachei koek poroteet. 9
11.9:
Tau 35.27
Ki ek eng' kayaneet kiprutoiyot eng' emetap arorutyet, ko uu emet ne ma nenyi, komeng'ooti emaisyek, kobooto Isak ak Jakobo, che ki che namei arorutyonooto kobooto ineendet: 10amu ki igeni nganaseet ne tinyei lumeiywek, ne Kamuktaindet teegindet ak ko yaindet. 11
11.11:
Tau 18.11-14; 21.2
Ki sich agot Sara agine kimnateet eng' kayaneet komanach ko kagosiirto kenyiisyekyik, amu kiit kole po iman ineendet ne ki iarorchi ineendet: 12
11.12:
Tau 15.5; 22.17; 32.12
nooto anyun ki kisich eng' agenge, ne kiga koigei ne ki kome, piik che chaang', ko uu kecheigap kipsengwet ak ng'aniek che mi ngeguutap nyanjet, che ma iitoksei.

13

11.13:
Tau 23.4; 1A.Pet 29.15; T.Kal 39.12
Ki pek chuuto tugul eng' kayaneet, ama taach arorutichooto, ago kiga kogeer ak koboiboitu kota komi ole loo, ko kagong'aany kole ki toek ak ko kiprutoinik eng' ng'wony. 14Amu icheek che mwaei tuguuk che uu chooto kobooru kole cheeng'ei emet ne nenywa. 15Ak nda kiga ibwaat iman emoni ki mang'une, ta kinyooru poroindo koweektagei. 16Ago machei kot nguno emet ne karaaran kosiir nooto, nooto ko, ne po kipsengwet: nooto anyun ma keerei Kamuktaindet kalilanet agobo icheek keguure Kamuktaindet nenywa: amu Ki kochopchi icheek nganaseet.

17

11.17:
Tau 22.1-14
Kingo kagetyem Abraham, kogoito Isak eng' kayaneet: ee, ki igoitoi nenyi ne ki kisich ineegei, ineendet ne kiga taach arorutik eng' poiboiyet; 18
11.18:
Tau 21.12
one kiga kemwachi keleenji, Tuun kimwaitae Isak iyoteng'ung': 19koiit kole imuuchi Kamuktaindet kong'eet agot eng' che ki kobek, ak kitaach ineendet koweek eng' yooto koek karogutyet.

20

11.20:
Tau 27.27-29,39-40
Ki iberuur Isak eng' kayaneet Jakobo ak Esau, agot eng' tuguuk che pwoonei. 21
11.21:
Tau 47.31-48.20
Ki iberuur Jakobo eng' kayaneet, weeriik tuwai che po Joseph, ye ki neegit kome; ak kosa kotiegei walitap kiroktonyi.

22Ki mwa Joseph eng' kayaneet agobo mandaetap piigap Israel ye ki neegit kome; ak kogoon ng'atuutyet agobo kawekyik.

23

11.23:
Kom 2.2; 1.22
Ki uny sigiikyik Musa eng' kayaneet eng' arawek somok kingo kagesich, amu kiga keer kole ki lakweet ne karaaran; ak ki ma iywei ng'atuutyetap laitoryat.

24

11.24:
Kom 2.10-12
Ki eesyo Musa eng' kayaneet, ye kingo kagoeet, keguure weeriitap che po Pharaoh; 25kolewen keyachi ne ya kobooto piigap Kamuktaindet, kosiir kobaibaegei poiboiosyegap tengekto che po peetuusyek che matya; 26koiit teweernateet ne kiteweeri Kristo kole mogornatosyek che eecheen kosiir konoraik che po Misiri: amu ki igeni melekto.

27

11.27:
Kom 2.15
Ki pagaakta Misiri eng' kayaneet, amaiywei nereegegap laitoryat: amu kimuita, ko uu ye keerei ineendet ne ma taagu. 28
11.28:
Kom 12.21-30
Ki yai paska eng' kayaneet, ak isisyetap korotiik, si matwa icheek ne kibarei weeriik che po tai.

29

11.29:
Kom 14.21-31
Kilandae “Araraita ne piriir” eng' kayaneet ko uu ye punei emet ne yaamaat; ak ye kileen kotyem Misiriik koyai ko uu nooto kelugui.

30

11.30:
Jos 6.12-21
Eng' kayaneet kogilulyo irimoigap Jeriko, kingo kageyiem peetuusyek tisap. 31
11.31:
Jos 2.1-21; 6.22-25
Eng' kayaneet koma me chepkugoniot Rahab kobooto icheek che kingelelik, amu kiga taach segeik eng' kaalyeet.

32

11.32:
Kirw 6.11-8.32; 4.6-5.31; 13.2-16.31; 11.1-12.7; 1Sam 1.1-1Lai 2.11; 1Sam 1.1-25.1
Ara nee anyun age neta amwae? Amu mayama poroindo ngot amwa agobo Gideon, Barak, Samson, Jephtha; ak agobo Daudi ak Samuel ak maotik: 33
11.33:
Dan 6.1-27
che ki iterteer laitornatosyek eng' kayaneet, koyai imanda, ki sich arorutik, kiger kutusweegap ng'etuunyik, 34
11.34:
Dan 3.1-30
ki imis kimnateet ne po maat, kichililye rotwetap chok, ki kigimit komong' eng' nyalulet, ki kimegitu eng' lugeet, ki oon lugosyegap puunik koweekta. 35
11.35:
1Lai 17.17-24; 2Lai4.25-37
Kitaach kwonyiik piikwak che kiga kobek, che ki king'eet: ak ki kibir alak kot kobek, koesyoi katyagennywa; si kobiit kosich ng'eetyeet ne myee kosiir: 36
11.36:
1Lai 22.26-27; 2A.Pet 18.25-26; Jer 20.2; 37.15; 38.6.
ak ki kityem alak eng' chombilet, ak eng' pirisyosyegap kipcharitisyek, ee, ak kogeny eng' ratisyosyek ak toorchinetap korgoreet: 37
11.37:
2A.Pet 24.21
ki kilach eng' koik, ki kimurmure musumenosyek, ki kiyoom, ki kibare rotwetap chok: ki ilaagoti ngoroigap keechiirek, ak che po ng'oroorek, kobonondos, ki kinyalili, keyachin ne ya 38(che ki ma konyaaljin ng'wony icheek), koombenoti eng' ong'atosyek ak tuloonook ak kebenonik ak keriingonigap ng'wony.

39Ak kingo kagosich chuuto tugul paornateet ne ki kibaoryanji amu kayanennywa, koma kotaach icheek arorutyet, 40amu kisip kochobwech Kamuktaindet kiit ne myee kosiir, si ma ki yai koek che ititaatiin ama kimi.

12

Jeso, kaboorunet ne po kayaneet

121Nooto anyun, amu kiyiemenech pooldet ne oo ne po paorinik eng' komoswek tugul, ongeiste nyigiisindo age tugul, ak tengekto ne isip konamech, ak ongerwai eng' muitaet eng' kabeletapkei ne ki kinde tainnyo, 2kegeere Jeso ne kandoindet ak ko kawong'unindet ne po kayaneet, ne kimuita eng' kimurtoiyot amu poiboiyet ne ki kinde tainnyi, ak kosas kalilanet, ak ki kotebee eutap tai ne po ng'echereetap laitornatet ne po Kamuktaindet.

3Obwaat miising' ineendet ne kimuita eng' kirindaetapkei ne po kiptengeginik agobo ineendet, si mong'etye, otanuise eng' saboonwekwok. 4Tom oyai lugeet kot kotumdagei korotiik, obaregei ak tengekto: 5

12.5-6:
Job 5.17; Kale 3.11-12
ak ki outye kateunet, ne ng'alaalwok ko uu ye ki ng'alaaljin weeriik, kole,

Weeriinnyu, amesas kergong'yetap Kiptaiyat,

Anan itanui ye kerin kong' ineendet;

6Amu ineendet ne chamei Kiptaiyat, kotigoni,

Ak kobirei weeriit age tugul ne taachei.

7Omuite eng' kergong'yetne koonook yaiywok Kamuktaindet ko uu nooto ko uu ye yachin weeriikyik; ng'oo weeriit ne ma keregong' kwanda? 8Ago ngot ko motinye katigonet, ne kigonyoorunee tugul yamdaet, oo po sarbuch anyun, ma oo weeriik. 9Ak ki kitinyei kwanisyek che po poorwekyok che ki kereech kong', ago ki kigonyiti icheek: tos ma kaigai kiming'inityige Kwanda ne po saboon, ak kesapche? 10Amu ki kerisye kong' icheek peetuusyek che ng'ering' ko uu ye kigeerei kole myee; ago ineendet, kogerei kong' agobo toreteet, si keegu che yamdoi tiliilindanyi. 11Ma taagu kereetap kong' tugul keele po poiboiyet eng' peetuunnyi; ago po arageneet: ago ye ibata koiichi icheeget che kinetegei nooto, logoegap kaalyeet, chooto ko logoegap imanda.

Katigonutik ak kateunoik

12

12.12:
Isa 35.3
Eng' nooto anyun onamji parak eunek che nyalulyotin, ak kutung'oik che meiyotiin; 13
12.13:
Kale 4.26
ak oyachi keelyekwok ortinwek che lititen, si ma kimaas che king'waldos, ago si kisoop.

14Ogiilgei otebi eng' kaalyeet kobooto piik tugul, ak tiliilinooto ne ngo ma tinyei chii koma imuuchi kogeer Kiptaiyat: 15

12.15:
NKNg'a 29.18
ogeer si ma rartae chii myeeindap Kamuktaindet; si ma piit tigityotap ng'wanindo ak konyalilis, ak komurwon che chaang'; 16
12.16:
Tau 25.29-34
si ma piit ne soksei, anan chiito ne ma iywei Kamuktaindet, ko uu Esau, ne ki alda etunatennyi ne po sigeet agobo amdit agenge. 17
12.17:
Tau 27.30-40
Amu ongen ole kingo mach eng' let konam kaberuret, keesyo (amu ki ma sich poroindo ne po siguunet) nganda ki cheeng' miising' eng' peegap kong'.

18

12.18-19:
Kom 19.16-22; 20.18-21; NKNg'a 4.11-12; 5.22-27
Amu ma oit tulweet ne kimuuchi ketwa, ne kilalei, anan tuindo, ak mesundeito, ak kipchurchuryet, 19ak cheetap iryageet, ak tweguunet ne po ng'aleek, ne ki soom icheek che kigasei kole si mata kemwachi icheek ng'olyoo age tugul: 20
12.20:
Kom 19.12-13
amu ki ma imuuch komuita eng' ng'olyoondonooto ki king'at keele, Agot ngo twa tyony tulweet, kelage koik; 21
12.21:
NKNg'a 9.19
ak nooto ki took, ko ki uu kiy ne imuisei, kot kole Musa, Aiywei miising' ak abotani: 22ago kaoit okweek tulweetap Zion, ak nganaseet ne po Kamuktaindet ne sabei, Jerusalem ne po kipsengwet, ak tuiyosyek che po malaikaisyek che ma iitoksei, 23ak tuiyetap piik tugul ak kaniset ne po che po tai eng' sigeet che kigesir eng' kipsengwet, ak Kamuktaindet kirwoogindetap tugul, ak saboonwek che po piigap imanda che ki kiyai koek che ititaatiin, 24
12.24:
Tau 4.10
ak Jeso katuiyoindetap kayomiset ne leel, ak korotiigap iset, che ng'alaali ko myee kosiir che po Abel.

25

12.25:
Kom 20.22
Ogeer, amoeesye ineendet ne ng'alaali. Amu ngot ko ki ma chililyo icheek ye kingo eesyo ineendet ne kiga koteeita eng' ng'wony, kesiire ne tya anyun acheek ngot keistoegei ineendet ne iteu eng' kipsengwet: 26
12.26:
Hag 2.6
ne ki itumdum ng'wony kutinnyi peetuunooto: ago kagoaror anyun nguno, kole, “Ta atumdumi kogeny konyil agenge, ma ng'wony kityo, ago kipsengwet agine.” 27Ago ng'olyoondoniito, kamwa kole, “Ta konyilei agenge,” kobooru istoetap tuguuk che kimuuchi kitumdum, ko uu eng' tuguuk che ki keyai, si kobiit kong'et tuguuchooto che ma kitumdumi.

28Nooto anyun, amu kinyooru laitornatet ne ma kimuuchi kitumdum, ko ongeegu che tinyei myeeindo, ne kimuuchi keyae poisyet ne iboiboi Kamuktaindet miising', eng' teegisto ak kayweet: 29

12.29:
NKNg'a 4.24
amu Kamuktaindet nenyo ko maat ne igeesu.

13

Katigonutik che toretisye kotugul

131Ingotep ko uu nooto chamyetap che kitupche. 2

13.2:
Tau 18.1-8; 19.1-3
Amoutye oboorchi toek chamyet: amu ki kotaach alak malaikaisyek eng' nooto amaingen. 3Obwaat icheek che mi eng' ratisyosyek, ko uu ne oo ratotiin tugul; icheeget che kinyaliili, ko uu ye omi ak okweek eng' poorto.

4Ingogonyit tugul katunisyet, amat koek itoogut ne tinyei simdo: amu tuun irwookyin Kamuktaindet che soksei ak che ibegei.

5

13.5:
NKNg'a 31.6,8; Jos 1.5
Oegu che ityagatin eng' chametap silingisyek; ingoyamak tuguuk che otinye; amu ki komwa ineendet kole, “Ma koi abagaakteen, ma koi ameteen.” 6
13.6:
T.Kal 118.6
Nooto anyun kimwae eng' nyiganateet ne myee keele,

Toretindennyu Kiptaiyat; maiyweisyei:

Yaiywo nee chii?

7Obwaat icheek che ki indoiywok, che kimwaiwok ng'olyootap Kamuktaindet; ye obwaati ole kiteptoi atebosyekwak, oyai ko uu ye kiyaei icheek eng' kayanennywa. 8Kergei Jeso Kristo eng' amut ak ra, ak agoi koigeny. 9Amatata ongobeetook kaneetisyosyek che pesyotin che teer: amu myee kolumdaak muguleldo eng' myeeindo; ma eng' amitwogik, che ki ma keljine kiy icheek che kiga pendate chooto.

10Ki tinyei kaptisisyet, ne ma tinyei kimnateet koamisye icheek che poisye emait. 11

13.11:
A.La 16.27
Amu poorwegap tyong'ichooto ki ibu tisiindet ne oo korotiikwak kobwa ole-tiliil agobo tengekto, kebeelei eng' nganaseet saang'. 12Nooto anyun, kinyalil Jeso agine eng' ormariich saang', si kobiit kotiliil piik eng' korotiikyik. 13Ongebe anyun ole mi ineendet eng' saang'utap ormariich, keibe teweernateet ne kiteweeri ineendet. 14Amu ma ki tinyei eng' yu nganaseet ne tebyei koigeny, ago kicheeng'e nin nyoonei. 15Nooto anyun ongigoochi Kamuktaindet eng' ineendet korosyotap kalasunet kotugul, nooto ko logoiyatap kutusweek che ng'aanyei kainennyi. 16Oyai che myachen, amoutye oyai yamdaet: amu paibai miising' Kamuktaindet eng' koroseek che uu chooto.

17Ogas iit che indoiywok, ak oming'inityige icheek: amu riipsei agobo saboonwekwok, ko uu che tuun tetu agobo poisyennywa; si kobiit koyai poisyoniito eng' poiboiyet, ama eng' arageneet: amu magelwok kiy eng' nooto.

18Osaa agobo acheek: amu kiyani keele ki tinyei kabwaatet ne myee, kimache ketebi eng' atebeet ne myee eng' tuguuk tugul. 19Ak asoome miising' kot ale oyai ko uu nooto, si kobiit kesip keeweekyo oldang'wong'.

Saaet

20Ingoyaak Kamuktaindet ne po kaalyeet, ne ki imut mestowot ne oo ne po keechiirek komong' eng' che ki pek, eng' korotiik che po kayomiset ne po koigeny, ineendet Kiptaiyandennyo Jeso, 21oegu che ochobootiin eng' poisyet age tugul ne myee si oyai magennyi, koyai eng' icheek che chamaksei miising' eng' tainnyi, eng' Jeso Kristo; ne nenyi toroornatet koigeny ak koigeny. Amen.

Ng'aleek che po let

22Ago asoomok miising', tupchosyechu, ale omuite eng' ng'olyootap kagimiitet: amu kaasirwak eng' ng'aleek tutigin. 23Onai ole ko kityaach tupchennyo Timoteo; ngot konyo ko neegit, ko tuun anyoo ageerok kobooto ineendet.

24Ogat tugul che indoiywok, ak tugul che tiliileen. Igatok che po Italy. 25Ingotep myeeindo kobootok okweek tugul. Amen.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]