Revised Kalenjin Bible (KAPR)
7

Melkisedek tisiindet

71

7.1-2:
Tau 14.17-20
Amu Melkisedeki-niito, laitoryatap Salem, Tisiindet ne po Kamuktaindet Ne Toroor Miising', ne ki tuiyo ak Abraham ye ki weeksei kobunu ole ki pare laitorinik, ak koberuur ineendet, 2ne kipchechi agine Abraham kebebertap taman ne po tugul ne ye kiweech, ko Laitoryatap imanda korook, ak yeityo kogeny ko Laitoryatap Salem, nooto ko Laitoryatap kaalyeet; 3ne ma tinyei kwanda, ama tinyei kamet, ama tinyei ooreenywa, ama tinyei taunetap peetuusyek anan kagesunetap saboondo, ago ki kiyai kogergeit ak Weeriitap Kamuktaindet, tebyei ko tisiindet koigeny.

4Obwaat anyun ole kite ooindap chiichi, ne ki igoochi Abraham, poiyot ne oo, kebeberta ne po taman ne po pareiywek. 5

7.5:
Kai 18.21
Ak tinyei iman weeriitap Lawi che namei poisyetap tisiisyet, ng'atuutyet konam kebeberwegap taman eng' piik ko uu eng' Ng'atuutyet, eng' tupchosyekwak, agot nga ki punu poortap Abraham: 6ago ki nam kebeberwegap taman eng' Abraham ineendet ne ki ma ki itito icheek eng' ooreenywa, ak koberuur ineendet ne tinyei arorutik. 7Ago ne ma mi tiyet age tugul, konyooru ne ming'in kaberuret eng' ne oo. 8Ak eng' yu kotaachei piik che pegu kebeberwegap taman; ago eng' olooto, ko ineendet ne kibaoryani keele sabei. 9Ak, kimuuchi kemwa keele, eng' Abraham agot Lawi, ne taachei kebeberwegap taman, ko ki igoito kebeberwegap taman; 10amu kita komi poortap kwandanyi, ye kituitos ak Melkisedek.

11Ak nda ki mi kagesunatetapkei eng' tiseinatetap Lawiik (amu ki nyoorunee yooto piik Ng'atuutyet), ko kita kimage nee kobiit tisiindet age ne uu kiit ne ki uu Melkisedek, ama kiititoi kiit ne ki uu Aron? 12Amu ngot kowalak tiseinateet, ko kanyool kewal agine ng'atuutyet. 13Amu ineendet ne kimwaitae tuguuchu ko po pororyet age, ne ma mi chii eng' pororyonooto ne ki kobois eng' kaptisiisyo. 14Amu taagu keele ki punu Kiptaiyandennyo ooreetap Judah; pororyet ne ki ma mwaitae Musa ng'olyoo age tugul eng' ng'aleegap tisiik.

Tisiindet age

15Ak taagu komyee kosiir, ngot kotun piitu tisiindet age eng' kergeindap Melkisedek, 16ne ki kiyai, ago ma eng' ooreetap ng'atuututigap poorto, ago eng' kimnateetap saboondo ne ma igeesugei: 17

7.17:
T.Kal 110.4
amu kibaoryani keele, ii tisiindet koigeny Ko uu kiit ne ki uu Melkisedek. 18Amu miitei metoet ne po ng'atuutyet ne kiga kindoune, amu nyalulennyi ama tilei kiy 19(amu ma yai Ng'atuutyet kiy koek ne ititaat), ak komiitei ibunetap kamang'unet ne kaigai, ne kiriikyine Kamuktaindet.

20Ama yaaksei ama kiyasyo 21

7.21:
T.Kal 110.4
(amu ki kiyai icheek koek tisiik ama mi kayasyoet eng' ineendet ne mwaei agobo ineendet kole,

Ki iyasyo Kiptaiyat ama walei kole,

Ii tisiindet koigeny).

22Ko uu nooto anyun ki ek Jeso tononjinindet ne po arorutyet ne myee kosiir.

23Ago icheeget ko ki kiyai koek tisiik ko ki chaang' eng' koitet, amu ki eete icheek meet si ma testai eng' poisyennywa. 24Ago amu tebyei ineendet koigeny, kotinyei anyun tiseinateet ne ma kiwalei. 25Eng' nooto anyun komuuchi kogeny kosar agoi kasuldaet icheek che pwaanjin Kamuktaindet eng' ineendet, amu sabei ineendet koigeny si kobiit kosaaei agobo icheek.

26Amu nyoljinech tisiindet ne oo ne uu ni, ne tiliil, ne ma tinyei keniisyet, ama tinyei murwoonindo, ne itabaanat eng' kiptengegiinik, ak ki kitoroor kosiir kipsengwet; 27

7.27:
A.La 9.7
ne ma nyoljin kogoito tiseiywek peetuut age tugul, ko uu tisiichu ki eecheen, che igoitoi korook agobo tengekwogikyik, ye ibata kogoito agobo piik: amu ki yai niito konyil agenge ak koyam, ye ki igoitogei. 28Amu indoi Ng'atuutyet piik che nyalulyotin koek tisiik che eecheen; ago ng'olyootap kayasyoet, ne ki piitu let eng' Ng'atuutyet, kondoi Weeriit, ne ititaat koigeny.

8

Tisiindet ne Oo ne po Arorutyet ne leel

81

8.1:
T.Kal 110.1
Nguno anyun, eng' tuguuk che kimwae, kiit ne oo ko ni: ki tinyei tisiindet ne oo ne uu ni, ne kitebee komostap euut ne po tai ne po ng'echereetap Laitornatet ne po Etunateet eng' kipsengwet, 2kiboityot ne poisye eng' ole-tiliil ne emait ne po iman, ne kilumei Kiptaiyat, ma piik.

3Amu kindoi tisiindet age tugul ne oo si kogoitoi kagoochinoik ak tiseiywek: nooto anyun konyolu kotinyei agine tisiindoni kiit ne igoitoi. 4Nda mi ng'wony, ta ma egu tisiindet, amu mi icheek che igoitoi kagoochinoik ko uu piteetap Ng'atuutyet; 5

8.5:
Kom 25.40
che poisyei eng' karogutyet ak urwetap tuguuk che po kipsengwet, ko uu ye ki kiteechi Musa ye kimachei kotonon emait: amu ki leenji, Riip, si iyai tuguuk tugul ko uu kergeindo ne ki kiboorun eng' tulweet. 6Ago kagosich nguno poisyet ne myee kosiir, ko uu nooto agine, ineendet ko katuiyoindet ne po kayomiset ne myee kosiir, ne ki kiyai eng' arorutik che myach kosiir.

7Amu nda ki ma ko rartaat arorutyet ne po tai, ko kimatata kecheeng'jin poroindo ne po aeng'. 8

8.8-12:
Jer 31.31-34
Amu ye kingo nyoorchi lelutik icheek, komwa kole:

“Ogeero, pwoonei peetuusyek, mwaei Kiptaiyat kole,

che tuun kiyomisyinige kayomiset ne leel ak kootap Israel

ak kootap Judah.

9Ma ko uu kayomiset ne ki kiyomiske ak kwanisyekwak

eng' peetuut ne ki anam eunekwak si amut komong' eng' emetap Misiri;

amu ki ma koteptoi kayomisennyu,

ak ki ma amage kiy icheek, mwaei Kiptaiyat.

10Amu ni kayomiset ne tuun kiyomisyinige ak kootap Israel.

Ye ibata peetuusyechooto, mwaei Kiptaiyat:

Andoi ng'atuutikyuk kabwaatutikwak,

ak asirchi kogeny mugulelwekwak,

ak aegu Kamuktaindet eng' icheek,

ak koek piikyuk.

11Amu koneeti chii tugul chiitap kokwennyi,

anan koneet chii age tugul ne tupcho, koleenji, ‘Ni Kiptaiyat,’

amu tuun naa tugul

kobooch ne ming'in eng' icheek kot koit ne oo.

12Amu tuun ariiree icheek amu tengekwogikwak,

Ama tuun abwaati tengekwogikwak agoi.”

13Amu ki mwa kole, “Arorutyet ne leel,” ki koyai koosit ne po tai. Ago nooto ositu ko kagotebi keny, ko neegit kogeskei.

9

Arorutyet ne po tai

91Nooto anyun, agot arorutyet ne po tai ko ki tinyei ng'atuutigap saaet, ak komostanyi ole-tiliil, ne po ng'wonyuni. 2

9.2:
Kom 26.1-30; 25.23-40
Amu kiga kichop emait; ne po tai ko ole ki mi keldap tait, ak meset, ak magatiinik che itabaanatiin; ne kiguure ole-tiliil. 3
9.3:
Kom 26.31-33
Ak ki ngesiir angeet ne po aeng', ne ki kioiye koot, ko ki mi emait ne kiguure ole-tiliil Kosiir Tugul; 4
9.4:
Kom 16.33; 25.10-16; 30.1-6;Kai 17.8-10; NKNg'a 10.3-5
ne tinyei kapkorosutap thahabu, ak moingetap arorutyet ne ki kiliige thahabu komoswek tugul, ole ki mi tereet ne po thahabu ne ki mi mana, ak kirokto ne po Aron ne ki ing'ati, ak koik che po arorutyet; 5
9.5:
Kom 25.18-22
ak ki mi paragunnyi kerubisyegap liilindo che ki iuuri kerwetap rireenet; tuguuk che ma kimuuchi keng'alaale nguno agenge agenge.

6

9.6:
Kai 18.2-6
Ak kingo kagechop anyun tuguuchuuto ko uu nooto, koba tisiik kotugul emait ne po tai, koyaei poisyosyegap saaet; 7
9.7:
A.La 16.15-16; Kai 19.9; 17-19
ago, kiwendi tisiindet ne oo ineegei emait ne po aeng' konyil agenge eng' kenyiit, ama wendi ama tinyei korotiik, che igoitoi agobo kei, ak agobo lelutigap piik. 8Ibooru Kabuuset ne Tiliil eng' ng'olyoondoni kole, ki tom keng'aany ooreet ne mong'jin ole-tiliil, ye kita ko tononot emait ne po tai; 9ne kalewenetap peetuusyechu; ki kigoitoi eng' kalewenonooto agine kagoochinoik ak tiseiywek, che ma imuuchi koyai chiito ne saaei koek ne ititaat eng' kabwaatennyi, 10amu (kobooto amitwogik ak che kieei ak kaunsosyek che teerchiin) chooto ko ng'atuutik che po poorto kityo, che ki king'at agoi peetuusyek che po kalititet.

11Ago Kristo, ye kingo kagonyo, ne ineendet tisiindet ne oo ne po tuguuk che myach che tuun pwoonei, eng' emait ne oo ak kogesunotkei kosiir, ne ma kiyae eunek, ye kiweech, koma po ng'wonyuni, 12ama eng' korotiigap kwesik ak moek, ago eng' korotiikyik icheegei, kwo anyun ole-tiliil konyil agenge ak koyam, ye kingo kagonyoor katyaget ne po koigeny. 13Amu ngot kotiliili agoi kaunetap poorto korotiigap kwesik ak kiruugik, ak oreegap rooryat che ki ise icheek che tinyei murwoonindo: 14kotiliili anyun ne tya korotiigap Kristo, ne ki igoochigei Kamuktaindet eng' Kabuuset ne po koigeny, koma tinyei peruut, kotiliil kabwaateng'wong' eng' poisyosyek che meiyotiin si oboisyechi Kamuktaindet ne sabei!

15Ak amu ng'olyoondoniito ineendet ko katuiyoindetap kayomiset ne leel, si kobiit konyoor che kigeguur, arorutyetap poroteet ne po koigeny, ye kingo kagobiit meet agobo katyagetap pistaosyek che ki miitei eng' kayomiset ne po tai.

16Amu ole miitei arorutyet ne po nametap tuguuk ko kanyool komiitei meetap ineendet ne kiyaei. 17Amu tinyei arorutyet kimnateet ye kabiit meet: tos kiim kota kosabei ineendet ne kiyaei? 18Eng' nooto anyun agot arorutyet ne po tai, ko ki ma kigoito koma mi korotiik. 19

9.19-20:
Kom 24.6-8
Amu ye kingo kagomwachi Musa piik tugul kayomiset age tugul ko uu eng' Ng'atuutyet, konam korotiigap moek ak che po kwesik, kobooto peek ak koroorik che piriireen ak husop, ak kois bukuit, ak piik tugul, 20komwaei kole, “Chu ko korotiik che po arorutyet ne ki ng'at Kamuktaindet agobo okweek.” 21
9.21:
A.La 8.15
Ak koisee kogeny korotiik emait kobooto tuguuk che kiboisyee. 22
9.22:
A.La 17.11
Ak eng' Ng'atuutyet ko uu keele, kitiliili tuguuk tugul eng' korotiik, ak ngo ma mi tumdaetap korotiik koma mi nyoetap kaat.

Kristo tiseiywot ne ineegei

23Kinyolu anyun kitiliil itoonwegap tuguuk che po kipsengwet eng' chooto; ago kitiliile tuguuk che po kipsengwet tiseiywek che myach kosiir chuuto. 24Amu ki ma mong'ji Kristo ole-tiliil ole ki kiyae eunek, ne karogutyetap tuguugap iman; ago ki mong'ji kipsengwet ineendet, si kotaagu eng' taitap Kamuktaindet agoi acheek: 25ma si kogoitogei konyil che chaang': ko uu ye wendi tisiindet ne oo ole-tiliil eng' kenyiit age tugul koibei korotiik che ma chechiik; 26amu nda ki uu nooto anyun ta kinyooljin konyalil konyil che chaang' kobooch ngelumda ng'wony; ago kagong'ang'ak nguno konyil agenge eng' kagesunetap kenyiisyek si kobiit koisto tengekto eng' tiseiywot ne ki ineendet. 27Ak ko uu ye ki king'at agobo piik kobek konyil agenge, ak ye ibata niito koek kirwooget; 28

9.28:
Isa 53.12
ko uu nooto Kristo agine, kingo kagigoito konyil agenge si koip tengekwogigap che chaang', ko tuun taagu ne po aeng', ma agobo tengek, ago agobo icheek che igeni ineendet agoi yetunet.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]