Revised Kalenjin Bible (KAPR)
31

Koyometapkei ak Misiri ko puch

311Pwo eng' icheek che choorchingei Misiri kocheeng'ei toreteet,

ak kotiegei paraisisyek;

ak komang'u kariisyek, amu chaang',

ak komang'u piik che ketei paraisisyek amu kiimeen kot;

ago ma inyali Ineendet ne Tiliil ne po Israel,

ama cheeng'ei Kamuktaindet ne Toroor!

2Ago utaat ineendet agine ak ibu yaityet,

ama walei ng'aleekyik;

ago ng'eetei kogirindoi kootap yaigap yaityet,

ak toretetap icheeget che yaei tengekto.

3Ago piik Misiriik, ak ma Kamuktaindet;

ak panyeek paraisisyekwak, ama kiy.

Ye chuul Kamuktaindet ne Toroor eunnyi,

keriichei ineendet ne toretisyei, ak ibuti ne ketoreti,

ak kobutos tuwai.

4Amu mwaei Kamuktaindet ne Toroor kole,

ko uu ye pooriseni ng'etundo ak ng'etundo ne parnotyot, agobo tyondo ne kagobar,

agot ngeguur mestoweek che chaang' koawenji ineendet,

koma arageni eng' waagannywa,

anan koming'injigei polatennywa.

Chorugei ko uu nooto Kamuktaindet ne Toroor ne po lugoosyek

koyai pooryeet eng' tulweetap Zion ak eng' tulweennyi ne ming'in.

5Ko uu ye tirirendos toriitik,

ko uu nooto riibei Kamuktaindet ne Toroor ne po lugoosyek Jerusalem;

riibei ak kosaru,

siirtoi kowendi koriibei.

6Oweekyigei ineendet ne ki ongelelji miising', ee lagogap Israel. 7Amu tuun wiirtoi chii age tugul eng' peetuunooto kanamonikyik che po fedha ak kanamonikyik che po thahabu, che kiyaiywok eunekwok koek tengekto.

8“Ibuti anyun Assyrianindet eng' rotwetap chok, ma rotwetap chii;

ak kobar ineendet rotwetap chok, ne ma po piik;

ak komwee rotwetap chok,

ak koek murenikyik otwogik.

9Ak komwei rwandennyi amu kamuiset,

ak kotoptobenso pounikyik amu songolyet ne kageer,”

mwaei Kamuktaindet ne Toroor ne mi maannyi Zion,

ak komi maannyi ne oo Jerusalem.

32

Pounateet ne po imanda

321Ogeero, laitorani laitoryat eng' imanda,

ak kobounis pounik eng' kirwooget.

2Egu chiito ole kiung'egei eng' usoonet,

ak eng' usoonet ne oo;

ko uu ainoosyegap peek eng' ole yaamaat,

ko uu urwetap rwandet ne oo eng' emetap ng'etatet.

3Ama kigerei konyegap icheeget che keertoi,

ak kogasta itigap icheeget che kastoi.

4Ak koguiyo naet ak icheek mugulelwegap icheeget che sartaisyei,

ak kong'alaalso komyee ng'elyebwegap che uueen kutusweek.

5Ma keguure kogeny chiito ne perber ne tagunoot,

anan keguure rebindet ne aiyeep.

6Amu ng'alaali ne perber kaberberisyet,

ak koyai muguleldanyi tengekto,

kochombilis,

komwa ne ya agobo Kamuktaindet ne Toroor,

kometo puch saboondo ne amei rubeet,

ak koete koee ne amei melel.

7Yaacheen tuguuk che po rebindet;

chobei chobutik che yaacheen

si kobare che talaen ng'aleek che po lembech,

agot ye ng'alaali ne ma tinyei kiy ng'aleek che lititen.

8Ago chobei ne tagunoot tuguuk che taagunotiin;

ak tebyei eng' tuguuk che taagunotiin.

Kateunet ne kiteechin kwonyiik

9Ong'eetyee okweek kwonyiik che omuunyi, ogas kutinnyu;

oepchi iit ng'aleekyuk okweek tiibiik che moriibegei.

10Amu kinyalilok eng' peetuusyek alak ko kagosiirto kenyiit,

okweek kwonyiik che moriibegei;

amu petei ruroteetap sabibuk,

ma piitu kesisyet.

11Obotanse okweek kwonyiik che omuunyi;

onyalilye, okweek che moriibegei;

oreegu ngoroik, ak otebi aach ngor,

ak ogermenegei kuniok.

12Luchei tegetik koriirchin mbareenik che korooron,

koriirchin keetiigap sabibuk che rurtos kot.

13Piitos katook che toorei piich ak che rutei piich eng' emetap piikyuk;

ee, eng' kooriik tugul che po poiboiyet

eng' nganaseet ne paibai.

14Amu kibagaaktoi kootap laitoryat;

kiue nganaseet ne mi piik che chaang';

tulweet ak teekseet ne kooi ne kitabendoe,

ko egu kebenonik koigeny

ole poiboitune sigirok che po timiin,

koek ole agete keechiirek;

15agoi keroong'wech Kabuuset ne Tiliil eng' parak,

ak koek surkwen mbareet ne rurei,

ak kiroge mbareet ne rurei, timiin.

16Tebee anyun kirwooget surkwen,

ak kotebee imanda mbareet ne rurei.

17Ak koek poisyetap imanda kaalyeet;

ak kobiitune imanda kamuung'et ak kamang'unet koigeny.

18Ak kotebee piikyuk meng'ootetap kaalyeet,

eng' meng'otosyek che riibootin,

ak eng' komoswek che kimuung'e ole siisaat.

19Ago roboni koigap ropta kot koluul timiin;

ak koluul nganaseet tugul.

20Oberuurotin okweek che ogoole tabanwegap peek komugul,

che iyooktoi keelyegap eito ak che po sigiryet.

33

Maonateet agobo katyaknateet eng' puunik

331Pwo eng' inyee ne ing'emisyei,

ama king'emin;

ak ne iberberisyei,

ama iberberin icheek!

Ye ma ing'emisyei, keng'emin,

ak ye ma iberberisyei,

koberberin icheek.

2Ee Kamuktaindet ne Toroor, rirenech; ki kigenin.

Egu kimnateennyo

eunnyo karonet age tugul,

ak iegu yetunennyo agine eng' peetuutap nyalilda.

3Mweei piik ye kas polatetap wasetapkei;

yestoi pororyosyek ye keng'eet.

4Ak kiyumi parunenik ko uu ye iyumi kuutik;

toroombenjin ko uu ye toroombeni chereng'enyinik.

5Toroor Kamuktaindet ne Toroor; amu menyei parak,

ki konyiit Zion kirwooget ak imanda.

6Tuun piitu kimnateet eng' peetuusyeguk,

ak ooindap yetunet, utaatyet, ak naet;

kaiyweisyet ne kiywei Kamuktaindet ne Toroor ko konorwennyi.

7Ogeero, waaktos eng' saang' piikwak che nyigoonen;

riirtos miising' tononjinigap kaalyeet.

8Kigelakta ortinwek che eecheen,

ma korutoi kiprutoiyot.

Ki kobut kayomisutik,

Ki kogas nganasook,

ma koiti chii.

9Riirei emet ak konyaluli;

ililani Lebanon ak koresei,

uu Saron surkwen,

ak poregei sok Bashan ak Karmel.

10Mwaei Kamuktaindet ne Toroor kole; “Kang'eet anyun nguno,

aeetu nguno;

atororitu nguno.

11Omanachi meteteek, oiyie mobeek;

kabuseng'wong' ko maat ne igeswok.

12Kergeitu piik ak taartaarik che kibeelei,

ko uu katok che kiluuli, che kibeelei eng' ma.”

13Ogas, okweek che oo looen, kiit ne kaayai;

ak okweek che oo neegit, ong'aany kamugennyu.

14Ki aragenso kiptengeginik che mi Zion;

ki konam potanet che ma iywei Kamuktaindet.

Mwaei icheek kole ng'oo eng' acheek ne imuuchi komeng'iis ak maat ne igeesu?

Ng'oo eng' acheek ne imuuchi komeng'iis ak maat ne lalei koigeny?

15Ineendet ne wendote imanda ak kong'alaali che lititen,

ineendet ne sasei kelunetap sastaet,

ne ma namei asoya,

ne timei itiikyik si ma kas agobo korotiik,

ak ne tuchei konyekyik si ma keer yaityet,

16menyei ineendet ole toroor;

oldanyi ole teegu ko irimoigap rwandosyek;

kigoochin amitwogikyik, ma rarchin peekyik.

17Keerei konyeguk karaaranindap laitoryat;

keerei icheek emet ne kiuiitogei.

18Ibwaati muguleldang'ung' agobo kamuiset:

“Mi ano ineendet ne iitisyei, mi ano ineendet ne kerei karagendoetap aisuruut?

Mi ano ineendet ne iiti teeksosyek che kooen?”

19Megeere piik che koroomen,

piik che paroen mookwekwak che memuuchi iguiye,

piik che ng'alaali kutit ne too ne memuuchi iguiye.

20Keer Zion, nganaseetap igoorwekyok che ki king'at!

Tuun keerei konyeguk Jerusalem,

meng'ootetap kamuung'et, emait ne ma kiutoi,

ne ma kitutu tigongenikyik agoi,

ama ng'etos poroonikyik.

21Ago tuun tebyei Kamuktaindet ne Toroor kobootech eng' olooto eng' etunatennyi,

ye mi ainoosyek che paroen ak kereruusyek,

ole ma punei moingetap peek ne kekwerye eng' mugangok che kiwase peek,

ama punei yooto meeliit ne karaaran.

22Amu Kamuktaindet ne Toroor ko kirwoogindennyo, ne koonech ng'atuutik,

Kamuktaindet ne Toroor ko laitoryandennyo; ineendet ne sarwech.

23Kagitustus porooniguk;

ma imuuch kogimit kelutap toloitap melinnywa,

ma imuuch koiito angeetap meeliit.

Kipcheak anyun parunenigap tuguuk che chaang' che ki kiluul;

ki nam che ing'waldos parunenik.

24Ak ma tuun mwaei ne meng'iisyei kole, “Amyani”;

kinyochin kaat tengekwogigap piik che menyei olooto.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]