Revised Kalenjin Bible (KAPR)
32

Pounateet ne po imanda

321Ogeero, laitorani laitoryat eng' imanda,

ak kobounis pounik eng' kirwooget.

2Egu chiito ole kiung'egei eng' usoonet,

ak eng' usoonet ne oo;

ko uu ainoosyegap peek eng' ole yaamaat,

ko uu urwetap rwandet ne oo eng' emetap ng'etatet.

3Ama kigerei konyegap icheeget che keertoi,

ak kogasta itigap icheeget che kastoi.

4Ak koguiyo naet ak icheek mugulelwegap icheeget che sartaisyei,

ak kong'alaalso komyee ng'elyebwegap che uueen kutusweek.

5Ma keguure kogeny chiito ne perber ne tagunoot,

anan keguure rebindet ne aiyeep.

6Amu ng'alaali ne perber kaberberisyet,

ak koyai muguleldanyi tengekto,

kochombilis,

komwa ne ya agobo Kamuktaindet ne Toroor,

kometo puch saboondo ne amei rubeet,

ak koete koee ne amei melel.

7Yaacheen tuguuk che po rebindet;

chobei chobutik che yaacheen

si kobare che talaen ng'aleek che po lembech,

agot ye ng'alaali ne ma tinyei kiy ng'aleek che lititen.

8Ago chobei ne tagunoot tuguuk che taagunotiin;

ak tebyei eng' tuguuk che taagunotiin.

Kateunet ne kiteechin kwonyiik

9Ong'eetyee okweek kwonyiik che omuunyi, ogas kutinnyu;

oepchi iit ng'aleekyuk okweek tiibiik che moriibegei.

10Amu kinyalilok eng' peetuusyek alak ko kagosiirto kenyiit,

okweek kwonyiik che moriibegei;

amu petei ruroteetap sabibuk,

ma piitu kesisyet.

11Obotanse okweek kwonyiik che omuunyi;

onyalilye, okweek che moriibegei;

oreegu ngoroik, ak otebi aach ngor,

ak ogermenegei kuniok.

12Luchei tegetik koriirchin mbareenik che korooron,

koriirchin keetiigap sabibuk che rurtos kot.

13Piitos katook che toorei piich ak che rutei piich eng' emetap piikyuk;

ee, eng' kooriik tugul che po poiboiyet

eng' nganaseet ne paibai.

14Amu kibagaaktoi kootap laitoryat;

kiue nganaseet ne mi piik che chaang';

tulweet ak teekseet ne kooi ne kitabendoe,

ko egu kebenonik koigeny

ole poiboitune sigirok che po timiin,

koek ole agete keechiirek;

15agoi keroong'wech Kabuuset ne Tiliil eng' parak,

ak koek surkwen mbareet ne rurei,

ak kiroge mbareet ne rurei, timiin.

16Tebee anyun kirwooget surkwen,

ak kotebee imanda mbareet ne rurei.

17Ak koek poisyetap imanda kaalyeet;

ak kobiitune imanda kamuung'et ak kamang'unet koigeny.

18Ak kotebee piikyuk meng'ootetap kaalyeet,

eng' meng'otosyek che riibootin,

ak eng' komoswek che kimuung'e ole siisaat.

19Ago roboni koigap ropta kot koluul timiin;

ak koluul nganaseet tugul.

20Oberuurotin okweek che ogoole tabanwegap peek komugul,

che iyooktoi keelyegap eito ak che po sigiryet.

33

Maonateet agobo katyaknateet eng' puunik

331Pwo eng' inyee ne ing'emisyei,

ama king'emin;

ak ne iberberisyei,

ama iberberin icheek!

Ye ma ing'emisyei, keng'emin,

ak ye ma iberberisyei,

koberberin icheek.

2Ee Kamuktaindet ne Toroor, rirenech; ki kigenin.

Egu kimnateennyo

eunnyo karonet age tugul,

ak iegu yetunennyo agine eng' peetuutap nyalilda.

3Mweei piik ye kas polatetap wasetapkei;

yestoi pororyosyek ye keng'eet.

4Ak kiyumi parunenik ko uu ye iyumi kuutik;

toroombenjin ko uu ye toroombeni chereng'enyinik.

5Toroor Kamuktaindet ne Toroor; amu menyei parak,

ki konyiit Zion kirwooget ak imanda.

6Tuun piitu kimnateet eng' peetuusyeguk,

ak ooindap yetunet, utaatyet, ak naet;

kaiyweisyet ne kiywei Kamuktaindet ne Toroor ko konorwennyi.

7Ogeero, waaktos eng' saang' piikwak che nyigoonen;

riirtos miising' tononjinigap kaalyeet.

8Kigelakta ortinwek che eecheen,

ma korutoi kiprutoiyot.

Ki kobut kayomisutik,

Ki kogas nganasook,

ma koiti chii.

9Riirei emet ak konyaluli;

ililani Lebanon ak koresei,

uu Saron surkwen,

ak poregei sok Bashan ak Karmel.

10Mwaei Kamuktaindet ne Toroor kole; “Kang'eet anyun nguno,

aeetu nguno;

atororitu nguno.

11Omanachi meteteek, oiyie mobeek;

kabuseng'wong' ko maat ne igeswok.

12Kergeitu piik ak taartaarik che kibeelei,

ko uu katok che kiluuli, che kibeelei eng' ma.”

13Ogas, okweek che oo looen, kiit ne kaayai;

ak okweek che oo neegit, ong'aany kamugennyu.

14Ki aragenso kiptengeginik che mi Zion;

ki konam potanet che ma iywei Kamuktaindet.

Mwaei icheek kole ng'oo eng' acheek ne imuuchi komeng'iis ak maat ne igeesu?

Ng'oo eng' acheek ne imuuchi komeng'iis ak maat ne lalei koigeny?

15Ineendet ne wendote imanda ak kong'alaali che lititen,

ineendet ne sasei kelunetap sastaet,

ne ma namei asoya,

ne timei itiikyik si ma kas agobo korotiik,

ak ne tuchei konyekyik si ma keer yaityet,

16menyei ineendet ole toroor;

oldanyi ole teegu ko irimoigap rwandosyek;

kigoochin amitwogikyik, ma rarchin peekyik.

17Keerei konyeguk karaaranindap laitoryat;

keerei icheek emet ne kiuiitogei.

18Ibwaati muguleldang'ung' agobo kamuiset:

“Mi ano ineendet ne iitisyei, mi ano ineendet ne kerei karagendoetap aisuruut?

Mi ano ineendet ne iiti teeksosyek che kooen?”

19Megeere piik che koroomen,

piik che paroen mookwekwak che memuuchi iguiye,

piik che ng'alaali kutit ne too ne memuuchi iguiye.

20Keer Zion, nganaseetap igoorwekyok che ki king'at!

Tuun keerei konyeguk Jerusalem,

meng'ootetap kamuung'et, emait ne ma kiutoi,

ne ma kitutu tigongenikyik agoi,

ama ng'etos poroonikyik.

21Ago tuun tebyei Kamuktaindet ne Toroor kobootech eng' olooto eng' etunatennyi,

ye mi ainoosyek che paroen ak kereruusyek,

ole ma punei moingetap peek ne kekwerye eng' mugangok che kiwase peek,

ama punei yooto meeliit ne karaaran.

22Amu Kamuktaindet ne Toroor ko kirwoogindennyo, ne koonech ng'atuutik,

Kamuktaindet ne Toroor ko laitoryandennyo; ineendet ne sarwech.

23Kagitustus porooniguk;

ma imuuch kogimit kelutap toloitap melinnywa,

ma imuuch koiito angeetap meeliit.

Kipcheak anyun parunenigap tuguuk che chaang' che ki kiluul;

ki nam che ing'waldos parunenik.

24Ak ma tuun mwaei ne meng'iisyei kole, “Amyani”;

kinyochin kaat tengekwogigap piik che menyei olooto.

34

Kirwooget ne ityin Pororyosyek

341Oriigu okweek pororyosyek, si ogas;

ak oep iit okweek piik!

Ingogas emet, ak tuguuk che nyiitaat olooto;

ng'wony ak tuguuk tugul che mang'une.

2Amu tinyei Kamuktaindet ne Toroor nyitatet agobo pororyosyek tugul,

ak nereegek che laldos agobo lugosyekwak tugul;

Ki kong'em icheek kogees, ki kogoito icheek kebar.

3Ki wiirtoi piikwak che kigebar,

ak puldos muuswekwak,

ak kochootyo tuloonook amu korotiikwak.

4

34.4:
Mat 24.29; Mar 13.25; Luk 21.26; Ng'a 6.13-14
Ak kochoot lugeet tugul ne po kipsengwet,

ak kemaman kipsengwet ko uu kartasit.

Ak kowandagei lugeennywa tugul,

ko uu sogoot ne ibuti eng' keetitap sabibuk,

ak ko uu sogoot ne ibuti eng' mogoywet.

5

34.5-17:
Isa 63.1-6; Jer 49.7-22; Ezk 25.12-14; 35.1-15; Amo 1.11-12; Oba 1-14; Mal 1.2-5
Amu ki koee rotwennyu po chok eng' kipsengwet kot konyi,

ogeero, choorchingei Edom,

ak choorchingei piik che ki achup, kirwookyi.

6Nyiitaat korotiik rotwetap chok ne po Kamuktaindet ne Toroor,

kigo akwait eng' akwaindo,

eng' korotiigap aaregap keechiir ak ng'oroorek,

kobooto mwanigap soromok che po mengichik.

Amu tinyei Kamuktaindet ne Toroor tiseiywot eng' Bosra,

ak parisyet ne oo eng' emetap Edom.

7Ak ki choorgei soenik kobooto icheek,

kiruugik che mengeechen kobooto kiruugik che eecheen.

Ak kobogite emennywa korotiik,

ak ko akwaitu temburyekwak eng' akwaindo.

8Amu peetuutap Kamuktaindet ne Toroor ne po yaaktaetap mugetuut,

kenyiitap kageeret ne po toiyetap Zion.

9Ak kewal kereruusyekyik koek manget,

ak kewal temburyekyik koek koik che laldos,

ak koek emennyi manget ne lalei.

10

34.10:
Ng'a 14.11; 19.3
Ma kimisi kemoi anan peet;

togostoi iyetanyi koigeny.

Egu karaatya kobooch ibinda age agoi ibinda age;

ma punei chii yooto koigeny ak koigeny.

11Ago punjin chebo kibabaa ak chepswererit;

ak komeny olooto sugurut ak chepkugit.

Ak kochuul eng' paragunnyi porowetap toiyet,

ak porowet ne po puch ne po kalititisyet.

12Kuurei icheek piik che taagunotiin kobwa laitornatet,

ago ma piitu chii eng' olooto;

egu puch pounikyik tugul.

13Ak kobitye katok kooriikyik che po laitorinik,

ak kobitye siwek ak katook che rutei piich irimoikyik.

Ak koek meng'ootetap lelwek,

ak seremutap tyong'igap songolik.

14Ak kotuiyo tyong'igap surkwen ak suik,

ak kowaach kwesta kowaakyi chorwennyi;

ee, tebee olooto sugurut ne po kemoi,

ak kosikyigei ole imuung'ee.

15Ak koteekyigei eng' olooto sugurut ne oo keswennyi,

ak kolok, ak kogeeny, ak koyumji aarekyik urwennyi;

ee, iyumjigei olooto keerosyek, age tugul ak koget.

16Ocheeng' ak osoman eng' bukuitap Kamuktaindet ne Toroor:

Ma petei agot agenge eng' chuuto,

ma mi ne rartae koget.

Amu kang'at kutinnyu,

ak kagoyum icheek kabuusennyi.

17Kigoseer parbareek agobo icheek,

ak kigopchechi icheek eunnyi eng' porowet;

punjin icheek agoi,

menyei olooto kobooch ibinda age agoi ibinda age.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]