Revised Kalenjin Bible (KAPR)
43

Kayomiset ne po weegunet ak riibetap Israel

431Ago mwaei anyun Kamuktaindet ne Toroor ne kiyain kole

ee Jakobo, ak ineendet ne kimimiin, ee Israel: kole,

meiywei, amu ki atyachin;

ki aguurin eng' kaineng'ung', ii nenyu.

2Ami kobooten ye ibune peek che chaang';

ak ye ibune ainoosyek,

koma imaluuchin;

ye ibune maat, koma peelin;

ama imelin liplibenetap maat.

3Amu aa Kamuktaindet ne Toroor Kamuktaindeng'ung',

Ineendet ne Tiliil ne po Israel, Yetindeng'ung';

kaagoite Misiri koek ne kityagenen, kobooto Kush ak Seba.

4Amu koiegu eng' anee ne achame miising',

ak ne kigonyiti, ak ki achamin;

agoitoi anyun piik agobo inyee,

ak agoite piik agobo sabeeng'ung'.

5Meiywei; amu ami kobooten:

amutu iyoteng'ung' eng' kong'asiis,

ayumin inyoo eng' cherongo;

6Amwachini murot kaataam,

aleenjini, Koonu;

ak amwachi murot tai aleenji,

Ametuuch; omutu weeriikyuk kobun ole loo,

ak omutu tiibiikyuk eng' ole poochin ng'wony;

7age tugul ne kimwaitoe kainennyu,

ineendet ne ki atau ayai agobo toroornatennyu;

ki amimii; ee, ki ayai.

8Omutu piik che koryotiin che tinyei koonyek,

ak omutu piik che ming'otin che tinyei itiik.

9Ingoyumgei pororyosyek tugul,

ak ingoyumgei piik:

ng'oo eng' icheek ne imuuchi komwa ng'olyoondoniito,

ak koboorwech tuguuk che po tai?

Ingomut paorinikwak,

si kobiit kiityi imanda:

anan ingogas, ak komwa kole,

po iman.

10Oo paorinikyuk, mwaei Kamuktaindet ne Toroor,

ak otwogindennyu ne ki alewen;

si kobiit onai ak oyana,

ak oguiye ole aa ineendet;

ma mi Kamuktaindet age ne kisip keyai eng' anee,

ama kobiitu age eng' let.

11Anee, ee, aneendet, aa Kamuktaindet ne Toroor;

ama mi yetindet age kobatena.

12Ki amwaite, ak ki asaru, ak ki abarte,

ama mi kamuktain ne teer eng' kwenung'wong':

oo paorinikyuk anyun, mwaei Kamuktaindet ne Toroor,

ak aa Kamuktaindet.

13Ee, aa ineendet kobooch agoi,

ama mi age ne imuuchi korep eng' eunnyu:

aboisyei, ak ng'oo ne imuuchi koger?

14Mwaei Kamuktaindet ne Toroor,

katyagindeng'wong',

Ineendet ne Tiliil ne po Israel,

ko uu ni, kole:

Ki ayookte ng'olyoot kwo Babilon agobo okweek,

ak achooru icheek tugul ko uu che mweoti,

chooto po Kaldeik,

eng' melisyek che poiboitune.

15Aa Kamuktaindet ne Toroor, neng'wong' Ne Tiliil,

Yaindetap Israel, Laitoryandeng'wong'.

16Mwaei Kamuktaindet ne Toroor,

ne yaei ooreet eng' nyanjet,

ak ooreet eng' peek che kiimeen;

17ne imoong'u chepkichutit

ak paraisiit kobooto lugeet

ak kimnateet; ruitos tugul ng'wony,

ama ng'eetos kogeny;

kagobetyo, kagimis ko uu kitambit:

18Amat obwaat tuguuk che po tai,

amat ogereerchi met tuguuk che po keny.

19Ogeero, ayae kiit ne leel;

piitu anyun nguno; tos monae?

Ayae ooreet eng' surkwen,

ak ainoosyek eng' surkwen.

20Konyita tyong'igap timiin,

lelwek ak tyong'igap songolik:

amu agoonu peek eng' surkwen,

ak ainoosyek eng' surkwen,

si anaga piikyuk, chechuuk che ki alewen:

21piik che ki ayachigei,

si kobiit kobarta kalasunennyu.

22Ago ma iguura, ee Jakobo;

ago ki ing'eet agobo anee, ee Israel.

23Ma igetwo aareguk koek kagoochinoiguk che kibeelei;

ama igonyitena tiseiyweguk.

Ma abirchin iotisye kagoochinoik,

ama aimeneen tuguuk che nyamdut.

24Ma ialunena fedha tuguuk

che uu mutweek che nyamdut,

ama igoono abiyo eng' mwanigap tiseiyweguk:

ago ki imena tengekwogiguk,

ki igoono ang'et agobo yaitwogiguk.

25Anee, ee aneendet ne aistoi pistaosyeguk,

amu kainennyu;

amabwaati tengekwogiguk.

26Ibwaatwa; ngeng'alaal tuwai:

tetu ng'aleeguk, si kobiit kiityin imanda.

27Ki yai tengekto kwandang'ung' ne po tai,

ak ki ingelelja ng'alaaliguk.

28Amurwoni anyun pounik che po ole-tiliil,

ak ayae Jakobo koek ne chuboot,

ak ayae Israel koek ne kisasei.

44

Israel ne lewenot

441Kas anyun nguno, ee otwogindennyu Jakobo; ak Israel ne ki alewen: 2Mwaei Kamuktaindet ne Toroor ne kiyain, ne kimimiin eng' moet, ne toretin, kole, meiywei, ee otwogindennyu Jakobo; ak inyee Jesurun, ne ki alewen. 3Amu aroong'jini peek ne amei melel, aroong'jini ainoosyek emet ne yaamaat: aroong'jini Kabuusennyu iyoteng'ung', ak aroong'jini perurtanyu lagoguk: 4ak kobiityo eng' ole mi susweek, ko uu keetiik che piitos eng' ole roote peek. 5Mwaei age kole, aa po Kamuktaindet ne Toroor; ak koguuregei age kainetap Jakobo; ak kosirchi age eunnyi kainetap Kamuktaindet ne Toroor; ak komwaitoegei kainetap Israel. 6

44.6:
Isa 48.12; Ng'a 1.17; 2.8; 22.13
Mwaei Kamuktaindet ne Toroor, Laitoryatap Israel, ak ko katyagindennyi Kamuktaindet ne Toroor ne po lugoosyek, kole, aa ne po tai ak ne po let; ama mi Kamuktaindet age kobatena. 7Ak ng'oo ne uu anee, ne kuurei, ak komwaita, ak kotetwa, kobooch ngap ande piigap keny? Ak ingomwa icheek tuguuk che pwoonei, ak che ta kosuldoi. 8Amoiywei, anan oaragense: tos ma amwaun niito keny, aboorun? Oo paorinikyuk. Tos mi Kamuktaindet age kobatena? Ee, ma miitei Rwandet; mangen age.

Berberindap saaetap kanamonik

9Puch icheeget tugul che yaei kanamonik che kiwaei; ak ma tinyei keljinet tuguukwak che iboiboegei: ak ma keertoi paorinikwak, ama naei; si kolilaanso. 10Ng'oo ne ki yai kamuktain, anan kotany kanamwet ne kiwaei, ne tinyei keljinet ne po puch? 11Ogeero, ililandos choronokyik tugul; ak po piik musogik: ingoyumgei tugul, ingotononso; iyweisyei, ililandos tugul.

12Itanyi kitang'indet aiywet, ak koboisyee nesek, ak kotang'e kiriswet, ak koboisyee eunnyi ne kiim: ee, amei rubeet, ak petei kimnateennyi; ma eei peek, ak kotanui. 13Iitoe musogindetap pagoinik porowet; ak komare kalamit; site rotonik, ak komare yiemutyet kariik che kimarse, ak kowai koigei itoondap chiito, ko uu karaaranindap chiito, si kobiit kotebee ko. 14Iluuljingei taragonik, ak koip piribiryet ak keetit age, ak koriipchigei age eng' keetiigap timiin: minei tarakwet ne sabul, ak koner amu ropta. 15Egu anyun keetoto ne ilaali chiito; ak ibei kweenikyik, ak kwo koyu; ee, ilaali, ak kobeele magatiinik: ee, yaei kamuktain, ak kosa; yaei koek kanamwet ne kiwaei, ak kogutung'ji. 16Ilaali alak; amei alak panyeek: watani pendo, ak kobiyo: ee, yue maat, ak kole, haa, kalalang'itu, kaageer maat: 17ak koyae che ng'etu kamuktain, nooto kanamwennyi ne kiwaei: ibutyin ak kogutung'jin, ak kosaaei, kole, sarwo; amu ii kamuktaindennyu.

18Ma ingen icheek, ama ibwaati: amu ki kogeer konyekwak, si ma keerto; ak koger mugulelwekwak, si ma iguiyo. 19Ama mi ne ibwaati, ama mi naet anan kaguiyet ne mwaei kole, Kaabeel alak eng' ma: ee, kaabeele magatiinik nesekyik kogeny; kaawatane panyeek ak aam: ak tos ayai ne kang'et koek kiit ne kiwechei? Tos abutyini kiit ne kiyae keetit?

20Amei oreek: kagomaas ineendet muguleldo ne iberberat, kot koma imuuchi kosar saboondanyi, anan komwa kole, tos ma mi lembeita eunnyu ne po tai? 21Ibwaat tuguuchuuto, ee Jakobo, ak Israel; amu ii otwogindennyu: ki ayain; ii otwogindennyu: ee Israel, mautyenen. 22Ki aiste pistaosyeguk, ko uu pooldet ne oo, ak ki aiste tengekwogiguk, ko uu pooldet: weekyage; amu ki atyachin. 23Ee okweek kipsengwet, Otyense, amu ki yai Kamuktaindet ne Toroor nooto; owaach okweek, komoswek che po oriit che po ng'wony; otyense, okweek tuloonook, ee timiin, ak keetit age tugul ne mi yooto: amu kagotyach Kamuktaindet ne Toroor Jakobo, ak kotoroorgei eng' Israel. 24Mwaei Kamuktaindet ne Toroor, katyagindeng'ung', ineendet ne kimimiin eng' moet, kole, aa Kamuktaindet ne Toroor, ne yaei tuguuk tugul; aneege ne aiitoi kipsengwet; ne aiitoi ng'wony; ng'oo ne mi kobooto? 25

44.25:
1Kor 1.20
Ne walei tartetap kiplembechonik koek puch, ak kogoochin che ng'oorsei koiiywenso; ne weechi piik che utaatiin koba let, ak koyaei naennywa koek perberyo: 26ne igimiti ng'olyootap otwogindennyi, ak kosuldoi kirwoogetap chechiik che kiyooktoi; ne mwaei agobo Jerusalem kole, tuun ki menyei; ak komwaei agobo nganasoogap Judah kole, tuun kiteechei, ak ang'eet komoswekyik che ki koek karatwek: 27ne mwachin rireet koleenjin, Yaam, ak ateenyi ainoosyeguk: 28
44.28:
2A.Pet 36.23; Ezr 1.2
ne mwaei agobo Cyrus kole, ineendet ko mestowondennyu, ak koyaei ineendet tuguuk tugul che achame: mwaei kogeny agobo Jerusalem kole, tuun kiteechei, ak komwachin Hekaluut koleenjin, Tuun kilumei lumeiyweguk.

45

Koboisyee `Kamuktaindet ne Toroor Cyrus

451Mwachin `Kamuktaindet ne Toroor Cyrus, nenyi ne iilaat, ne aname eunnyi ne po tai, koterteer pororyosyek eng' tainnyi, ak atyach suenutigap laitorinik; si ayaat kurgotik eng' tainnyi, ama kigerei ormariichok, komwaei kole; 2Andoenen, ak alitit komoswek che kunuuren: atonatoni kereiywegap sugunonik che po kurgotik, ak atil temeleiywek che po kariik: 3ak agoonin konoraigap mesundeito, ak mogornatosyek che ung'ootiin che po komoswegap ung'oot, si kobiit inai ile aa Kamuktaindet ne Toroor ne ki aguurin eng' kaineng'ung', Kamuktaindetap Israel. 4Ki aguurin eng' kaineng'ung' amu Jakobo otwogindennyu ak amu Israel nenyu ne ki alewen: kaataun kainet nganda tomo inaa. 5Aa Kamuktaindet ne Toroor, ama mi age; ma mi Kamuktaindet age kobatena: agermenin, nganda tomo inaa: 6si kobiit konai icheek kobooch ko kachor asiis, ak kobooch cherongo, kole ma mi age kobatena: aa Kamuktaindet ne Toroor, ama mi age. 7Ayae lapkeiyet, ak ayae mesundeito; ayae kaalyeet, ak ayae yaityet; aa Kamuktaindet ne Toroor, ne yaei tuguuchuuto tugul. 8Osau, okweek kipsengwet, ak ingorong' poolik imanda: ingoyaatak emet, si kobiit koip poolik yetunet, ak ingogoochi imanda kobiityo tugul; anee Kamuktaindet ne Toroor ne ki ayae nooto. 9

45.9:
Rom 9.20
Pwo eng' ineendet ne poortos ak Yaindennyi! Rokyet eng' rokyonigap ng'wony! Tos mwachin meneet ineendet ne kimimii, koleenjin, Iyae nee? Anan tos mwaei poisyeng'ung' kole, ma tinyei ineendet eunek? 10Pwo eng' ineendet ne leenjin kwandanyi, Iyie nee? Anan koteebe kwondo koleenji, amin moet agobo nee? 11Mwaei Kamuktaindet ne Toroor, Ineendet ne Tiliil ne po Israel, ak ko Yaindennyi, kole, teebena agobo tuguuk che pwoonei; ong'ata agobo weeriikyuk, ak agobo poisyetap eunekyuk. 12Ki ayae ng'wony, ak ki atau ayai chiito kotebee olooto: anee, ee, eunekyuk, che kiito kipsengwet, ak ki ang'at lugosyekwak tugul. 13Ki ang'eet ineendet eng' imanda, ak alititi ortinwekyik tugul: ineendet ne teechei nganasennyu, ak kotyach piikyuk che ki kimut, ma eng' alet anan melekto, mwaei Kamuktaindet ne Toroor ne po lugoosyek. 14Mwaei Kamuktaindet ne Toroor kole, nyonjinin poisyetap Misiri, kobooto tuguugap mung'areetap Kush, ak piigap Sabe, piik che kooen, ak punjinin; isubun; pwonjinin ko ratotiin; ak kobutyi keelyeguk, kosoomin, kole, Iman mi Kamuktaindet kobooten; ama mi age, ma mi Kamuktaindet age. 15Iman, ii Kamuktaindet ne iunyegei, ee, Kamuktaindetap Israel, Yetindet. 16Ililandos, ee, toptobendos icheek tugul; toitos tugul che yaei kanamonik. 17Ago saru Kamuktaindet ne Toroor Israel eng' yetunet ne po koigeny: molilandosi anan otoptobense koigeny ak koigeny. 18Amu mwaei Kamuktaindet ne Toroor ne ki toi koyai kipsengwet kole, Ineendet ko Kamuktaindet ne kimimii ng'wony ak koyai; ki igimit, ki ma yai koek puch, ki yai si kobiit kemeny: aa Kamuktaindet ne Toroor; ama mi age. 19Tom ang'alaal eng' ung'oot, eng' komostap emet ne po mesundeito; ma aleenji iyoteetap Jakobo, Ocheeng'a puch; amwae anee Kamuktaindet ne Toroor imanda, amwae tuguuk che litit. 20Oyumgei obwa; oriigu tugul, okweek che ki ochilile pororyosyek: ma tinyei naet icheek che ibei keetitap kanamwennywa ne ki kiwai, ak kosaaei kamuktain ne ma imuuchi kosar. 21Omwaite, obarte; ee, ingorwoch tugul: ng'oo ne ki iboor ng'olyoondoniito kobooch keny? Ng'oo ne ki mwaita kobooch keny? Tos ma anee Kamuktaindet ne Toroor? Ama mi Kamuktaindet age kobatena; Kamuktaindet ne po iman, ak ko yaindet; ma mi age kobatena. 22Onyala, si kesorwok, okweek tabanwek tugul che po ng'wony: amu aa Kamuktaindet, ama mi age. 23
45.23:
Rom 14.11; Phlp 2.10-11
Ki ayosyechigei, kagomang'une ng'olyoot kutinnyu eng' imanda, ama weechegei, ale, kutung'jino kutundo age tugul, iyastos ng'elyepta age tugul. 24Leenjino age, Mi eng' Kamuktaindet ne Toroor ineegei imanda ak kimnateet: pwaanjin `piik ineendet ak kolilaandos icheek tugul che ki nereekyi ineendet. 25Ki ityin imanda iyoteet tugul ne po Israel eng' Kamuktaindet ne Toroor, ak kolasunegei.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]