Revised Kalenjin Bible (KAPR)
54

Toroornatetap Zion

541

54.1:
Gal 4.27
Tyen, ee inyee ne ii soon, ne ma ii; tyen, ak iwaach, inyee ne ma inyooru ng'wanindo agobo sigisyet: amu chaang' lagogap ne mi ineegei kosiir lagogap osotyot, mwaei Kamuktaindet ne Toroor. 2Ibaraa ye mi emaing'ung', ak ingoiito icheek angoogap meng'otosyeguk; ameetee; igoit porooniguk, ak igimit tigongeniguk. 3Amu inaktoi komostap eutap tai ak ne po kaataam; ak konyaban iyoteng'ung' pororyosyek, ak kogoochi kemeny kogeny nganasook che kiga kelakta. 4Meiywei, amu melilani; anan itoptoben; amu ma kiteweerin, amu iutye teweernatetap ming'inateng'ung', ama ibwaati chotisyetap mosoknateng'ung'. 5Amu Yaindeng'ung' ko manong'otyondeng'ung'; Kamuktaindet ne Toroor ne po lugoosyek kainennyi ak Ineendet ne Tiliil ne po Israel ko katyagindeng'ung'. Kiguure ineendet Kamuktaindetap ng'wony komugul. 6Amu kigoguurin Kamuktaindet ne Toroor ko uu osotyot ne kigebagaakta, ne ki kigoochi koaragen eng' muguleldanyi, osotyot neta ko ming'in, ye kagion, mwaei Kamuktaindeng'ung'. 7Ki abagaakteen ne matya; ago ayumin eng' rireenet ne oo. 8Ki aung'enen togeennyu ne matya eng' nereegek che ing'irtogei; ago ariirenen eng' talasyet ne po koigeny, mwaei Kamuktaindet ne Toroor katyagindeng'ung'. 9
54.9:
Tau 9.8-17
Amu uu niito eng' anee peegap Noa: amu ko uu ye ki ayosye ale ma komarane emet peegap Noa kogeny, kayosye ko uu nooto ale ma nereekyinin kogeny, anan agerin kong'. 10Amu istogei tuloonook ak kiutoi tuloonook che mengeechen; ago ma istoenengei talasyennyu, ama ki istoi kayomisennyu ne po kaalyeet, mwaei Kamuktaindet ne Toroor ne rireenen. 11
54.11-12:
Ng'a 21.18-21
Ee inyee ne kinyaliili, ne wiirtoi usoonet ne oo, ama kigaigain, keero, alumdoi koiguk eng' saleiywek che korooron, ak alume lumeiyweguk koik che kiguure sapire. 12Ak ateege irimoiguk koik che piriireen, ak ayae ormariichoguk koik che kiguure bareqet, ak ayae tabanweguk tugul koik che korooron. 13
54.13:
Jhn 6.45
Ak ineeti Kamuktaindet ne Toroor lagoguk tugul; ak koeet kaalyeetap lagoguk. 14Ki kimiitin eng' imanda; ilooitu eng' nyalilda, amu meiyweisyei; ilooitu eng' kamuiset, amu mariikyinin. 15Keero, ngot kong'eet chii pooryeet, koma punwa: ibuti age tugul ne ing'eetyinin pooryeet. 16Keero, ki ayai kitang'indet ne kuutei maatap nesek, si kobiit karnet ne po poisyennyi, ak ki ayai ng'emindet si kong'emis. 17Ma kiberuuri karnet age tugul ne kiyaei si kogirinden; ak igikyini ng'elyepta age tugul ne kirindoin eng' kirwooget. Niito poroteetap otwogigap Kamuktaindet ne Toroor, ak imandanywa ne punwa, mwaei Kamuktaindet ne Toroor.

55

Keguurei che amei melelda

551

55.1:
Ng'a 21.6; 22.17
Ee chii age tugul ne amei melel, obwonjin peek, kobooto ineendet ne ma tinyei fedha; obwa anyun, oal ak oam; ee, obwa, oal divaik ak cheego ama eng' fedha anan eng' alyet. 2Amu nee si oboisyee fedha eng' tuguuk che ma amitwogik? Ak poisyeng'wong' agobo tuguuk che mobiyonyi? Oepcha iit miising', si oam che myach, ak ingoboiboitu saboonwekwok eng' che akwaen. 3
55.3:
Poi 13.34
Oep iit, ak obwanjo, ogas, si kosapcho saboonwekwok: ak kiyomisyige ak okweek kayomiset ne po koigeny, nooto rireenosyek che po iman, che po Daudi. 4Ogeero, ki agoite ineendet koek paoryat eng' pororyosyek, koek kandoindet, ak ko ng'atindet ne po pororyosyek. 5Keero, iguure pororyet ne mengen, ak kolabatyin pororyet ne ki ma kongenin, amu Kamuktaindet ne Toroor Kamuktaindeng'ung', ak amu Ineendet ne Tiliil ne po Israel; amu ki kotoroorin. 6Ocheeng' Kamuktaindet ne Toroor kota kimuuchi kenyoor, oguur kota ko neegit: 7ingometo kiptengekyot ooreennyi, ak ingometo ineendet ne ma po iman, kabwaatutikyik: ak ingoweekyigei Kamuktaindet ne Toroor, si koriiree; ak ingoweekyigei Kamuktaindennyo, amu nyochin kaat iman. 8Amu ma chekwok kabwaatutikyuk, ama chechuuk ortinwekwok, mwaei Kamuktaindet ne Toroor. 9Amu ko uu ye toroor kipsengwet kosiir ng'wony, ko uu nooto torooreen ortinwekyuk kosiir ortinwekwok, ak ko torooreen kabwaatutikyuk kosiir kabwaatutikwok. 10
55.10:
2Kor 9.10
Amu ko uu ye roboni ak kobuti teluji kobunu kipsengwet, ama weektagei olooto kogeny, ago ibisi ng'wony, ak kogoochi tuguuk kobiityo ak kong'atyo, ak kogoochi kesweek leetaindet, ak kogoochi amitwogik chiito ne amei; 11uu nooto ng'olyoondennyu ne mang'une kutinnyu: ma weekyinagei puch, ago yaei kosulda kiit ne amache, ak koboorei eng' kiit ne kiayooktochine. 12Amu tuun omandoi eng' poiboiyet, ak kindoiywok eng' kaalyeet: tyendos eng' taing'wong' tuloonook ak tuloonook che mengeechen, ak koraprap eunekwak keetiik tugul che po timiin. 13Piitei piribiryet kogeeri katok che toorei piich, ak kobiit momonyet kogeer katook che rutei piich: ak kibwaate kainetap Kamuktaindet ne Toroor, koek kaboorunet ne po koigeny ne ma ki istoi.

56

Saruunet agobo alak

561Mwaei Kamuktaindet ne Toroor kole, osup kirwooget, ak oyai imanda: amu neegit konyo yetunennyu, ak neegit keng'aany imandanyu. 2Iberuurot ne yaei chuuto, ak weeriitap chii ne namei chuuto miising' ne riibei sabato ama imurwoni, ne riibei eunnyi si ma yai yaityet age tugul. 3Amechamji toondet ne ki konamgei ak Kamuktaindet ne Toroor, kong'alaal kole, Itabaanena `Kamuktaindet ne Toroor piikyik: amechamji sirorto komwa kole, keero, aa keetit ne yaamaat. 4Amu mwaei Kamuktaindet ne Toroor ko uu ni agobo sirorinik che riibei sabatosyekyuk, ak che leweni tuguuk che iboiboa, ak che namei miising' kayomisennyu: 5kole, agoochini icheek kabwaatet ak kainet eng' koonnyu ak eng' irimoikyuk, kosiir weeriik ak tiibiik; agoochini kainet ne po koigeny, ne ma ki istoi. 6Amutu kogeny toek che namegei ak Kamuktaindet ne Toroor, si koboisyechi ineendet ak kocham kainetap Kamuktaindet ne Toroor, koek otwogikyik, age tugul ne riibei sabato ne ma imurwoni, ak konamei miising' arorutyennyu; 7amutu icheek kobwa tulweennyu ne tiliil, ak agoochi koboiboitu eng' koonnyu ne po saaet; kitaachei kagoochinoikwak che kibeelei ak tiseiywekwak, eng' kaptisisyennyu: amu kiguure koonnyu kootap saaet ne po pororyosyek tugul. 8Mwaei Kiptaiyat Kamuktaindet ne Toroor ne iyumi che kigetimda che po Israel, kole, ta ayumjini alak ineendet, che siirei chechiik che ki kiyum. 9Obwa, oamisye, okweek tyong'ik tugul che po timiin, ee, okweek tyong'ik tugul che po timiin. 10Koryotin riibiikyik, ma tinyei tugul naet; icheeget tugul ko sesenik che namotin kuut, ma imuuchi icheek kokwer; irotitoi, ruitos, chamei konuukso. 11Ee, kipkein sesenik, ma piyong'dos agoi; ak chuuto ko mestoweek che ma iguitos kiy: ki komaasta tugul koosup ooreenywa, kigosup chii tugul keljinennyi, eng' komosta age tugul. 12Mwaei kole, obwa, si aip divaik, si kee maiyek konyiiech; ak kergeitu peetuuni ak mutai; peetuut ne oo, ne siirtoot.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]