Revised Kalenjin Bible (KAPR)
10

Perberindap saaetap kanamonik

101Ogas ng'olyoot ne mwaiwok Kamuktaindet ne Toroor,

ee kootap Israel.

2Mwaei Kamuktaindet ne Toroor kole,

“Amat oneetkei ortinwegap pororyosyek,

amoaragense agobo kaboorunoigap kipsengwet;

amu aragendos pororyosyek, agobo chooto.

3Amu tangoita pitonwegap piik,

ebei age keetit eng' timiin,

ak chobei komyee musogindet aiywet koboisyee aiywet.

4Ki lelesonjine fedha ak thahabu;

ki igiige kipchumarisyek

si ma twagei.

5Uu icheek tiiret ne kimue toriitik,

che ma ng'alaaldos;

kanyool keibot, amu ma imuuchi kobendat.

Amoiywei icheek,

amu ma imuuchi koyai kiy ne ya,

amaimuuchi koyai kiy ne myee.”

6Ma mi ne ogerge, ee Kamuktaindet ne Toroor;

ii oo, ak ko oo kaineng'ung' eng' kamuktaet.

7

10.7:
Ng'a 15.4
Ng'oo ne ma iywein, ee Laitoryatap pororyosyek?

Nyoljinin toroornatet amu ma mi ne uu inyee eng' piik tugul che utaatiin che po pororyosyek,

ak eng' pounatosyekwak tugul.

8Ago uu icheek tugul tyong'ik ak ko abusotiin

kaneetisyet ne kineeti kanamonik, ko uu ye kineeti ketin.

9Miitei fedha che ki kitany kolebelitu che ki kiibune Tarsis,

ak thahabu che punu Upas,

nooto poisyetap musogindet ak po kitang'indetap thahabu;

buluu ngoroikwak ak ko arusen ne piriir;

poisyetap piik che ng'oomen chooto tugul.

10Ago Kamuktaindet ne Toroor ko Kamuktaindet ne Toroor ne po iman;

ineendet ko Kamuktaindet ne Toroor ne sabei,

ak ko laitoryat ne po koigeny.

Bbotani ng'wony amu nereegekyik,

amaimuuchi komuita pororyosyek eng' nereegekyik. 11Mwachi anyun icheek ko uu ni ileenji,

“Petos eng' ng'wony ak eng' kurereetap kipsengwet kamuktaik che ki ma koyaei kipsengwet ak ng'wony.

12Ki yai ng'wony eng' kamuktaennyi,

ki igimit ng'wonyuni eng' utotyennyi,

ak kiito kipsengwet eng' naennyi.

13Ye twek, kobiit wasetapkei ne po peek eng' kipsengwet,

ak kogoochi kibungweret kotogosta eng' ole poochin ng'wony.

Yachin ropta kalyelosyek,

imoong'u usoonet eng' ole ki kigonoree.

14Kergeitu chiito age tugul ak tyondo ama tinyei naet.

Ililani kitang'indet age tugul ne po thahabu eng' kanamwennyi ne ki kiwai.

Amu lembeita kanamwennyi ne ki kitany,

ama tinyei kabuset.

15Puch chooto, poisyetap ng'aalseet;

petos eng' peetuut ne ityin pirennywa.

16Ma uu chuuto kebebertap Jakobo;

amu po tai ineendet eng' tuguuk tugul.

Israel ko pororyetap porotennyi:

kainennyi ko Kamuktaindet ne Toroor ne po lugoosyek.”

Kimuti piik koba luuleet

17Iyum eng' emet tuguuguk che po mung'aaret,

ee inyee ne imenye irimeet.

18Amu mwaei Kamuktaindet ne Toroor kole,

Awirtoi piigap emoni peetuuni,

ak anyaliil icheek, si kobiit kogas.

19Pwo eng' anee, amu ng'wanindanyu!

Ng'waan kaguotenennyu.

Ago ki amwa ale, “Aragenennyu iman niito,

ak kanyool amuita.”

20Kigeng'em emainnyu,

ak kigeng'eti poroonikyuk tugul.

Kigoba lagokyuk kometaa,

Ama komi.

Ma komi chii ne teekwo ak kondaiywo emainnyu angook.

21Amu kigoigei mestoweek tyong'ik,

amata koteepse `icheek Kamuktaindet ne Toroor.

Amu nooro, ko mata konyoor anyun kaberuret,

ak kagiyesta keechiirekwak tugul.

22Ogaso! Kigasei ng'aleek kobwanei,

ak kirgirenet ne oo komang'une emetap murot kaataam,

si kobiit koyai nganasoogap Judah koek karaatya,

ole menyei lelwek.

23Ee Kamuktaindet ne Toroor, angen ale,

ma po uu chii ortinwekyik;

amaindochin chii kabwaatutikyik.

24Ee Kamuktaindet ne Toroor, itigoono,

ago eng' kirwooget;

ma eng' nereegeguk,

si meyaa aek puch.

25Rong'ji nereegeguk che ng'woneen pororyosyek che ma ingenin,

ak ortinwek che maguurei kaineng'ung';

amu kigoam Jakobo,

ee, kigoam ineendet kogees ak Ki kong'em meng'ootennywa.

11

Jeremiah ak riibetap kayomiset

111Ki nyoonji `ng'olyootap Kamuktaindet ne Toroor Jeremiah koleenji, 2“Ogas ng'aleegap kayomisoni, yeityo ong'alaalji piigap Judah ak piik che menyei Jerusalem. 3Mwachi icheek ileenji, mwaei Kamuktaindet ne Toroor, Kamuktaindetap Israel, kole, chuboot chiito ne ma kasei ng'aleegap kayomisoni, 4ne ki ang'at kwanisyekwok eng' peetuut ne ki amutu icheek komong' eng' emetap Misiri, komang'une maatap karnet ak aleenji, ‘Ogas iit kutinnyu ak oyai chooto, ko uu tugul che ang'atook, si oegu piikyuk anyun ak aegu Kamuktaindeng'wong'. 5Si kobiit agimiit kayasyoet ne ki ayosyechi kwanisyekwok, ale agoochini icheek emet ne nyiitaat cheego ak komi kumyat eng' chaang'indo, ko uu rani.’ ” Ki awolu anyun, ale, “Amen, ee Kamuktaindet ne Toroor.”

6Ki leenjo kogeny anyun `Kamuktaindet ne Toroor, mwaite ng'aleechuuto tugul eng' nganasoogap Judah ak eng' ortinwegap Jerusalem, ileenji, ogas ng'aleegap arorutyoni ak oyai. 7Amu ki abaoryanji kwanisyekwok eng' kagiiletapkei, kobooch peetuut ne ki amutu icheek komong' eng' emetap Misiri, agoi ra, ang'eete karon ak abaoryanjini, aleenjini, ogas iit kutinnyu. 8Ago ma kas iit, ama ep iit, ago kiwendot age tugul eng' uuindap muguleldanyi ne ya. Aipchini anyun icheek ng'aleek tugul che po kayomisoni, ne ki kang'at icheek koyai, ago ma yai.

9Kimwaiwo kogeny koleenjo Kamuktaindet ne Toroor, “Miitei chaamset kwenutap piigap Judah ak eng' piik che menyei Jerusalem. 10Ki koweekyigei tengekwogigap kwanisyekwak, che ki eesyo kogas ng'aleekyuk, ak ki isup kanamonik koot. Ki kobut kayomisennyu kootap Israel ak kootap Judah ne ki kayai kobooto kwanisyekwak. 11Ara amwae anyun anee Kamuktaindet ne Toroor ale, ogeero, aipchini icheek yaityet, ne ma imuuchi kochililee. Ririirchino, ago ma kasyini icheek. 12Eng' yooto anyun kobendi nganasoogap Judah ak piik che menyei Jerusalem, kobendi koriirchin kanamonik che igoochin nyamdutik. Ago ma saru icheek agot kitigin eng' peetuutap nyalildanywa kanamonichooto. 13Amu ko uu ole tee koitetap nganasoguk, ko uu nooto kanamoniguk, ee Judah. Ak ko uu ole tee koitetap ortinwegap Jerusalem, ko uu nooto ki olumde kapkorosusyegap kiit ne kililane, kapkorosusyek che kibeeljine Baal nyamdutik. 14Amesaa anyun agobo pichu, ameriir anan isaa agobo icheek. Amu ma agase icheek eng' peetuut ne riirchino amu nyalildanywa.”

15Tinyei iman nee chamanennyu eng' koonnyu, amu ki koyai tengek? Tos saruun kayasyosyek ak panyeek che itabaanatiin kong'eetee yaityoni? Tos ye iyae tengek ibaibaitu. 16Kiguure Kamuktaindet ne Toroor kaineng'ung', Emdit ne tuon, ne karaaran ak kotinyei logoek che myach. Ki ilaal maat eng' yooto eng' polatetap wasetapkei ne oo ak kagoilyo mooriikyik. 17Amu kagomwa Kamuktaindet ne Toroor ne po lugoosyek, ne kiminin, yaityet agobo inyee, amu yaityetap kootap Israel ak ne po kootap Judah, che ki koyachigei kotacha anereech amu ki igoochi Baal nyamdutik.

Chaamset agobo pareetap Jeremiah

18Ki koono Kamuktaindet ne Toroor naet agobo chaamsennywa ak ki anai.

Ki iboorwo ineendet poisyonikwak.

19Ago ki auu aarwetap keechiir ne tala,

ne ki kweryei kwo ole kieng'e;

ak ki ma anai ale Ki kochop `icheek chobutik che yaacheen agobo anee,

kole, ongeng'em keetit kobooto logoekyik,

ak ongeiste ineendet eng' emetap che saptos,

si mata kibwaat kainennyi kogeny.

20Ago, koono ageer yaaktaeng'ung' po mugetuut eng' icheek,

ee Kamuktaindet ne Toroor ne po lugoosyek,

ne irwoochi eng' imanda,

ne ityeme kabwaatutik ak muguleldo,

amu kaang'ang'un ng'olyoondennyu.

21Nooto anyun amu nee si komwaei Kamuktaindet ne Toroor agobo piigap Anatoth, che cheeng'ei saboondang'ung', kole, “Amat imaoten eng' kainetap Kamuktaindet ne Toroor, si ma ki parin acheek.” 22Mwaei anyun Kamuktaindet ne Toroor ne po lugoosyek kole, “Abire icheek. Pegu neranik eng' rotwetap chok, parei rubeet weeriikwak ak tiibiikwak, 23ama piitu che ng'etu eng' icheek. Amu aipchini yaityet piigap Anatoth, eng' kenyiit ne agikyini icheek abire.”

12

Tebutyetap Jeremiah

121Ii po iman, ee Kamuktaindet ne Toroor, ye ariirchinin,

nga amache atebeenen agobo ng'olyoondoni:

Amu nee anyun si kiberuur ooreetap kiptengeginik?

Amu nee si komuunyi icheek tugul che yaei kaberberisyet?

2Ki imin icheek, ak ki konam ng'wony tigitik;

eegitu, ee, iytos logoek.

Ii neegitee kutusweekwak,

ago ii loo eng' mugulelwekwak.

3Ago ingeno, ee Kamuktaindet ne Toroor,

Igeera ak ityeme muguleldanyu kotokyingei.

Ichuutu kobwa ko uu keechiirek che kienyei,

ye ibata itabaanji icheek peetuutap eng'seet.

4Iteei emet kot kotyanit, ak korestos sogegap emet komugul agoi au?

Amu sogornatetap piik che menyei olooto,

ko ki koges kei anyun ak ki kobek tyong'ik ak toriitik.

Amu ki le icheek, “Ma keerei ineendet kagesunennyo.”

5Ngot ko ki orwai ak piik che punei keelyek, ak kigogoonin ing'et,

Ko tos imuktoi ano anyun obargei ak paraisisyek?

Agot ngot itebye eng' chametapkei eng' emetap kaalyeet,

iyae nee anyun ye kanyi peek Jordan miising'?

6Ki koyaun kaberberisyet tupchosyeguk ak kootap kwandang'ung'.

Ki koriirchin miising'.

Ameyan icheek, agot nda mwaun ng'aleek che korooron.

7Ki abagaakte koonnyu, ki amete porotennyu,

ki agoochi chamaneetap saboondanyu kwo eunegap puunikyik.

8Kigoigei porotennyu eng' anee, ng'etundo ne miitei timiin.

Ki kowaagena ak ki awech anyun amu nooto.

9Tos ma igei porotennyu eng' anee toriityon ne legee, ne parisyei?

Ne kayiem ineendet toriitik che parisyei?

Ara oba anyun ak oyum tyong'ik tugul che po timiin;

ogetu kobwa koamis.

10Kigong'em mbareennyu ne po sabibuk mestoweek che chaang',

ki kotyegat kebebertanyu, ki koyai kebebertanyu ne karaaran koek surkwen ne ma mi kiy.

11Ki koyai koek karaatya;

riirchino, amu karaatya;

ki keyai emet komugul koek karaatya,

ak ma mi chii ne ibwaati emonooto.

12Katogosta piik che luulsei koba tuloonook tugul che churyotin eng' surkwen.

Amu parisyei rotwetap chok ne po Kamuktaindet ne Toroor kobooch tabanda age ne po emet,

agoi tabanda age.

Ara ma mi chii ne tinyei kaalyeet.

13Ki kool `icheek nganuuk ak kagoges katook;

kibirtogei ama kelji kiy.

Ililandos icheek amu logoekwak,

ak amu nereegek che ng'woneen che po Kamuktaindet ne Toroor.

Ng'emisyet kobun pororyosyek

14Mwaei Kamuktaindet ne Toroor ng'aleechooto agobo piik tugul che kiptengeginik che po kokwennyu, che twaei poroteet ne ki agoochi piikyuk Israel konam kobunji, kole: “Ogeero, atutu icheek eng' emennywa ak atutu kootap Judah komong' eng' kwenunnywa.” 15Ago ye kaatut icheek, aweechigei ak ariiree icheek. Ak amutu kogeny konyo age tugul porotennyi ak konyo age tugul emennyi. 16Ak ngot koneetkei ko ki iljigei ooreetap piikyuk, ak koyasyo eng' kainennyu kole, “Ko uu ye sabei Kamuktaindet ne Toroor ak ko uu ye ki ineet piikyuk koyasyo eng' Baal, keteechei anyun icheek eng' kwenutap piikyuk. 17Ago ngot koma cham kogas, atutu pororyonooto. Atutu anyun ak ang'em,” mwaei Kamuktaindet ne Toroor.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]