Revised Kalenjin Bible (KAPR)
12

Tebutyetap Jeremiah

121Ii po iman, ee Kamuktaindet ne Toroor, ye ariirchinin,

nga amache atebeenen agobo ng'olyoondoni:

Amu nee anyun si kiberuur ooreetap kiptengeginik?

Amu nee si komuunyi icheek tugul che yaei kaberberisyet?

2Ki imin icheek, ak ki konam ng'wony tigitik;

eegitu, ee, iytos logoek.

Ii neegitee kutusweekwak,

ago ii loo eng' mugulelwekwak.

3Ago ingeno, ee Kamuktaindet ne Toroor,

Igeera ak ityeme muguleldanyu kotokyingei.

Ichuutu kobwa ko uu keechiirek che kienyei,

ye ibata itabaanji icheek peetuutap eng'seet.

4Iteei emet kot kotyanit, ak korestos sogegap emet komugul agoi au?

Amu sogornatetap piik che menyei olooto,

ko ki koges kei anyun ak ki kobek tyong'ik ak toriitik.

Amu ki le icheek, “Ma keerei ineendet kagesunennyo.”

5Ngot ko ki orwai ak piik che punei keelyek, ak kigogoonin ing'et,

Ko tos imuktoi ano anyun obargei ak paraisisyek?

Agot ngot itebye eng' chametapkei eng' emetap kaalyeet,

iyae nee anyun ye kanyi peek Jordan miising'?

6Ki koyaun kaberberisyet tupchosyeguk ak kootap kwandang'ung'.

Ki koriirchin miising'.

Ameyan icheek, agot nda mwaun ng'aleek che korooron.

7Ki abagaakte koonnyu, ki amete porotennyu,

ki agoochi chamaneetap saboondanyu kwo eunegap puunikyik.

8Kigoigei porotennyu eng' anee, ng'etundo ne miitei timiin.

Ki kowaagena ak ki awech anyun amu nooto.

9Tos ma igei porotennyu eng' anee toriityon ne legee, ne parisyei?

Ne kayiem ineendet toriitik che parisyei?

Ara oba anyun ak oyum tyong'ik tugul che po timiin;

ogetu kobwa koamis.

10Kigong'em mbareennyu ne po sabibuk mestoweek che chaang',

ki kotyegat kebebertanyu, ki koyai kebebertanyu ne karaaran koek surkwen ne ma mi kiy.

11Ki koyai koek karaatya;

riirchino, amu karaatya;

ki keyai emet komugul koek karaatya,

ak ma mi chii ne ibwaati emonooto.

12Katogosta piik che luulsei koba tuloonook tugul che churyotin eng' surkwen.

Amu parisyei rotwetap chok ne po Kamuktaindet ne Toroor kobooch tabanda age ne po emet,

agoi tabanda age.

Ara ma mi chii ne tinyei kaalyeet.

13Ki kool `icheek nganuuk ak kagoges katook;

kibirtogei ama kelji kiy.

Ililandos icheek amu logoekwak,

ak amu nereegek che ng'woneen che po Kamuktaindet ne Toroor.

Ng'emisyet kobun pororyosyek

14Mwaei Kamuktaindet ne Toroor ng'aleechooto agobo piik tugul che kiptengeginik che po kokwennyu, che twaei poroteet ne ki agoochi piikyuk Israel konam kobunji, kole: “Ogeero, atutu icheek eng' emennywa ak atutu kootap Judah komong' eng' kwenunnywa.” 15Ago ye kaatut icheek, aweechigei ak ariiree icheek. Ak amutu kogeny konyo age tugul porotennyi ak konyo age tugul emennyi. 16Ak ngot koneetkei ko ki iljigei ooreetap piikyuk, ak koyasyo eng' kainennyu kole, “Ko uu ye sabei Kamuktaindet ne Toroor ak ko uu ye ki ineet piikyuk koyasyo eng' Baal, keteechei anyun icheek eng' kwenutap piikyuk. 17Ago ngot koma cham kogas, atutu pororyonooto. Atutu anyun ak ang'em,” mwaei Kamuktaindet ne Toroor.

13

Kalewenet agobo pireneet

131Kimwaiwo Kamuktaindet ne Toroor kole, “Ui, ak ialjige pireneetap angeet ne karaaran ak irategei, amat inde peek.” 2Ki aal anyun pireneet ko uu ng'olyootap Kamuktaindet ne Toroor ak arategei. 3Ki nyoonjo ng'olyootap Kamuktaindet ne Toroor ne po aeng', koleenjo, 4“Nam pireneet ne kaial nooto kerategei ak ing'eet iwe Yufrets, yeityo iuny eng' yooto eng' keriinget ne mi rwandet.” 5Ara ki awe anyun, ak auny eng' ole neegitee Yufrets, ko uu ye king'ata Kamuktaindet ne Toroor.

6Kingo pata peetuusyek che chaang', komwaiwo Kamuktaindet ne Toroor koleenjo, “Ng'eet, ui Yufrets ak inemu pireneet ne ki kang'atiin iuny eng' yooto.” 7Ara ki awe anyun Yufrets ak kinga pal, anemu pireneet eng' ole kigaung'e. Ago kiga kong'emak pirenooto, ki ma kota kotilei kiy.

8Yeityo konyoonjo ng'olyootap Kamuktaindet ne Toroor kole, 9“Mwaei Kamuktaindet ne Toroor kole, ang'eme menoteetap Judah ko uu niito kobooto menoteet ne oo ne po Jerusalem. 10Igeitu pirenoni ma kotilei kiy, pichu yaacheen, che eesyoi kogas ng'aleekyuk, che pendote uuindap mugulelwekwak, ak kosuboti kamuktaik che teer, si koot icheek ak kolas. 11Amu ko uu ye namegei pireneet ak suetap chii, ko uu nooto anyun kaagoochi koot komugul ne po Israel ak koot komugul ne po Judah kenamge, mwaei Kamuktaindet ne Toroor, si kobiit koek eng' anee pororyet, kainet, kalasunet ak teegisto. Ago ma cham kogas.”

Kalewenetap tereetap divaik

12Mwachi anyun icheek ng'olyoondoni, ileenji, “Mwaei Kamuktaindet ne Toroor, Kamuktaindetap Israel kole, ‘Kinyiiti divaik tereet age tugul.’ Ago teebenen icheek kole, ‘Tos ma kingen keele kinyiiti divaik tereet age tugul?’ ” 13Ileenji anyun icheek, mwaei Kamuktaindet ne Toroor kole, ogeero, anyiiti pogitet piik tugul che menyei emoni, laitorinik che tebee ng'echereetap laitornatet ne po Daudi, tisiik, maotik ak piik tugul che menyei Jerusalem. 14Ak atue chii age age, kwanisyek ak weeriik, mwaei Kamuktaindet ne Toroor. Ma riiree anan abagaakte anan koriira moo, kot ko magesu icheek. 15Ogas anyun, oep iit, amomenie. Amu kagomwa Kamuktaindet ne Toroor. 16Ogonyit Kamuktaindet ne Toroor Kamuktaindeng'wong',

kotom koip mesundeito konyo,

kotom kinach keelyekwok eng' tuloonoogap mesundeito.

Ak ye ocheeng'e lapkeiyet, kowal koek urwetap meet ak koyai koek mesundeito ne oo.

17Ago ngot ko mogas ng'olyoondoniito,

koriirei saboondanyu eng' ung'oot agobo menateng'wong',

ak ariir miising', kot koba peegap kong',

amu kageluul keechiiregap Kamuktaindet ne Toroor.

18Mwachi laitoryat ak kametap laitoryat, ileenji,

oming'inge, otebee ng'wony:

ki kobutyo chepkuloikwok,

chooto ko naaryeetap toroornateng'wong'.

19Kigeger nganasook che po murot tai,

ama mi chii ne yaatei:

ki kimut Judah tugul koek luulenik,

ki kimut tugul koek luulenik.

20Ong'eet met ak ogeer icheek che punu murot kaataam.

Mi ano keechiirek che ki kigoonin, keechiireguk che korooron?

21Tos mwaei nee ye tuun inde ineendet choronoguk koboun,

ak ko inyee ne ki ineeti icheek?

Tos manamin ng'waninwek, ko uu kwondo ne machei kosigiis?

22Ak ngot imwa eng' muguleldang'ung' ile,

amu nee anyun si kobwanjo tuguuchuuto?

Kageng'aany ngoroiguk amu ooindap tengektong'ung',

ak kagonyoor kwariniguk ng'wanindo.

23Tos imuuchi kowal Ethiopiaindet iriryondennyi,

anan kowal cheplanget simormorindanyi?

Ngo uu nooto, omuuchi ak okweek oyai ne myee, che ki onaite oyae yaityet.

24Ayestoi anyun icheek, ko uu mobeek che ibei usoonetap surkwen.

25Kebebertang'ung' niito, kebeberta ne punwa ne ki kigerun,

mwaei Kamuktaindet ne Toroor;

amu ki iutyeno ak imang'u lembechek.

26Ang'aanye anyun agane ngoroiguk kot koit metit,

si kotook teweernateng'ung'.

27Ki ageer tuguuguk che kiwechei,

ibeetapkei neng'ung' ak kateeng'ung' ne po mageet,

tengektap kugoinateng'ung' eng' tuloonook che mi kewanin.

Pwo eng' inyee, ee Jerusalem! Memache itiliiliitu,

yaaksei niito kot kotyanit?

14

Kemeut ne piitu eng' Judah

141Ki nyoonji Jeremiah ng'olyootap Kamuktaindet ne Toroor agobo kemeut. 2Ki mwa kole, itei Judah ak nyaluldos ormariichokyik,

tebyei piikyik koteitos,

ak kotogosta riiregap Jerusalem.

3Iyooktoi piikwak che taagunotiin kiboitiinikwak koba ole mi peek:

pendi agoi keriingonik, ama nyooru peek.

Weeksei kiboitiinik puch ak tereenikwak;

kolililandos, kotoptobendos ak kogatuch metowekwak eng' arageneet.

4Ililandos che ibatisye ak kotuchei metowekwak,

amu emet ne ki kobetak,

ak amu ki ma kota komi ropta emet.

5Ee, yiei kenyeleet agine eng' kewanin,

ak kobagaakta arwennyi,

amu ma mi susweek.

6Tonondos ak icheek sigirogap timiin eng' tuloonook che churyotin,

isyendos ko uu lelwek;

imenitu konyekwak, amu ma komi kiy ne tuon.

7Nga paoryanjinech tengekwogikyok,

iboisye ee Kamuktaindet ne Toroor, amu kaineng'ung'.

Amu chaang' kachuchugosyekyok pogei,

ak kigeyaun acheek tengek.

8Ee inyee kamang'unetap Israel,

yetindennyi eng' peetuutap nyalilda,

amu nee si iige toondet eng' emet,

ak iige kiprutoiyot ne mastoi koruei kemout agenge?

9Amu nee si iige chii ne kakwong',

kalya iige chii ne kiim, ne ma imuuch kosaruunis?

Ago inyee, ee Kamuktaindet ne Toroor, imi kwenunnyo ak kimwaitaenech kaineng'ung'; amemetech.

10Mwachin Kamuktaindet ne Toroor pichu kole;

“Ki cham ko uu nooto koombenso;

tomo koisto keelyekwak.

Mataachei anyun anee icheek amu nooto.

Ago abwaati aneendet tengektonywa,

ak aityin pireet amu tengekwogikwak.”

11Ak kimwaiwo Kamuktaindet ne Toroor koleenjo, “Amat isaa isomji pichu myeeindo. 12Agot ye irugutkei icheek, koma kase riirekwak, ak ye igoito kagoochinet ne kibeelei, kobooto kagoochinetap peek che ng'ootiin, ko mataache. Ago ageesu icheek eng' rotwetap chok, rubeet ak koroito.”

13Ago ki amwa anyun ale, ee, Kiptaiyat Kamuktaindet ne Toroor! Keero, mwachin maotik icheek, koleenji, “ ‘Maityinok rotwetap chok, amonyooru rubeet; ago agoonok kaalyeet ne po iman eng' olito.’ ”

14Ago ki leenjo anyun Kamuktaindet ne Toroor, maoteni maotik lembechek eng' kainennyu. Ma ayookte icheek, ama ang'at icheek anan ang'alaalji. Maotenwok ng'ang'utyet ne po lembech, kobooto ng'oorset ak kiit ne po puch ak kaberberisyetap mugulelwekwak. 15Amu nooto anyun komwae Kamuktaindet ne Toroor ko uu ni agobo maotik che maoteni eng' kainennyu; Nga ma ayookte icheek, komwae komwaei icheek koleen, ma piitu rotwetap chok anan rubeet eng' emoni. Kigeesu maotichooto eng' rotwetap chok ak rubeet. 16Ak kewiirchi ortinwek che po Jerusalem piik che ki maotenjin, amu rubeet ak rotwetap chok. Ama piitu chii ne tubei icheek, osotikwak, weeriikwak ak tiibiikwak. Amu aroong'jini icheeget yaityennywa. 17Mwachi icheek ng'olyoondoni ileenji,

“Ingoba peekyuk po kong' kemoi ak peet, amat kosiisyo,

amu kail ne pergeiyat, nooto piikyuk,

eng' ilet ne oo ak eng' kaguotenet ne ng'waan miising'.

18Ngot ale awo mbar,

ageere che ki kebare rotwetap chok!

Ak ngot ale awo nganaseet,

ageere ale miitei che nyaluldos amu rubeet!

Amu pendoti eng' emet maotik ak tisiik ama tinyei naet.”

19Tos ki ieesye Judah iman?

Tos kigowech saboondang'ung' Zion?

Amu nee si ibirech, ama mi kasoobet eng' acheek?

Ki kigen kaalyeet, ago ma nyo kiy ne myee;

ki kigen peetuutap kasoobet ak keero, ki piit arageneet!

20Ee Kamuktaindet ne Toroor, king'aanye tengektonyo,

ak yaityetap kwanisyekyok,

amu kigeyaun tengekto.

21Amat iwechech amu kaineng'ung',

ameteweer ng'echereetap laitornatet ne po toroornateng'ung'.

Ibwaat, amat ibut kayomiset ne kigaiyomiswech.

22Tos mi eng' age tugul eng' kanamonik che ma tilei kiy che po pororyosyek,

ne imuuchi kogoon ropta?

Anan tos imuuchi kipsengwet kogoon ropta ne inesi?

Tos ma inyeendet Kamuktaindet ne Toroor, Kamuktaindennyo?

Ara anyun kimang'un inyee,

amu inyee ne yae tuguuchuuto tugul.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]