Revised Kalenjin Bible (KAPR)
26

Komi ng'oiyondit sabeetap Jeremiah

261

26.1:
2Lai 23.36-24.6; 2A.Pet 36.5-7
Ki pun ng'olyondoni Kamuktaindet ne Toroor eng' taunetap laitornatetap Jehoiakim weeriitap Josiah, laitoryatap Judah, kole, 2Kamwa Kamuktaindet ne Toroor kole: Tonon eng' seremutap kootap Kamuktaindet ne Toroor, ak ing'alaalji nganasook tugul che po Judah, che cham kobwanei kolasu eng' kootap Kamuktaindet ne Toroor, mwachi ng'aleek tugul che ang'atiin; imwachi; ametuuch ng'olyoo. 3Abeere imuuchi kogas, ak koweek chii age tugul eng' ooreennyi ne ya; si kobiit awal kabwaatutikyuk eng' yaityet ne kiga achop ale ayachini icheek amu yaityetap poisyonikwak.

4Ak ileenji icheek, Kamwa Kamuktaindet ne Toroor kole: Ngot ko mocham ogasa, obendate ng'atuutikyuk, che ki ande taing'wong', 5ogas ng'aleegap otwogikyuk maotik, che ayookwok, ang'eete karon miising' ak ayookwok, ago ki ma ogas; 6

26.6:
Jos 18.1; T.Kal 78.60; Jer 7.12-14
ayae anyun kooi koigei Shiloh, ak ayai nganasani koek ne sasei pororyosyek tugul che po ng'wony.

7Ak kigasei tisiik ak maotik ak piik tugul komwaei Jeremiah ng'aleechuuto eng' kootap Kamuktaindet ne Toroor. 8Ak kingo kagogees Jeremiah ng'alaalet tugul ne kiga ng'at Kamuktaindet ne Toroor komwachi piik tugul, konam anyun tisiik ak maotik ak piik tugul ineendet, koleenji, imee iman. 9Amu nee si imaoten eng' kainetap Kamuktaindet ne Toroor, ile, Igeitu koi Shiloh, ak koek karaatya nganasani, amaa komenyei chii? Ak ki iyumjigei piik tugul Jeremiah eng' kootap Kamuktaindet ne Toroor.

10Ak kingo kas pounigap Judah tuguuchuuto, kotogos eng' kootap laitoryat kobwa kootap Kamuktaindet ne Toroor; ak ki tep ng'wony eng' ole kibunei eng' ormariichet ne leel ne po kootap Kamuktaindet ne Toroor. 11Yeityo komwachi tisiik ak maotik, pounik, ak piik tugul koleenji, Nyoljin meet chiichi; amu kogomaoten kiit ne ya agobo nganasani, ko uu ye koogas eng' itiikwok.

12Yeityo komwachi Jeremiah pounik tugul ak piik tugul koleenji, Ki iyookwo Kamuktaindet ne Toroor amaoten kiit ne ya agobo kooi ak nganasani, amwa ng'aleek tugul che koogas. 13Nooto anyun, olitit ortinwekwok ak poisyonikwok, ak ogas iit kutitap Kamuktaindet ne Toroor Kamuktaindeng'wong'; si kowal Kamuktaindet ne Toroor kabwaatutikyik eng' yaityet ne kogomwa agobo okweek. 14Ago ogeero, ami anee eung'wong': oyaiywo ko uu ye ogeere ole myee ak ko po iman. 15Ago onai komyee ole, ngot obara, oipchinigei korotiik che ma tinyei tengek, kobooto nganasani, ak piik tugul che menyei olito: amu kagoyokwo Kamuktaindet ne Toroor iman anyo amwaiwok ng'aleechuuto tugul ogase.

16Yeityo komwachi pounik ak piik tugul tisiik ak maotik koleenji: Ma nyooljin meet chiichi; amu kagong'alaalwech eng' kainetap Kamuktaindet ne Toroor Kamuktaindennyo. 17Kong'eetyo anyun poisyek alak che po emet, ak komwachi tuiyet tugul ne po piik koleenji, 18

26.18:
Mik 3.12
Ki maoten Mikaia meng'iindetap Moresheth eng' peetuusyegap Hezekiah laitoryatap Judah; ak ki ng'alaalji piik tugul che po Judah koleenji, kamwa Kamuktaindet ne Toroor ne po lugoosyek kole: Kibati Zion ko uu ye kibati mbareet, ak koek Jerusalem karurugutik, ak koigei tulweetap koot komoswek che torooreen che po timiin. 19Tos kita kobar Hezekiah laitoryatap Judah ak Judah tugul ineendet? Tos ki ma iywei Kamuktaindet ne Toroor ak kogaigai Kamuktaindet ne Toroor, kot kowal Kamuktaindet ne Toroor kabwaatutikyik eng' yaityet ne kiga komwa agobo icheek? Ngot keyai ko uu nooto, ko kagiipchi saboonwekyok yaityet ne oo.

20Ak ki mi chiito age agine ne ki maoten eng' kainetap Kamuktaindet ne Toroor, ineendet ko ki Uriah weeriitap Semaiah ne po Kiriath-Jearim; ak ki maoten kiit ne ya agobo nganasani ak emet, ko uu ng'aleek tugul che po Jeremiah. 21Ak ye kingo kas Laitoryat Jehoiakim, kobooto piikyik tugul che nyigoonen, ak pounik tugul, kogicheeng' laitoryat kobar ineendet; ago ye kingo kas Uriah, koywei ak komwei, kwo Misiri. 22Ak ki iyookto Laitoryat Jehoiakim piik koba Misiri, chooto ko Elnatan weeriitap Akbor, ak piik alak che ki mi kobooto ineendet, koba agoi Misiri; 23ak ki imut Uriah eng' Misiri, komutyi Jehoiakim laitoryat, ne ki par ineendet eng' rotwetap chok, ak kowiirchi muustonyi kereeriisyegap piik che ma taagunotiin.

24Ago ki riip Aikam weeriitap Sapan Jeremiah, si ma kigoito ineendet kobar piik.

27

Kateunet agobo Judah

271Ki nyoonji Jeremiah ng'olyoondoni kobunu Kamuktaindet ne Toroor eng' taunetap laitornatetap Jeoikam weeriitap Josiah, laitoryatap Judah, 2koleenji, kamwaiwo Kamuktaindet ne Toroor kole, yachigei anook ak chogisyek, ak iratyi kaating'ung'; 3yeityo iyookyi laitoryatap Edom, ak laitoryatap Moab, ak laitoryatap lagogap Ammon, ak laitoryatap Tyro, ak laitoryatap Sidon, koip piik che kiyooktoi che pwoonei Jerusalem kap Zedekiah laitoryatap Judah: 4ak iyomis icheek koba kapkiptainikwak koleenji kamwa Kamuktaindet ne Toroor ne po lugoosyek, Kamuktaindetap Israel, kole: Omwachini kiptainikwok ko uu ni oleenjini: 5Ki ayai ng'wonyuni, chii ak tyony che miitei ng'wony, eng' kamuktaennyu ne oo ak eunnyu ne chuulaat; ak agoochi emoniito ineendet ne ageere ale nyolu agoochi. 6Kaagoochi anyun emotinwechuuto tugul Nebukadnezar laitoryatap Babilon, otwogindennyu, kaagoochi ineendet tyong'igap timiin koot ineendet. 7Ak koot pororyosyek tugul ineendet ak weeriitnnyi, agoi koit peetuusyegap emennyi: ak koyae anyun pororyosyek che chaang' ak laitorinik che eecheen ineendet koek otwogindennywa.

8Ak tuun abire pororyet ak pounateet ne maotei Nebukadnezar niito laitoryatap Babilon, ak ne eesyoi konde kaatinnywa chogitap laitoryatap Babilon, abire pororyonooto rotwetap chok, ak rubeet, ak koroito, agoi ageesu icheek eng' eunnyi, mwaei Kamuktaindet ne Toroor. 9Ago, amogas okweek maotikwok anan piikwok che ng'oorsei anan karwotitaosyekwok anan chepsogeinik anan pooniik, che ng'alaalwok koleenjinok, Moote laitoryatap Babilon: 10amu maotenwok lembeita, si koistook olooegitu eng' emeng'wong'; kole si aoonak olusye. 11Ago pororyet ne kase iit laitoryatap Babilon, ak koot ineendet, abagaaktoi pororyonooto kong'et eng' emennywa, mwaei Kamuktaindet ne Toroor; ak kobat emonooto, ak komeny olooto.

12Ak ki ang'alaalji Zedekiah laitoryatap Judah ko uu ng'aleechuuto tugul aleenji, Onde kaating'wong' chogitap laitoryatap Babilon, ak oot ineendet ak piikyik, si osapche. 13Amu nee si imee, inyee kobooto piiguk, eng' rotwetap chok, ak eng' rubeet, ak eng' koroito, ko uu ye kogomwa Kamuktaindet ne Toroor agobo pororyet ne ma chamei koot laitoryatap Babilon? 14Amogas ng'aleegap maotik che ng'alaalwok koleenjinok, Moote laitoryatap Babilon: amu maotenwok lembeita. 15Amu ma ayoogu icheek, mwaei Kamuktaindet ne Toroor, ago maoteni lembechek eng' kainennyu kole si aoonak, ak olusye, okweek ak maotik che maotenwok.

16Ki ang'alaalji tisiik ak icheek ak pichu tugul aleenji, Kamwa Kamuktaindet ne Toroor kole: Amogas ng'aleegap maotikwok che maotenwok koleenjinok, Ogeero, neegit si keeweech kogeny tereenigap kootap Kamuktaindet ne Toroor eng' Babilon: amu maotenwok lembeita. 17Amogas pichooto; oot laitoryatap Babilon si osapche: amu nee anyun si koek karaita nganasani? 18Ago ngot ko maotik icheeget, ak ngot komi ng'olyootap Kamuktaindet ne Toroor eng' icheek, ingosa anyun Kamuktaindet ne Toroor ne po lugoosyek, si ma ki ip tereenik che ki ng'et eng' kootap Kamuktaindet ne Toroor, ak eng' kootap laitoryatap Judah, ak eng' Jerusalem, koba Babilon. 19Amu kamwa Kamuktaindet ne Toroor ne po lugoosyek ko uu ni agobo tolochik, ak nyanjet, ak ng'echerok che tebee tuguuk, ak che ng'etunotiin che po tereenik che ki ng'et eng' nganasani, 20che ki ma ip Nebukadnezar laitoryatap Babilon, ye kiluulei Jekoniah weeriitap Jehoiakim, laitoryatap Judah, komut eng' Jerusalem kwo Babilon, ak piik tugul che taagunotiin che po Judah ak Jerusalem;

21Ee, mwaei Kamuktaindet ne Toroor ne po lugoosyek, Kamuktaindetap Israel, agobo tereenik che ki ng'et eng' kootap Kamuktaindet ne Toroor, ak eng' kootap laitoryatap Judah ak eng' Jerusalem, kole, 22ki ibei koba Babilon, ak tebee olooto, agoi peetuut ne arutochini icheek, mwaei Kamuktaindet ne Toroor; aibu anyun aweegu kobwa olito.

28

Maonatetap lembech ne po Hananiah

281

28.1:
2Lai 24.18-20; 2A.Pet 36.11-13
Ak eng' kenyinooto, eng' taunetap laitornatetap Zedekiah laitoryatap Judah, eng' kenyiit ne po ang'wan, eng' arawetap muut, kong'alaalwo Hananiah weeriitap Ashur, maotyot, ne ki po Gibeon, eng' kootap Kamuktaindet ne Toroor, eng' taitap tisiik ak piik tugul koleenjo, 2Mwaei Kamuktaindet ne Toroor ne po lugoosyek, Kamuktaindetap Israel ko uu ni kole, kaairi chogitap laitoryatap Babilon. 3Kotom kogeskei kenyiisyek aeng', aibu kogeny kobwa olito tuguuk tugul che po kootap Kamuktaindet ne Toroor, che kiga ip Nebukadnezar laitoryatap Babilon eng' olito koba Babilon: 4ak amutu kogeny konyo olito Jekoniah weeriitap Jehoiakim laitoryatap Judah, kobooto luulenik tugul che ki kiluul che po Judah, che ki pa Babilon, mwaei Kamuktaindet ne Toroor: amu airie chogitap laitoryatap Babilon.

5Ki mwachi anyun maotyot Jeremiah maotyot Hananiah eng' taitap tisiik ak eng' taitap piik tugul che kitonondos eng' kootap Kamuktaindet ne Toroor, 6ak ki le maotyot Jeremiah, Amen: ingoyai Kamuktaindet ne Toroor ko uu nooto: ingoyai Kamuktaindet ne Toroor ng'aleeguk kosulda che kaimaoten, koip kogeny tuguuk kobwa kootap Kamuktaindet ne Toroor, ak komut tugul che ki kiluul, kobwa olito, kobunu Babilon. 7Ago kas anyun ng'olyoondoni amwae eng' taing'ung' ak eng' taitap piik tugul: 8Ki maoten maotik che po keny che ki indounena ak che ki indounenen agobo emotinwek che chaang', ak pounatosyek, agobo lugeet ak yaityet, ak koroito. 9Maotyot ne maoteni agobo kaalyeet, ye kagosulda ng'olyoondennyi, konaaksei maotyondonooto, keele, ki iyoogu Kamuktaindet ne Toroor iman.

10Ki inem anyun maotyot Hananiah chogit ne ki mi kaatitap maotyot Jeremiah, ak koiri. 11Ak ki ng'alaal Hananiah eng' taitap piik tugul kole, mwaei Kamuktaindet ne Toroor kole: Airie ko uu nooto chogitap Nebukadnezar laitoryatap Babilon eng' kaatitap pororyosyek tugul, kotom kogeskei kenyiisyek aeng'u. Ki wo anyun maotyot Jeremiah.

12Ki nyoonji anyun `ng'olyootap Kamuktaindet ne Toroor Jeremiah, ye kingo kagoiri maotyot Hananiah chogit eng' kaatitap maotyot Jeremiah, koleenji, 13ui ak imwachi Hananiah ileenji, kamwa Kamuktaindet ne Toroor kole kaiiri chogisyegap keetiik; ago iyae chogisyegap kariik igeere chooto. 14Amu mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Kande chogitap karnet kaatwegap pororyosyechu tugul, si kobiit koot Nebukadnezar laitoryatap Babilon; ak otei ineendet: ak kaagoochi ineendet tyong'igap timiin ak icheek.

15Yeityo komwachi maotyot Jeremiah maotyot Hananiah, koleenji, Kaso, Hananiah. Ma iyogun Kamuktaindet ne Toroor; ago igoochini pichu komong' lembeita. 16Nooto anyun, mwaei Kamuktaindet ne Toroor kole keero, aistoin eng' ng'wony: imee kenyini, amu kaimwa ngelelnateet ingelelji Kamuktaindet ne Toroor.

17Kime anyun maotyot Hananiah eng' kenyinooto eng' arawetap tisap.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]