Revised Kalenjin Bible (KAPR)
44

Kaimutyet agobo otetap kanamonik

441Ki nyoonji ng'olyoot Jeremiah agobo Yahudik tugul che ki menyei emetap Misiri, che ki menyei Migdok, ak Tapanes, ak Nop, ak emetap Patros, koleenji, 2Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole: Ki ogeer yaityet tugul ne ki apchi Jerusalem, ak nganasook tugul che po Judah; ak ogeero, karatwek rani nganasochooto, ama mi chii ne menyei olooto; 3amu yaityennywa ne ki koyai kotacha anereech, amu ki pa kobeel nyamdutik, koot kamuktaik che ki ma kongen, icheeget, anan okweek, anan kwanisyekwok. 4Ago ki ayookwok otwogikyuk tugul, che maotik, ang'eete karon miising' ak ayoogu, aleenjinok, “Amat oyai kiito samis ne aweche.” 5Ago ma kas, anan koep iit si kobiit koweek kometo yaityennywa, si mata kobeelji nyamdutik kamuktaik che teer. 6Kirong'kei anyun nereegekyuk che ng'woneen, ak kong'waanityi nganasoogap Judah ak eng' ortinwek che po Jerusalem; ak ki koek karatwek ak kigoguber ko uu kiit ne uu peetuusyechu.

7Mwaei anyun Kamuktaindet ne po Toroornatet ne po lugoosyek, Kamuktaindetap Israel, kole: Amu nee si oyachi saboonwekwok yaityoni oo, si kobiit kigeesunenok muren ak kwony, lakwa ak ne reryei, komong' eng' Judah, si ma ng'etwok agot agenge; 8amu otagena poisyonigap eunekwok, obeeljini nyamdutik kamuktaik eng' emetap Misiri, ole ki obe otebee; si kobiit kigeswok, ak oegu che kisasei ak che kichotei eng' pororyosyek tugul che po ng'wony? 9Tos ki outye yaitwogigap kwanisyekwok, ak yaitwogigap laitorinigap Judah, ak yaitwogigap osotikwak, ak yaitwogikwok, ak yaitwogigap osotikwok, che ki yai eng' emetap Judah, ak eng' ortinwegap Jerusalem? 10Ma iming'ingei agoi rani, anan koiyweis, anan kobendatee ng'atuutikyuk, anan kayomisutikyuk, che ki ande taing'wong', ak eng' taitap kwanisyekwok.

11Mwaei anyun Kamuktaindet ne Toroor ne po lugoosyek, Kamuktaindetap Israel, kole: Ogeero, atokyinok togeennyu aibwok yaityet, agoi ageesu Judah tugul. 12Ak anam che ng'etu che po Judah, che kitokyigei emetap Misiri, koba kotebee olooto, ak kigeesu icheek tugul: ibutos eng' emetap Misiri; kigeesu icheek eng' rotwetap chok ak eng' rubeet; pegu icheek, kong'etee ne ming'in agoi ne oo, eng' rotwetap chok ak eng' rubeet: ak koek che kichubei, ak che kikwong'ee, ak che kisasei, ak che kichotei. 13Amu abire icheek che menyei emetap Misiri, ko uu ye ki abir Jerusalem, eng' rotwetap chok, ak eng' rubeet, ak eng' koroito; 14kot koma chilil anan kong'et agot agenge eng' che kiga ng'et che po Judah, che ki pa emetap Misiri, kotebee olooto, kole koweek kobwa emetap Judah, emet ne machei kole koweekyigei koba komeny: amu ma piitu ne weechigei kobatee ne chilili.

15Ki wol anyun murenik tugul che ki ingen kole kibeeljin osotikwak nyamdutik kamuktaik che teer, ak kwonyiik tugul che kitonondos eng' ole neegit, che kituiyet ne oo, agot piik tugul che ki menyei emetap Misiri, eng' Patros, kowolji Jeremiah koleenji, 16Ma kigasun ng'olyoondonooto kemwaiwech eng' kainetap Kamuktaindet ne Toroor. 17Ago kiyae iman ng'olyoot age tugul ne kagemwa, keele kibeeljini nyamdutik laitoryatap kipsengwet, ne kwondo, ak keroong'jini ineendet kagoochinoik che kieei, ko uu ye ki keyai, acheek ak kwanisyekyok ak laitorinikyok, ak pounikyok, eng' nganasoogap Judah, ak eng' ortinwek che po Jerusalem: amu ki kitinye eng' peetuusyechooto amitwogik che chaang', ak ki kichamegei, ama ki keer yeityo. 18Ago kobooch ngap kebagaakte kebeelji nyamdutik laitoryatap kipsengwet ne kwondo, ak keroong'jini kagoochinoik che kieei, korarwech tuguuk tugul, ak kigeswech eng' rotwetap chok ak rubeet. 19Ak ye ki kibeeljini nyamdutik laitoryatap kipsengwet ne kwondo, ak keroong'jini kagoochinoik che kieei, tos ma kikwang'kwang'ji magatiinik che kilasune ineendet, ak keroong'ji kagoochinoik che kieei, koma pooto manong'otaikyok?

20Ki mwachi anyun Jeremiah piik tugul, murenik, ak kwonyiik, agot piik tugul che kiga kowolji, koleenji, 21Tos ki ma ibwaat `Kamuktaindet ne Toroor icheek ama chut metinnyi, nyamdutik che ki obeele eng' nganasoogap Judah, ak eng' ortinwek che po Jerusalem, okweek ak kwanisyekwok, laitorinikwok, ak pounikwok, ak piigap emet, 22kot ko mata komuuch Kamuktaindet ne Toroor komuita, amu yaityetap poisyonikwok, ak amu tuguuk che kiwechei che ki oyai? Ki ek anyun emeng'wong' ne kuberot, ak ne kikwong'ee, ak ne kisasei, ama menyei chii, ko uu ye uu rani. 23Amu ki obeel nyamdutik, ak amu ki oyachi Kamuktaindet ne Toroor tengekto, ama ogas iit kutitap Kamuktaindet ne Toroor, anan obendate ng'atuutikyik, anan kayomisutikyik, anan paornatosyekyik; konyonjok anyun yaityoni ko uu ye uu rani.

24Ki mwachi kogeny `Jeremiah piik tugul, kobooto kwonyiik tugul, koleenji: Ogas ng'olyootap Kamuktaindet ne Toroor, okweek Judah tugul che omi emetap Misiri: 25Mwaei Kamuktaindet ne Toroor ne po lugoosyek, Kamuktaindetap Israel, ko uu ni kole, ki omwa eng' kutusweekwok, okweek kobooto osotikwok, ak oyai kosulda, eng' eunekwok, oleen, Kiyae iman kaarorunosyek che ki kiaroru, kebeelji nyamdutik laitoryatap kipsengwet ne kwondo, ak keroong'ji kagoochinoik che kieei: ogimiit anyun kaarorunosyekwok, ak oyai kaarorunosyekwok. 26Ogas anyun ng'olyootap Kamuktaindet ne Toroor, okweek piigap Judah tugul che omenye emetap Misiri: Ogeero, koayosye eng' kainennyu ne oo, mwaei Kamuktaindet ne Toroor, ale, ma komwaei kainennyu chii age tugul ne po Judah eng' emet tugul ne po Misiri, kole, ko uu ye sabei Kiptaiyat Kamuktaindet ne Toroor. 27Ogeero, ariibe icheek agobo yaityet, ma agobo ne myee: ak kigeesu murenik tugul che po Judah che mi emetap Misiri, eng' rotwetap chok ak eng' rubeet, agoi kogeskei. 28Ak koweigei icheek che chililee rotwetap chok komong' eng' emetap Misiri, kobwa Judah, che ng'ering'; ak konai tugul che ki kong'et che po Judah, che ki pa emetap Misiri koba kotebee olooto, kole ng'olyootap ng'oo ne isuldoi, nenyu anan nenywa. 29Ak ni kaboorunet eng' okweek, mwaei Kamuktaindet ne Toroor, ale kabirok eng' olito, si onai ole isuldoi iman ng'aleekyuk koibwok yaityet: 30

44.30:
2Lai 25.1-7
Mwaei Kamuktaindet ne Toroor kole: Ogeero, andoi Pharaoh Hopra laitoryatap Misiri, eutap puunikyik, ak eutap icheeget che cheeng'ei saboondanyi; ko uu ye ki ande Zedekiah laitoryatap Judah, eutap Nebukadresar laitoryatap Babilon, punyondennyi, ak ko ne ki cheeng'ei saboondanyi.

45

Ng'olyootap kagaigaet

451

45.1:
2Lai 24.1; 2A.Pet 36.5-7; Dan 1.1-2
Ki mwachi `maotyot Jeremiah Baruk weeriitap Neriah, ng'olyoot ye kisirchin bukuit ng'aleechu komwaei Jeremiah, eng' kenyiitap ang'wan ne po Jehoiakim weeriitap Josiah laitoryatap Judah, koleenji, 2Mwaun Kamuktaindet ne Toroor, Kamuktaindetap Israel, inyee ee Baruk, ko uu ni kole: 3Ki imwa ile, pwo eng' anee! Amu kagotesyi Kamuktaindet ne Toroor arageneet ng'wanindanyu; kaang'et amu tigenoikyuk, amanyooru kamuung'et. 4Mwachi anyun ineendet ko uu ni, ileenji, mwaei Kamuktaindet ne Toroor ko uu ni kole: Keero, abute ne ki ateech, ak atutu ne ki amin; ak ayae niito eng' emet komugul. 5Ko tos, icheeng'jinigei inyee tuguuk che eecheen? Amecheeng': amu, keero, aipchini yaityet piik tugul, mwaei Kamuktaindet ne Toroor: ago agoonin saboondang'ung' koek luuleneng'ung' eng' komoswek tugul ole iwendi.

46

Maonateet agobo Misiri

461Ki nyoonji maotyot Jeremiah ng'olyootap Kamuktaindet ne Toroor agobo pororyosyek.

2

46.2-26:
Isa 19.1-25; Ezk 29.1-32.32
Ng'aleegap Misiri: agobo lugeetap Pharaoh-neko laitoryatap Misiri, ne ki mi ole neegitee aineet Yufrets eng' Karkemish, ne ki par Nebukadresar laitoryatap Babilon eng' kenyiitap ang'wan ne po Jehoiakim weeriitap Josiah, laitoryatap Judah. 3Ochop long'onik che mengech ak che eecheen ak ooriikyi lugeet. 4Ochop paraisisyek ak olaany, okweek che olaanye paraisisyek, ak otononse ko kaolaach chepkuloikwak che po lugeet; osit ng'otwek, ak olaach ngoroigap lugeet. 5Amu nee si ageere ko uu nooto? Aragendos ak koweechegei let; kagetuatui piikwak che kiimeen, ak kagomwei kochaakta, ama kusegong': mi kamuiset komosta age tugul, mwaei Kamuktaindet ne Toroor. 6Amat komwei ne chepchep, anan kochilil chiito ne nyigan; ki konachkei ak kobutyo eng' murot kaataam ne po ole neegitee aineetap Yufrets. 7Ng'oo ni ng'eetei ko uu aineet, ne wasegei peekyik ko uu ainoosyek? 8Ng'eetei Misiri ko uu aineet, ak wasegei peekyik ko uu ainoosyek: ak leen, Ang'eete ak atuch emet; ang'eme nganaseet ak piik che menyei olooto. 9Otogoste, okweek, paraisisyek; ak ochakte okweek, kariigap lugeet; ak ingoba piik che nyigoonen: Kush ak Put, che tinyei long'onik; ak Ludik, che tinyei kwangok ak kong'iei. 10Amu po peetuunooto Kiptaiyat Kamuktaindet ne Toroor ne po lugoosyek, peetuutap yaaktaetap mugetuut, si koyaaktoochi ineendet mugetuut eng' puunikyik: ak koamis rotwetap chok ak kobiyo, ak koeei korotiikwak kobiyo: amu tinyei Kiptaiyat, Kamuktaindet ne Toroor ne po lugoosyek, tiseiywot eng' emetap murot kaataam ole neegitee aineetap Yufrets. 11Togoste Gilead ak iip mwanik che kinyaise, ee pergeiyandani, cheptap Misiri: iboisyee kerichek che chaang' puch; mesabe. 12Ki kogas pororyosyek agobo teweernateng'ung', ak kigonyi emoni riireguk: amu kagonach chiito ne nyigan ne nyigan, kagobutyo tuwai.

13

46.13:
Jer 43.10-13
Ni ng'olyoot ne ki mwachi `Kamuktaindet ne Toroor maotyot Jeremiah, kole nyoonei Nebukadresar laitoryatap Babilon ak kobar emetap Misiri. 14Omwaite eng' Misiri, ak obarte eng' Migdol, ak obarte eng' Nop ak eng' Tapanes: oleenji, Otononse, ochopkei; amu kagoamis rotwetap chok eng' tabanweguk. 15Amu nee si kibukto cheguuk che kiimeen? Ma tononso, amu ki oon Kamuktaindet ne Toroor. 16Ki riich che chaang', ee, ki ibutyi age paragutap age: ak ki le, Ong'eetyee, ongebe kogeny oldap piikyok, agoi emet ne ki kisikyinech kemwee rotwetap chok ne usiisyei. 17Kiwookyo eng' olooto kole polateet kityo Pharaoh laitoryatap Misiri; ki kobagakta kosiirto peetuut ne kiga kichop. 18Mwaei Laitoryat ne kainennyi ko Kamuktaindet ne Toroor ne po lugoosyek, kole, Ko uu ye asabe, nyoonei iman ineendet ko uu Tabor eng' tuloonook, ak ko uu Karmel eng' ole neegitee nyanjet. 19Ee inyee chepto ne imenye Misiri, monorsechigei si iwe keluulin: amu egu Nop karaatya, ak kebeel, ama mi chii ne menyei. 20Rooryat ne karaaran miising' Misiri; ago kagonyo ng'emisyet ne punu murot kaataam, kagonyo. 21Uu kogeny piikyik che kesirei che mi kwenunnyi moek che neryootiin; amu kagoweigei let ak icheek, kagomwei tugul, ma tononso: amu kanyonji icheek peetuutap nyalildanywa, peetuut ne kibirei. 22Wendi kutinnyi ko uu ereneet; amu pendi ak lugeet, ak kobookyine ineendet aonok, ko uu piik che ebei keetiik. 23Iluuli osnennyi, mwaei Kamuktaindet ne Toroor, agot ngo ma kimuuchi kisyach; amu chaang' kosiir chereng'enyinik, ama iitoksei. 24Kiteweeri cheptap Misiri; kindoi eutap piigap murot kaataam.

25Mwaei Kamuktaindet ne Toroor ne po lugoosyek, Kamuktaindetap Israel, kole: Ogeero, abire Ammon ne po No, ak Pharaoh, ak Misiri, kobooto kamuktaikyik, ak laitorinikyik; chooto ko Pharaoh ak icheeget che imang'u ineendet: 26ak andoi icheek eutap icheeget che cheeng'ei saboonwekwak, ak eutap Nebukadresar laitoryatap Babilon, ak eutap otwogikyik; ye ibata kemeny ko uu peetuusyek che po keny, mwaei Kamuktaindet ne Toroor. 27

46.27-28:
Jer 30.10-11
Ago meiywei, ee Jakobo otwogindennyu, anan iaragen, ee Israel; amu, keero, asaruun eng' ole loo, ak asaru iyoteng'ung' eng' emet ne ki kiluulji; ak koweek Jakobo, ak komuuny ak kotebee kaalyeet, ama mi chii ne imui. 28Meiywei, ee Jakobo otwogindennyu, mwaei Kamuktaindet ne Toroor; amu ami kobooten: amu ageesu pororyosyek tugul che kigaonjin, ago magesun; ago atigoonin eng' kirwooget, amabagaaktoin ama kibirin.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]