Revised Kalenjin Bible (KAPR)
5

Ma mi ne po iman agot agenge

51Orwaate ortinwegap Jerusalem

si ogeer ak onai,

ocheeng' eng' komoswekyik che paraen,

ngot omuuchi onyooru chii agenge,

ne yaei imanda ak ne cheeng'ei imanit,

si ngot komi, anyochi kaat nganasanooto.

2Agot nga imurtoi icheek koleen, “Ko uu ye sabei Kamuktaindet ne Toroor,”

ko iyastos icheek eng' lembech.

3Ee Kamuktaindet ne Toroor, tos ma keerei konyeguk imanit?

Ki ibir icheek, ago ma aragenso,

ki igeesu icheek, ago ki eesyo kotaach katigonet.

Ki iuit icheek togoochikwak kosiir rwandet,

ki eesyo koweekyingei.

4Ki abwaat anyun ale

nyalulyotin iman pichuuto,

perberen icheek;

amu ma naei ooreetap Kamuktaindet ne Toroor,

anan kirwoogetap Kamuktaindennywa.

5Awendi ye mi piik che eecheen,

ak ang'alaalji icheek,

amu ingen icheeget ooreetap Kamuktaindet ne Toroor,

ak kirwoogetap Kamuktaindennywa.

Ago kigoiri chu kabo tai chogit kibagenge

ak kong'eti ratuutik.

6Ara anyun parei icheek `ng'etundo ne mang'une timiin,

parei icheek suiyot ne po surkwen.

Sapchin `cheplanget nganasookwak,

kitonatoni age tugul ne mong'u eng' olooto,

amu chaang' pistaosyekwak,

ak ki kotesak kachuchugennywa pogei.

7Amuktoi ano anyoun kaat?

Ki kometa lagoguk,

ak ki koyosyo agobo kanamonik che ma kamuktaik.

Kingo kaabai kobiyong'so,

koyai ibeetapkei

ak koyumjinotkei kooriigap chepkugonik.

8Kiu icheek paraisisyek che kagobiyong'so karon,

ki itei age tugul eng' mageet agobo osotyotap chiitap kokwennyi.

9Tos manyone abire agobo tuguuchuuto?

Mwaei Kamuktaindet ne Toroor;

ak tos mayaaktochinigei mugetuut

eng' pororyet ne uu ni?

10Otogoste irimoikyik ak ong'em,

ago mong'em ogesu.

Oiste mooriikyik,

2 amu ma po chooto Kamuktaindet ne Toroor.

11Ee, kootap Israel ak kootap Judah,

koma kotinyei kayaneet,

mwaei Kamuktaindet ne Toroor.

12Ki komwa lembechek agobo Kamuktaindet ne Toroor,

komwa kole, “Ma yae kiy ineendet,

ma mi yaityet ne ityinech,

ma koi kigeer rotwetap chok anan ko rubeet.”

13Maotik koma kiy ago usoonet kityo,

ama mi ng'olyoot eng' oriitinnywa.

Ara anyun ingeyachi icheeget ko uu ye mwaei.

14Mwaei anyun Kiptaiyat ne po lugoosyek ko uu ni kole,

“Amu mwaei pichu ng'olyoondoni,

ayae ng'aleekyuk eng' kuting'ung' koek maat,

ak koek pichu kweenik, si kobeel maata icheek.

15Ee kootap Israel, mwaei Kamuktaindet ne Toroor,

amutwok pororyet ne punu ole loo,

pororyet ne kiim,

pororyet ne po keny miising',

pororyet ne mongen kutinnyi,

amoguitosi kiit ne mwaei.

16Motyennywa ko uu kererit ne yaataat,

icheek tugul ko nyigoonigap lugeet che kiimeen.

17Amei `icheek peekwok ak amitwogikwok,

amei kowong'u weeriiguk ak tiibiiguk;

amei `icheek keechiireguk ak akwotisyeguk,

amei keetiiguk che po sabibuk ak mogooniguk.

Eng' rotwetap chok kobutei

nganasook che ng'ootaatiin chooto imang'u.”

18“Ago agot eng' peetuusyechooto, ko mageswok,” mwaei Kamuktaindet ne Toroor. 19Ak ye tuun teep piik kole, “Amu nee si koyaiywech Kamuktaindet ne Toroor Kamuktaindennyo tuguuchuuto tugul?” Ileenji anyun, “Ko uu ye ki ometa ak oot kanamonik che teer eng' emeng'wong', oote ko uu nooto toek eng' emet ne ma neng'wong'.”

Kogereigong' `Kamuktaindet ne Toroor piik

20Omwaite niito eng' kootap Jakobo,

ak obarte eng' Judah ole:

21

5.21:
Isa 6.9-10; Ezk 12.2; Mar 8.18
Ogas ni anyun, ee okweek piik che perber ak che motinye kaguiyet,

che otinye koonyek, amogeertoe,

che otinye itiik, amogastoe.

22

5.22:
Job 38.8-11
Amu nee asi moiywea? Mwaei Kamuktaindet ne Toroor.

Amu nee si mobotandosi eng' tainnyu?

Tos ma anee ne ki ande ng'aniek koek kiwotetap nyanjet,

eng' ng'atuutyet ne tebyei agoi ne ma imuuchi nyanjet kosiir?

Nganda mildoegei peek miising', koma imuuchi kotil kiy,

agot ngo moror, koma imuuchi kosiir.

23Ago tinyei pichu muguleldo ne po pistoet ak ngelelnateet,

ki kobistoe ak koba.

24Ama mwaei eng' mugulelwekwak koleen,

ongiywei Kamuktaindet ne Toroor Kamuktaindennyo,

ne koonu ropta ne po tai ak ne po let eng' peetuusyekyik,

ineendet ne riibwech wigisyek che ki king'at che po kesisyet.

25Ki kowal tengekwogikwok tuguuchuuto,

ak ki koetenak tengekwogikwok myeeindo.

26Amu kinyoorchin piikyuk piik che yaacheen.

Riipsei ko uu ye riipsei namigap toriitik,

ak ko uu che richei mesteet si konamei piik.

27Ko uu kitonget ne nyiitaat toriitik,

ko uu nooto nyiitootiin kooriikwak ng'aalseet.

Ki eegitu ak koek anyun mogoreek amu nooto,

28ki koneryo miising' ak iluu.

Siirtootin icheek eng' poisyonigap sogornateet;

ma irwoochi si kobesyechi eng' imanit ne ma tinyei sigiik,

ama irwooksechin komyee che ponondos.

29Tos manyone abire icheeget agobo tuguuchuuto?

Mwaei Kamuktaindet ne Toroor,

tos mayaaktochinigei mugetuut

eng' pororyet ne uu ni?

30Kogobiit kiit ne po kwong'eet,

ak ko ne samis kot eng' emet.

31Maoteni maotik lembeita,

ak pou tisiik ko uu mageetap maotinwekwak,

ak chamei piikyuk koteep ko uu nooto.

Ago oyae nee anyun eng' kagesunetap tuguuchuuto?

6

Koyiemei puunik Jerusalem

61Omwei osaruge, okweek lagogap Benjamin,

omong'u eng' Jerusalem ak oguut iryageet eng' Tekoa;

onamji parak kitap kaboorunet eng' Beth-hakerem.

Amu itu yaityet eng' murot kaataam ak ng'emisyet ne oo.

2Agot nga karaaran ak ko ng'arng'ar cheptap Zion,

ang'eme aistoi ineendet.

3Pwaanjin ineendet mestoweek ak keechiirekwak;

teechei emaisyekwak koyieme ineendet,

ak iyagisye age tugul komostanyi.

4Ochop lugeet si obargei ak ineendet;

ong'eetyee, ongetogoste peet kween.

Pwo eng' acheek!

Amu kaimen, neegit kororokto asiista.

5Ong'eetyee, ongetogoste kemoi,

keng'em kooriikyik che po laitorinik.

6Amu kagomwa Kamuktaindet ne Toroor ne po lugoosyek kole,

Oluul, oep keetiik ak owasyi ng'ung'unyek Jerusalem,

amu niito nganaseet ne kebirei,

sastaet ineegei ne mi kwenunnyi.

7Ko uu ye kutune peek keriinget,

ko kuutu ko uu nooto yaityennyi.

Kigasei koroomnateet ak ng'emisyet eng' ineendet;

mi tainnyu kotugul myando ak mook.

8Kas kergong', ee Jerusalem,

si ma istoenegei saboondanyu;

ak si ma yain iegu karaatya,

nooto emet ne ma menyei chii.

9Mwaei Kamuktaindet ne Toroor ne po lugoosyek kole;

“Ingeturot icheek che ng'etunotiin che po Israel komyee,

ingeturot ko uu keetitap sabibuk.

Ketyi eung'ung' kogeny kitongok,

ko uu ineendet ne putei sabibuk.”

10Ang'alaaljini ng'oo, ak abaoryanji,

si kobiit kogasa?

Ma kimuratan itiikwak,

ara amaimuuchi koep iit.

Kaek ng'olyootap Kamuktaindet ne Toroor teweernateet eng' icheek,

ak ma poiboitune.

11Kanyiia anyun nereegek che ng'woneen che po Kamuktaindet ne Toroor;

kaang'et araanye.

Ak ki leenjo Kamuktaindet ne Toroor,

roong'ji nereegechooto lagok che mi ooreet,

kobooto tuiyetap murenik;

Amu kimuti manong'otyot

ak osotyot ne ki koosit kobooto ne neegit koolil.

12

6.12-15:
Jer 8.10-12
Kiwolei kooriikwak kobunji piik alak,

kobooto mbareenikwak ak osotikwak,

amu achuuljini eunnyu piik che menyei emet, mwaei Kamuktaindet ne Toroor.

13Amu kobooch ne ming'in agoi ne oo eng' icheek,

ko tinyei age tugul keyandiit,

ak kobooch maotyot agoi tisiindet,

ko yaei kaberberisyet age tugul.

14

6.14:
Ezk 13.10
Kigonya ak kobir parak moogap piikyuk,

koleenjin, “Kaalyeet, kaalyeet,”

ye ma mi kaalyeet.

15Tos ki ililanso ye kingo yai tuguuk che kiwechei?

Achicha, ma ililanso agot kitigin,

ama walogis togoochikwak.

Ibutos anyun kobooto icheeget che ibutos,

tuun ki wiirtoi eng' peetuut ne anyoonjini icheek abire,

mwaei Kamuktaindet ne Toroor.

16

6.16:
Mat 11.29
Mwaei Kamuktaindet ne Toroor kole,

otononie eng' ortinwek ak ogeerte,

oteep ortinwek che po keny,

ole mi ooreet ne myee, ak obendate nooto,

si osich kamuung'et eng' saboonwekwok.

Ago ki wol kole, “Ma kibendote ortinwechooto.”

17Ki ande riibiik koriibok ak ale,

“Oepchi iit cheetap iryageet!”

Ago ki le, “Ma kigase.”

18Ogas anyun, okweek pororyosyek,

ak onai, ee okweek tuiyet, kiit ne mi kwenunnywa.

19Ogas okweek ng'wony, aipchini pichu yaityet,

kosupkei ak logoegap kabwaatutikwak,

amu ma epchi iit ng'aleekyuk,

ak ki koeesyo ng'atuutikyuk.

20Tilei nee che nyamdut ngeibwa eng' Sheba,

anan ko tuguuk che uu mutweek che nyamdut che ki ibune emet ne loo?

Ma taachaksei kagoochinoikwok che po peelset,

amachame tiseiywekwok.

21Mwaei anyun Kamuktaindet ne Toroor kole;

“Andoi taitap pichu kanagutik,

si konach kwanisyek kobooto weeriik,

ak kolus chiitap kokwet kobooto chorwennyi.”

22Mwaei kora Kamuktaindet ne Toroor kole,

“Punu piik emet ne mi murot kaataam;

king'eeti pororyet ne oo ne punu komoswek che looen che po ng'wony.

23Tinyei kwanget ak ng'otit;

ak koroomen, ama tinyei rireenet;

morori cheennywa ko uu nyanjet,

ak ketei paraisisyek;

choboot age tugul ko uu chiito ne wendi lugeet,

asi kobookyin, ee inyee cheptap Zion.

24Kigegas kalasunennywa,

ak kanyalulso eunekyok.

Kanamech pichiindo ak ng'waninwek,

che uu che po kwondo ne machei kosigiis.

25Ma kimuuchi kemandee keebe mbar,

anan kebendate eng' ooreet;

amu mi rotwetap chok ne po puunyoot,

ak kamuiset eng' komosta age tugul.”

26Ee cheptap piikyuk, kermenegei kuniok,

ak iburburegei oreek.

Itee ko uu ye kitee agobo weeriit ne ki kisich ineegei,

kateet ne ng'waan miising';

amu ng'emindet

konyonjinech kocheeu.

27Koayain inyee Jeremiah iegu ole kitabendoe

ak irimeet eng' kwenutap piikyuk;

si kobiit inai ak ityem ooreenywa.

28Ngelelik icheek tugul che yaacheen,

che pendi komosi ak komosi kochaamsoti,

uueen icheeget ko uu sugunwet ak karnet,

yaei tugul ng'emisyet.

29Kuutei kobanda miising';

laldos ngosyelaisyek,

itiliilisyei puch;

amu ma ki isto kiptengeginik.

30Kuuree icheek “Michikyigek che kigenendoe fedha,”

amu ki koeesyo `Kamuktaindet ne Toroor icheek.

7

Amdaetap Jeremiah eng' Hekaluut

71Ki nyoonji Jeremiah `ng'olyoot ne ki punu Kamuktaindet ne Toroor koleenji, 2tonone kurgeetap kootap Kamuktaindet ne Toroor, ak imwaite eng' yooto ng'olyoondoni, ile, ogas ng'olyootap Kamuktaindet ne Toroor, okweek tugul che oo po Judah, che omandoe ormariichochu obendi olasu Kamuktaindet ne Toroor. 3Mwaei Kamuktaindet ne Toroor ne po lugoosyek, Kamuktaindetap Israel kole: Olitit ortinwekwok ak poisyonikwok, si agoonok omeny yuto. 4Amomang'u ng'aleechu po lembech ak ole: “Hekaluutap Kamuktaindet ne Toroor, Hekaluutap Kamuktaindet ne Toroor, Hekaluutap Kamuktaindet ne Toroor chuuto!”

5Amu ngot olitit komyee ortinwekwok ak poisyonikwok, ak ngot orwooksechi komyee chii ak chiitap kokwennyi, 6ngot ko mosastoe toondet, ak ne ma tinyei sigiik, ak mosoget, amotumde korotiik che ma tinyei tengek eng' olito, anan osubote kamuktaik che teer ogoochinegei nyalilda, 7agoonok anyun omeny olito, emet ne ki agoochi kwanisyekwok kobooch keny agoi koigeny.

8Ago ogeero, omang'u okweek ng'aleegap lembech che ma imuuchi kogoonok kelunet age tugul. 9Tos nyolu ochoorsei, orumisyei, oyaei ibeetapkei, oyosye eng' lembech, obeelji nyamdutik Baal ak osubote kamuktaik che teer che mongen, 10yeityo obwa otonone tainnyu eng' koi, ne kimwaitoe kainennyu ak ole, “Kagesarwech,” si kobiit oyai tuguuchuuto tugul kiwechei? 11

7.11:
Mat 21.13; Mar 11.17; Luk 19.46
Tos kaek kooi kemwaitoe kainennyu kebeneetap rebiik eng' taing'wong'? Onai ole anee, aneendet ne kaageer, mwaei Kamuktaindet ne Toroor. 12
7.12-14:
Jos 18.1; T.Kal 78.60; Jer 26.6
Oba nguno oldanyu ne ki mi Shiloh, ole ki ande kainennyu eng' tai, si ogeer kiit ne ki ayachi amu tengekwogigap piikyuk Israel. 13Ara anyun, amu ki oyai poisyonichuuto tugul, mwaei Kamuktaindet ne Toroor, ak ki ang'alaalwok, ang'eete karon miising' ak ang'alaali, ago ma ogas, ak ki aguurok, ago ma owolu, 14ayachini anyun koyooto, nooto kimwaitoe kainennyu, ne omang'u, kobooto komosta ne ki agoonok ak kwanisyekwok, ko uu ye ki ayachi Shiloh. 15Atimdak eng' tainnyu, ko uu ye ki atimde tupchosyekwok tugul, iyoteet komugul ne po Ephraim.

Ngelelnatetap piik

16Ara anyun inyee Jeremiah, ko mat isaa agobo pichu, agot iriirchi ko matiriirchi, mat isaachi anan isaa. Amu ma kasun. 17Tos megeere tuguuk che yaei eng' nganasoogap Judah ak eng' ortinwegap Jerusalem? 18

7.18:
Jer 44.17-19
Iyumi lagok kweenik, ilali maat kwanisyek, kokwonykwonyi magatiinik kwonyiik, si kobeelji osotyotap laitoryat ne po kipsengwet ak koroong'ji kagoochinoik che kieei, kamuktaik, si kobiit kotacha anereech. 19Tos tachei ng'oo pichooto konereech? Tos anee? Mwaei Kamuktaindet ne Toroor. Tos matachegei icheegei, si kogoochigei kalilanet eng' togoochikwak? 20Mwaei anyun Kiptaiyat Kamuktaindet ne Toroor kole; Ogeero, kiroong'jin olito nereegekyuk ak nereegekyuk che ng'woneen, kiroong'jin piik, tuuga, keetiigap timiin ak eng' logoegap mbar; ak laldos, ama kimisi.

21Mwaei Kamuktaindet ne Toroor ne po lugoosyek, Kamuktaindetap Israel, kole, otesyi kagoochinoikwok che kibeelei tiseiywek ak oam panyeek. 22Amu ki ma ang'alaalji kwanisyekwok anan ang'at icheek eng' peetuut ne ki amutu komang'une emetap Misiri, agobo kagoochinoik che kibeelei ak tiseiywek. 23Ago ki ang'at icheek agobo ng'olyoondoni aleenji, ogas kutinnyu, si aek Kamuktaindeng'wong', ak oegu piikyuk. Obendate ooreet tugul ne ang'atook, si kobiit komyeeit eng' okweek. 24Ago ma kas, ama ep iit, ago kibendatee kirwoogutikwak ak uuindap mugulelwekwak che yaacheen. Kituitui koba let, ma pa tai. 25Kobooch peetuut ne ki mong' kwanisyekwok eng' emetap Misiri agoi rani, ko ki ayookwok otwogikyuk tugul che maotik ang'eete kotugul karon ak ayoogu icheek. 26Ago ma kasa, ama ep iit, ago ki iuit kaatinnywa. Ki yai ne ya kosiir kwanisyekwak.

27Ara anyun mwachi icheek ng'aleechuuto tugul. Ago ma kasin. Iguure icheek kogeny, ago mawolun. 28Ileenjini icheek, niito pororyet ne ma epchi iit kutitap Kamuktaindet ne Toroor Kamuktaindennywa, ama taach atep ne myee. Ki kobet imanda ak kigeisto eng' kutusweekwak.

Tengekwogik eng' atebweetap Himon

29Ee Jerusalem, icheru suumeeguk anyun, ak iwiirte,

rirate eng' tuloonook che churyotin,

amu kaesyok ak ametook anee Kamuktaindet ne Toroor,

okweek ibini ko kogoono nereegek.

30Amu ki koyai lagogap Judah kiit ne ya eng' tainnyu, mwaei Kamuktaindet ne Toroor. Ki konde tuguukwak che kiwechei koot ne kimwaitoe kainennyu ak komurwon. 31

7.31:
A.La 18.21; 2Lai 23.10; Jer 32.35
Kigoteech komoswek che torooreen che po Topet, ne mi atebweetap weeriitap Hinom, si kobeel weeriikwak ak tiibiikwak eng' maat; ne ki ma ang'at, ne ma kuura met. 32Keero, pwoonei anyun peetuusyek, mwaei Kamuktaindet ne Toroor, che ma keguure yooto Topet, anan keguure weeriitap Hinom, ago kiguure Atebweetap Parisyet. Amu tuun tubisyei icheek eng' Topet, amu ma komi ole ketupchin. 33Ak koek muuswegap pichu amitwogigap toriitik che po parak, ak che po tyong'igap ng'wony. Ama piitu chii ne iyestoi. 34
7.34:
Jer 16.9; 25.10; Ng'a 18.23
Agoochini anyun kosiis tuugeetap poiboiyet ak ne po kagasetapkei, ne po sandet ak ne po murereet, eng' nganasoogap Judah ak ortinwegap Jerusalem, amu egu emet karaatya.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]