Revised Kalenjin Bible (KAPR)
12

Kiili Jeso eng' Bethania

(Mat 26:6-13; Mar 14:3-9)

121Ak kingo ta komi peetuusyek lo si koit paska konyo Jeso Bethania, ole ki mi Lazaro, ne ki ing'eeti Jeso komong' eng' che ki pek. 2Kichopchi icheek eng' olooto ineendet amitwogik che po lagat: koboisyechi Marta; ago ki mi Lazaro kobooto icheek che ki amisyei ak ineendet. 3

12.3:
Luk 7.37-38
Ki inem anyun Maria mwaita ne nyamdut ne po ratilit agenge, ne po kamanuutyet ne oo, ak koilee keelyegap Jeso, ak kouuse suumeekyik keelyekyik: ak ki nyi koot nyamdutyet ne po mwaata. 4Ago ki le Judas Iskaryot, ne ki agenge ne po kasubikyik, ne kimachei kong'wekta ineendet, 5“Ko amu nee si ma ki aldae mwai dinarisyek pogol somok, si kigoochi kibananook?” 6Ki mwa ni anyun, ma amu ki riiree kibananook; ago amu ki choriin, ak ki tinyei lolet, ak ki ibei tuguuk che mi oriit. 7Kole Jeso, “Omete kogonorchi peetuutap tubeennyu. 8
12.8:
NKNg'a 15.11
Amu mi kibananook kobootok kotugul; ago ma mi anee ak okweek kotugul.”

Teteet kebar Lazaro

9Ki nai anyun piik che chaang' che po Yahudik kole mi olooto: ak ki pwa, ma agobo Jeso ineegei, ago si kobiit kogeer Lazaro agine, ne kiga kong'eet ineendet eng' che ki pek. 10Ago ki irwooch tisiik che eecheen kole kobar Lazaro agine; 11amu kiitabaangei che chaang' che po Yahudik, koba koyan Jeso amu ineendet.

Taagetap Jeso eng' Jerusalem

(Mat 21:1-11; Mar 11:1-11; Luk 19:28-40)

12Ak eng' peetuut ne ki isubi nooto, ye kingo kas tuiyet ne oo ne po piik che kigabwa igoorto, kogas kole nyoonei Jeso Jerusalem. 13

12.13:
T.Kal 118.25-26
Ki nam anyun mooriik che po sosik, ak koba kotorookta ineendet ak komwa eng' kutit ne oo kole,

“Hosanna!

Iberuurot ineendet ne nyoonei eng' kainetap Kiptaiyat,

nooto Laitoryatap Israel.”

14Ak ye kingo kagonyoor Jeso moitap sigiryet, kolaany; ko uu ye ki kisir keele:

15

12.15:
Zek 9.9
“Meiywei, inyee, ee, cheptap Zion.

Keero, nyoonei Laitoryandeng'ung',

kobunu moitap sigiryet!”

16Ki ma iguiyo kasubikyik eng' tai tuguuchuuto: ago kingo kagitoroor Jeso, kobwaat anyun icheek kole ki kisir tuguuchuuto agobo ineendet, ak kiga keyachi ineendet tuguuchuuto.

17Kibaoryan anyun tuiyet ne ki mi kobooto ineendet ye kiguurei Lazaro komong' eng' kererit, ak ki ing'eet ineendet eng' che ki pek. 18Ki pa anyun tuiyet amu nooto kotorookta ineendet, amu ki kas kole kiga koyai kaboorunoni. 19Kimwachigei anyun Pharisaik icheegei kole, “Ogeero, ma oterter eng' kiy: ogeero, kagosup `ineendet piik tugul che po ng'wony.”

Komachei Yunanik kogeer Jeso

20Ak ki mi Yunanik alage eng' che kigaba kotogosta kosa eng' igoorto. 21Ki pwa chooto anyun ole mi Philipu, ne po Bethsaida ne po Galilaya, ak koteebe ineendet kole, “Kiptaiyat, kimache kegeer Jeso.” 22Ki nyo Philipu komwachi Andrea: ak ki pwa Andrea ak Philipu komwachi Jeso. 23Ak ki wolji Jeso koleenji, “Kait sait, ne kitoroore Weeriitap chii. 24Amwaiwok, iman, iman, ale, Ngo ma me paiywat ne ibutyin ng'ung'unyek, kotebyei ineegei; ago ngo me, koiyiei che chaang'. 25

12.25:
Mat 10.39; 16.25; Mar 8.35; Luk 9.24; 17.33
Ineendet ne chamei saboondanyi kobeeti; ak ineendet ne wechei saboondanyi eng' ng'wonyuni koriip kot koit saboondap koigeny. 26Ngo poisyeiwo chii age tugul, ko nyolu kosubota; ak si ole ami, komi olooto agine kiboityondennyu: ngo poisyeiwo chii, koteechei ineendet Kwanda.

Komwaei Jeso agobo meennyi

27“Nyalili nguno saboondanyu; amwae nee anyun? Tos amwa ale ‘Abba we, sarwo eng' saini?’ Ago ki anyo amu niito si anyoor eng' saini. 28Abba, itoroor kaineng'ung'.” Ki mong' anyun kutit eng' kipsengwet, kole, “Ki atoroor ak ta atoroori kogeny.”

29Ki mwa anyun tuiyet ne kitononi eng' olooto kogasei, kole, katul. Kole alak, “Kang'alaalji malaikaiyat.” 30Kowolji Jeso koleenji, “Kama nyo kutini agobo anee, ago agobo okweek. 31Kabiit nguno kirwoogetap ng'wonyuni: ak kagitoorta anyun nguno ne oo ne po ng'wony komanda. 32Ak ye kiuita eng' ng'wony, amutyige piik tugul.” 33Ago ki mwa ni, koboortoi meet ole meitoi.

34

12.34:
T.Kal 110.4; Isa 9.7; Ezk 37.25; Dan 7.14
Ki wolji anyun tuiyet ineendet, koleenji, “Kigegas eng' Ng'atuutik keele tebyei Kristo koigeny. Teptoi ano anyun si imwa ile, kanyool keuito Weeriitap chii? Ng'oo Weerooto po chii?” 35Koleenji Jeso anyun, “Ta komi lapkeiyet eng' kwenung'wong' eng' peetuusyek che matya. Obendoti ye ta otinye lapkeiyet, si ma namak mesundeito: ak ineendet ne wendoti eng' mesundeito koma naei ole wendi. 36Ye ta otinye lapkeiyet, oyan lapkeiyet, si kobiit oegu weeriitap lapkeiyet. Ki mwa Jeso tuguuchu, ak kwo koung'egei icheek.”

Terchinetap kayaneet eng' Jeso

37Ago nga kiga koyai kaboorunoik che chaang' che tee cho eng' tainnywa, koma iyan ineendet. 38

12.38:
Isa 53.1
Kiyaak niito si kobiit kosulda ng'olyootap maotyot Isaiah, ne ki mwa, kole,

“Kiptaiyat, ki iyan ng'oo ng'aleekyok?

Ak kigeng'aang'ji ng'oo eutap Kiptaiyat?”

39Ma imuuch anyun koyan amu ng'olyoondoniito, amu ki mwa Isaiah kogeny, kole,

40

12.40:
Isa 6.10
“Ki kotuch `ineendet konyekwak,

ak Ki kogoochi ineendet mugulelwekwak kouegitu;

si ma keere konyekwak, anan konai eng' mugulelwekwak,

ak koweek,

ak asoop icheek. ”

41Ki mwa tuguuchu Isaiah, amu ki keer toroornatennyi; ak ki ng'alaal agobo ineendet. 42Ago ki iyan ineendet che chaang' agot eng' pounik; ago ma ng'aany ineendet amu Pharisaik, si ma ki oon icheek eng' sinagogit: 43amu ki chamei kalasunetap piik kosiir kalasunetap Kamuktaindet.

Kuursetap Jeso agobo kiyan ineendet

44Ak ki mwa Jeso eng' kutit ne oo, kole, “Ineendet ne iyana, koma iyana anee, ago iyani ineendet ne ki iyookwo. 45Ak ineendet ne keera kogeerei ineendet ne ki iyookwo. 46Ki anyoo aegu lapkeiyet eng' ng'wony, si ma kotebyei eng' mesundeito chii age tugul ne iyana. 47Ak ngo kas chii age tugul ng'aleekyuk, ama riip, ko marwookyini ineendet: amu ki ma anyoo arwookyi ng'wony, ago ki anyoo asaru ng'wony. 48Ineendet ne eesyoa, ama taachei ng'aleekyuk, kotinyei ne irwookyin: ng'olyoot ne ki amwa, nooto ne irwookyin ineendet eng' peetuutap let. 49Amu ki ma amwae aneege; ago ki koono Kwanda ne ki iyookwo, ng'atuutyet, ne kanyool amwa, ak ne kanyool aamda. 50Ak angen ale saboondap koigeny ng'atuutyennyi: tuguuk che amwae anyun, ko ko uu ye ki mwaiwo Kwanda, amwae ko uu nooto.”

13

Kouni Jeso keelyegap kasubik

131Ak ye kingo tomo koit igoortap paska, konai Jeso kole kagoit sainnyi ne wendi eng' ng'wony kwo ole mi Kwanda, ko kagocham chechiik che mi ng'wony, kocham anyun agoi peetuutap let.

2Ak eng' saitap amitwogigap lagat, ko kagonde chesawilyet ng'wektaet muguleldap Judas Iskaryot, ne po kap Simion, 3ko kagonai Jeso kole kagonde Kwanda tuguuk tugul eunekyik, ak kole ki punu Kamuktaindet, ak wendi ole mi Kamuktaindet, 4kong'eet eng' amitwogik, ak konde taban ngoroikyik, ak konam angeet ne kiusegei, kogermenegei. 5Ak koroong'ji peek sanit, ak kotoi koun keelyegap kasubik, ak kouuse anganooto kiga kermenegei. 6Konyo anyun ole mi Simion Petero. Yeityo koleenji Petero, Kiptaiyat, tos iuni inyee keelyekyuk? 7Kowolji `Jeso ineendet koleenji, “Kiit ne ayae, ko mengen nguno; ago tatun inae.” 8Koleenji Petero, Ma koi iun keelyekyuk. Kowolji Jeso koleenji, Ngo maunin, koma kiting'egei kiy. 9Koleenji Simion Petero ineendet, Kiptaiyat, ma keelyekyuk kityo, ago eunekyuk ak icheek ak metinnyu. 10Koleenji `Jeso ineendet, “Ineendet ne kagouungei koma komachei kouungei kogeny, kobatee keelyekyik, amu iuunoot inne: ak ouunootin okweek, ago ma okweek tugul.” 11Amu ki ingen ne kimachei kong'wekta ineendet; ki mwa amu nooto kole, “Ma ouunootin tugul.”

12

13.12-15:
Luk 22.27
Ak ye kingo kagoun anyun keelyekwak, ak konem ngoroikyik, ak kotep ng'wony kogeny, koleenji, “Tos ongen ne kayaiywok? 13Oguureno Kaneetindet, ak Kiptaiyat: ak omwae komyee; amu aa ineendet. 14Ngo anee anyun ne aa Kiptaiyat ak Kaneetindet, ne kaun keelyekwok, ko kanyoljok ak okweek ounjige keelyek. 15Amu kaboorwok, si oyai ak okweek ko uu ne kayaiywok. 16
13.16:
Mat 10.24; Luk 6.40; Jhn 15.20
Amwaiwok, iman, iman, ale, ma oo otwogindet kosiir kiptaiyandannyi; ama oo ineendet ne ki kiyok kosiir ineendet ne ki iyoogu. 17Ngo nai tuguuchu, ko oboiboi ngo yai.

18

13.18:
T.Kal 41.9
“Ma mwaei agobo okweek tugul: angen che ki alewen: ago si kobiit kosulda siruutyet, ne ki le, Ineendet ne amei magatyandennyu, ko kagong'eet kwaryandennyi koyaiywo ne ya. 19Kasip amwaiwok kobooch nguno kotom kosulda, si ye isulda, oyan ole aa ineendet. 20
13.20
Mat 10.40; Mar 9.37; Luk 9.48;10.16
Amwaiwok, iman, iman, ale, Ineendet ne taachei age tugul ne ayoogu ko kataacha; ak ineendet ne taacha ko kataach kineendet ne ki iyookwo.”

Sip komwaei Jeso agobo ng'wektaennyi

(Mat 26:20-25; Mar 14:17-21; Luk 22:21-23)

21Kingo kagomwa Jeso ko uu nooto, koimgei eng' muguleldanyi, ak kobaoryan, kole, “Amwaiwok, iman, iman, ale, Ng'wektoo age eng' okweek.” 22Kogeergei anyun kasubik, ama naei kole, ngo mwaei agobo ng'oo. 23Ak ki mi meset agenge ne po kasubikyik ne kitiegei tegetap Jeso ne ki chamat eng' Jeso. 24Kong'wech anyun Simion Petero ineendet, koleenji, “Mwaiwech, tos mwaei ineendet agobo ng'oo?” 25Koleenji anyun ne kitiegei tegetap Jeso, “Kiptaiyat, ng'oo nooto?” 26Kowol Jeso anyun kole, “Ineendet ne agoochini kererutyet, ye kaaburburte.” Ak ye kingo kagoburburto kererutyet, kogoochi Judas, ne po kap Simion Iskaryot. 27Ak kingo kagotaach kererutyet, kochut Setani ineendet. Koleenji `Jeso ineendet anyun, Yai chokyi ne imache iyai. 28Koma konai chii eng' che ki mi amisyet kole kamwachi ineendet agobo nee. 29Amu kileen alak eng' icheek kaleenji Jeso, “Ui al tuguuk che kimache eng' igoorto”, amu kiting'oti Judas lolet; anan ko kaleenji kogoochi kiy kibanaok. 30Kingo kagotaach anyun ineendet kererutyet, komanda sainooto: ak ki kemoi.

Ng'atuutyet ne leel

31Ye kingo kagomanda saang', komwa Jeso kole, “Kagitoroor nguno Weeriitap chii, ak kagitoroor Kamuktaindet eng' ineendet; 32ak tuun itoroori `Kamuktaindet ineendet eng' oriitinnyi; ak kotoroori ineendet eng' sainooto.

33

13.33:
Jhn 7.34
“Lagochu mengech, ta atebye kobootok ne matya. Tuun ocheeng'a: ak ko uu ye ki amwachi Yahudik aleenji, Ole awendi, ko momuuchi obwa; amwaiwok nguno ak okweek ko uu nooto. 34
13.34:
Jhn 15.12,17; Jhn 3.23; 2Jhn 5
Agoonok ng'atuutyet ne leel, ale, ochamye; ko uu ye ki achamak, ochamyee ak okweek. 35Naei piik tugul kole oo kasubikyuk, ngo chamdosi.”

Sip koyastos Petero kole ma eesyoi Jeso

(Mat 26:31-35; Mar 14:27-31; Luk 22:31-34)

36Ki leenji anyun Simion Petero, Kiptaiyat, iwendi ano? Kowolji Jeso koleenji, “Ole awendi, ko memuuchi isubwo nguno; ago tatun isubwo.” 37Koleenji Petero, Kiptaiyat, kalya si ma muuchi asubun agot nguno? Agoitoi saboondanyu agobo inyee. 38Kowolji Jeso koleenji, “Igoitoi saboondang'ung' agobo anee? Amwaun, iman, iman, ale, kotom koote kipsoiywet, ieesyoa konyil somok.”

14

Ooreet ne itei ole mi Kwanda

141Amogoochi mugulelwekwok koiimgei: oyani Kamuktaindet, oyana agane. 2Miitei kooriik che chaang' eng' kootap Abba; nda ki ma ko uu nooto, ta ki amwaiwok; awendi achobwok kooret. 3Ak ye awe achobwok kooret, anyoone kogeny amutok; si ole ami omite ak okweek. 4Ak ole awendi, ongen ooreet.

5Koleenji Thomas, Kiptaiyat, ma kingen ole iwendi; kinaitoi ano anyun ooreet? 6Koleenji Jeso, Aa ooreet, ak iman, ak saboondo: ma nyoonjin chii Kwanda, ama eng' anee. 7Nda ki onaa, ta ki onai Abba agine: ak kaonai ineendet anyun kobooch nguno, ak kaogeer ineendet.

8Koleenji Philipu, Kiptaiyat, iboorwech Kwanda, si koyamech. 9Koleenji Jeso, Ki kitebi tugul ak okweek peetuusyek che chaang', ak tomo inaa, Philipu? Ineendet ne ki kogeero ko ki kogeer Kwanda: imwae eng' nee anyun, ile, Iboorwech Kwanda? 10Tos meyani ile ami eng' Kwanda, ak Kwanda eng' anee? Ng'aleek che amwaiwok koma mwaei aneege: ago Kwanda ne menya ne yaei poisyonikyik. 11Iyana amu ami eng' Kwanda, ak Kwanda eng' anee: anan oyana agobo poisyonik icheeget. 12Amwaiwok, iman, iman, ale, Ineendet ne iyana, koyaei agine poisyonik che ayae; ak koyaei poisyonik che eech eng' chuuto; amu awendi ole mi Kwanda. 13Ak kiit age tugul ne osoome eng' kainennyu, ayae, si kegonyit Kwanda eng' Weeriit. 14Ngot osoom kiy age tugul eng' kainennyu, ayae kioto.

Kabuuset ne Tiliil

15Ngot ochama, oriibe ng'atuutikyuk. 16Ak asoom Kwanda, ak kogoonok kagaigaindet age, si kotebi kobootok koigeny, 17nooto Kabuuset ne Tiliil ne po imanit, ne ma imuuchi ng'wony kotaach; amu ma keerei ineendet, ama naei ineendet: ago ongen ineendet: amu tebyei kobootok, ak tuun tebyei eng' oriing'wong'.

18Ma pagaaktook ko uu kibananook: anyonjinok. 19Ta komi kitigin, si ma kogeero ng'wony; ago ogeera: amu asabe, osaptosi ak okweek. 20Eng' peetuunooto onai ole ami eng' Abba, ak okweek eng' anee, ak anee eng' okweek. 21Ineendet ne tinyei ng'atuutikyuk, ak koriibei, ko nooto ne chama: ak ineendet ne chama kochamaat eng' Abba, ak achame ineendet ak ang'aang'jigei ineendet.

22Koleenji `Judas (ma Iskaryot), Kiptaiyat, kalya si ing'ang'weige, ama ing'aang'jige ng'wony? 23Kowolji Jeso koleenji, “Ngo chama chii, koriip ng'olyoondennyu: ak kocham Abba ineendet ak kebwonji ineendet, ak kemeny kobooto ineendet. 24Ineendet ne ma chama ko ma riibei ng'aleekyuk: ak ma nenyu ng'olyoot ne ogase, ago po Kwanda ne ki iyookwo. 25Kaamwaiwok tuguuchu, kota ami kobootok. 26Ago ineetook tuguuk tugul Kagaigaindet, Kabuuset ne Tiliil, ne iyoogu Kwanda eng' kainennyu, ak kobwaatwok tugul che kaamwaiwok. 27Abagakwok kaalyeet; agoonok kalyennyu: ma koonok ko uu ye koonu ng'wony. Among' koiimgei mugulelwekwok, anan koiyweis. 28Kaogas ko uu ye kaamwaiwok ale, Awendi, ak anyoone ole omi. Ngot ochama, ko oboiboi, amu awendi ole mi Kwanda: amu oo Kwanda eng' anee. 29Ak kaamwaiwok nguno kotom koyaak, si ye kagoyaak, oyan. 30Ma ng'alaalwok miising', amu nyoonei ne oo ne po ng'wony: ama tinyei kiy eng' anee; 31ago si konai ng'wony kole achame Kwanda, ak ko uu ye ki koono Kwanda ng'atuutyet, ayae ko uu nooto. Ong'eetyee, keebe.”

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]