Revised Kalenjin Bible (KAPR)
16

161Kaamwaiwok tuguuchu, si ma kinachak. 2Oonok eng' sinagogisyek. Nyoonei sait, ne ibwaati chii tugul ne parok kole, ayachini Kamuktaindet poisyet. 3Ak yaei tuguuchu, amu ma nai Kwanda, anan anee. 4Ago kaamwaiwok tuguuchu, si ye nyo sainnywa, omuuchi obwaat ole ki amwaiwok agobo chuuto.

“Ago ki ma amwaiwok tuguuchu eng' taunet, amu ki ami kobootok. 5Ago kawe nguno ole mi ineendet ne ki iyookwo; ama mi age eng' okweek ne teebena kole, ‘Iwendi ano?’ 6Amu kaamwaiwok tuguuchu, ko kanyi mugulelwekwok arageneet. 7Ago amwaiwok ne po iman: myee eng' okweek ngawe: amu ngo mawe, ko manyonjinok Kagaigaindet; ago ngot awe, ayookwok ineendet. 8Ak ye kagonyo ineendet, kogikyi ng'wony agobo tengekto, ak imanda, ak kirwooget: 9agobo tengekto, amu ma iyana; 10agobo imanda, amu awendi ole mi Kwanda, ama ogeero kogeny; 11agobo kirwooget, amu ki kirwookyi ne oo ne po ng'wonyuni.”

12“Ta atinye tuguuk che chaang' che kata ta amwaiwok, ago ma omuuchi omuite nguno. 13Ago ye tuun kagonyo ineendet, Kabuuset ne Tiliil ne po imanit, kondoiywok agoi oit imanda tugul: amu ma mwaei ineegei; ago mwaei tuguuk tugul che kasei: ak kong'ang'wok tuguuk che pwoonei. 14Itoroora: amu namei chechuuk, ak kong'ang'wok. 15Chechuuk tuguuk tugul che tinyei Kwanda: nooto kaamwa, ale, namei chechuuk, ak koboorwok.”

Riirek kewalei koek poiboyet

16“Tomo kitigin, si ma ogeera kogeny; ak mi kitigin kogeny, si ogeero.” 17Kong'alaaljigei anyun alak eng' kasubikyik kole, “Nee ni kamwaiwech kole, ‘Mi kitigin, si ma ogeera; ak mi kitigin kogeny, si ogeera: ak, Amu awendi ole mi Kwanda?’ ” 18Kole anyun, “Nee ni kamwa kole, ‘Mi kitigin?’ Ma kingen kiit ne mwaei.” 19Ki nai Jeso anyun kole, machei koteebe pichooto ineendet, ak ki leenji, “Tos oteebegei okweegei agobo ng'olyoondoni kaamwa ale mi kitigin, si ma ogeera, ak mi kitigin kogeny, si ogeera? 20Amwaiwok, iman, iman, ale orirtosi ak oteitosi, ago paibai ng'wony: oaragendosi, ago kiweechi arageneng'wong' koek poiboiyet. 21Arageni tamonet ye machei kosigiis, amu kait sainnyi; ago ye kagosich lakweet, koma kobwaati ng'wanindo kogeny, eng' poiboiyet amu kagesikyi chii ng'wony. 22Nooto anyun otinye arageneet nguno: ago ta ageerok kogeny, ak poiboi mugulelwekwok, ama rebenok chii poiboiyeng'wong'. 23Ama oteebena kiy eng' peetuunooto. Amwaiwok, iman, iman, ale, Ngot osoom Kwanda kiy age tugul, kogoonok eng' kainennyu. 24Tom osoom kiy eng' kainennyu: osoom, si onyooru, si kobiit kosulda poiboiyeng'wong'.”

Kogimiti `Jeso kasubik

25“Kaamwaiwok tuguuchu eng' kalewenaik: ago nyoonei sait, ye ma ang'alaalwok eng' kalewenaik, ago aboorwok komyee agobo Kwanda. 26Osoome peetuunooto eng' kainennyu: amamwaiwok, ale ateebee Kwanda kiy agobo okweek; 27amu chamok ineendet Kwanda, amu ki ochama, ak ki oyan ole ki abunu Kwanda. 28Ki abunu Kwanda, anyoonji ng'wony: abagaaktoi ng'wony kogeny, ak agetitegei ole mi Kwanda.”

29Koleenji kasubikyik, “Keero, ing'alaali nguno komyee kotook, ama imwae kalewenet.” 30Kingen nguno keele ingen tuguuk tugul, ama nyoljin chii koteebenen kiy: kiyani eng' niito keele ki ibunu Kamuktaindet. 31Kowolji Jeso koleenji, “Oyani nguno? 32Ogeero, nyoonei sait, ee, kagonyo nguno, ye kiyestook, kwo chii tugul oldanyi, ak obagaakta aneege: ago ma mi aneege, amu mi Kwanda kobooto. 33Kaamwaiwok tuguuchu, si kobiit onyoorunena kaalyeet. Otinye nyalilda eng' ng'wony! Ago onyiganitu; amu kaaterter ng'wony.”

17

Saaet ne po Jeso

171Ki mwa Jeso ng'aleechu; ak konyal kipsengwet, ak kole, “Abba, kagonyo sait; itoroor Weeriing'ung', si kotoroorin Weeriit; 2ko uu ye ki igoochi ineendet kimnateet koboi piik tugul, si kobiit kogoochi saboondap koigeny tugul che ki igoochi ineendet. 3Ak ni saboondap koigeny, ale konain Kamuktaindet ne inyeendet inyegei ne po iman, ak Jeso Kristo, ne ki iyoogu. 4Ki atoroorin eng' ng'wony, amu kaagesu poisyet ne ki igoono ayai. 5Ak nguno, ee Abba, itoroora eng' inyeendet inyegei eng' toroornatet ne ki atinye kemi tuwai kotom kobiit ng'wony. 6Ki aboorchi kaineng'ung' piik che ki igoono eng' ng'wony. Ki cheguuk, ak ki igoono; ak ki koriip ng'olyoondeng'ung'. 7Kagonai nguno kole punun tuguuk tugul che ki igoono; 8amu ki agoochi icheek ng'aleek che ki igoono ak ki kotaach, ak ki konai iman kole ki abunu ole imi, ak ki koyan kole ki iyookwo. 9Asaae agobo icheek: ma saae agobo ng'wony, ago agobo icheek che ki igoono; amu cheguuk: 10ak tuguuk tugul chechuuk ko cheguuk, ak cheguuk ko chechuuk: ak ki itoroora eng' icheek. 11Ak ma amite ng'wony, ago mi ng'wony chu, ak anyoone ole imi. Abba ne Tiliil, riip eng' kaineng'ung' icheek che ki igoono, si kobiit koek agenge, ko uu acheek. 12

17.12:
T.Kal 41.9; Jhn 13.18
Ki ariip eng' kaineng'ung' icheek che ki igoono, ye kota kemi ak icheek: ki ariip icheek, ama pet agot agenge eng' icheek, kobatee weeriitap luseet; si kobiit kosulda siruutyet. 13Ak kanyonjin nguno; ak amwae tuguuchu eng' ng'wony, si kobiit kosulda poiboiyennyu eng' icheek. 14Ki agoochi ng'olyoondeng'ung'; ak kawech ng'wony icheek, amu ma po ng'wony, ko uu ye ma po ng'wony anee. 15Masaae ale imut icheek eng' ng'wony, ago ale iriip icheek eng' ineendet ne ya. 16Ma po ng'wony icheek, ko uu ye ma po ng'wony anee. 17Itiliil icheek eng' imanit: imanit ng'olyoondeng'ung'. 18Ko uu ye ki iyookwo anyo ng'wony, ko uu nooto kaayookte icheek koba ng'wony. 19Ak atabaanige agobo icheek si kobiit kitabaan icheek eng' imanit. 20Amasaae agobo chu kityo, ago asaae agobo icheek che tuun iyana amu ng'olyoonnywa; 21si kobiit koek icheek tugul agenge; ko uu ye imi inyee Abba, eng' anee, ak anee eng' inyee, si kobiit kotep icheek eng' acheek: si kobiit koyan ng'wony kole ki iyookwo. 22Ak kaagoochi icheek toroornatet ne ki igoono; si kobiit koek agenge ko uu ye ki agenge acheek; 23anee eng' icheek, ak inyee eng' anee, si kobiit koek icheek che ititaatiin eng' agenge; si kobiit konai ng'wony kole ki iyookwo, ak ichame icheek, ko uu ye ichama.”

24Abba, amache ale kotebi kobooto eng' ole ami, icheek che ki igoono; si kobiit kogeer toroornatennyu ne ki igoono; amu ki ichama kotom kelumda ng'wony. 25“Ee Abba ne po imanda, ki ma kongenin ng'wony, ago ki angenin; ak ki konai chu kole, ki iyookwo. 26Ki ang'aang'ji icheek kaineng'ung', ak ta ang'aang'jini; si kobiit kotebee icheek chamyet ne ki ichamena, ak anee eng' icheek.”

18

Kenamei Jeso

(Mat 26:47-56; Mar 14:43-50; Luk 22:46-53)

181Ye kingo kagomwa Jeso ng'aleechu, koba ak kasubikyik kolanda eng' kereruut ne kiguure Kedron, ole ki mi mbareet, ole ki wo ineendet, kobooto kasubikyik. 2Ak ki ingen koronooto Judas agine, ne king'wektoi ineendet: amu ki cham kowendi Jeso yooto kobooto kasubikyik. 3Ak kingo kagonyoor Judas lugeetap kiplugotinik, ak kiptainik che punu tisiik che eecheen ak Pharisaik, kobwa kotinyei taisyek ak kegenganik ak kariik che po lugeet. 4Kwo anyun Jeso, ko kagonai tuguuk tugul che pwaanjin ineendet ak koleenji, “Ocheeng'e ng'oo?” 5Kowolji koleenji, “Jeso ne po Nazareth.” Koleenji Jeso, “Aa ineendet.” Ak ki tononi kobooto icheek Judas agine, ne king'wektoi ineendet.

6Ye kingo mwachi anyun kole, “Aa ineendet,” kobee patai ak kobutyo. 7Ki teebe anyun icheek kogeny, kole, “Ocheeng'e ng'oo?” Ak kole, “Jeso ne po Nazareth.” 8Kowol Jeso, kole, “Kaamwaiwok ale aa ineendet; nooto anyun ngo cheeng'a ounde chu koba.” 9Si kosulda ng'olyoot ne ki mwa kole, “Ma petena agot agenge eng' chooto ki igoono.” 10King'us anyun Simion Petero rotwetap chok ne ki tinyei, ak koep otwogindetap tisiindet ne oo, koep iitinnyi ne po tai. Ki kiguure otwogindonooto Malko. 11

18.11:
Mat 26.39; Mar 14.36; Luk 22.42
Koleenji Jeso anyun Petero, Weekyi rotweet choget: tos maee kigombet ne kagoono Kwanda?

Komi Jeso taitap Annas tisiindet ne oo

12Konam anyun lugeet ak kiptaiyat ne oo, ak kiptainik che po Yahudik, Jeso ak koraat ineendet, 13ak komutyi Anas korook; amu ki kabyugoit ne po Caiaphas, ne ki tisiindet ne oo kenyinooto. 14

18.14:
Jhn 11.49-50
Caiaphas nooto ne ki iboorchi Yahudik kole, nyolu komechi chiito agenge piik.

Koeesyoi `Petero Jeso

(Mat 26:69-70; Mar 14:66-68; Luk 22:55-57)

15Ki isup anyun Simion Petero Jeso, ak age eng' kasubik. Amu ki ingengei tisiindet ne oo ak nooto agenge eng' kasubik, koba koot oriit kobooto Jeso agoi kapkirwoogetap tisiindet ne oo. 16Kitononi Petero eng' saang' ye neegit kurgeet. Ki manda anyun chiichooto agenge eng' kasubik ne ki ingengei ak tisiindet ne oo, ak kong'alaalji chepto ne kiriibei kurgeet, ki imut Petero konyo ko. 17Koleenji anyun chepto ne kiriibei kurgeet Petero, Ma ii agenge eng' kasubigap chiichi? Kole, Ma anee.

18Ak kitonondos eng' yooto otwogik ak kiptainik, che kiga kolaal maat ne po nesek, amu ki kaitit; ak kiyue maat: ak kitononi Petero agine kobooto icheek, koyue maat.

Koteepseen `tisiindet ne oo Jeso

(Mat 26:59-66; Mar14:55-64; Luk 22-66-71)

19Ki teebe anyun tisiindet ne oo Jeso agobo kasubikyik ak kaneetisyennyi. 20Kowolji Jeso koleenji, “Ki ang'alaalji ng'wony, amauny ng'olyoo; ki aneetisye kotugul eng' sinagogisyek, ak eng' Hekaluut, ole tuiyechin Yahudik tugul; amamwa kiy eng' ung'oot. 21Amu nee si iteebena? Teebe icheek che ki kas kiit ne ki amwachi icheek; keero, ingen chu tuguuk che ki amwa.” 22Ak ye kingo kagomwa ko uu niito, korabach Jeso age eng' kiptainik che kitonondos eng' yooto kole, “Iwoljini tisiindet ne oo ko uu nooto?” 23Kowolji Jeso koleenji, “Ngot ko kaamwa ne ya, ibaoryan agobo nooto ya: ago ngot ko myee, ko amu nee si irabaacha?” 24Ki iyookto anyun Anas ineendet ko rataat kwo kap Kaiapa, tisiindet ne oo.

Kotiitos `Petero Jeso kogeny

(Mat 26:71-75; Mar 14:69-72; Luk 22:58-62)

25Ak kitononi Simion Petero koyue maat. Koleenji anyun icheek ineendet, Ma ii age aginye ne po kasubikyik? Kotiiyo kole, “Ma aa ineendet.” 26Kole otwogindet age ne po tisiindet ne oo ne kitilyonut ak chiichooto kiebei Petero itinnyi, Koma ageerin eng' mbar omi ak ineendet. 27Kotiiyo anyun Petero kogeny; ak eng' sainooto koote kipsoiywet.

Komi Jeso taitap Pilato

(Mat 27:1-2, 11-14; Mar 15:1-5; Luk 23:1-5)

28Ki imut Jeso anyun kong'etee kap Kaiapa kwo Praitorium: ak kita ko karon miising'; ak ma pa icheeget Praitorium oriit, si ma ng'woneegitu, ago si kobiit koam paska. 29Ki manda Pilato anyun kwo ole mi icheek, ak kole, “Nee ng'olyoo ne orwookyine chiichi?” 30Kowolji koleenji, “Nda koma ko chalwogin chiichi, ta koma kimutu ineendet konyo taing'ung'.” 31Koleenji Pilato icheek anyun, Onam ineendet okweek, ak orwookyi ko uu ng'atuutyeng'wong'. Koleenji anyun Yahudik, Ma chamdaat eng' acheek kebar chii age tugul: 32

18.32:
Jhn 3.14; 12.32
si kobiit kosulda ng'olyootap Jeso, ne ki mwa, kobooru meet ole meitoi ineendet. 33Ki wo anyun kogeny Pilato Praitorium oriit, ak koguur Jeso, koleenji, “Tos ii Laitoryatap Yahudik?” 34Kowolji Jeso koleenji, “Imwae ng'olyoondoni inyegei anan komwaun alak agobo anee?” 35Kowol Pilato kole, “Aa Yahudyot? Kagomutun tainnyu pororyeng'ung' ak tisiik che eecheen. Ki iyai nee?” 36Kowol Jeso, kole, “Ma po ng'wonyuni laitornatennyu: nda po ng'wonyuni laitornatennyu, ko kata yaei pooryeet kasubikyuk si ma kindea eunegap Yahudik: ago nguno koma po laitornatennyu oli.” 37Koleenji anyun Pilato ineendet, “Ara, ii laitoryat so?” Kowol Jeso kole, “Imwae ile aa laitoryat. Ki kisicha amu niito, ak ki anyoo ng'wony amu niito, si kobiit abaoryanji imanit. Kasei kutinnyu chii age tugul ne po imanit.” 38Koleenji Pilato, Nee imanit?

Ketiljin Jeso kirwoogetap meet

(Mat 27:15-31; Mar 15:6-20; Luk 23:13-25)

Ak ye kingo kagomwa ko uu ni, komanda kogeny ole mi Yahudik, ak koleenji, “Ma anyoorchi anee leluut ineendet. 39Ago otinye piteet, ole atyakwok age eng' paska: ara omache atyakwok Laitoryatap Yahudik?” 40Kobolyo anyun kogeny, kole “Ma chiichi, ago Barabbas!” Ago anyun, ki rebindet Barabbas.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]