Revised Kalenjin Bible (KAPR)
17

Saaet ne po Jeso

171Ki mwa Jeso ng'aleechu; ak konyal kipsengwet, ak kole, “Abba, kagonyo sait; itoroor Weeriing'ung', si kotoroorin Weeriit; 2ko uu ye ki igoochi ineendet kimnateet koboi piik tugul, si kobiit kogoochi saboondap koigeny tugul che ki igoochi ineendet. 3Ak ni saboondap koigeny, ale konain Kamuktaindet ne inyeendet inyegei ne po iman, ak Jeso Kristo, ne ki iyoogu. 4Ki atoroorin eng' ng'wony, amu kaagesu poisyet ne ki igoono ayai. 5Ak nguno, ee Abba, itoroora eng' inyeendet inyegei eng' toroornatet ne ki atinye kemi tuwai kotom kobiit ng'wony. 6Ki aboorchi kaineng'ung' piik che ki igoono eng' ng'wony. Ki cheguuk, ak ki igoono; ak ki koriip ng'olyoondeng'ung'. 7Kagonai nguno kole punun tuguuk tugul che ki igoono; 8amu ki agoochi icheek ng'aleek che ki igoono ak ki kotaach, ak ki konai iman kole ki abunu ole imi, ak ki koyan kole ki iyookwo. 9Asaae agobo icheek: ma saae agobo ng'wony, ago agobo icheek che ki igoono; amu cheguuk: 10ak tuguuk tugul chechuuk ko cheguuk, ak cheguuk ko chechuuk: ak ki itoroora eng' icheek. 11Ak ma amite ng'wony, ago mi ng'wony chu, ak anyoone ole imi. Abba ne Tiliil, riip eng' kaineng'ung' icheek che ki igoono, si kobiit koek agenge, ko uu acheek. 12

17.12:
T.Kal 41.9; Jhn 13.18
Ki ariip eng' kaineng'ung' icheek che ki igoono, ye kota kemi ak icheek: ki ariip icheek, ama pet agot agenge eng' icheek, kobatee weeriitap luseet; si kobiit kosulda siruutyet. 13Ak kanyonjin nguno; ak amwae tuguuchu eng' ng'wony, si kobiit kosulda poiboiyennyu eng' icheek. 14Ki agoochi ng'olyoondeng'ung'; ak kawech ng'wony icheek, amu ma po ng'wony, ko uu ye ma po ng'wony anee. 15Masaae ale imut icheek eng' ng'wony, ago ale iriip icheek eng' ineendet ne ya. 16Ma po ng'wony icheek, ko uu ye ma po ng'wony anee. 17Itiliil icheek eng' imanit: imanit ng'olyoondeng'ung'. 18Ko uu ye ki iyookwo anyo ng'wony, ko uu nooto kaayookte icheek koba ng'wony. 19Ak atabaanige agobo icheek si kobiit kitabaan icheek eng' imanit. 20Amasaae agobo chu kityo, ago asaae agobo icheek che tuun iyana amu ng'olyoonnywa; 21si kobiit koek icheek tugul agenge; ko uu ye imi inyee Abba, eng' anee, ak anee eng' inyee, si kobiit kotep icheek eng' acheek: si kobiit koyan ng'wony kole ki iyookwo. 22Ak kaagoochi icheek toroornatet ne ki igoono; si kobiit koek agenge ko uu ye ki agenge acheek; 23anee eng' icheek, ak inyee eng' anee, si kobiit koek icheek che ititaatiin eng' agenge; si kobiit konai ng'wony kole ki iyookwo, ak ichame icheek, ko uu ye ichama.”

24Abba, amache ale kotebi kobooto eng' ole ami, icheek che ki igoono; si kobiit kogeer toroornatennyu ne ki igoono; amu ki ichama kotom kelumda ng'wony. 25“Ee Abba ne po imanda, ki ma kongenin ng'wony, ago ki angenin; ak ki konai chu kole, ki iyookwo. 26Ki ang'aang'ji icheek kaineng'ung', ak ta ang'aang'jini; si kobiit kotebee icheek chamyet ne ki ichamena, ak anee eng' icheek.”

18

Kenamei Jeso

(Mat 26:47-56; Mar 14:43-50; Luk 22:46-53)

181Ye kingo kagomwa Jeso ng'aleechu, koba ak kasubikyik kolanda eng' kereruut ne kiguure Kedron, ole ki mi mbareet, ole ki wo ineendet, kobooto kasubikyik. 2Ak ki ingen koronooto Judas agine, ne king'wektoi ineendet: amu ki cham kowendi Jeso yooto kobooto kasubikyik. 3Ak kingo kagonyoor Judas lugeetap kiplugotinik, ak kiptainik che punu tisiik che eecheen ak Pharisaik, kobwa kotinyei taisyek ak kegenganik ak kariik che po lugeet. 4Kwo anyun Jeso, ko kagonai tuguuk tugul che pwaanjin ineendet ak koleenji, “Ocheeng'e ng'oo?” 5Kowolji koleenji, “Jeso ne po Nazareth.” Koleenji Jeso, “Aa ineendet.” Ak ki tononi kobooto icheek Judas agine, ne king'wektoi ineendet.

6Ye kingo mwachi anyun kole, “Aa ineendet,” kobee patai ak kobutyo. 7Ki teebe anyun icheek kogeny, kole, “Ocheeng'e ng'oo?” Ak kole, “Jeso ne po Nazareth.” 8Kowol Jeso, kole, “Kaamwaiwok ale aa ineendet; nooto anyun ngo cheeng'a ounde chu koba.” 9Si kosulda ng'olyoot ne ki mwa kole, “Ma petena agot agenge eng' chooto ki igoono.” 10King'us anyun Simion Petero rotwetap chok ne ki tinyei, ak koep otwogindetap tisiindet ne oo, koep iitinnyi ne po tai. Ki kiguure otwogindonooto Malko. 11

18.11:
Mat 26.39; Mar 14.36; Luk 22.42
Koleenji Jeso anyun Petero, Weekyi rotweet choget: tos maee kigombet ne kagoono Kwanda?

Komi Jeso taitap Annas tisiindet ne oo

12Konam anyun lugeet ak kiptaiyat ne oo, ak kiptainik che po Yahudik, Jeso ak koraat ineendet, 13ak komutyi Anas korook; amu ki kabyugoit ne po Caiaphas, ne ki tisiindet ne oo kenyinooto. 14

18.14:
Jhn 11.49-50
Caiaphas nooto ne ki iboorchi Yahudik kole, nyolu komechi chiito agenge piik.

Koeesyoi `Petero Jeso

(Mat 26:69-70; Mar 14:66-68; Luk 22:55-57)

15Ki isup anyun Simion Petero Jeso, ak age eng' kasubik. Amu ki ingengei tisiindet ne oo ak nooto agenge eng' kasubik, koba koot oriit kobooto Jeso agoi kapkirwoogetap tisiindet ne oo. 16Kitononi Petero eng' saang' ye neegit kurgeet. Ki manda anyun chiichooto agenge eng' kasubik ne ki ingengei ak tisiindet ne oo, ak kong'alaalji chepto ne kiriibei kurgeet, ki imut Petero konyo ko. 17Koleenji anyun chepto ne kiriibei kurgeet Petero, Ma ii agenge eng' kasubigap chiichi? Kole, Ma anee.

18Ak kitonondos eng' yooto otwogik ak kiptainik, che kiga kolaal maat ne po nesek, amu ki kaitit; ak kiyue maat: ak kitononi Petero agine kobooto icheek, koyue maat.

Koteepseen `tisiindet ne oo Jeso

(Mat 26:59-66; Mar14:55-64; Luk 22-66-71)

19Ki teebe anyun tisiindet ne oo Jeso agobo kasubikyik ak kaneetisyennyi. 20Kowolji Jeso koleenji, “Ki ang'alaalji ng'wony, amauny ng'olyoo; ki aneetisye kotugul eng' sinagogisyek, ak eng' Hekaluut, ole tuiyechin Yahudik tugul; amamwa kiy eng' ung'oot. 21Amu nee si iteebena? Teebe icheek che ki kas kiit ne ki amwachi icheek; keero, ingen chu tuguuk che ki amwa.” 22Ak ye kingo kagomwa ko uu niito, korabach Jeso age eng' kiptainik che kitonondos eng' yooto kole, “Iwoljini tisiindet ne oo ko uu nooto?” 23Kowolji Jeso koleenji, “Ngot ko kaamwa ne ya, ibaoryan agobo nooto ya: ago ngot ko myee, ko amu nee si irabaacha?” 24Ki iyookto anyun Anas ineendet ko rataat kwo kap Kaiapa, tisiindet ne oo.

Kotiitos `Petero Jeso kogeny

(Mat 26:71-75; Mar 14:69-72; Luk 22:58-62)

25Ak kitononi Simion Petero koyue maat. Koleenji anyun icheek ineendet, Ma ii age aginye ne po kasubikyik? Kotiiyo kole, “Ma aa ineendet.” 26Kole otwogindet age ne po tisiindet ne oo ne kitilyonut ak chiichooto kiebei Petero itinnyi, Koma ageerin eng' mbar omi ak ineendet. 27Kotiiyo anyun Petero kogeny; ak eng' sainooto koote kipsoiywet.

Komi Jeso taitap Pilato

(Mat 27:1-2, 11-14; Mar 15:1-5; Luk 23:1-5)

28Ki imut Jeso anyun kong'etee kap Kaiapa kwo Praitorium: ak kita ko karon miising'; ak ma pa icheeget Praitorium oriit, si ma ng'woneegitu, ago si kobiit koam paska. 29Ki manda Pilato anyun kwo ole mi icheek, ak kole, “Nee ng'olyoo ne orwookyine chiichi?” 30Kowolji koleenji, “Nda koma ko chalwogin chiichi, ta koma kimutu ineendet konyo taing'ung'.” 31Koleenji Pilato icheek anyun, Onam ineendet okweek, ak orwookyi ko uu ng'atuutyeng'wong'. Koleenji anyun Yahudik, Ma chamdaat eng' acheek kebar chii age tugul: 32

18.32:
Jhn 3.14; 12.32
si kobiit kosulda ng'olyootap Jeso, ne ki mwa, kobooru meet ole meitoi ineendet. 33Ki wo anyun kogeny Pilato Praitorium oriit, ak koguur Jeso, koleenji, “Tos ii Laitoryatap Yahudik?” 34Kowolji Jeso koleenji, “Imwae ng'olyoondoni inyegei anan komwaun alak agobo anee?” 35Kowol Pilato kole, “Aa Yahudyot? Kagomutun tainnyu pororyeng'ung' ak tisiik che eecheen. Ki iyai nee?” 36Kowol Jeso, kole, “Ma po ng'wonyuni laitornatennyu: nda po ng'wonyuni laitornatennyu, ko kata yaei pooryeet kasubikyuk si ma kindea eunegap Yahudik: ago nguno koma po laitornatennyu oli.” 37Koleenji anyun Pilato ineendet, “Ara, ii laitoryat so?” Kowol Jeso kole, “Imwae ile aa laitoryat. Ki kisicha amu niito, ak ki anyoo ng'wony amu niito, si kobiit abaoryanji imanit. Kasei kutinnyu chii age tugul ne po imanit.” 38Koleenji Pilato, Nee imanit?

Ketiljin Jeso kirwoogetap meet

(Mat 27:15-31; Mar 15:6-20; Luk 23:13-25)

Ak ye kingo kagomwa ko uu ni, komanda kogeny ole mi Yahudik, ak koleenji, “Ma anyoorchi anee leluut ineendet. 39Ago otinye piteet, ole atyakwok age eng' paska: ara omache atyakwok Laitoryatap Yahudik?” 40Kobolyo anyun kogeny, kole “Ma chiichi, ago Barabbas!” Ago anyun, ki rebindet Barabbas.

19

191Ki nam anyun Pilato Jeso, ak kobire kipchoritiit. 2Ak kita kiplugotinik ngatyet ne po katook, ak konde metit, ak kolaakyi ineendet ngoryeet ne aruus ne piriir; 3ak kobwa ole mi ineendet kole, “Kigatin, Laitoryatap Yahudik!” Ak korabach ineendet. 4Ak kimanda Pilato kogeny, ak koleenji icheek, “Ogeero, kamutwak ineendet konyo taing'wong', si onai ole ma anyoorchi anee leluut ineendet.” 5Komong' Jeso anyun konyo saang', ko kerat metit eng' ngatyetap katook, kolaaganu ngoryonooto aruus ne piriir. Ak koleenji Pilato pichooto, “Ogeer chiichi anyun o!” 6Ye kingo keer anyun ineendet tisiik che eecheen ak kiptainik, kobolyo, kole, “Igartaat! Igartaat!” Koleenji Pilato, “Omut okweek ineendet ak ogartaat; amu ma anyoorchi leluut.” 7Kowolji Yahudik koleenji, “Ki tinyei ng'atuutyet, ak kanyool kome amu ng'atuutyonooto, amu ki yaigei koek Weeriitap Kamuktaindet.”

8Ye kingo kas anyun Pilato mwaonooto, koywei miising'; 9ak ki wo Praitorium oriit kogeny, ak koleenji Jeso, Ibunu ano? Ago ma wolji `Jeso ineendet. 10Koleenji Pilato anyun ineendet, “Metwekwa? Mengen ile atinye kimnateet atyachin, ak atinye kimnateet agartatin?” 11Kowolji Jeso koleenji, “Kama ko tetinye kimnateet iyaiywo kiy, nda kama kigoonin eng' parak; nooto anyun, tinyei ineendet ne koindea euneguk tengekto ne oo kosiir.” 12Kobooch yooto kocheeng' Pilato kotyach ineendet: ago ki polyo Yahudik, kole, “Ngot ityaach chiichi, koma ii chorweet ne po Caesarea: reenyei Caesarea chii age tugul ne yaegei koek laitoryat.” 13Ye kingo kas anyun Pilato ng'aleechuuto, komut Jeso komong' saang', ak kotep ng'wony eng' ng'echereetap kirwooget eng' ole kiguure Teteetap Koik, ago kiguure eng' kutitap Yahudik, Gabata.

14Ki chobetap paska peetuunooto: ak ki olo po sait lo. Ak ki leenji Yahudik, “Ogeero, Laitoryandeng'wong'!” 15Kobolyo pichooto kole, “Iste ineendet! Iste ineendet! Igartaat ineendet!” Koleenji Pilato anyun icheek, agartaat laitoryandeng'wong'? Kowol tisiik che eecheen, kole, ma kitinye laitorya kobatee Caesarea. 16Kogoito anyun Pilato ineendet kigartaat.

Kigartati Jeso

(Mat 27:32-44; Mar 15:21-32; Luk 23:26-43)

Konam anyun icheek Jeso ak komut: 17ak komanda, koibei ineegei kimurtoiyot, agoi koit ole kiguure Kooretap terta, ne kiguure eng' kutitap Yahudik, Golgota: 18ole ki igartate icheek ineendet, kobooto aeng' alak, age komosi ak age komosi, ak ki mi Jeso kween. 19Ak kisir anyun Pilato sireet, ak konde kimurtoiyot. Ki kisir keele, “JESO NE PO NASARET, LAITORYAT NE PO YAHUDIK.” 20Kosoman anyun Yahudik che chaang' sironiito: amu kineegite nganaseet ole ki kigartate Jeso: ak ki kisir eng' kutitap Yahudik, ak Romanik, ak Yunanik. 21Koleenji anyun tisiik che eecheen che po Yahudik Pilato, “Amesir ile, Laitoryat ne po Yahudik: ago, ki mwa kole, ‘Aa Laitoryat ne po Yahudik.’ ” 22Kowol Pilato kole, “Kiit ne kaasir ko kaasir.”

23Ye kingo kagogartaat anyun kiplugotinik Jeso, konam ngoroikyik, kopchei koek kebeberwek ang'wan, koip asigarindet age tugul kebeberta age; ak ko uu nooto sumet agine: ak ki ma kotinyei sumet ole ki kituiye, ki kinap koek agenge kongeete parak agoi kapkelyen. 24

19.24:
T.Kal 22.18
Koleenjigei anyun icheegei, “Amongegereer, ago ongeseer parbareek, si kenai chiito ne punjin: si kosulda siruutyet ne mwaei kole,

Kipchechigei ngoroikyuk,

Ak kolotyigei ngoryennyu.

Ki yai anyun kiplugotinik tuguuchuuto.”

25Ago kitonondos eng' ye neegitee kimurtoiyotap Jeso kamet, ak chepkametap kamet, Maria ne po Klopa, ak Maria Magdalene. 26Ye kingo keer Jeso anyun kamet, ak nooto agenge eng' kasubikyik ne ki chamei Jeso kotonondos eng' yooto, koleenji kamet, “Chebyosoni, keer weeriing'ung'!” 27Koleenji anyun nooto agenge eng' kasubikyik, “Keer kamenng'ung'!” Ak kobooch sainooto komut ineendet chebyosonooto kwo koonnyi.

Meetap Jeso

(Mat27:45-56; Mar 15:33-41; Luk 23:44-49)

28

19.28:
T.Kal 22.15; 69.21
Kingo pata chooto, ko kagonai Jeso kole kagogeskei tuguuk tugul, si kobiit kosulda siruutyet, komwa kole, “Ama melel.” 29Kiga kinde yooto tereet ne nyiitaat siki: konyiit anyun sponjit siki ak koyogoochine husop, konde kutinnyi. 30Ye kingo kagotaach Jeso siki, komwa kole, “Kagogeskei.” Ki abuch anyun metinnyi, ak kogoito saboondanyi.

Ketoore karaasta ne po Jeso

31Amu ki Chobeet ak ki ma kemakyin muuswek kotebee kimurtoiyot eng' sabato (amu ki oo peetuunooto po sabato), kosoom Yahudik Pilato kole keiri keelyekwak, si kesutei. 32Kobwa anyun kiplugotinik, ak koiri keelyegap ne po tai, ak ne po age ne kiga kigartaat kobooto ineendet. 33Ago ye kingo pwa ye mi Jeso, ak kogeer kole kagome, ko mata koiri keelyekyik: 34ago kitoore ng'otit karaastanyi age eng' kiplugotinik, ak koma tyanit komong' korotiik ak peek. 35Ak kibaoryan ineendet ne ki keer, ak ko po iman paornatennyi: ak ingen ineendet kole mwaei iman, si kobiit oyan ak okweek. 36

19.36:
Kom 12.48; Kai 9.12; T.Kal 34.20
Ki yaak tuguuchu, si kobiit kosulda siruutyet ne ki le, “Ma ki iriei kowennyi.” 37
19.37:
Zek 12.10; Ng'a 1.7
Ak kogeny mwaei siruutyet age kole, “Tuun keerei icheek ineendet ne kitoorei.”

Tubeetap Jeso

(Mat 27:57-61; Mar 15:42-47; Luk 23:50-56)

38Ak kingo pata tuguuchu, kwo Joseph ne po Arimatea, ne ki agenge eng' kasubigap Jeso eng' ung'oot, amu ki iywei Yahudik, kosoom Pilato kole kosut muustap Jeso: ak ki chamji Pilato. Konyo anyun koip poortanyi. 39

19.39:
Jhn 3.1-2
Ak ki nyo agine Nikodemo, ne ki nyoonji Jeso kemoi atkinye tai, koibu tuguuk che uu igomoik che ki kiburukto nyamdutik alak, che ki olo po ratilisyek pogol. 40Kisut anyun muustap Jeso, ak kotaa eng' ngoroik che po katanit kobooto nyamdutik, ko uu piteetap Yahudik ye tubisyei. 41Ki mi mbareet ole ki kigartate ineendet; ak ki mi mbaranooto kererit ne leel ne kitom ketupchi chii. 42Ki inde anyun Jeso olooto amu peetuutap chobetap Yahudik, amu ki neegit kererit.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]