Revised Kalenjin Bible (KAPR)
4

Jeso ak kobogoryotap Samaria

41Ye kingo nai Kiptaiyat kole ki kogas Pharisaik kole ki yaei `Jeso piik koek kasubik ak kobatisani che siirei che ki ibatisan Johana 2(ago ma Jeso ineendet ne ki ibatisanisyei, ago kasubikyik), 3kong'eet eng' Judea, kwo kogeny Galilaya. 4Ak ki kanyool kobun Samaria.

5

4.5:
Tau 33.19; Jos 24.32
Ki it anyun nganaseet ne po Samaria, ne kiguure Sykar, ne neegitee kooret ne ki igoochi Jakobo weeriinnyi Joseph: 6ak ki mi olooto keriingetap peek ne po Jakobo. Kitebyei anyun Jeso eng' ye neegitee keriingetap peek, amu ng'etatetap pandanyi. Ki olo po sait lo.

7Ki nyo kobogoryot ne po Samaria kosiil peek: koleenji Jeso, Inaga aee. 8Amu kigaba kasubikyik nganaseet koal amitwogik.

9

4.9:
Ezr 4.1-5
Ki leenji anyun kobogoryot ne po Samaria, Katepto ano si isooma peek che iee, ak inyee ko ii Yahudyot, ak anee ko aa kobogoryotap Samaria? (Amu ma namegei Yahudik ak Samarik.) 10Kowolji Jeso koleenji, “Nda kengen konunetap Kamuktaindet, ak ineendet ne kalenjin, ‘Inaga peek aee,’ ta kaisoom ineendet, ak ta kagogoonin peegap saboon.” 11Koleenji kobogoryot, Kiptaiyat, metinye kiit ne isiile, ak loo keriinget: inyoorchini ano anyun peechooto po saboon? 12Ii oo inyee eng' kwandanyo Jakobo, ne ki koonech keriingoni, ne kiee ineendet ak weeriikyik, ak tuukyik? 13Kowolji Jeso koleenji, “Age tugul ne eei peechu kota koamei melel kogeny: 14ago age tugul ne eei peek che agoochini koma koamei melel agoi; ago egu peek che agoochini kondap peek eng' ineendet, che kuutu agoi saboondap koigeny.” 15Koleenji kobogoryot, Kiptaiyat, inaga peechooto, si ma koama melel, si ma anyoone asiile peek eng' oli loo. 16Koleenji Jeso kobogoryondonooto, Ui, iguur manong'otyondeng'ung', ak obwa yuto.

17Kowolji kobogoryot koleenji, “Ma tinyei manong'otyot.” Koleenji Jeso, “Kaimwa komyee ile, ‘Ma tinye manong'otyot’, 18amu ki otebi ak manong'otaik muut; ak ineendet ne omi tuwai nguno koma manong'otyondeng'ung': kaimwa anyun iman niito.” 19Koleenji kobogoryot, Kiptaiyat, kaageer ale ii maotyo. 20Ki saaei kwanisyekyok eng' tulwooni; ak oleen okweek, Jerusalem ole kanyool kosaae piik.

21Koleenji Jeso, Kobogoryondoni, iyana, nyoonei sait, ye ma kosaae Kwanda eng' tulwooni, anan eng' Jerusalem. 22Osae ne mongen: kisaae acheek ne kingen: amu punu yetunet Yahudik. 23Ago nyoonei sait, ak kagoit nguno, ye saaei Kwanda saaik che po iman eng' Kabuuset ne Tiliil ak imanit: amu cheeng'oti Kwanda che uu chooto koek che saaei ineendet. 24Kamuktaindet ko kabuuset: ak kanyool kosa ineendet eng' kabuuset ak imanit che saaei ineendet. 25Koleenji kobogoryot, Angen ale nyoonei Mesia (ne keguure Kristo): ye nyo ineendet, komwaiwech tuguuk tugul. 26Koleenji Jeso, Aa ineendet ne ang'alaalun.

27Ki pwa anyun kasubikyik; ak ki kwong'yo amu ki ng'alaali ak kobogoryot; ago ma mwachi chii kole, “Icheeng'e nee? Anan, Kalya si ong'alaal ak ineendet?”

28Ki pagaakta anyun kobogoryot tereennyi po pei, ak kwo nganaseet, ak komwachi piik koleenji, 29Obwa ogeer chiito ne kamwaiwo tuguuk tugul che ki ayai atkinye kora: tos Kristo niito? 30Ki mong' anyun eng' nganaseet kobwa ole mi ineendet.

31Kingo ta kobwanei, kosoom kasubikyik, kole, “Rabbi, amisye.” 32Ago ki leenji icheek, “Atinye amitwogik che aame che mongen.” 33Koleenjigei anyun kasubikyik, “Tos kagoipchi chii kiy ne amei?” 34Koleenji Jeso, “Amitwogikyuk ko ayai mageetap ineendet ne ki iyookwo, ak ageesu poisyennyi. 35Momwae okweek ole, ‘Ta komi arawek ang'wanu, si koit kesisyet?’ Ogeero, amwaiwok ale, ‘Ong'eet met, ak ogeer mbareenik ole kagoleelagitu, kagoyam keges. 36Ineendet ne kesei kotaachei melekto, ak koyumi logoek che po saboondap koigeny; si koboiboitu tuwai ne koolei ak ne kesei. 37Amu po iman mwaoni eng' ni, kolei age, kogesei age. 38Ki ayooktook oges che ki ma onyalilji: kigonyalilji alage, ak kaonam okweek uuindap poisyennywa.’ ”

39Ki iyan anyun ineendet Samarik che chaang' che po nganasanooto amu ng'olyootap kobogoryot, ne kibaoryan kole, “Kamwaiwo tuguuk tugul che ki ayai atkinye kora.” 40Nooto anyun, ye kingo pwanji ineendet `Samarik, kosoom kole kotebi kobooto icheek; ak ki peni olooto peetuusyek aeng'. 41Ak ki iyan alak che chaang' amu ng'olyoondennyi; 42ak ki leenji kobogoryot, “Kiyani nguno, ma amu ng'alaaleng'ung': amu kagegasyige; ak kingen iman keele niito ko Yetindetap ng'wony.”

Kosoobi Jeso weeriitap kiboityotap kaplaitoryat

43Ak kingo pata peetuusyechooto aeng'u kong'eet eng' olooto kwo Galilaya. 44

4.44:
Mat 13.57; Mar 6.4; Luk 4.24
Amu kibaoryan Jeso ineendet kole, “Ma tinyei maotyondo teegisto eng' emennyi.” 45
4.45:
Jhn 2.23
Ak kingo nyo anyun Galilaya, kotaach ineendet piigap Galilaya, ko kagogeer tuguuk tugul che ki yai ineendet eng' Jerusalem eng' igoorto: amu kigaba ak icheek igoorto.

46

4.46:
Jhn 2.1-11
Ki nyo anyun ineendet kogeny Kana ne po Galilaya, ole kiyae peek koek divaik. Ak ki mi kiboityot age ne po kaplaitoryat, ne ki myani weeriinnyi eng' Kapernaum. 47Ye kingo kas kole kagomong' Jeso eng' Judea konyo Galilaya, kwo ole mi ineendet, ak ki soom kochoorgei, kosoop weeriinnyi; amu ki neegit kome. 48Koleenji anyun `Jeso ineendet, Ngot ko mogeer kaboorunoik ak kwang'utik, koma koi oyan matiny. 49Koleenji kiboityondonooto, Kiptaiyat, chooruge kotom kome lakweennyu. 50Koleenji `Jeso ineendet, Ui inyee; sabei weeriing'ung'. Koyan anyun chiichooto ng'olyoot ne kamwachi Jeso, ak kwo. 51Ak ye kita kochoortagei, kotuiyo ak otwogikyik, ak koleenji, Sabei weeriing'ung'. 52koteebee anyun kole kogaigaitu kotya. Koleenji anyun pichooto ineendet, Kobagaakta eseet ineendet amut sait tisap. 53Konai anyun kwanda kole ko sainooto ne komwachin Jeso koleenjin, Sabei weeriing'ung': ak ki iyan ineendet ak koonnyi komugul. 54Nooto kaboorunet ne po aeng' ne ki yai Jeso kobooch ngo mong' eng' Judea konyo Galilaya.

5

Kosoobi `Jeso chii ne ki mi ye neegit tamboiyot

51Kingo pata tuguuchu kobiit igoorto ne po Yahudik; ak kotogosta Jeso Jerusalem. 2Ak miitei Jerusalem tamboiyot, ne kainennyi ko Betesda eng' kutitap Yahudik, ye neegitee ormariichetap keechiirek; ki tinyei keterusyek muut. 3Ki ruitos eng' olooto piik che chaang' che ki myandos: che koryotiin, che ing'waldos, ak che meiyotiin poorwek, [kogeni wasetap peek: 4amu ki chorchingei malaikaiyat ne po Kiptaiyat tamboiyot peetuusyek alak, kowendi kowasei peek: si kisoop chii age tugul ne sip kochutei ko kawaskei peek, eng' myando age tugul ne ki tinyei.] 5Ak ki mi yooto chiito age, ne kiga komyan kenyiisyek sosom ak sisiit. 6Ak ye kingo keer Jeso chiichooto koruei, ak konai kole ki uu nooto eng' peetuusyek che chaang', koleenji, “Imache kisaabin?” 7Kowolji chiito ne myani koleenji, “Kiptaiyat, ma tinye chii, ne indea tamboiyot, ko kawaskei peek: amu ye ta anyoone, kosip kochoortagei age.” 8Koleenji Jeso anyun, “Ng'eet, ip itogung'ung', ak iwe.” 9Ak kisop chiichooto koma tyanit, ak koip itogunnyi ak kwo. Ak ki sabato peetuunooto. 10

5.10:
Neh 13.19; Jer 17.21
Ki leenji anyun Yahudik ineendet ne kagisoop, “Peetuutap sabato niito, ma chamdaat eng' ng'atuutik iip itogung'ung'.” 11Ago ki wolji icheek koleenji, “Kamwaiwo ineendet ne kagosaaba, koleenjo, ‘Ip itogung'ung', ak iwe.’ ” 12koteebee anyun pichooto ineendet kole, “Ng'oo chiichooto kamwaun kole, ‘Ip itogung'ung' ak iwe?’ ” 13Ago ki ma nai ineendet ne kagisoobi kole ka ng'oo: amu kiga kwo Jeso, amu ki mi piik che chaang' olooto. 14Kingo pata nooto konyoorchi Jeso ineendet Hekaluut, ak koleenji, Keero, kagisaabin: amatata iyai tengek, si ma nyoonjin kiit age ne ya ne siirei ni. 15Ki wo anyun chiichooto, ak komwachi Yahudik kole Jeso ne kagosoop ineendet.

16Ki us anyun Yahudik Jeso amu ng'olyoondoniito, amu ki yai tuguuchu eng' peetuutap sabato. 17Ak ki wolji Jeso koleenji, “Poisyei Abba agoi kora, ak aboisyei agane.”

18Ki cheeng' anyun Yahudik miising' kole kobar ineendet amu niito, amu ki ma pistoe sabato kityo, ago mwaei kole Kamuktaindet Kwandanyi, koyaegei kogergeit ak Kamuktaindet.

Weeriit ak Kwanda

19Ki wolji anyun Jeso icheek koleenji, “Amwaiwok, iman, iman, ale, ‘Ma yaei kiy Weeriit ineegei, ago ne keerei koyaei Kwanda: amu tuguuk tugul che yaei ineendet, koyaei chooto agine Weeriit ko uu nooto. 20Amu chamei Kwanda Weeriit, ak koboorchin tuguuk tugul che yaei ineendet: ak ta koboorchin poisyonik che eecheen che siirei chu, si kobiit okwong'ye. 21Amu ko uu ye ing'eeti Kwanda che ki kobek ak kosoobi, isoobi Weeriit ko uu nooto agine che machei. 22Amu ma irwookyin Kwanda chii age tugul, ago Ki kogoochi Weeriit kirwooget tugul; 23si kobiit koteech tugul Weeriit, ko uu ye teechei Kwanda. Ineendet ne ma teechei Weeriit koma teechei Kwanda ne ki iyook ineendet.’ ”

24“Amwaiwok, iman, iman, ale, Ineendet ne kasei ng'olyoondennyu, ak koyani ineendet ne ki iyookwo, kotinyei saboondap koigeny, ama wendi ole mi kirwooget, ago kagomong' eng' meet komong'ji saboondo. 25Amwaiwok, iman, iman, ale, Nyoonei sait, ak kagoit, ye kas che ki kobek kutitap Weeriitap Kamuktaindet; ak saptos icheeget che kasei. 26Amu ko uu ye tinyei Kwanda saboondo ineegei, uu nooto Ki kogoochi Weeriit kotepto saboondo: 27ak ki igoochi kimnateet koyai kirwooget, amu Weeriitap chii ineendet. 28Amokwong'ee niito: amu nyoonei sait, ne tuun kasei kutinnyi tugul che mi kereeriisyek, 29

5.29:
Dan 12.2
ak komong'; ng'eetyin saboondo che kiyaei ne myee; ak kong'eetyi kirwooget icheeget che kiyaei ne ya.”

Paornateet agobo Jeso

30Ma muuchi ayai kiy aneege: arwoochi ko uu ye agase, ak po iman kirwoogennyu; amu ma cheeng'e ayai magennyu, ago mageetap ineendet ne ki iyookwo. 31Ngabaoryanjinigei, koma po iman paornatennyu. 32Mi age ne paoryanjino; ak angen ale po iman paornateet ne paoryanjino. 33

5.33:
Jhn 1.19-27; 3.27-30
Ki oyokyi ng'olyoot Johana, ak kibaoryanji imanda. 34Ago paornateet ne ataache koma punu chii: ago amwae tuguuchu, si kobiit kesorwok. 35Kitait ineendet ne kilalei kokweng'sei: ak ki ocham oboiboitune lapkeiyennyi eng' peetuusyek che matya. 36Ago paornateet ne atinye ko oo kosiir ne po Johana: amu poisyonik che ki koono Kwanda agees, chooto che ayae, ko che paoryanjino, kole ki iyookwo Kwanda. 37
5.37:
Mat 3.17; Mar 1.11; Luk 3.22
Ak kibaoryanjo Kwanda ineendet ne ki iyookwo. Tom ogas kutinnyi ole kinye kora, ak tomo ogeer itoondanyi. 38Ama tebyei eng' okweek ng'olyoondennyi: amu moyani ineendet ne ki iyoogu Kamuktaindet. 39Cham osyachi eng' siruutik, amu oleen otinye saboondap koigeny eng' chooto; ago chooto che paoryanjino; 40ago mochame obwanjo, si kobiit konyooru saboondo.

41Mataache kalasunet eng' piik. 42Ago angenok ale motinye chamyetap Kamuktaindet eng' oriing'wong'. 43Ki anyoo eng' kainetap Abba, ama otaacha: ngo nyo age eng' kainennyi otaache ineendet. 44Omuuchi eng' nee oyan, che otaagegei kalasunet, amocheeng'e kalasunet ne punu Kamuktaindet ne mi ineegei? 45Mo leen ang'ang'ndook eng' Kwanda: miitei age ne ng'ang'dook, Musa nooto, ne omang'u. 46Amu nda ki koyan Musa, ta oyana; amu kisir agobo anee. 47Ago ngo moyani siruutikyik, omuktoi ano oyan ng'aleekyuk?

6

Kebaei piik eliphuusyek muut

(Mat 14:13-21; Mar 6:30-44; Luk 9:10-17)

61Kingo pata tuguuchu kwo Jeso pitet age ne po araraitap Galilaya, nooto ko araraitap Tiberia. 2Ak ki isup ineendet tuiyet ne oo, amu ki keer kaboorunoik che ki yachi che myandos. 3Ak kitogosta Jeso tulweet, kwo kotep ng'wony eng' olooto kobooto kasubikyik. 4Ak kiga riik paska, igoorto ne po Yahudik. 5Kingo ng'eet met anyun Jeso, kogeer tuiyet ne oo konyonjin ineendet, koleenji Philipu, Ki ale ano magatiinik si koam pichu? 6Kimwaei ni kotyeme ineendet: amu ki ingen ineendet kiit ne machei koyai. 7Kowolji `Philipu ineendet koleenji, “Mayamei icheek magatiinik che po dinarisyek pogol aeng', si konyoor age tugul kitigin.” 8Koleenji ineendet age ne po kasubikyik, Andrea, ng'eetap kametap Simion Petero, 9“Mi yu weeriit age, ne tinyei magatiinik muut che po sairi, ak njireenik aeng': ago yamei nee anyun chuuto eng' piik che tee chu?” 10Ki mwa Jeso kole, “Ochop piik kotep ng'wony.” Ak ki mi susweek che chaang' olooto. Ki ibuur anyun piik; ki olo po eliphuusyek muut murenjoto. 11Ki nam anyun `Jeso magatiinik; ak kingo kagogoito kongoi, koropchi icheeget che kitebyei ng'wony; ak ko uu nooto ak icheek njireenik che tee che machei. 12Ak ye kingo piyong'so, koleenji kasubikyik, “Oyum katuganik che kang'et, si ma pet kiy.” 13Koyum anyun katuganichooto, ak konyiit kereboonik taman ak aeng' katuganichooto po magatiinik muut che po sairi, che kang'etune icheeget che kaamisyei. 14Ye kingo keer anyun pichooto kaboorunet ne kayai, kole, “Ni maotyot iman ne nyoonjin ng'wony.” 15Kingo nai Jeso kole neegit kobwa si konam ineendet eng' kimnateet, si koyai ineendet koek laitoryat, kwo kogeny tulweet ineegei.

Kowendote `Jeso peek parak

(Mat 14:22-33; Mar 6:45-52)

16Ak ye kingo ek koskoleny, kochoortagei kasubikyik koba araraita; 17ak ki laany moingetap peek, kolandae araraita koba Kapernaum. Ak kiga koimenit, ak kitom koit Jeso ole mi icheek. 18Ak kiwasegei araraita amu kiusei usoonet ne oo. 19Ye kingo kagoba anyun eng' araraita ole po maelisyek somok anan ko somok ak kebeber, kogeer Jeso kowendoti eng' araraita parak, ak koriikyin moinget: ak ki iyweis. 20Ago ki leenji icheek, Anee; amoiywei. 21Kocham anyun kotaach ineendet eng' moinget: ak ne matyaniit, koit moinget emet ole kibendi.

Kocheeng'ei `piik Jeso

22Kibetuut ne ki isubi nooto kogeer tuiyet ne kitononi eng' araraita pitoniin, kole ma mi moinget age olooto, kobatee agenge, ak ki ma laany Jeso moingonooto kobooto kasubikyik, ago ki pa kasubikyik icheegei 23(ago ki pwa moingonik alage eng' Tiberia ye neegitee kooret ole ki ame magatiinik ye kingo kagogoito Kiptaiyat kongoi): 24Ye kingo keer tuiyet anyun kole ma mi Jeso olooto, anan kasubikyik, kolaany icheek moingonik, ak kobwa Kapernaum, kocheeng'onu Jeso.

Magatyatap saboon

25Ak ye kingo nyoor ineendet eng' pitet age ne po araraita, koleenji, Rabbi, koinyone au oli? 26Kowolji Jeso icheek koleenji, “Amwaiwok, iman, iman, ale, Ocheeng'a, ma amu koogeer kaboorunoik, ago amu kooam magatiinik ak obiyong'se. 27Amoboisye agobo amitwogik che pegu, ago oboisye agobo amitwogik che tebyei agoi saboondap koigeny, che koonok Weeriitap chii. Amu kigong'ooch ineendet Kwanda, ne ineendet ko Kamuktaindet.” 28Ki leenji anyun icheek ineendet, “Ki yai nee, si kobiit keyai poisyonik che po Kamuktaindet?” 29Kowolji Jeso koleenji, “Ni poisyetap Kamuktaindet, ale oyan ne ki iyoogu ineendet.”

30Ki leenji icheek ineendet anyun, “Nee kaboorunet ne iyae, si kegeer, ak kiyanin? Iyae nee? 31

6.31:
Kom 16.4,15; T.Kal 78.24
Ki am kwanisyekyok mana eng' surkwen; ko uu ye ki kisir keele, ‘Ki igoochi icheek magatyat ne punu kipsengwet koam.’ ”

32Koleenji anyun `Jeso icheek, “Amwaiwok, iman, iman, ale, ki ma ko Musa ne ki koonok magatyandanooto ki punu kipsengwet; ago koonok Abba magatyat ne po iman ne punu kipsengwet. 33Amu magatyat ne po Kamuktaindet ko nooto choorugei eng' kipsengwet, ak kogoochi ng'wony saboondo.” 34Koleenji anyun `icheek ineendet, “Kiptaiyat, koonech magatyandaniito agoi.” 35Koleenji `Jeso icheek, “Aa magatyat ne po saboon: ineendet ne nyoonjino koma kasei rubeet agoi, ak ineendet ne iyana koma amei melel agoi. 36Ago kaamwaiwok ale, koogeera, ama oyan. 37Pwonjino tugul che koono Kwanda; ak ineendet ne nyoonjino koma oone matiny. 38Amu ki achooruge eng' kipsengwet, ma si ayai magennyu, ago mageetap ineendet ne ki iyookwo. 39Ak ni mageetap ineendet ne ki iyookwo, ale, eng' tugul che ki koono ineendet, koma petena agot agenge, ago tatun ang'eeti eng' peetuutap let. 40Amu ni mageetap Abba, ale chii age tugul ne keerei Weeriit, ak koyan ineendet, konyooru saboondap koigeny; ak ang'eeti ineendet eng' peetuutap let.”

41Ki ing'unyng'ung'so anyun Yahudik, agobo ineendet, amu ki mwa kole, “Aa magatyat ne ki choorgei eng' kipsengwet.” 42Ak ki le, “Tos ma Jeso niito, weeriitap Joseph, ne kingen kwandanyi ak kamet? Amunee anyun si komwa kole, ‘Ki achooruge eng' kipsengwet?’ ” 43Kowolji Jeso anyun koleenji, “Among'unyng'ung'se okweegei eng' okweegei. 44Ma imuuchi chii konyoonjo, ama ichuut Kwanda ne ki iyookwo: ak ang'eeti ineendet eng' peetuutap let. 45

6.45:
Isa 54.13
Ki kisir eng' maotik, ak kineeti tugul eng' Kamuktaindet. Age tugul ne kagogas eng' Kwanda, ak kagonetkei, konyonjino. 46Moleen ki kogeer chii age tugul Kwanda, kobatee ineendet ne ki punu Kamuktaindet, ki kogeer ineendet Kwanda. 47Amwaiwok, iman, iman, ale, Ineendet ne iyani, kotinyei saboondap koigeny. 48Aa magatyat ne po saboon. 49Ki am kwanisyekwok mana eng' surkwen, ak ki pek. 50Ni magatyat ne choorugei eng' kipsengwet, ne ngo am chii, koma meei. 51Aa magatyat ne sabei ne ki choorgei eng' kipsengwet: ngo am chii age tugul magatyandani, kosabei koigeny: ee, ak poortanyu ko magatyat ne agoitoi agobo saboondo ne po ng'wony.”

52Kiboryo anyun Yahudik icheegei, kole, “Imuktoi ano chiichi kogoonech poortanyi keam?” 53Koleenji Jeso anyun icheek, “Amwaiwok, iman, iman, ale, ngot ko moam poortap Weeriitap chii ak oee korotiikyik, ko mosiche saboondo eng' oriiting'wong'. 54Ineendet ne amei poortanyu ak koeei korotiikyuk kotinyei saboondap koigeny; ak ang'eeti ineendet eng' peetuutap let. 55Amu amdit iman poortanyu, ak korotiikyuk ko che kieei iman. 56Ineendet ne amei poortanyu ak koeei korotiikyuk komenya, ak amenye ineendet. 57Ko uu ye ki iyookwo Kwanda ne sabei, ak asabe amu Kwanda; uu nooto ineendet ne ama, sabei agine amu anee. 58Ni magatyandanooto ne ki choorgei eng' kipsengwet: ma ko uu ye ki am kwanisyek ak kobek: ineendet ne amei magatyandani kosabei koigeny.” 59Ki mwa tuguuchu eng' sinagogit, kota koneetisyei eng' Kapernaum.

Kasubik che tinyei saget

60Ye kingo kas ni che chaang' eng' kasubikyik, komwa kole, “Uui ng'olyoondoni: imuuchi ng'oo kogas?” 61Ago ki nai Jeso eng' oriitinnyi kole ing'unyng'ung'jin kasubikyik ng'olyoondoniito. Koleenji icheek, “Tos kagonachak niito? 62Teptoi ano anyun ngot ko tuun ogeer Weeriitap chii kotogostoi ole ki mi atkinye? 63Kabuuset ne igoitoi saboondo; ma tilei kiy poorto: ng'aleek che kaamwawok ko kabuuset ak saboondo. 64Ago miitei alak eng' okweek che ma iyani.” Amu ki nai Jeso kobooch taunet icheeget che ma iyani, ak ineendet ne kimachei kong'wekta ineendet. 65Ak ki le, “Nooto kamwaiwok, ale, ma koi imuuch chii konyoonjo kobatee ne igoochin Kwanda.”

66Kobooch yooto kochuchuigei che chaang' che po kasubikyik, amata kobendat ak ineendet. 67Ki leenji anyun Jeso chooto taman ak aeng', Obendi ak okweek? 68

6.68-69:
Mat 16.16; Mar 8.29; Luk 9.20
Kowolji anyun Simion Petero, koleenji, “Kiptaiyat, kibendi ole mi ng'oo? Itinye ng'aleek che po saboondap koigeny. 69Ak ki kiyan ak kingen keele ii Ne Tiliil ne po Kamuktaindet.” 70Kowolji Jeso icheek koleenji, “Ki ma alewenok taman ak aeng', ak chesawilyet age eng' okweek?” 71Kimwaei anyun agobo Judas ne po kap Simion Iskaryot, amu inee ne kimachei kong'wekta ineendet, ne ki agenge eng' taman ak aeng'.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]