Revised Kalenjin Bible (KAPR)
1

Atebeet ak perurtap Job

11Ki mi chii eng' emetap Us ne ki kiguure Job. Ki igeesunotkei ineendet ak ko po iman. Ki iywei Kamuktaindet ak koistoegei yaityo. 2Ki kisikyi weeriik tisap ak tiibiik somok. 3Ki tinyei keechiirek eliphuusyek tisap, tambeesik eliphuusyek somok, eigap chogit eliphuut agenge ak sigiroik che iyuogik pogol muut ak kiboitiinik che chaang'. Ki mogoryo anyun chiichooto miising' kosiir piik tugul che po kong'asiis.

4Ak ki pendi weeriikyik kootap age tugul eng' peetuut ne ki kichopchi, ak ki iyooktoi keguur chepkametisyekwak somok kobwa koamis ak koeiso kobooto icheek.

5Ye kingo keskei peetuusyekwak che po igoorto, ko ki iyooktoi `Job icheek ki anyiny. King'eetei karon miising' ak kogoito kagoochinoik che kibeelei ko uu koitetap icheek tugul kobwaati koleen, “Abeere kogoyai weeriikyuk tengek ak koeesyo Kamuktaindet eng' mugulelwekwak.” Ki yaei Job ko uu nooto kotugul.

6

1.6:
Tau 6.2
Ki mi anyun peetuut ye kibwanei weeriigap Kamuktaindet kotonondos eng' taitap Kamuktaindet ne Toroor ak ki nyo agine Setani kobooto icheek.

7ki teebee anyun `Kamuktaindet ne Toroor Setani koleenji, “Ibunu ano?” Ak ki wolji `Setani Kamuktaindet ne Toroor koleenji, “Abunu ole awendotee ak ole abunotii eng' ng'wony.”

8Koleenji `Kamuktaindet ne Toroor Setani, “Tos ko igeer otwogindennyu Job, amu ma mi ne kergei ak ineendet eng' ng'wony? Ititaat ak ko po iman inee, iywei Kamuktaindet ak koistoegei yaityo.” 9

1.9-11:
Ng'a 12.10
Kowolji anyun `Setani Kamuktaindet ne Toroor koleenji, “Tos iywei `Job Kamuktaindet puch? 10Tos ma iyieme ng'ootweet ineendet kobooto koonnyi, ak tuguuk tugul che tinyei eng' komosta age tugul? Ki iberuur poisyonigap eunekyik ak ki kotesak tuguukyik eng' emet. 11Chuul ibak eung'ung' ak itwa tuguuk tugul che tinyei si iroo ngo ma eesyeen eng' taing'ung'.”

12Koleenji `Kamuktaindet ne Toroor Setani, “Keer anyuno, mi tuguuk tugul che tinyei `Job eung'ung', kobatee kityo ametwaa ineendet.” Ki wo anyun Setani eng' taitap Kamuktaindet ne Toroor.

Pichiindo ak nyalilwogigap Job

13Eng' peetuut age ye ki amisyei ak koeei divaik weeriikyik ak tiibiikyik eng' kootap weeriit ne oo ne tupcho, 14koit ole ki mi Job `chii ne kiga kiyook ak koleenji, “Kaibatisyei eiik ak koagetos sigiroik eng' ole neegitee yooto, 15koseet anyun piigap Sabe ak kokweri akwotisyechooto. Kagobar otwogik eng' rotwetap chok; kachilil aneege, kanyo amwaun.”

16Ye kita kong'alaali, koit agine age ak kole, “Kachoorgei maatap Kamuktaindet eng' kipsengwet ak kagobeel keechiirek ak otwogik kogees, ak kachilil aneege, kanyo amwaun.”

17Ye kita kong'alaali, koit agine age ak kole, “Kachop Kaldeik kweanaik somok yeityo kobook kobwa kokweri tambeesik. Kabar otwogik eng' rotwetap chok ak kaachilil aneege, ak kaanyo amwaun.”

18Ye kita kong'alaali, koit agine age ak kole, “Koamisyei ak koeei divaik weeriiguk ak tiibiiguk eng' kootap weeriit ne tupcho. 19Ak matyanit kous usoonet ne oo kobunu surkwen ak koryep luukwek ang'wan che po koot koluulji murenik ak kagobek, ak kaachilil aneege, kanyo amwaun.”

20Ki ng'eet anyun Job ak kobet ngoryennyi ne po parak ak kocher metinnyi yeityo kobutyi ng'wony kosa. 21Ak ki le,

“Ki kisicho aach ngor,

ak aweeksei aach ngor.

Ki koonu Kamuktaindet ne Toroor,

ak kagoweech Kamuktaindet ne Toroor.

Iberuurot kainetap Kamuktaindet ne Toroor.”

22Ma yai Job tengek eng' chuuto tugul anan koiityi Kamuktaindet yaityo.

2

Koityin Job myanwogik

21Ki mi kogeny peetuut ye kibwanei weeriigap Kamuktaindet kotonondos eng' taitap Kamuktaindet ne Toroor ak ki nyo agine Setani kobooto icheek, ak kotonon eng' taitap Kamuktaindet ne Toroor.

2Ki teebee `Kamuktaindet ne Toroor Setani koleenji, “Ibunu ano?” Ak ki wolji `Setani Kamuktaindet ne Toroor koleenji, “Abunu ole awendotee ak ole abunoti eng' ng'wony.” 3Koleenji `Kamuktaindet ne Toroor Setani, “Tos ko igeer otwogindennyu Job, amu ma mi ne kergei ak ineendet eng' ng'wony? Ititaat ak ko po iman inee, iywei Kamuktaindet ak koistoegei yaityo. Nganda ki ibea si ang'em ineendet puch, ko riibei kora `inee imandanyi.”

4Ki wolji `Setani Kamuktaindet ne Toroor koleenji, “Kigeeree `iriryot iriryot; igoitoi chii tuguukyik tugul agobo saboondanyi. 5Chuul ibak eung'ung' nguno ak itwaa kawekyik ak panyeekyik, si iroo ngo ma eesyen ineendet.” 6Koleenji `Kamuktaindet ne Toroor Setani, “Keero anyuno, mi ineendet eung'ung'; ituch kityo saboondanyi.”

7Kwo anyun Setani eng' taitap Kamuktaindet ne Toroor ak kobiree Job ondirik che ng'woneen kobooch keldebesyennyi agoi metit parak. 8Ki inem anyun Job rokyet ak kong'irireegei kotebee oreek. 9Ki leenji `osotyonnyi Job, “Ta iriibe kora imandang'ung'? Eesye Kamuktaindet si imei.”

10Ago ki leenji `Job ineendet, “Ing'alaali ko uu ye ng'alaaldos kwonyiik che perber. Tos kinyoor che myach eng' eutap Kamuktaindet ama kinyooru che yaach?” Eng' chuuto tugul koma mwa `Job tengek eng' kutinnyi.

Choronok somok che po Job

11Kingo kas anyun choronok somogu che po Job, agobo yaityoni tugul ki nyoonji ineendet, konyo age tugul kobunu oldanyi. Ki icheeget ko ki: Eliphas Temanindet, Bildad Suindet ak Zophar Naamatindet. Ki iyomiskei tugul kobwa koriirchi Job ak kogaigai ineendet. 12Ye kingo tooben `icheek ineendet eng' ye loo ama inyit ineendet, kowaakyo eng' kutit ne oo ak koriiryo. Ki pet age tugul ngoryennyi ne po parak ak koseerta temburyek koba parak kororokyi metowekwak. 13Ki tebee ng'wony anyun ak ineendet peetuusyek tisap ak kemousyek tisap, ak ki ma twekyi age tugul ineendet amu ki keer kole oo miising' ng'wanindanyi.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]