Revised Kalenjin Bible (KAPR)
10

101Aweche sabeennyu;

amwaitoi kang'unyng'unyennyu, amasise;

ang'alaali eng' ng'wanindap saboondanyu.

2Aleenjini Kamuktaindet: Amerwookwo;

iboorwo anyun kiit ne kagoonin kibelgei.

3Tos myee iusisye,

ak isas poisyetap euneguk,

ak igaigai kirwoogetap kiptengeginik?

4Tos itinye koonyek che po kipkosabei?

Tos igeere ko uu ye keerei kimugulmet?

5Tos kergei peetuusyeguk ak peetuusyegap chii,

anan uu kenyisyeguk peetuusyegap chii,

6kot icheeng' tengektonyu,

ak isyach chalwoktanyu,

7agot ngingen ile ma aa chii ne ya,

ama mi ne imuuchi kosar eng' eung'ung'?

8Kiyaa euneguk ak komimia.

Nguno anyun ko tos igeesua inyee?

9Ibwaat anyun ile ki imimia ko uu meneet;

ara tos igetyina ng'ung'unyek kogeny?

10Tos ma iroong'wa ko uu cheego,

ak iyaa aegei mwaitap cheego?

11Ki ilaakwa iriryot ak panyeek,

ak ituiyoo eng' kawek ak inoik.

12Ki igoono sabeet ak chamyet ne oo,

ak ki koriip `riipseng'ung' saboondanyu.

13Ago ki iung'ee tuguuchooto muguleldang'ung';

angen ale mi niito kobooten.

14Ngot ayai tengek, igeera,

amenyoiywa kaat agobo tengektonyu.

15Ngot ko aa ya, pwo eng' anee!

Agot ngo aa po iman, koma ng'eti metinnyu,

amu kagonyia kalilanet

ak ageere nyalildanyu.

16Ngot ang'eet metinnyu, isapchino ko uu ng'etundo;

ak iboorwogei kogeny eng' kwong'eet.

17Ileelityina paoriniguk,

ak ites nereegeguk agobo anee;

iyookyina kiplugotinik che tomo kobwonjino.

18“Kilya anyun si icham kesicho?

Kita kaigai ame, si ma keera kong' ne po chii.

19Aiegeitu chii ne ma piit,

kita kimutena moet awo kererit.

20Tos ma ng'ering' peetuusyekyuk?

Siis anyun ak ibagaakta, si anyoor kagaigaet kitigin,

21kotom awe ole ma aweeksei,

emetap mesundeito ak urwetap meet,

22emetap imenindo ne oo, ne uu mesundeito;

ne po urwetap meet ak ma tinyei ng'atuut age tugul,

ole uu lapkeiyet mesundeito.”

11

Kong'alaali Zophar

111Ki wol anyun Zophar Naamatindet kole

2tos ma nyoljin kewol ng'aleechu chaang'?

Tos ki ityin imanda chii ne chaang' ng'ala?

3Tos igoochin piik kosiisyo kachaunasyeguk pogei?

Ye ichotisyei, ko tos ma mi ne koonin ililan?

4Amu imwae ile, tiliileen kaneetisyosyekyuk,

ak aa tiliil eng' taing'ung'.

5Kata myee kong'alaal Kamuktaindet,

ak kong'alaal kogirinden,

6ak koboorun ung'ootik che po utaatyet,

amu utaatyet ko tinyei kebeberwek che chaang'.

Nai anyun ile ma magenen Kamuktaindet ne tee ne yamegei ak yaitwogiguk.

7“Tos imuuchi inyooru Kamuktaindet ngisyach?

Tos imuuchi inyooru ole poochin Ineendet Ne po Kamuktaet?

8Toroor kosiir kipsengwet, imuuchi iyai nee?

Loo kosiir ye mi che ki kobek; nee ne imuuchi inai?

9Kakwautyennyi ko kooi kosiir ng'wony,

ak ko tebees kosiir nyanjet.

10Ngot kosiirto inee, ak kogeris,

ak kuguurso keba kirwooget, ko ng'oo ne imuuchi kogirinda ineendet?

11Ingen `ineendet piik che ma tilei kiy;

ye keerei ineendet tengekto, ko tos ma mage kiy?

12Ago ma tinyei kaguiyet chiito ne ma tilei kiy,

kisichei chii ko uu moitap oloitigeet.

13Ngot ichop muguleldang'ung' kolititiit,

ak iitoochi ineendet euneguk,

14ngo mi tengekto eung'ung', iwiirte kolooit,

ameng' komeny emaisyeguk kiy ne ma po imanda.

15Ngiyai ko uu nooto, itokyi anyun parak togeng'ung' koma mi tisya;

ee, igimitu, ameiyweisyei.

16Iutye nyalildang'ung',

ibwaati ko uu peek che ki kosiirto.

17Lapkeitu sabeeng'ung' kosiir peet kween;

agot ngo mi mesundeito kogergeitu ak karon.

18Ak itebi eng' nyiganateet, amu mi kamang'unet;

iriiboksei, ak imuuny eng' chametapkei.

19Irue anyun, ama piitu ne imuin;

ee, cheeng'in che chaang' agobo toreteeng'ung'.

20Ago keroksei konyegap kiptengeginik,

petyin icheeget ooreet ne mwee,

ak kamang'unennywa ko kabuset ne po let.”

12

Kowolu Job

121Ki wol anyun Job kole

2iman, okweek ko oo piik,

ak pegu utaatyet kobootok.

3Ago anyun atinye kaguiyet agane, ko uu okweek;

ma aa nyeraat eng' okweek.

Tos ng'oo ne ma ingen tuguuk che uu chuuto?

4Auu chiito ne rorechin piigap kokwennyi;

ne kiguur Kamuktaindet, ak kowolwo ineendet,

chii ne kirorechin, nga po iman ak ko ititaat.

5Sasei nyaliil chii ne tebyei eng' kaalyeet;

eng' ineendet ko kigechopchi nyaliilda icheek che ichabaitoi keelyekwak.

6Poorei emaisyegap choriik,

ak riibootin che tachei Kamuktaindet;

che ibootee eunekwak kamuktaindennywa.

7Teebee tyong'ik, si koneetin;

anan teebee toriitik che po parak, si komwaun;

8ng'alaalji ng'wony, si koneetin,

anan igany komwaun njireenigap nyanjet.

9Ng'oo ne ma naei eng' chuuto tugul,

kole eutap Kamuktaindet ne Toroor ne ki yai niito?

10Mi eunnyi saboondap kiy age tugul ne sabei,

ak kabuusetap piik tugul.

11Tos matyemei itit ng'aleek,

ko uu ye chamchami kutit amitwogik?

12Tos ma mi utaatyet kobooto poisyek che oosen?

Ak tos ma piitu kaguiyet eng' chaang'indap peetuusyek?

13Mi utaatyet ak kamuktaet kobooto ineendet;

tinyei kirwooget ak naet.

14Putei, ama kimuuchi keteech kogeny;

kerei chii, ama mi ne yaatei.

15Ngot koeet peek, koteeng'dos;

ak ngo yook kogeny, konyiei emet kosiir.

16Mi kobooto ineendet kimnateet ak utaatyet;

nenyi ne kiberberi ak kaberberindet.

17Imuti kirwoogik aach ngor koloegitu,

ak yaei `ineendet icheek koek che perber.

18Ityachi ratuutyetap laitorinik,

ak kermenee `pireneet suenutikwak.

19Imuti tisiik ko luulenik,

ak kogabui che ki imeen.

20Istoi tweguunetap che kiyani,

ak koistoi kaguiyetap poisyek.

21Rong'jin pounik sasisyet,

ak kotyachi kariigap che kiimeen.

22Nyooru tuguuk che ung'ootiin eng' mesundeito,

ak koibu urwetap meet konyo lapkeiyet.

23Ieetu pororyosyek, ak kong'emei icheek;

ibaraiti pororyosyek, ak iseeri icheek.

24Ibee `kaguiyet pounigap piik che po ng'wony,

ak igoochin ko ombeniot eng' surkwen ole ma mi ooreet.

25Tung'dung'yoti eng' mesundeito ama tinyei lapkeiyet,

ak kogoochin icheek koterteeryot ko uu chiito ne kabogit.

This website is brought to you by the Bible Society of Kenya. You consent to our privacy statement and Terms of Service if you continue to use our website.[hide message]